RASUL-RASUL EKUGWA WENE 20

Ar Paulus, o Makedonia inom nen o Yunani inom etoma lagage wene

1O Efesus yemenogo, akuni inoba arar lakbu yirigemo, Ar Paulus nen, ir akuni Ar Allah akburi mende wonggal dalok inaruk wakige. Inaruk wakdiluk, yogo kir pano yegerogo ar dogono o yiluk yoralok, ar ebe o Makedonia arar lagage. 2Ar nen o Makedonia nggwe etoma inadikmo dombok il mbenarir laga dogolir, inaruk warir laga, denggal inaka eka lagagerek, ar ebe o akuni Yunani mende inuma nggwe lagage. 3Ar inggi tiga bulan etoma welagage. Tuguluk ar o Siria etoma laknen yiluk, abuk abak ekanem, ar kurumbi kolalka dogolir, ir akuni Yahudi mende nen, kar karu paga kabok mbalka o yiluk, ar aruk arar kolalkige. Eti paga nen, ar nen o Makedonia nggwe etomaru, ar iyok paga warurak kolkige. 4Sopater, ar ap Pirus akbur, ao o Berea mende imbirak lagugwa. Lagunem Aristarkhus o nen ar Sekundus, ir inao o Tesalonika mende inom, Gayus ao Derbe mende inom, Timotius, Tikhikus inom. Trofimus inom, inao o provinsi Asia mende inom arar lagugwa. 5Ir ndak o Troas ninaruwam ari lalok welagugwa. 6Ir Yahudi mende hari raya Roti Ragi Bigikdek mende dago nalok, o Filipi nen undalok lagugwa o. Noge lima yiluk nen, ir ninom o Troas abuk atuk dambulkugu o. Nir etomala welagwi ninagik, o tamban ambiar ekugu o.

Ar Paulus nen, ir jemaat Troas etila, o irep paga mondok bikda lagage wene

7Nir ninogariyak ninom erom nuwok nen yiluk, o hari minggu kukbagane arar wonggalkugu ekugu. O kubenengge, Ar Paulus ebe arar laurak ma, ir akuni etoma inom wene mbalkwi kigik, o kukbaga odo kirogo arar ertagage o. 8O kamar tida paga, nir wonggal kugumo etoma, lampu pakalok yibadek welagage o. 9Nen ar elege pemuda ambi endaga Eutikhus, ar ebe o jendela paga korek welagage. Ar Paulus wene idu ar yir laga kigik, elege enogo noge ilimo atuk, o kamar lantai tiga etoma nen, nggar le agan agar taga warogo wukigerek, ebe min arar wartagage o. 10Ma, ar Paulus kogona paga wuka lagagerek, elege enogo oba denggak togo oba winagagerek, tuguluk elege ebe agamo wokbiluk yoraga dogolir, “Kiniliti pirugup o, ebe iluk o!” yiluk yirige. 11Ar Paulus tuguluk iyok paga, ogona paga dagarigerek, erom tumburogo wogoralok, ir arar narugwa o. Erom nalok, ar Paulus wene yir laga ar kigik, o arar keyak mbeyak ekigemo, nen ar ebe arar lagage o. 12Ir akuni yomanogo nen, wedak enogo uma wolok bi lagugwa. Nen ir iniliti pano adeknggen agugwa o.

Paulus o Troas nen Miletus lagage wene

13Nir ndak kapal paga dagaluk, o Asos tolakma etoma, ar Paulus waganuwok nen yiluk lagagu o. Ar nen tuan iyok paga lak nen yiluk erigin nanggige, nir nen ar wagani lagagu o. 14Paulus ninom o Asos eta nen abuk atuk, to paga ungguluk o, Metilene arar labi wagagu o. 15Eta nen, to kapal paga arar wulku lagagurik, o Khios imbirak ilka kunik etila labi lagagu o. Kibir nggwe kwak nen, o Samos labi lagagurik, nininggi ambi noge ima yiluk, o keyalek mondok, o Miletus unggurugu o. 16Ar Paulus nen, an o Asia paga, o telek idu paga takbo durak ma, o Efesus etoma wuragin dek o yiluk yirigerek mo, nir ibar-ibar Hari Pentakosta#20:16: Hari Pentakosta eti: Ir akuni Yahudi mende nen Allah nen o Mesir paga anggon panggon erninakunem woknirek wundi wagage o yiluk, inakla eberogo komaku lagugwa. ake ekunem, o Yerusalem arar luwok o, yiluk lagagu o.

Ar Paulus nen akuni o Efesus mende yogo dogoni o yiluk yoragage wene

17Ar Paulus o Miletus dogolir, ir pemimpin jemaat etoma, o Efesus tuan ndaga naruwam dogono o, yiluk wene warogo lakbirige. 18Nen Ir obok arar wagugwama, ar Paulus nen yoraga dogolir, “Nakburi an kinoba o Asia yoma, o pagane wagagi kudi nen, ninom welagagu kinilu o. 19An nen Tuhan eyabu eka paga, ap Yahudi mende nen neloktema talir nugwi, anggin panggin ekbanunggwi kigik, niliti tebe yiluk, nile amburu inom eka lagagi kinilu o. 20An nen kir kinake paga, pano mende ambi nobade nen kimagago biluk yorkeragi mondok dek ar o. Telekma inom, uma nggwe inom, wene yokerar nega lagagi kinilu o. 21Akuni Yahudi mende inom, Yunani mende inom, kinomaduk mbo biluk, kiniliti kwagago Allah oba watuk, Ar Yesus oba panggol kwi erni o, yiluk yokeraga lagagi o. 22Yogondak Roh Allah nen, o Yerusalem lan o yiluk yonegemo, etoma an nenggerogo ernabugun eti nonggokdek kigik ar, etoma lagi o. 23Ap awo kota dombok neganem, Roh Allah nen, an kede warek banu mende inom, anggon panggon erogo banu mende inom, telekma bugarogo yonega, eka lagage o. 24An nebe niluk dogorak inom, kamburak inom, eti wene dek o. An niliti paga nen, Tuhan nen yabu noba birige yi ar erir laga, Allah awene Pano Wene iliti paga nen woknerage wene yi, naruk kolok erir nega nagik, kamburak kudi arar bi ligin o, yiluk eka lagage o. 25An arar kir obogar bikinar waga, Allah endaga mbogor nen wene pago dogolir erir taga mende yokeraga, eka lagagi o. Yogondak an nakla nen yabongga ninom abuk arugun dek o, yiluk eberitaga o, nakburi. 26Etama, yogondak an yangguk togo yokirak o, kir ambi nen yabungga kinebe arar bularugun kalok, eti an nobabur paga dek o, eti kir kinobabur paga arar o. 27An nen Ar Allah akla andalok, wene waganogo noba birige mende, ambi dambe binagarigi dek arar o. Obok ar yangguk togo yokeragagi o. 28Kir nen, kir kinebe aruwam watagwi, nen ir jemaat obogar inaruwam dogobagik nen yiluk, Roh Allah nen wokeragage mende etoma, obogar inaruam dogoni o. Kir nen, ar ap Gembala domba nen anggumi inaruwam dogirtaga kwak, kir nen ir jemaat, Ar Allah Akbur wartagage paga, Ar Amende erogo batarige mende etoma, inaruwam dogono o. 29An laga nagik, taknggewo kelo inanini werek mende kinoba unggwi warugun o. Nen akuni kir inaruwam binagagi endoma, irinarom aganem o. 30Nen ambi, ap kir kinom mende nen ar, ar wene adik mende ar emerir ligin o. Ir nen etegerogo ekwi kalok, akuni Yesus ane waganggugwa mende nuk puk erogo bamo, ir mugurek lugun o. 31Tuwam panorogo dogoni o! Tiga tahun paga dogolir, dinggaga kukbaga, nile amburu paga inom, takdi mbakdi eka dogolir, kinaditak dombok emekeraga lagagi mende eti, kir kinakla eberek dogolir, eku dogono o. 32Yogondak Allah nen kir kinaruwam kinagik, kir Ar nen pano mende pago dogowak nen yiluk, kinebe Allah inggimo binagi taga o. Ar Allah ebe obarne ambik nen, kir kinobarne erkinaka, amindi amende akburi wogorawak nen yiluk birige mende, wokeraga dogogin o. 33An nen kir kinauan inom, kiniyom inom, an nen wadok andarigi ambi dek arar o. 34An nebe ininggi obatne paga erogo, an nengga dogolir, naworomi ninom nugwi mende magaraga, eka lagagi yanogo, kir kinilu werek o. 35Kir nen ar ekige bikigik eku dogobagik nen yiluk, yabu anggin ambik kigik, ir akuni inoba ndakbuk mende inake yamak daurak o. Etiar ma, nir nen Tuhan Yesus yirige mende yi, nir ninakla eberek dogolir eku dogorak eti, ‘Kodagwi eti adeknggen nggok dek o, ogwe wogoragwi perak adeknggen nggok mondok o.’ ”

36Wene arar yoraga lagagerek, Paulus ir inom endop yunggu yiluk tamban ekugwa. 37Ir nen Paulus ebe kudik kambuk ekwi, adenggu makwi, ekdiluk yogo lan o, yiluk yoruga. 38Paulus nen yabongga ambi ninom abuk arugun dek o, yoragage eti iniliti mondok watarugwa. Etegerogo eku lagugwarik, ir nen ar wolok to paga maldi lagugwa o.

Currently Selected:

RASUL-RASUL EKUGWA WENE 20: WLW

Highlight

Copy