RASUL-RASUL EKUGWA WENE 21

Paulus o Yerusalem unggwi lagage wene

1Ir ap Jemaat o Efesus paga inaruwam dogir taga mende ninom, niniliti inoba kunik kigik dambe dalok, to paga unggugu lagagurik, o pulau Kos etoma arar lagagu. Kubenengge nen pulau Rodos paga labi lagagu. Eta nen o Patara tolakma wundi lagagu. 2O Patara tolakma eta nen, kapal o Fenisia laurak mende kwakbiluk, nir enogo tuguluk kapal eti paga dagi lalok arar lagagu. 3Nen, nir ima nggwe kirek lagu dogolir, o Siprus nineraga lilu lak keker lagagu. Nir o Siria etoma nggwe lagagu. To nir lagagu enogo ye mende nde mende wurabik nen yiluk, o Tirus tolakma lagagu. 4Eta nininggi satu minggu paga dogolir, akuni Yesus ane waganggugwa mende inoba lagagurik, nir ninom welagagu. Roh Allah nen yoragagemo, Paulus wae, kar o Yerusalem laurak dek o yiluk yorugwa. 5Nir eta ninom idu paga welagagurik, dambe dalok arar lagagu o. Ir obogar inagwi, inakburi inom, woknirek i aik paga, tolakma etoma arar lakbinani lagugwa. I aik paga eta ninendop yunggu yiluk, tamban ekugu o. 6Tuguluk nir ninom keyagi war-war yugu lagagurik, ir inuma lagwi, nir to paga dagi lagwi ekugu.

7Nir ima mondok kirek, o Tirus nen o Ptolemais labi lagagu. Eta ari lagagurik, ir akuni Yesus ane waganggugwa mende, ir bidar lagagurik, ninom nininggi ambi ninom eta welagagu. 8#Kis. 6:5, 8:5Kubenengge nen to paga ungguluk, o Kaisarea etoma unggwi lagagu. Eta nir ap penginjil ambi endaga Filipus oba lagagurik, ninom ar uma welagagu. Ar ebe ap tujuh diaken Yerusalem nen denogo barugwa inogar Filipus enogo uma welagage. 9Komadigi akburi inebe empat paga ma, Allah nen Allah awene yorar nugu dogowak nen yiluk erogo barige. 10#Kis. 11:28Nir ninom eta mondok werekma, ap ambi ebe nabi ma o Yudea nen ninoba wagage, ar endaga Agabus. 11Ninoba wagagerek, Paulus aredok wokbiluk ar inggi iyok kede wakdiluk yega dogolir, “Yi Roh Allah nen yegerogo yege o: Ap aredok yi werek, o Yerusalem etoma ap Yahudi nen kede yegerogo warogo, ap tekmana mende wogoragun o,” yiluk yonege o.

12Etegerogo yoneragagemo, nir obogar ir ninogari o Kaisarea werek mende ninom nen, kar Paulus yogondak, o Yerusalem unggwi laurak mondok dek o, yiluk nggino nggano yorugu o. 13Ar nen yega dogolir, “Kir an niliti watawak nen yiluk, nena nen denggu dengga yirtagwi? Ar Tuhan Yesus ake kede warnaburak inom, nebe narurak inom, an nebe arar telek erogo biluk agarik o,” yiluk yirige.

14Ar Paulus wene yorugu mende, ar aruk kulubuk agagemo, nir nen ninobade atuk, “Ar Allah andage mban eka kuwok o,” yiluk yirugu.

15Eta welagagurik ar nen, nir ninatunggan nggarelogo wolok, o Yerusalem lagagu. 16Nir ninogariyak o Kaisarea mende ninom woknerek, ap Manason uma binani lagugwa. Nen nir ar Manason uma etoma welagagu. Ar Manason ao o Siprus mende eti, ebe o pagane ar Yesus ane waganggige mende o.

Ar Paulus nen Yakobus bika lagage wene

17Nir o Yerusalem arar lagagumo, ir ninogariyak Yerusalem mende nen, iniliti adeknggen paga wokninakugwa o. 18Kubenengge, ar Paulus nir ninom ap Yakobus ninil bika lagagu. Ir jemaat inaruwam dogi taga mende obogar etoma werekma, nir bikda lagagu o. 19Keyagi warinatuk, ar Paulus nen, ir akuni tekman mende inake, wene yorar nega nem, Ar Allah nen eka lagage mende mbililogo yoragage. 20Ar Paulus wene yirige mende inaruk kuliluk, ir obogar Allah endaga pogorakugwa o. Nen ir nen Paulus yogu dogolir, “Dak Paulus wae! Kar ap Yahudi mende inebe beribu-ribu paga, Ar Yesus Ane waganggugwa eti kilu mondok kilu arurak o. Ir obogar nen Musa nen wene kindirogo yoragage mende nggedok togo eritagwi o. 21Nen, yogondak ir inaruk kolalku dogolir, kar nen ir Yahudi akuni mende, ir akuni ninggalok mende inom werek etoma, ar Musa awene kindirik eti, damber kani yiluk yorar taga yega o. Kar nen ir inakburi sunat erurak dek o yiluk yoragen a, Yahudi inobabur erir tagwi mende eti dik duk eku dogorak paga yorarigen a? 22Yogondak, ir akuni Yahudi mende, Ar Yesus Ane wagangga mende nen, ar Paulus yoma ari wagarik werek o, yiluk muk inaruk kulugun o. Yogo, yogondak kar nenggerogo erigin o? 23#Bil. 6:13-21Kar nen nir wene yokugwi mende mutok erumo pano werek o. Ap inebe mbere yi, ir nen Allah ambelabe biluk werek yi o. 24Ir iniri mbalkikdek mbelabe werekma, kar kinom ir iniri mbalkwi, kar kiri mbalkwi eri lani o.#21:24: Ir iniri mbalkugwa, 8:18 paga kinil bikani Onggo obogar kar nen bino o. Eta erumo akuni obogar kar eka keyalok, kabok yega mende inenggal inane mende yegama andagun o. Ma kar nen Musa awene kindirik eka keyagun o. 25#Kis. 15:29Ogwe ir akuni Yahudi dek mende, Ar Yesus ebebar o yiluk waganggugwa mende inake paga, wene ir nen erukbuk mende konferensi paga dambulogo, diru muk mbalogo inoba lagakugu eti, kuguwak ake amudi kunik mende naurak dek o, mep naurak dek o, anggodobak nggumuk warek mende nagup o; nen ugunar kagar-kagar erurak maga o,” yiluk wene eta arar lakbirugu o.

26Etegerogo yiluk, Kubenengge nen, ar Paulus ir ap inebe empat enogo inom, mbelabe mbali lagugwa. Ir nen Tuhan Ai Palekma unggwi lagugwarik, nir mbelabe mbalau paga wago o, yiluk yirugwama, ininggi mbere kenagan welagugwarik, mbelabe mbalinakwi, ake inake kurban ekwi ekugwa.

Paulus Tuhan Ai Palekma nen kede wakugwa wene

27Mbelabe mbal diluk tujuh hari arar agagemo, akuni Yahudi mende amberak, o Asia mende nen wagugwarik, Paulus Tuhan Ai Palekma werekma inil kalok. Ap amberak inayonggo biluk, ar Paulus pagago kede warkugwa. 28Ir inane naik yugu dogolir, “Akuni Israel mende nggi wulkop a, ap yi o ye ai nde ai etoma wene emerirar nega dogolir, Israel mende ninawene abel dagalka, Allah awene Musa yorige wene abel dagalka, Tuhan Ai Palek yi alon dik degar, yogondak ap Yahudi dek mende yi, Tuhan Ai Palekma yoma maduk erogo, wogorek ba unggwi wagarik yi a, ibar-ibar paknerani a!” yiluk oba naik kunggugwa. (29#Kis. 20:4Ir nen, ar Trofimus ai o Efesus mende eti, ar Paulus imbirak o kota inil dagu lagugwarikma, ir inakla paga nen, ar Paulus nen, ar eti muk wolok Tuhan Ai Palekma lagage yiluk inakla andarugwa o.) 30Ir ap waru mende nen Paulus waruwok yiluk ekwi dagik, akuni ap inarige werek inewe komandan Roma mende oba lapor eku dogolir, o Yerusalem muk maduk aga o, yiluk yorugwa. 31Ir akuni yonggolan mende yemetnogo, ar Paulus waru paga nggebek dagwi, ekwi dagik, ir akuni nen tentara Roma mende inewe, o Roma paga muk agum ane dagir taga o, yiluk yorugwa. 32Ar ap komandan nen ar aworomi tentara inewai wogonaka, tentara amberak wogonaka, eka lagagerek, ir Yerusalem wuk akunem lagugwa. Ar komandan aworomi inom lagwi dalok, Paulus ndugi waku lagugwa dambe karugwa o. 33Komandan nen lok-lok Paulus wagani lagagerek, ap yi mbuti kede paga, kede watni o yiluk yoragage. Tuguluk ar komandan nen, Paulus yi akuni nenggedek mende o, nen ar nena ekemo yoragage. 34Ir akuni yomanogo amberak nen yegerogon mende yirugwa, nen ir amberak nen etegerogo mende yirugwa. Nen wene dirogo negen yugwi dek agagemo, ar komandan nen markas wolok lani o, yiluk yirigemo wolok lagugwa. 35Paulus wolok uma bakma unggugu nanggugwa, waru mende nen, mondok waruwok yiluk erugu nanggugwa, komandan nen aworomi kininggi paga lek-lek waganini yirigemo, wolok unggirugwa o. 36Ir waruwok yiluk mende yabongga mugurek lagu dogolir, mondok-mondok warurak o, yir lagu lagugwa.

Paulus erakde mbalarige wene

37Markas tukandema ungguwok nen yiluk ari lagugwarik, ar Paulus nen komandan yoga dogolir, “Ae nombae, an wene ambi yokiru ndak a, dek a?” yiluk yorige.

“Yorigemo ar komandan nen, kar Yunani wene paga kilu a?” 38“Kalok, kar yi ap Mesir mende akuni empat ribu paga dogalogo balok, o yoma abel dagak pagak erogo binaniluk, inebe wogorek o todi anggu paga wulken enaga kebe yi a?” yiluk yorige.

39Yorigemo ar Paulus nen, wene onggo yoga dogolir, “An nebe ap Yahudi mende o; nen an nai edo eti o Kilikia paga, kota ebegirakma endaga Tarsus etoma arar o. Etama, ir akuni yi, an nen wene ambi yorak nen, telek erogo banin o,” yiluk nggino yorige.

40Wene etegerogon nggino yorigemo, ar Paulus wene yu ndak o yiluk yorigemo, ar Paulus menaga lagagerek, we yenggak neyawak nen yiluk inggi damok mban ekige. Ekige mende, ir akuni obogar inabodok dek agugwa. Inabodok arar de agugwama, ar Paulus ir akuni Ibrani inane paga wene yoraga dogolir,

Currently Selected:

RASUL-RASUL EKUGWA WENE 21: WLW

Highlight

Copy