RASUL-RASUL EKUGWA WENE 23

1Ar Paulus nen ir ap Mahkamah agama yemenogo il lakdalok yoraga dogolir, “Nogari o! Yogondak ya kudi, an nen Allah uwagam maduk eki ambi yi o yiluk, nakla andagikdek agarik o.” 2Eta yirigemo Ananias imam agung nen, ap Paulus eragalilu mendek etnogo yoga dogolir, wedak, ap endi ande tagumarinde yiluk yirige. 3#Mat. 23:27-28Eta paga nen, ar Paulus nen wene onggo imam agung yoga dogolir, “Pano neyawak ekwa enggal nggirik mende yi, Ar Allah nen ande tagaligin eti, kar arar agandik o! Kar enda kotatuk dogolir, Musa wene paga nuwak dolik yiluk eken mende, kar nen ar Musa wene yirige mende abel dagalogo, an nande tagalurak yegen o!”

4Ir ap Paulus inom korek mende nen, Paulus yogu dogolir, “Kar ap imam endaga mbogor Allah mende miyuk-meyak eken o,” yiluk yorugwa. 5#Kel. 22:28Ar Paulus nen, “Iyai, nogari, ar imam endaga mbogor nenggokdek ma yigi o. Eta Alkitab mbalek paga yirige ndak-ndak ar, ‘Kar nen keyai miyuk-meyak erinabugup o,’ ” yiluk yirige werek o.

6 # Kis. 26:5; Flp. 3:5 Ar Paulus nen anggota mahkamah etoma amberak, ir ap Saduki mende, amberak Farisi mende agagemo, ar nen yoraga dogolir, “Nogari o! An ap Farisi mende, nen nebe ap Farisi mende inumbu wigalek arar o. An yogondak nuwak dolir tagwi yi, akuni wartagugwa mende iniluk arurak wene waganggimo, nawene mbalir tagwi o!” yiluk yirige. 7Eta yega kalok, ir Saduki mende inom, ir Farisi mende inom, odo keyak togo etagugwa. Nen ir wene aredo ambik wakugwa. (8#Mat. 22:23; Mrk. 12:18; Luk. 20:27 Ir ap Saduki mende nen, akuni kambiluk iniluk arugun dek yugwi, malaikat mende eti degar yugwi, nen ir monggar irimbo mende eti degar yugwima o. Nen ir ap Farisi mende nen wene edo kenagan eti obogar werek yugwima, eta yirige o). 9Inane mondok ambigar yugu dogolir, ap guru Farisi mende nen yugu dogolir, ir Saduki mende winimuk ambik mberirarugwa. “Nir ninakla nen, ap yi maduk ekemo yurak edo mondok dek arar o. Ebe malaikat nen a, irimbo nen a, wene yogama yirtaga o!” 10Wene mondok ndugi burak ar etarigin nanggige, komandan Pasukan nen Paulus warurak kigi a yiluk, ar Paulus ap inakla nen waganogo wolok, o markas bi lani o yiluk, awurumi yoragage.

11Inggi ambi noge yiluk, Tuhan Yesus Paulus eragalilu wagagerek yoga dogolir, “Nombae yugup o! Kar nen an eka karigen mende, o Yerusalem pano yoragen kigi o. Nen yabongga, o Roma etoma etegerogon ar yoranok nen o,” yiluk yorige.

Paulus waruwok nen yiluk abok mbalkugwa wene

12O keyalek, ir ap Yahudi mende nandodogo kuwak ekbiluk, ir nen nir Paulus wakikdek kigik, erom inom, i inom, nugun mondok dek o, yiluk Allah uwak mbalkugwa. 13Ap inebe empat puluh nen Paulus waruwok o, yirugwa. 14Ir ap imam-imam kepala inom, ir Yahudi inewai inom, inoba lagugwarik yoragu dogolir, “Nir yi obogar nen, ar Paulus wakikdek kigik erom inom, i inom nugun dek o, yiluk Allah uwak mbalkorik wago o,” yiluk yorarugwa. 15Yogondak kir Mahkamah Agama mende obogar nen, ap komandan oba surat ibar lagarni o. Nir Paulus ambi inom dirogo, andokma waganuwok nen yiluk talek, wolok eme yiluk yorurak o. Nen ebe wolok waganem, nir nen mondok min arar warugun o.

16Ir wene yirugwa mende, ar Paulus ambilko aruk kolka lagagerek, o markas etoma oba laga lagagerek, ar Paulus kurumbi yori lagage. 17Paulus nen ap tentara inewe Roma mende ambi waituk yoga dogolir, “Elege yi komandan wene ambi yorik nen yiluk wagarik ma, oba wolok lan o,” yiluk yorige. 18Ap tentara inewe nen elege ebe ewe komandan oba wolok lagagerek, yoga dogolir, “Ap Paulus kede warek mende enogo nen, wai yornituk, elege yi komandan wene ambi yorik nen yiluk ma, wolok lan yonegemo, wolok wagi o,” yiluk yorige.

19Komandan nen elege enogo akdin wirak togon wolok, we nomo yiluk kinok wokega dogolir, “Kar an nena yonirik yiluk yegen?” yiluk yorige. 20Yorigemo, ar elege enogo nen men yorige, “Ir Yahudi mende obogar inane dambulku dogolir, ar Paulus tuguluk ambi inom ar pik pak andekma waganuwok nen yiluk talek, Tuan kar nen wolok Mahkamah Agama paga wolok lau paga nggino yokiruok nen yiluk, inane dambulka o. 21Ogwe, kar nen ir yokirugun ndak-ndak erugup o. Nenaluk ap inebe empat puluh paga nen, nir Paulus wakikdek kigik, erom inom, i inom, obogar kwan bogo yiluk, Allah uwak mbalka o. Ma kar nen ar Paulus wolok tuan taga laganem, nggodo mbalogo ar Paulus mondok min waruwok nen yiluk, yega o,” yiluk yorigemo, 22ar komandan nen, Ar elege enogo yoga dogolir, “Yogo, an yonegen arar o, akuni amberak yoragup o,” yiluk yotuk, yogo kuma lan o, yiluk yorige.

Ar Paulus Feliks oba lakbirugwa wene

23 Komandan aworomi tentara inewai inebe mbere wai yoralok, yoraga dogolir, “Ap tentara inebe dua ratus paga inom, ap tentara kuda paga inebe tujuh puluh paga inom, nen ap tentara tega wolok inebe dua ratus paga inom, jam sembilan kukbaga yi paga, o Kaisarea lugun o. 24Kuda ambi ar Paulus ake kwagago, ar ebe dulogo pik pak enagago wolok, ar Gubernur Feliks oba bi lano o,” yiluk yoragage. 25Nen, komandan surat eka dogolir, yegerogo ekige,

26“Gubernur kendaga mbogor kadik ar o. An Klaudius Lisias nen o! 27Ar akuni yi, ir ap Yahudi mende nen, pagago waruwok nen yiluk ekunem, an naworomi ninom lagagurik mo, ar nen an akuni Roma mende yonege paga, ar ebe ndilkoma o. 28An nen ya nena ekemo yoritagwi yiluk edo kwarik nen yiluk, ir Mahkamah Agama, ir mende werekma wolok lagarik, obogar mbenarko. 29Mende, Ar maduk eke ambi paga kede wakwi, ebe mondok nggakbuk warurak inom, dek negen kigi o. Wene waganogo oba bega eti, ir inawene agama paga kindirik mende kigi o. 30Yogondak ya, akuni nen, ir ap Yahudi mende nen waruwok yiluk arega talek werek yonegama, kar Gubernur nombae koba kiragago lakbi wagi endi o,” yiluk diru mbalkige.

31Nen, ir anggota tentara nen ar Paulus kukbaga eta paga, ar wolok ar Antipatris oba bi laurak paga ekugwa o. 32Ma, kuben o arar yirigemo, ir tentara kuda paga lektaga mende nen, ar Paulus wolok lagwi dagik, ir ap tentara amberak markas iniyok taga lagugwa. 33Tentara nen Paulus wolok o Kaisarea unggwi lagugwarik, Surat enogo Gubernur wogotuk, ar Paulus ebe inom wogorugwa. 34Gubernur nen surat enogo endaga taldiluk, ar Paulus, kar kao edo ngga o, yiluk yorige mende, ar Paulus nen; an nai edo Kilikia o, yirigemo ilu atuk. 35Ar nen yoga dogolir, “Kalok Pano o! Akuni wene koba bega mende inebe wagwi kalok, an nen kawene edo kwarigin o. Ma ar Gubernur nen ar Paulus endi, ar ap raja Herodes ambilamo pago dogoni o,” yiluk yoragage.

Currently Selected:

RASUL-RASUL EKUGWA WENE 23: WLW

Highlight

Copy