RASUL-RASUL EKUGWA WENE 25

Ar Paulus Kaisar nen nawene mbaluak yirige wene

1Ininggi tiga hari welagugwarik, Festus o Kaisarea nen Yerusalem lagage. 2O etomala, ir ap imam inakepala inom, ap Yahudi mende pemimpin inom, ar Paulus yi ekemo eli ekemo yiluk oba birugwa. 3Oba biluk, ir inane dambulogo nen Paulus o Yerusalem tuan paga wolok wagunem, tuan obakte paga waruwok nen wokneran o, yiluk nggino yorugwa. 4Ogwe ar Festus nen wene yoraga dogolir, “Ar Paulus ebe o Kaisarea kede warek werek o, nen an agwe o Kaisarea etoma dogoluk dek, muk niyok paga arar ligin o. 5Etiar ma, kir ap nggaindak kau, an o Kaisarea etoma laganem ninom lalok, nen ar maduk ekige mende werek kalok, wene ar oba biluk, etoma kinande kunurak o,” yiluk yoragage.

6Nen ar Festus ernogo, o Yerusalem inggi sepuluh hari negen welagagerek muk Kaisarea arar lagage. Lagagerek nen kubenengge, wene uwak dolitagama tu kurogo bega lagagerek, ar Paulus andokma waganu mende wolok watni o, yiluk yoragage. 7Ar Paulus arar unggirigemo, ir ap Yahudi mende, o Yerusalem nen wagugwa yemenogo nen, ar Paulus yik kur ekdiluk, yi ekemo eli ekemo yiluk, ar oba wene wurakugwarik ogwe, wene enggen mende negen yi ekemo o, yiluk oba biluk dek o. 8Etegerogo yogu lagugwa, ar Paulus nen yega dogolir, “An wene noba dek kigik kinane mende yitagwi o, An nen Musa wene kindirik paga inom, Tuhan Ai Palekma inom, ap Kaisar Roma mende endaga mbogor oba inom, an maduk mondok erukdek o,” yiluk yirige.

9Festus ir ap Yahudi mende inakla pano aruwak nen yiluk, ar Paulus yoga dogolir, “Kar an nil nagik, o Yerusalem nimbirak lalok, etoma nen kendokma waganogo kuwak dolu eti wadok a?” yiluk yorige.

10Ar Paulus nen, “An yogondak ya, mahkamah Kaisar Roma ilka paga mendek werek o; nen nawene mbalurak kalok, etala nen ar nawene mbalurak o. Tuan kar nen, ir akuni Yahudi mende inoba, an maduk mende ambi eki kil neyagen mondok dek arar o. 11Yogondak ya, an ebebar wene mbalek maga mende tagalka, nen wene yi tagalka kalok, akuni ebe min arar warurak o yiluk wene mbalek mende eti arar tagalkimo kalok, yogondak ya an min arar naru eti wadogar o. Ogwe, ir wene noba bega mende enggen mondok dek kalok, ta nen kwak nonggo dek ugun ar wartani o, yiluk narurak paga, ir ininggimo burak? Ma yogondak an nawene, ap nggok Kaisar nen arar mbaluwak nen yiluk, nggino yigi o!” yiluk yirige o.

12Ar Festus ir ap wene morekwa inom yugu lagugwarik, ar Paulus yoga dogolir, “Kar nen nawene Kaisar nen mbalurak yegen eti ma, kar kawene yi ar Kaisar nen kuwak doluak nen, kar nen ar oba ligin arar o,” yiluk yorige.

Ar Paulus ap Agripa o, kwe Bernike o, inuwagam wene yirige wene

13Welagugwarik ar nen, ap endaga mbogor Agripa kwe Bernike imbirak, ar Festus Gubernur arar dagarigemo, ir nen keyagi waruwok nen yiluk, o Kaisarea wagugwa. 14Ir inuma auan lagikdek, eta il ambi ar dogolir ma, ar Festus nen ar Paulus awene mende ar Raja Agripa yoga dogolir, “Ap ambi kede warek mende endaga Paulus ma, ar Feliks nen dambe kalok laga mende ebe yi werek o. 15Ma an o Yerusalem lagagirik paga, ir ap imam inewai inom, Yahudi mende inewai inom, noba wagu lagugwarik, ap eti nen yi ekemo, eli ekemo yiluk, edo dek kigik ar oba biluk, mondok waruwok nen wokneran o, yiluk yirugwa o. 16Yirugwa mende, an nen akuni Roma mende kalok, wene edo mbenarkikdek, ugun ar kede warogo batagodek o, ogwe ir akuni wene agarak inom kunik mende eti, ir inom aredo wakbiluk kalok, ar wene oba bu mende erakde mbalega kalok, wene maduk pano eti oba wurabi taga mende o. 17Etegerogo yorarigi mo, ir inebe an noba yoma wagugwama, o keyalek ar an nen wene mbalurak o, yiluk wene mbali tagama tu kurogo biluk, ar ap kede warek ebe inoba wulabi wagagi o. 18Nen wulira wagagimo, ir nen wene oba birugwa mende anggin werek negen bugun yiluk an andagi ndak-ndak negen oba biluk dek o. 19Ir nen agama wene mende, inane alokbak mbere biluk, oba wurakwi, ap ambi endaga Yesus eti wakugwama kanggige mende, ar Paulus nen ebe dirogo yega dogolir, Ar Yesus eti ebe iluk werek o yiluk ane obatne ambigar yega kigi o. 20Ma an nobakte mbalatuk, nenggerogo erukbuk agama, yogo kar Paulus nimbirak Yerusalem nen kawene nuwagam yugwi dak nen, wokarek nimbirak luwok yogi o. 21Ogwe Ar nen, an nawene ap nggok Kaisar nen mbaluwak nen oba ilik banurak yegemo, ar ebe ilikbu paga torek kede warek pago dogoni yigimo, pago werek o.” 22Agripa nen Festus yoga dogolir, “An ap ebe eti ane yega naruk kolalu wadok o?” yiluk yorigemo, ar Festus nen, “Kuben kalok ar ane yega karuk kulinok nen o,” yiluk yorige.

23Kubenengge nen, ap Agripa inom, kwe Bernike inom, ap inarige werek inombayelak inom, ap inendaga werek o etoma mende inom, wene moreri tagama unggugu lagugwarik, Festus nen Paulus wolok ya bi watni o, yiluk yoragagemo, wolok ap inuwagam bi wagugwa. 24Bi wagugwama, ar Festus nen, “Ninombae Agripa kendaga mbogor inom, kir yoma agoktip mende obogar keyagi wakinaki o. Akuni Yahudi mende o Yerusalem mende inom, ir mende amberak yoma werek mende inom, inane ambigar wene ar Paulus yi oba mugogo wuraku dogolir, ar iluk dogorak mondok ndak dek mende arar o, yiluk yugwi dagi o. 25Ogwe, inane oba bega mende birkigi mende, wene oba bega etoma paga, wene edo biluk ap yi maduk ekemo ma, ebe warurak o yiluk, wogoraurak mende edo mondok dek arar kigi o. Nen ar nen an nawene yi, ap endaga mbogor Kaisar nen, il mbenak naburak o yiluk yegemo, an nen Kaisar oba ilik bik nen yiluk nakla andalok ya biluk werekma, kinuwagam bi wagiya o. 26Ogwe ap ebe Kaisar oba elagabik nen andagi mende, wene Kaisar ake nena ekemo koba biluk ilikbi wagi yorigin yiluk, ar ebe pago ya werekma, yogondak ninombae Agripa koba wuldi wagi yi, ar ane yega mende ambi kinaruk kolaldiluk, wene ebe yegerogo erurak o, yiluk yornirugun o. 27Nenaluk an nakla nen, akuni kede warek, maduk yi ekemo o yiluk yilukdek kigik, ogona paga nggwe elaginabir tagodekma o,” yiluk yoragage.

Currently Selected:

RASUL-RASUL EKUGWA WENE 25: WLW

Highlight

Copy