RASUL-RASUL EKUGWA WENE 6

Ap yamak dagwa inebe tujuh paga meninakugwa wene

1Ar Yesus ane waganggugwa mende, ir inebe ambi lambok mondok yugar ertagugwa o. Nen, ir ap Yahudi mende inane akuni Yunani mende inane paga yirtaga mende nen, ir Yahudi inane Ibrani wene yugwi mende inabok mbalku dogolir, “Nir ninaguyalak togwe yoma erom wogoragakdek togok dakdartagwi o,” yiluk yirugwa. 2Ir Yesus aworomi nen, ir akuni Allah ane waganggugwa mende obogar wonggalogo balok yoragu dogolir, “Wadigi, nir erom wogorau awene yugwi ninagik, Allah awene yorau dambe kaurak eti nina'ir o. 3Etama, kir nen, ap inebe tujuh paga, inabok inendaga pano mende, Roh Allah inom kunik mende, iniliti werek mende, yabu yi ake eku dogowak nen yiluk, kwarinabini o. 4Nenaluk nir ninebe eti tamban ekwi, Allah wene yorar nugwi, eti mban eku dogogun o,” yiluk yorarugwa.

5Ir akuni obogar nen, Ar Yesus aworomi wene yirugwa eti pano yogop yiluk waganggugwa o. Ir nen ap kwarinakugwa mende eti, ambi endaga Stefanus, Ar eti Yesus oba ebebar andarige mende, nen Roh Allah akla malabek mende arar. Nen ap ambi Filipus, ambi Prokhorus, nen ambi Nikanor, nen ambi Timon, nen ambi Parmenas, nen Nikolaus ai Antiokhia mende nen ar ebe Yahudi mende dek, ogwe ar ebe ap Yunani mende ma, ar nen agama Yahudi mende unggirigerek ma inom pulinakugwa o. 6Inebe tujuh paga enogo, ir rasul inoba lagakugwa. Nen ir rasul nen, inake tamban ekwi, Ar Allah nen yonggwa dawak nen yiluk, Allah nggino yogwi ekugwa.

7Eta ekugwama, Ar Allah wene nggok wigalkwi, akuni o Yerusalem werek mende, mondok ambigar Yesus ane waganggwi ekugwa. Ir ap imam mende inebe ambigar, Ar Yesus oba ebebar o yiluk, iniliti panggol kugwa.

Stefanus kede wakugwa wene

8Ar Allah adeknggen ambigar ar Stefanus kado milogo oba birigemo, Stefanus nen elalin erukbuk mende eka dogolir, wene amberak erirtagodek mende inom ar ekige o. 9Ogwe, #6:9: Ir akuni merdeka erek mende: Ir akuni Yahudi mende alep kwak inebe yabu mende dugu ake inonggo kunik mende, ogwe inadik dogowak nen yiluk onggo begetekma wender erogo barugwa mende inom nen ir inakba nen wender erogo barugwa mende inom. ir akuni alep ar yedoman ake yiluk inonggo kunik ogwe, ir nen inonggo batalok a, we wedek inakba nen a, kir merdeka arar o yiluk togok barugwa mende ma, ir inebe Tuhan Ai Palekma dogirtaga mende ma, Stefanus ane paga wene yeganem, ane aik warkugwa. Ir ap eti inebe Yahudi mende oge, inai o Kirene inom, Aleksanderia inom mende. Nen ap amberak inai o Kilikia mende inom, Asia mende inom nen Stefanus inom aredo waku lagugwa. 10Stefanus Roh Allah nen ar wene yurak mende akla paga nggagalogo yoga kalok yega paga, ir nen wene onggo yurak ndak dek ar agage o. 11Eta paga, ir nen ap amberak wene maduk oba buwak nen yiluk onggo wogoragu dogolir “Ap yi Musa inom, Allah inom miyuk-meyak erinabir taga o,” yiluk yino o, yiluk ekugwa. 12Etegerogo ir ap etoma inakla nggagalogo birugwama, ir nen akuni inakla nggagalir lagu dogolir, ap Yahudi inewai inom, guru-guru Agama inom yoralok, ar Stefanus ebe pagago Mahkamah Agama inoba wolok lagugwa. 13Ir nen akuni inaruk paga yege mende inebe ya o, yiluk ir inenggal yuwak nen yiluk waganogo onggol inakugwa. Ir ap eti, ar Stefanus nen etegerogo yega ninaruk kulko o, yiluk yugu dogolir, “Ap yi nen Allah Ai Palek puduk padak yega, nen Wene ninedo mende Ar Allah Musa oba birige mende eti puduk padak eka, kogo o. 14Ninaruk ninagik, ar nen, Yesus ai Nazaret mende nen, Tuhan Ai Palek yi miyaligin, yege o. Nen wene yegerogo erno endegerogo erno yiluk, Musa nen ninoba wukdi wagagemo, nir erir taga mende yoma dambe kalok adik erik yiluk yege o!” 15Ir akuni obok sidang ekunem unggirugwa mende nen, ar Stefanus mban inil oba birugwa. Eta paga, ar Stefanus eloktenggen ap malaikat mende ndak-ndak etagage inil karugwa o.

Currently Selected:

RASUL-RASUL EKUGWA WENE 6: WLW

Highlight

Copy