RASUL-RASUL EKUGWA WENE 24

Ap Israel mende nen, ar Feliks uwagam, ar Paulus wene oba birugwa wene

1Lima hari welagugwarik nen, ap AnaniasImam Agung mende aworomi inom, ap Yahudi inewai obogar inom, ap Feliks oba o Kaisarea arar lagugwa. Lagu dogolir, ap pengacara ambi endaga Tertulus eti, Paulus oba wene wurabu yiluk wolok lagugwa. 2Arar lagugwarik nen, Ar Tertulus menatuk Paulus yi ekemo, eli ekemo, yiluk oba bega dogolir,

“Ae, ninombae kendaga mbogor wae! Ninombae kiliti werek kar ar ma, ninawene mbalogo mor erninaka kayagik, kakburi kuwakma pano mondok welagoma o. 3Etiar ma, nir kakburi o yoma agorik mende nen, ninombae wa, yiluk niniliti adeknggen paga, keyagi warkabi tagwi o. 4Nen, kar kinggi eru mende, an wene idu ar yega nagik, ka'ir neyaurak ma, an wene oba wuraka mende, bugudak nggaruk togon yega nagik, nombae karuk kolek dogono o. 5Ap yi, akuni o yoma maduk erinabir lektaga mende ebe yi arar o. Nen akuni o kuri ya nda etoma, akuni Yahudi mende maduk erinakwa mende inewe, ar ebe yi arar o. Ar ebe, ap ai o Nazaret mende inewe ar yi arar o. 6Yogondak ya ar nir ninombae Tuhan Ai Palekma magama onggega lagarik, maduk erogo bik yiluk ekanem paktago o. [Nir nen ar pakbiluk, nir ninawene kindirik paga andokma waganuwok nen yiluk ekunem, 7ar ap Komandan Lisias nen il ninalok, nininggimo ndilogo koba yoma wolok bi wagiyama o. 8Ma ar nen, kir wene etoma nen yi lani o,] yiluk koba lakbinani wagama, koba wago o, lak. Ninombae kar nen, ar ap yi andokma wagangganem, nir nen wene ar oba wurako mende, ar andema nen, yega dirogo karuk kolalin o,” 9Ir akuni Yahudi mende, wene mbalkunem etoma welagugwa mende nen, Tertulus wene yege etoma bebar ekemo yege o, ir inane ambigar oba bugwi, etegerogon ekugwa.

Ar Paulus Feliks uwagam erakde mbalarige wene

10Ap Gubernur nen, yogo kar Paulus nen, wene ambi yinda, yiluk yorigemo, ar Paulus nen yega dogolir, “Nombae, kar nir akuni yoma ninawene mbalka keyagik, tahun dogalek ar welagagen nilu ma, an nobade dek dogolir, an wene noba bega mende, nombae kuwagam ya nen, onggo yigin o. 11Ma, nombae o, an alep dua belas hari eta paga tamban erik nen yiluk, o Yerusalem ari lagagi o. 12O eta ari lagagirik, akuni ninom wuk aka, wene werek eka, erukdek o. Nen Tuhan Ai Palekma akman nggwe inom, akuni Yahudi mende tamban erir tagama inom, tekman nggwe inom, erir laga akuni ambi inil nalok dek o. 13Ar ap wene noba bega werek yi nen, ap yi il paga ekemo yiluk yokirigin ambi mondok dek arar o. 14Erir wagi mende, an nen wene ar Yesus nen emerniragage mutok, Ar Allah nir ninumbui nen ane waganggu lagugwa eti, Ar ane wokbiluk eka agarik o. Ogwe wene ir Nabi-nabi nen buku mbalkugwa paga inom, nen buku ar Musa nen mbalkige paga inom, an nen ebebar o yiluk nakla andar taga o. 15An nen, ar iniliti nir Allah nen niniluk erogo binanigin yiluk, oba eberek werek eti kwak, an etegerogo ar, yabongga akuni alep ar, inebe maduk pano kanggugwa mende obogar, iniluk erninabigin ar o, yiluk pago werek o. 16Ebe eta paga nen, an Allah inom, akuni inom, inapma maduk ekikdek pano mban erir lektaga o.

17 # Kis. 21:17-28 Tahun mbere kenagan negen perak, akuni inuma tekman nggwe etoma welagarik, akuni ninogariyak ininggi dek mende inake bigik, Allah ake bigik, erik nen yiluk ari wagarik mo o, lak. 18An wene erik yiluk wagi eta mende obogar erir laganem, ap Yahudi mende o Asia etoma nen wagiya mende nen, an Tuhan Ai Palekma inil neyalok, akuni dogalek ninom dek, wene aredo negen ninom wakikdek ar o, ogwe kok noba lagiyarik, kede warnaka o. 19Ir akuni Yahudi mende o provinsi Asia paga, inebe bugudak negen ar o. Nen wene ir nen an ambi noba biluk dogolepma, Ir nen wene yi nombae koba yoma ilik bi warurak mende o. 20Eta mende, yogondak ya, ir ap ya ari wagiya yoma nen, an maduk eka inil neyaga mende, Mahkamah Agama inuwagam, ar il neyage mende ebe yi il paga ekemo o, yiluk yokirugun o. 21#Kis. 23:6Ir nen, an nandokma waganggunem yigi mende wene ebe yi o, nen an yogondak nande bagalir tagwi yi, akuni kanggugwa mende, iniluk erinabigin wene yi paga, an nande bagalir tagwi yi o.”

22Ar ap Feliks wene ar Yesus nen yorige mende pakalok ilu ar ma, sidang ekwi enogo wene abir warogo yega dogolir, “Wene yi ar ap komandan Lusias eti ari waga kalok, wene ebe nggaruk togon arar mbaligin o.” 23Yoralok Feliks nen ap Paulus aruwam werek mende tentara inewe enogo, yoga dogolir, ar ebe kede warek ar dogogin o, ogwe ogariyak nen bika wagik, ye mende nde mende wogori wagik eku dogowak nen, o telek erogo bano o, yiluk yoragage.

Ar Paulus nen ap Feliks o nen kwe Drusila o inilka paga wene yirige wene

24Hari mbere kenagan welagugwarik nen, Feliks agwe kwe Drusila ebe Yahudi kwe ma, imbirak wolok wagage. Wagu lagugwarik ar Paulus wagani lani o, yiluk yoragagemo, ar Paulus wolok oba bi wagugwama, ar Paulus Yesus ebebar o yiluk iliti ebebar andarige mende yega kigik, ar Feliks aruk welagage o. 25Ogwe ar Paulus nen wene enogo ugu kunogo, wene mor ebebar erir lagugwa mende inom, inakla aganggen dagaga kalok tebelurak wene inom, yabongga o aga yobok paga anggin panggin erigin wene inom, yigi nanggige, ar Feliks obade atuk, yoga dogolir, “O telek ambi werek aga kalok, wene ugu yinok nen kayonggo bigin ma, yogondak kar kuma lan o,” yiluk yorige. 26Nen Ar Feliks akla paga nen, ar Paulus nimbirak wene mbalku dogolir, uang ambi woknirigin yiluk, ar Paulus wagani lani o, yiluk ayonggo bega lagage.

27Nen Ar Feliks nen akuni Yahudi mende iniliti waganik nen yiluk eka inil kalok, dua tahun welagugwarik, ar Feliks korek biluk, ap Perkius Festus eti Gubernur arar mendirugwa.

Currently Selected:

RASUL-RASUL EKUGWA WENE 24: WLW

Highlight

Copy