RASUL-RASUL EKUGWA WENE 22

Ar Paulus nen akuni Yahudi mende wene yoragage wene

1“Ae, nogari kir obogar! An wene nerakde mbalogo yokeragin ma, kinaruk dogoni o!” 2Paulus ir inane Ibrani wene paga ar yigi nanggige, inane mondok nggokbok yirugwama, Paulus wene ar ekige mende mbililogo yoraga dogolir, 3#Kis. 5:34-39“An ap Yahudi mende o, an nai o Kilikia, kota Tarsus etomala endak tagagi o. Nebe o Yerusalem yoma nen nggok agagi mo o. Ap guru Gamaliel nggok enogo nen, wene panorogo emer nirige o. Musa wene kindirik, nir ninumbui yoragage mende dik dak emernirige o. Nogari kir yogondak ya, wene kir ekwi mende, wene wolok unggwi wagwi dalok, Ar Allah erakde etegerogon ar mbalka dogolir, amberak kede warogo malinaka, eka lagagi ar o. 4#Kis. 8:3, 26:9-11Wene ngger mende wolok unggwi wagwi dalok, kumi, ap obogar warinaka, amberak kede warogo malinaka eka lagagi o. 5Ap imam Agung inom, anggota Mahkamah Agama inom, ir yi saksi agarik o. An nenggal Dek o. Ir Ap eti obok nen, inane dambulogo surat pengantar, ap Damsyik mende wene ngger mende eti, waganggwi dalok, pagago o Yerusalem ba watuk hukuman wogorawok nen yiluk ekigimo o.”

Paulus eka lagage mende mbililogo yoragage wene

6“An o Damsyik bakma panggo yi lagagirikmo, o akbinak mbogortaga nen dinggaga paga noba kwi ndade erogo wura wagage. 7Yanogo arar agar taga yuk puk arar nggilagimo, ane ambi yonege naruk kolalkigi o, ‘Saulus wae, Saulus wae! kar an nenaluk narir tagan o?’ 8Yiluk yirigemo, an nen, ‘Kar ta o, nombae?’ yorigimo ar nen onggo yonega dogolir, ‘An Yesus nai Nazaret mende arar narir tagan o!’ yiluk yirige o. 9Ir akuni ninom lagwi mende akbinak eti inil karugwa mende, ir nen an nimbirak wene mbalkwi ekwi inaruk kolalkikdek. 10An nen kinok wokkega dogolir, ‘Tuhan wae, an nenggerogo erigin?’ yiluk yorigi. Yorigimo, Ar Tuhan nen, ‘Kar ibar kiluk atuk menarin, nen o Damsyik unggwi lan o. Etoma nen kar eru mende Allah nen andage mende yokirigin o.’ 11Akbinak eti paga, an nil mbuk agage o. Nen ap an nogari ninom lagagu mende nen, ininggi pagago woknarek, o Damsyik uma unggwi lagagu o.

12Etoma ap ambi endaga Ananias, Ar obabur mor-mor pano eka dogolir, Musa wene diktogo pano ekanem, Ir akuni Yahudi mende o Damsyik mende nen, ar wogokdugu lagugwa o. 13Ar an warek werekma birneya wagagerek, nen yonega dogolir, ‘Saulus nogar a, kil benggelarin o!’ yiluk yornirigemo, an nur puda yiluk nil bikarigi o. 14Ar nen an yonega dogolir, ‘Ar Allah nir ninumbu mende eti nen, Ar Akla andarige mende eti kilu aruak nen yiluk, kayonggo bege o. Kar Ar Yesus Allah ayedoman, Ar akla andalok erir taga mende werek, kil kegena o. Nen Ar Yesus ane yokega karuk kolka ekena o. 15Kar kil kigik, karuk kolalki eken mende, akuni obogar o ya nda yorar nega dogogin o. 16Yogondak ya, il ambi dogorak dek o. Menarin o, an ima wukbagagin o. Kar kane Ar Tuhan oba, nomaduk mbo lakbin o, yiluk yorurak o,’ ” yiluk yorige.

Allah nen Paulus ap nin mende wene yora lan yorige wene

17Ma “An o Yerusalem wagagirik, Tuhan Ai Palekma ari ungguluk tamban ekanem, Roh Allah nakla unggirige o. 18An nen Tuhan ebe nil karigi ar o. Ar nen an yonega dogolir, ‘Akuni Yerusalem mende, kar nen an nawene yoraganem, waganugun dekma, o yoma dogogup o,’yiluk yonirige o. 19An nen yega dogolir, ‘Tuhan wae, An tamban erir tagama nggwe, ya malagik nega dogolir, kar kane waganggwi mende kede warinaka, ndugi mburalinaka eka lagagi eti, ir yoma inilu ar agiyarik o. 20#Kis. 7:58Nen kane wolok mende Stefanus wakwi dagik, an eta mendek welagagi, an ir ar wakwi dagik iniyom nggorek pago welagagi o. An nen panorogo warno yega lagagi o.’ 21Nen, Tuhan ane ambi inom yonega dogolir, ‘Kar lan arar o. An nen kar waganogo akuni yahudi dek mende inuma, o walegar etoma arar lakbagagin o,’” yiluk yonirige o.

22Ir akuni nen Paulus wene yega inaruk kolalkwi welagugwa mende, wene irip paga eta yigi nanggige, ir akuni etoma inane ya kwa yugu dogolir, “Ar ebe mondok arar warurak o. Iluk dogorak dek arar o,” yiluk yirugwa o. 23Inane ya kwa yugu dogolir, iniyom jubah puk denggak ekwi, wul agaga purogo lagakwi ekugwa. 24Ap komandan pasukan Roma mende nen, Paulus markas nggwe nen panorogo mbenakwi eruwok nen wolok warni o. Ir akuni Yahudi mende nen, nenaluk inane ambik yirtagwi, wene edo yoma mbenak inakwi eruwok nen, wolok lani o yoraga. 25Ar Paulus inggi kede warogo biluk, andokma waganggu nanggugwa, ar Paulus nen ap tentara inewe mendek enogo yoga dogolir, “Akuni Negara Roma mende inawene morekikdek, inebe ndak ndugi inarurak pano a, dek a?” yiluk yorige.

26Ar tentara inewe enogo aruk kuliluk, ap komandan oba lagagerek yoga dogolir, “Kar nen ap yi nenggerogo erigin? Ar ebe Negara Roma mende o!” yiluk yorige.

27Yorigemo, ar komandan nen Paulus kinok wokega dogolir, “Yogo, kar kebe ap Roma mende ebebar a?” yiluk yorigemo ar Paulus nen, “Ebebar o! An nebe akuni inedo negara Roma mende arar o,” yiluk yorige. 28Komandan nen ambi inom yoga dogolir, “An ap Roma mende etarik nen yiluk onggo ambik mbalkigi o!” yiluk yorige.

Ogwe ar Paulus nen wene onggo yoga dogolir; An Negara Roma mende paga endak lagagi o. 29Eta yega kalok, tentara kinok kanok yugu lagugwa yanogo kode mbugulkwi, komandan nen ap yi Roma mendek kigik kede wakimo nobade a, yiluk andarige o.

Ar Paulus mahkamah agama yoragage wene

30Komandan Pasukan Roma eti nen, ap Paulus yi, nena ekemo ap Yahudi mende nen waruwok yiluk yirtagwi yega lagagerek, edo kwaka lagage. Kubenengge nen ir imam-imam kepala inom, anggota Mahkamah Agama inom, inayonggo birigemo kuwak ekbiluk, ar Paulus nen ane bagaluwak nen yiluk, ebe kede pigalogo wolok ir inuwagam lagugwa o.

Currently Selected:

RASUL-RASUL EKUGWA WENE 22: WLW

Highlight

Copy