RASUL-RASUL EKUGWA WENE 7

Ar Stefanus wene wurakige mende yi o

1Ap Imam endaga mbogor nen, Stefanus yoga dogolir, “Wene akuni nen yega enda, kar ebebar yegena a?” yiluk yorige. 2#Kej. 12:1Stefanus nen wene onggo yoga dogolir, “Kir an nawor nakbur inom, nombaelak inom, yogo an nane kinaruk kulini o! O pagane ar, nir ninumbu ar Abraham eti, o Haran ari lagikdek kigik, o Mesopotamia werekma, Ar Allah endaga mbogor eti arar oba wagage o. 3Wagagerek, yoga dogolir, ‘Kar kuma inom, kagwiya kombae inom, dambek dalok, o An nen yokirigin mo etoma arar lano o,’ yiluk yorige. 4#Kej. 11:31, 12:4Etegerogo yorigemo, Abraham o Kasdim dambe kalok, o Haran mondok-mondok arar ari lagage o. Nen ar Abraham ombae arar wartagagemo, Ar Allah nen, ar Abraham o yogondak kir nogari inom nen Ninombaelak inom agorikmo yoma dogowak nen yiluk, arar ekige o. 5O eta paga, Ar Allah nen o yoma ugu kudi warogo men, nen dambulik obogar mende, ar adik onde aruwak nen yiluk wogortukdek o. Ogwe Ar Allah nen, agar yoma An nen kar inom, kumbui endago inom, onde mondok dogobagik nen yiluk, wokeragin o yiluk, awene warogo yorige o. Nen o eta paga ar Abraham akbur ambi endago mondok dek kigik ar yorige o. 6#Kej. 15:13-14Eta mende, Ar Allah nen Abraham yegerogo yorige, ‘Kar kumbui ap inuma inuwakma kuro ari lalok dogogun o. Ir ap inai werek nen, inuwakma tebelogo balok, yiduk maduk nggok inoba bugwi, etegerogo ekwi dagik empat ratus tahun dogogup o. 7#Kel. 3:12Ogwe ir akuni inayedoman erkinakwi mende eti, An nen hukuman inoba wurabigin o. Nen kir ap inuma etoma nen wundi watuk, o yoma dogolir, An nalon palogo dogolir, woguk banunggu dogogun o.’ 8#Kej. 17:10-14, 21:2-4, 25:26, 29:31–35:18Wene etegerogo yega lagagerek, Ar Allah ane amburu yabungga erurak yirige eti, sunat#7:8 Sunat: Ar Allah Ane amburu Abraham yorige mende wene yalogo bega dogolir, akburi elege ap endak tagwi kalok, inebe auwan umur 8 hari paga kigik, inayo agakdo irep mbalkwi awene endaga yugwi. ekwi paga eberek dogowak nen yiluk, yalogo birige o. Ma Abraham akbur endak lagagemo, noge delapan hari yiluk, ar akbur Isak eti sunat ekige. Tuguluk ar Isak nen, akbur Yakub eti endak lagagemo, ebesunat ekige. Tuguluk ar Yakub nen, ar akburi inebe dua belas paga, nir ninumbu ninomba ertagugwarik, ir paga nen akuni Yahudi mende yoma obogar, wigalarir wagagu yi o.

9 # Kej. 37:11, 28, 39:2, 21 Ir Ninumbu ninomba amberak nen, inogarak ar Yusuf eti oba ina'ir kundiluk, ir akuni Mesir mende inoba onggo kunggugwama, o etoma yedoman mende welagage o. Ogwe Ar Allah nen ye wene nde wene maduk mende oba kau, aruwam mondok welagage o. 10#Kej. 41:39-41Ar Allah nen, ebe iliti werek erogo bega, ye wene nde wene akla nggagalek erogo bega ekige paga, ar ap Firaun il kalok, ar uma Mesir etoma, ap Gubernur endaga mbogor erogo menbega, nen istana ar Firaun dogir tagama uma etoma, endaga mbogor dogowak nen yiluk, ar ebe menogo bega erkige o. 11Tuguluk, ir o Mesir paga etoma inom, nen o Kanaan paga inom, nogado nggok obari maduk mende ambi arar wulkigemo, ir akuni obogar erom abu nen nggakbuk dida yirugwa o. Nen o eta paga, nir ninumbu ninomba, ir inagarom o ngga nen kwartakbuk arar ertagage o. #Kej. 42:1-2 12Etegerogo werekma, ar Yakub aruk kolalka dogolir, dek o, o Mesir etoma gandum#7:12 Gandum: Eti padi talek ma, ir akuni Yahudi mende nen, gandum enggen mbalogo biluk tepung eku lagugwa. Ma tepung eti paga roti eku lagugwa o. enggen werek o yiluk aruk kolalka lagagerek, nir ninumbui ibibir mondok o etoma inenggokdekma arar, gandum enggen kunu paga, lakbarige. 13#Kej. 45:1, 16Ar Yusuf eyai enogo, tuguluk na mbere paga o Mesir iniyok paga ari lagugwarik paga, Ar Yusuf nen, an yi ar Yusuf kir kinogarak enogo arar o, yiluk yoragage. Eta paga nen, ar Firaun enogo, ar Yusuf mende keluarga tani yiluk, ilu agage o. 14Tuguluk ar Yusuf nen, ombae Yakub oba wene lakbega dogolir, ar inom akburi inom obogar koknok togo, o Mesir arar ari warno o yiluk yoragagemo, ir inebe obogar dambulik tujuh puluh lima paga arar lagugwa. 15#Kej. 46:1-7, 49:33Ari lagugwarik, ar Yakub akburi inom o Mesir etoma dogolir, ar Yakub enogo etoma arar wartagage, nen nir ninumbui inebe obogar etoma dogolir wartagugwa o. 16#Kej. 23:3-16, 33:19, 50:7-13; Yos. 24:32Etama, ir enogo inuwagalo wolok o Sikhem etoma wundi wagugwarik, kubur erinakugwa o. Ma ir kubur erinakugwa etoma o Sikhem paga etoma, ar Abraham nen akuni inalebunu Hemor ir inai Sikhem werek mende etoma inoba, uang pakalok negen ar paga, kuburan onggo birige mende ma, etoma arar kubur erinakugwa o.

17 # Kel. 1:7-8 Ar Allah ane amburu yirige mende enogo akma dik yurak paga, akuni nir mende, o Mesir etoma ambigar wigalagugwa o. 18Werekma ogwe, yabungga o Mesir etoma, ap endaga mbogor raja ambi, ar Yusuf unggukdek mende arar menagage o. 19#Kel. 1:10-11, 22Ma ar ap raja eti nen, akuni nir mende tibik tebe erogo baga, nen anini paga mep daguk paguk inoba baga lagage o. Tuguluk elege nir ninumbui inakburi ap endaklagwi kalok, kambuwak nen yiluk ima mbo lakbaga, eka lagage o. 20#Kel. 2:2Eta ekunem akla, ar Musa endak lagage o. Ma ar ebe pano mondok agabak kigirik endak lagagemo, ar ombae uma kimakbiluk nggulkwi kigik, inggi tiga bulan ekbiluk, 21#Kel. 2:3-10 ar Musa endago enogo, ima mbo lakbi lagugwama, ar ap Firaun akbur kodak tadirik eti nen, an nggulagin o, yiluk kodarige o. 22Wene ir akuni o Mesir mende inedo obogar ilu aga, nen ar ye wene nde wene yega paga inom, nen ye eka nde eka paga inom, mondok obarne werek alon mbi mberek arar ertagage o.

23 # Kel. 2:11-15 Ar Musa mende umur eti empat puluh tahun paga, ar akla nen akuni ar mende, inebe nenggerogo werek yiluk, il birkdau wadok akla andarige o. 24Ap Mesir mende ambi nen, akuni ar mende ndugi mburalir lagwi il dalok, Musa nen ap Yahudi mende enogo idi wagangga dogolir, ap Mesir mende ambi mondok nggakbuk min arar warkige o. 25Ar Musa akla paga nen, Ar Allah nen akuni Yahudi mende wogorek wundu paga lakbani wagama yiluk yenggak andagun talek andarige mende, ir nen eta mende dikbigidek arar ekugwa o. 26O kubenengge, ap mbere Israel mende, imbirak ndugi bugu nanggugwa, ar Musa nen agorinaka dogolir, ‘wadigi yi, kogarak kimbirak nenaluk ndugi bir tagwi o?’ yiluk yorarige. 27Yirigemo, ap ogarak waka lagage enogo nen, Musa peda logo lagaka dogolir, ‘Kar ta nen nir ninewe ninawene mbalka dogorak paga menogo bagagemo yitagan? 28Keyam ap mesir mende waken enogo kwak, yogondak an narik nen yiluk yegen a?’ yiluk yorige. 29#Kel. 18:3-4Eta yega kalok, ar Musa obade nen kode o Mesir dambe kalok, o Midian etoma lagagerek dogolir, akburi mbere endak inarkige o.

30Empat puluh tahun welagagerek nen, o ye dekma nde dekma telekma ado Sinai eragalu korogar werekma, ap malaikat mende ambi oba wagage. Ar malaikat mende enogo, o edo teberek negen mende enggalokbak akla yemenogo, indu akda wulok damok ekanem ma, etoma akla arar wagage o. 31Eka kalok, ar Musa bi waka dogolir, yoma nena nen erir taga yiluk, il bikak paga korok-korok ligin anggige, Tuhan nen yoga dogolir, 32‘Kar kumbui mende Allah eti An ar o. Eti ar ma, Abraham inom, Isak inom, nen Yakub inom, ir mende Allah eti An arar o.’ Yigi nanggige, ar Musa obade atuk, ongga kali weraka enogo il lakau obade nen, nil nomotek welagage o. 33Ar Tuhan ane Musa yoga dogolir, ‘Sendal kiyokma yugu eti, nggolalogo bin o, agar kiyok ma enda, o magama arar kar mendek agandik o. 34#Kel. 3:1-10 An Nakburi o Mesir etoma nil daga o dogolir, inebe mep dagik dagok erinakwi kigi o. Ma ir nen inane kener wakwi mende An muk naruk kolalki o, ma An nen ir inebe inadik wender erogo baurak paga Nebe muk wura wagi o. Yogondak, kar ibar eme! An nen, kar yogondak o Mesir etoma, kiyok paga arar lakbagagin o,’ yiluk yorige.

35 # Kel. 2:14 Ar Musa yi ar, ir Israel mende nen, ‘Kar ta nen nir ninewe menogo bagage nen ninawene mbalka dogowak nen yiluk menogo bagage o?’ Ogwe ar Musa eti ar, ar Allah Israel mende nen, ndilinakwa dogowak yiluk lakbi wagage o. Nen eti ake paga, ar malaikat nen ongga alokbak kali weraka dogolir, wene yorige. 36Musa yi nen ar, ir Israel mende o Mesir nen wogorek wundi wagage. Ir wogorek wundi waga dogolir, elalin erubuk mende, o Mesir paga nen inom, i Laut Merah eti odo beralogo unda waga, nen o ye dekma nde dekma telekma etoma inggi empat puluh tahun paga, ya nogo yigik wagu dogolir erir waga lagage o. 37#Ul. 18:15, 18Ar Musa eti nen ar, ir Israel mende yoraga dogolir, ‘Ar Allah nen, An pulnakige ndak-ndak, ap nabi ambi kir kinakla yoma nenar mendigin o,’ yiluk yorarige o. 38#Kel. 19:1–20:17; Ul. 5:1-33Ar Musa ir Israel mende inom, o todi anggumo Sinai kulik eragalu eta nen, malaikat mende nen, wene ar Musa oba watuk yoga kalok, tuguluk ar nen akuni Israel mende etoma yoraga lagage o. Nen wene iluk pano mende Allah Ane yugu eti, ar mban ar wagangga lagagerek, nen nir worneragage o.

39Yoraga kigik, ninumbui nen Musa ane inaruk kulkikdek. Musa dambe kalok niniyok paga Mesir lugun o, yiluk yugu lagugwa. 40#Kel. 32:1Ar Harun ir nen yogu dogolir, ‘Kar nen nir mende dewa#7:40 Dewa eti, ye mende nde mende paga, akuni kwak, sapi kwak, wam kwak, inakla wadok mutok erogo biluk, anggo warogo amudi kunggwi ninalok, nir wadok mende erogo binanigin yiluk ekwi. amudi kunggu dogu edo erniran o. Dewa amudi kunik eti nen, woknerek nega dogowak nen o. Nenaluk Ar Musa o Mesir nen yoma woknirek wundi wagagerek ogwe, yogondak ar ebe nenggertaga, ninunggukdek o!’ 41#Kel. 32:2-6Ir nen patung lembu ak ndak-ndak emas paga ekbiluk, amep werek mende ake kurban ekwi, ebe wogok bugwi, endai waganggwi eku lagugwa. 42Ekwi dalok, Ar Allah nen dambek darigemo, ir nen dadi mbogortaga mende etoma wogokdagu lagugwa o. Wene ya ap nabi-nabi nen wene yirugwa ndak-ndak yi o;

‘Ir akuni Israel mende yi wae!

Kir nen o todi anggupmo etoma empat puluh tahun dogolir, An nake kurban amep werek mende eti ekugup dek etnogogi.

43Ar Molokh eti ya bigik wolok nugwi,

patung dadi Refan eti talek agabak kigirogo biluk,

kir nen wogokbugu lagagup eti paga nen,

An nen kir ap Babel mende werekma etoma mbo lakbinagagin o,’yiluk yorarige o.

44 # Kel. 25:9, 40 Ar Allah nen akuni inoba waga dogomo o kemah tenda paga eti, nir ninumbui nen ar o lumo ye dekma nde dekma telekma etoma palkugwa o. Ma o kemah tenda paga eti, Ar Allah ane Musa yorige mutok, ninumbui nen palkugwama. 45#Yos. 3:14-17Ar Allah nen, ir ap o yoma inai werek inendaga mbogor mende, ir ninumbui ar Yosua inom inilka paga nen, ir mugogo wuldaga paga, o kemah tenda paga palek eti inom ar wolok wagugwa o. Nen o kemah tenda paga palek eti, ar Daud kenam atuk welagage kudi paga eta, welagage ar o. 46#2Sam. 7:1-16; 1Taw. 17:1-14Daud nen pano eka paga, Ar Allah iliti adeknggen erogo bega lagage o. Ma ar Daud nen, an numbu Yakub nen, Ar Allah alon palogo wogok dega lagage eti, an nen Kar Kao palurak paga, telek erogo banin o yiluk, nggino yorige o. 47#1Raj. 6:1-38; 2Taw. 3:1-17Ogwe, o ebe Salomo nen arar, Ar Allah Ao eti palkige.

48Etegerogon ogwe, Ar Allah eti endaga mbogor ma, o akuni ininggi paga palekma etoma Ar dogorak ndak dek o, yiluk buku ir nabi mende nen diru mbalkugwa mende yi o,

49 # Yes. 66:1-2 ‘Mbogor eti An korek dogirtagama arar o,

nen agar eti niyok yarirtagama.

O An Nai nenggerogon mende paluok nen yiluk yirtagwi o?

Nen An tar mbalka dogorak nggoma? 50Ar Allah nen yega dogolir, o yoma obogar, An nen kenam ekigi eti kir kinonggokdek a?’

Yiluk Ar Allah andema nen etegerogon yirige o.

51 # Yes. 63:10 Kir kinalubak yigom kunik ma, Ar Allah ane mutok laurak ndak dek mende arar o! Ar Allah ake yokeraganem, kinaruk mondok dogu arirtaga o! Nan ar Allah ane tagalku lagugwa kwak, nir yi etegerogo ar eritagwi o! 52Kir kinumbui nen, ap nabi ambi anggin panggin inoba bigikdek welagugwa a? Ir nen, o pagane Ar Allah ayedoman ebe mende wagartek mende, ir nen inebe warinaku lagugwa. Nen yogondak kir dek, Allah ayedoman yi onggo mbalogo wakop o. 53Ir malaikat yonggo mende nen, Allah wene yokeragwi mende, kir nen waganggikdek o!”

Stefanus Yugum paga alep tagurir wakuga wene

54Stefanus nen wene eta yega ap Mahkamah Agama mende inaruk kulku lagugwarik, inanini ambik oba birugwa. 55Ar Stefanus Roh Allah akla kerok yiluk imbirak puk mo, il mbogortaga iliktagage mende, mbogor keyak togo, Ar Allah alon palek welaga kigik, Ar Yesus obarne paga, Allah inggi ebemangge mendek welaga il ndaguk togo darige. 56Yogo, “Kinil lakani, an mbogor taga tu kurikmo, Ar Akuni Inakbur enogo, Ar Allah inggi ebema nggwe mendek kigi o!” yiluk yirige. 57Ir ap Mahkamah Agama mende yemenogo nen, inaruk abir wakdiluk, naik yugu dogolir Stefanus pakta lagugwa o. 58Ir nen ebe pagago wolok, tekman nggwe bi wuldiluk, yigom paga ar alep tagurir mondok arar wakugwa o. Ir akuni Stefanus waruwok yiluk eku dogolir, elege ambi endaga Saulus eti, ir iniyom nggorek pago welagage o. 59Ir nen Stefanus wakwi kigik, Stefanus ane yega dogolir, “Tuhan Yesus wae, nagorengge kinggimo bigi o, ma nebe woknabin o!” yiluk nggino yorige. 60Ma ar al babuk togon kotatuk, ane kwa yega dogolir, “Tuhan, ir maduk eka mende yi, onggo inoba bagup o!” yega lagagerek, ar ebe arar kanggige.

Currently Selected:

RASUL-RASUL EKUGWA WENE 7: WLW

Highlight

Copy