RASUL-RASUL EKUGWA WENE 5

Ananias Safira imbirak ekugwa wene

1Nen ap ambi endaga Ananias, ar agwe endaga Safira, ir imbirak inagar onggo kunggugwa ar o. 2Uang onggo kunggugwa mende ugu ir batalok, ugu ir rasul-rasul inoba agwe imbirak inane dambulogo bi lagugwa. 3Petrus nen, “Ananias, nenaluk ar Iblis nen kiliti nggagalka kigik damber kegen, uang agar onggo kunggen mende ugu kar kake lakbi lakbo kimagago batalok, ugu wolok wagan a? Kar nen Roh Allah amborna arar dagalken o. 4Agar auwan onggo kunggikdek kigik, agar eti kar kagar ar welaga o. Nen agar ebe arar onggo kunggindik mende, nen uang onggo kunik eti kar mende ar o. Nen, eta nena erurak kakla andalok kakla paga nen erurak erkake? Nir akuni kenggal yoneragen dek ogwe, Ar Allah arar kenggal yogena o!” 5Ar Ananias enogo, wene eta yega aruk kolalka kigik, yulik pulik wurka dogolir, ebe arar wartagage o. Nen ir akuni wene enogo inaruk kolalku lagugwarik, ir obogar inobade agage o. 6Elege lerago mende wagu lagugwarik, ebe ogi dinggilogo kubur eruwok nen yiluk wolok wulkugwa o.

7O tiga jam negen arar welagugwarik, ar agwe arar unggirige o. Nen ar agun wartagage enogo ar onggokdegar unggirige o. 8Petrus nen kinok yoga dogolir, “An yornirin o: kir kagun kimbirak, agar onggo kunggop mende, uang ya arar a?” yiluk yorigemo, ar enogo nen wene onggo yoga dogolir, “Ebebar o, onggo waganggo mende ebe enda arar o,” yiluk onggo yirige.

9Nen ar Petrus nen onggo yoga dogolir, “Kir kagun kimbirak Roh Tuhan auk mbaluwok nen yiluk ekop a? Karuk kulin o! Akuni kagun kubur ekdiluk, ir nen kar wokarek wundu mende warirtagwi yi o.” 10Eta yoga kigik, Ananias agwe enogo Petrus uwagam yanogo arar, mbuk togo wartagage. Nen ir elege yemenogo wagu lagugwa, kwe warek oba diak togo ari wagugwa. Nen ir enogo kwedak enogo warek wolok, agun eragalilu kubur ekdi lagugwa o. 11Akuni ebebar andalok waganggugwa mende inom, wedek akuni mende inom, eta etagagemo inaruk kulku lagugwarik, ir obogar nen inobade agage o.

Elalin Erubuk mende eku lagugwa wene

12Ir rasul-rasul nen yabu erir lagwi dagik, elalin erukbuk mende ambigar ekwi, akuni inil kugu lagugwa. Ir Allah ane waganggugwa mende nen, Tuhan Ai Palek lambimo endaga Serambi Salomo yirtagama etomala, iniliti ambi atuk kuwak eku lagugwa. 13Ir akuni tekman nggwe mende, ir Allah akburi kuwak ekunem inoba unggurak inobade ambik welagugwa. Ir akuni ugun mende nen, Ar Allah akburi mende enogo inalon palogo, wogok dagu lagugwa. 14Nogo ambi yigik, akuni ambi lambok, Allah ane waganggugwa mende, kumi ap ambigar ertagugwa. 15Etegerogon etarugu nanggugwa, akuni u warek mende, uma nen ogi ndal-ndal erogo tuan taga wogorek erarogo balok, ar Petrus tuan yi paga ligin kalok, akumak inoba damuk togo loak nen yiluk eku lagugwa. 16Akuni o Yerusalem korok-korok mende nen, mondok alma kunduk wagu lagugwa. Ir nen akuni u warek mende, iniliti mbalek mende wogorek wagwi kalok, ir obogar u palinaku lagugwa o.

Rasul-rasul anggin-panggin inoba birugwa wene

17Ar imam agung awor akbur, ir akuni Saduki mende inom, ir nen ina'ir kuninakwi dogolir, yogondak pagago kede warogo bawok o yiluk andagu lagugwarik, 18Ir rasul-rasul enogo arar kede warogo, inebe kede warek dambulik bartagama arar onggolinakugwa. 19Ogwe o kukbagane ar malaikat Tuhan mende nen, ir rasul-rasul kede warek enogo tu kurogo wuldarige. Wuldalok ir rasul-rasul enogo yoraga dogolir, 20“Kir kinebe Tuhan Ai Palekma menari lalok dogolir, wene iniluk dogorak edo, akuni nabedal kabedal wene eti arar emeriragwi dogono o,” yiluk yorarige. 21Etama nen, ir rasul-rasul enogo, ar malaikat yirige enogo ndak-ndak arar, o keyalek mondok arar, Tuhan Ai Palekma lagu lagugwarik, wene akuni emeriragwi welagugwa.

Ekwi dagik, ar imam agung o, nen ar inggi iyok inom, nen ir Yahudi mende inewai inom, wene inande kunu yonggo biluk wonggalkugwa ar o. Wonggalku dogolir, ir rasul-rasul kede warek enogo wogorek warni o yiluk, ir akuni yonggo mende lakbarugwa. 22Ogwe ir yonggo mende lakbarugwa enogo arar lagugwa mende, ir rasul-rasul kede warek enogo, inebe kede warek baktagama yemenogo dek arar ka lagugwa. Nen ir arar iniyok paga lagugwarik, mahkamah paga etoma arar yoragu dogolir, 23“Nir kede marek baktagama lago mende, Tu kede warek baktagama pano akber werek larek kogo, nen ir ap tuam mende inebe tuam ar welagwi dago, ogwe apman nggwe kede warek tu kurogo unggugu lago, akuni kede warek mende inebe mondok dek arar dago o,” yiluk yorarugwa. 24Ma ir tentara inewe Tuhan Ai Palek tuwam dogirtaga mende inom, ir imam-imam kepala inom, wene eta inaruk kuliluk, wadigi ap yi nenggetagiya yiluk inoba dibi nen inobade dimbik togo arar ertagugwa o. 25Yanogo yugunem akla, ap ambi nen wene yi wolok wagage, “Kinaruk kulini o! Ap kir kede warogo bagop yomanogo, Tuhan Ai Palekma ari unggegarik, akuni pakalok wene emerira tagwi o,” yiluk yorige. 26Yirigemo, ar tentara inewe Tuhan Ai Palek aruwam dogir taga mende eti aworomi inom, ir rasul-rasul enogo o Tuhan Ai Palekma nen wogonabi lagugwa. Ogwe ir akuni pakalok wene yoragwi eti paga ma, akuni nen nggir inakwi kau, ir nen inanini paga negen dek ogwe, we yanggorogon arar wogonabi lagugwa o.

27Nen arar wogorek mahkamah paga ba lagugwama, ar imam agung nen inebe mbenarinakige o. 28#Mat. 27:25 Ma ar nen yoraga dogolir “Nir nen, kir Ar ap eti awenenggak mende, akuni yoma emeriraurak mondok dek yokeraga o. Yogo kir yogondak ya ekop mende yini nda! Kir wene eti yorar o Yerusalem paga yoma, ap eti nir ninobabur paga waka o yiluk, wene enggen nir ninoba burak paga erir nertagwi o,” yiluk yirige.

29Mende ar Petrus o, nen ogari rasul-rasul enogo nen, “Nir nen wene Ar Allah ane yugu mutok mban erugun o, nen akuni inane mutok kwak dek o. 30Ar Yesus kir nen o paga warogo menogo bogop mende, Ar Allah nir ninumbui ir mende nen, Ar ebe warek ma nen iluk erogo mendege o. 31Nen Ar Allah nen Ar ebe nggain endaga nggok akuni ndilinaka dogu paga, eyabu mende inom, obarne alon palek mende inom, obok oba begemo arar o. Eti paga nen, ir akuni Israel mende yoma, ir maduk ekugwa mende bugalogo dambe kalok, iniliti kwaktamo, maga bagin o. 32Nir yi eti, wene etoma etaga ninil ebe nen karugu werek ninebe yi arar o. Nen nir yi ogwe, Ar Allah nen Ar Roh Allah eti, Allah Ane yugu ndak-ndak, Ar Agorengge eti worniragagemo, Ar ane mutok lagwi mende nen yitagwi o,” yiluk yorarugwa.

33Ir Mahkamah Agama nen wene enogo ir inaruk kuldiluk, inanini pakalok ikige; Ma ir nen, yogo rasul-rasul obogar warinabuwok nen yiluk, inane dambulkugwa o. 34Ir ap Mahkamah Agama etoma, ap ambi ebe Farisi mende, nen ar endaga Gamaliel eti welagage o. Ar ebe guru agama, ir akuni obogar abok pano yogu lagugwa. Ar menatuk rasul-rasul yi, inebe wogorek tekman korok enda wundi lani o, yiluk yoragage. 35Ar nen ir Mahkamah Agama mende yoraga dogolir, “Nawor nakbur akuni Israel mende obogar, kir nen ir ap yi nenggerogo erinabuwok yiluk, kiniliti pik pak panorogo ebekdiluk, nen erurak panorogo o. 36Nenaluk, pagane etoma ap ambi endaga Teudas eti menagagerek, ar nen an ap nggain mende an arar o, yiluk yirige. Nen ir akuni inebe empat ratus paga, ar ane wokbiluk mutok lagu-lagugwa mende, ar ebe arar warugu nanggugwa, akburi yemenogo mbuguk tadek etagugwa o, nen awene inom degar agage. 37Yabongga ap ambi endaga Yudas ai Galilea mende wagage, ar ane obabur paga akuni ambigar ane waganggugwa mende, Ar ebe warugun nanggugwa, akburi ane waganggugwa mende mbugul tadek ar mbugul kugwa o. 38Yogondak yi ertaga, an wene yi yokirak o. Ap yi yegerogo ndegerogo erinabugup o. Togok dani o. Ma nenaluk ir nen wene yirtagwi yi, wene ebe akuni inane kalok, inawene eti dek arigin o. Ogwe Ar Allah yoragemo yir warir tagwi kalok, ninil kugun ar o. 39Nen, Eti Ar Allah nen yegemo kalok, nawor nakbur kir nen ir tebelogo bugun mondok dek o. Kir nen erugun kalok, kir nen Ar Allah kinom ndugi agorugun o.”

Nen ir mahkamah agama nen, ar Gamaliel nen wene inaruk wakige mende enogo, kalok pano yegen o, yiluk ane waganggugwa. 40Ir Rasul enogo wai yoralok, lakmbirok inakwi, Ar Yesus awene emerir lagu dogorak dek o, yiluk kudi balok, inebe kede pigalogo, inuma lakbarugwa. 41Nen ir rasul-rasul enogo, o Mahkamah Agama nen, iniliti adeknggen paga arar inuma lagugwa. Ma Ar Allah nen, Ar Yesus awene paga, ir yiduk maduk yorau ndak-ndak ar yoragiya o, yiluk Andarige. 42O kup keyam, o Tuhan Ai Palekma inom, nen uma nggwe inom, wene Pano Wene Ar Yesus ekige wene enogo, emeriragu dogolir, Ar Yesus yi endaga mbogor akuni ndilinakwa, Ar Allah nen lakbi warigin yirige enogo, ebe yi ar o, yiluk wene emeriragu dogolir wigalir wulkugwa o.

Currently Selected:

RASUL-RASUL EKUGWA WENE 5: WLW

Highlight

Copy