RASUL-RASUL EKUGWA WENE 16

Ar Timotius Paulus Silas Inom lagugwa wene

1Ar Paulus o Derbe lagagerek, nen tuguluk o Listra lagage. Etoma elege ambi Yesus ane waganggige mende endaga Timotius eti welagage. Ar agwiya eti Yahudi kwe, Ar Yesus ane waganggige mende ar. Nen ar ombae ap Yunani mende. 2Ir Allah akburi o Listra inom, nen o Ikonium inom etoma nen, ar Timotius ebe obabur pano yiluk, ir inilu welagugwa. 3Ar Paulus nen ar inom nugu dogowok nen yiluk andalok, ar ebe sunat erni yoragagemo ekugwa. Eta ir akuni Yahudi mende nen, ombae ap Yunani mende obok inilu paga nen ekige o. 4Ir akuni inai dombok unggir lagu dogolir, ir ap rasul-rasul inom nen ap nggaindak inobogar inom, wene konferensi Yerusalem paga nen yirugwa mende, yorar lagugwa. Ir nen, ir ar Yesus Ane waganggugwa mende, wene yogo endi waganini o yiluk yoragwi, ir inaruk wakwi, erir lagugwa. 5Eti ekugwa paga, ir jemaat etoma iniliti ambi inom kode erogo, aik wakbagwi, nen ir akuni inebe o ninggi nanggi inoba lamboli wagwi eku lagugwa.

O Troas dogolir ar Paulus akbi ngganggo karige wene

6Ar Roh Allah nen ar Paulus, Silas imbirak o Asia etoma, Allah Ane yoraurak dek o, yiluk yoragagemo, ir o Frigia, Galatia etoma arar lagugwa. 7Ir o Misia kudi paga ari lagugwarik, o Bitinia ungguwok nen yiluk ekugwa mende, Roh Yesus nen endoma unggugup o, yiluk yoragage. 8Yoragagemo, ir enogo o Misia nen Troas wundi lagugwa. 9Ar Paulus o Troas kukbaga nogo yeganem, ar akbi ngganggo ambi kega dogolir, ap Makedonia mende nen, ibar ndil ninabi undame o, yiluk yoga karige. 10Ar Paulus nen akbi ngganggo enogo kega lagagerek, ir o Makedonia unda luwok nen yiluk tuan kwaku lagugwa. Ir nen yogo, Allah nen nir wene Pano Wene akuni eloma yora lowak nen yiluk yege o, yiluk ir inakla andarugwa.

O Filipi etoma, kwe Lidia Allah oba ebebar andarige wene

11Nir o Troas dambe kalok, o Samotrake unda lagagurik, nen Kubenengge o Neapolis unggurugu. 12Eta nen o Makedonia etoma distrik ambi endaga Filipi, ma etoma arar unggi lagagu. O Filipi etoma ir ap Roma mende nen tebel dalok werekma, nir etoma nogo nininggi mbere ambi paga yirugu. 13O hari Sabtu paga nir kota nen wundiluk i aik paga nggwe wura lagagu. Wuku dogolir, nir ninakla nen etoma, ir akuni Yahudi mende tamban erir tagama werek a, yiluk andalok wura lagagu. Lagagurik nen, nir korek werek ma, ir kumi etoma mende ninoba kuwak eri wagugwama, ninom wene mbalku lagagu. 14Kwe ambi kain onggo kunirtaga mende, endaga Lidia, ao Tiatira nen wagage mende ma, ar nen Allah iliti kunikma, Tuhan nen ar iliti paga, ar Paulus ane yega mende wene waganuwak nen yiluk, erogo birigemo, ar Paulus ane waganggige o. 15Ar Lidia inom, akuni ar uma welagwi mende obogar inom ima wukdarugwa. Ima wukdarugwama, ar Lidia nen nir yorniraga dogolir, “Kir nen an Ar Yesus oba ebebar eberogo wagangge andagop kalok, an numa ninom luwok nen watni o.” Yega lagagerek, ar nen ninom luwok o, yiluk tombogor ninarigemo, nir ninom arar lagagu o.

Ar Paulus o Filipi kede marogo malakugwa wene

16O ambi paga nir tamban erir tagama lagunem, kwe ambi ninom abuk agagu. Kwe ebe yedoman mende, kwe eti irimbo akla dogolir obagari mende ertatuk welaganem ma, ar nen akuni yegetarugun endegertarugun yiluk yoraga kalok, andokma waganggu dogolir, uang ambik wogogwi paga, ap ombayelak ininggi werek erinaka lagage. 17Ar kwe eti nen, nir muknerek naik agan waga dogolir, “Ap yi Allah endaga mbogor ayedoman o, ir nen kir kinagap endak kinaburak wene yokerawok nen yiluk wagiya o,” yiluk agan nega lagage. 18Kwe eti kwa agan mondok ninggi nanggi mutnirek nega lagage. Nen ar Paulus oba wenemuk atuk, kugi irimbo enogo yoga dogolir, “An yogondak Yesus Kristus endaga paga, kwe yi akla nen dambe kalok, wundilan!” yiluk yorige. 19Ir ap kwe enogo ombaelak nen, ir inauang luktartaga mende edo arar dek aga yiluk andalok, ir nen Paulus Silas imbirak kede warogo, inebe lik dalok wogorek, ap wene mbalirtagama inoba lagugwa o. 20Ir nen wogorek ap Roma mende wene ininggim werek inoba lagugwarik, “Ap yi inebe Yahudi mende, nen o nir werekma yoma maduk ekama wogorek wago o. 21Ir nen ap Roma mende inawene kindirik dambe kalok, adik erurak yir tagwi o. Nir nen ir inobabur erir taga mende eti, nir erurak nina'ir ninagik yirtagwi o!” 22Ir ap etoma obogar Paulus Silas imbirak inaruwok yiluk ekugwa. Ir ap pemerintah mende nen Paulus Silas imbirak iniyom likbilogo balok, imbirak ibar lakmbirok wanggol inartni o, yiluk yoragugwa. 23Ir enogo lakmbirok wanggik wanggok erogo, inebe kede warek batagama malinakugwa. Maldalok nen, ar kepala nen, ap kede warek endi inaruam pikpak dogono o, yiluk yirige. 24Etegerogon yirigemo, ap kede warek inaruwam mende nen, ar Paulus Silas imbirak ngganggok indikmo kwak etoma, ininggi iniyok mbir tebelogo barige.

25Kukbagane odo kirogo, ar Paulus Silas imbirak tamban ekwi, Allah endai wakwi, etegerogo ekwi ap kede warek mende amberak inaruk kulkugwa ar o. 26Etegerogo ekwi ugun werekma, lugur nggok waga dogolir, o penjara uwak wurabek danggolir laga, tu larek mende kurtaga, ap ininggi mbuti kede warek mende aburak lero-lero wurka ekige. 27Ap kepala penjara agur lalok menagagerek, il birkega lagage, tu obogar kurik arigi nanggige, akuni kede warek mende obogar wulkama yiluk, pisau paga inggi ndaluk watak nen yiluk ekige. 28Eki nanggige, Paulus ane nggok ar yoga dogolir, “Wedak! kar wartagup o, nir ninebe obogar yoma werek o!” yiluk yorige.

29Ap kepala penjara enogo, indu lampu nggino yiluk, wolok kede warek werekma unggwi lagagerek, ir Paulus Silas inuwagam endop yunggu yi lagage o. 30Tuguluk ir Paulus Silas imbirak wogorek tekman nggwe ba wulka lagagerek, yoraga dogolir, “Ae nombayelak, an nebe ndilnabuwak nen yiluk nena erik o?” yiluk kinok yoragage.

31Yoragagemo, ir Paulus, Silas imbirak nen, ar wene onggo yugu dogolir, “Tuhan Yesus oba ebebar o yiluk kiliti eberogo waganin o! Eta eberumo, kar inom, akuni kuma werek mende inom, obogar ndil kinabigin o!” 32Yotuk, ar Paulus Silas imbirak nen, Tuhan awene yirige mende, ir kepala penjara inom, akburi uma mende inom, mbililogo yoragugwa. 33Yoralok o kukbaga odo kirogo eta paga, ap kepala penjara nen, ir inoba inumo mbalek ma nggwe korinaka, eka lagagerek wogorek lagage. Nen ar inom, akburi uma mende inom, obogar ima wurinakugwa. 34Eku lagugwarik, ar Paulus Silas imbirak uma ba unggiluk, erom magaragwi, nen ar akburi inom, Allah oba iniliti ebebar andalok, ir iniliti adeknggen ambik agugwa o.

35Kubenengge nen, ir ap pemerintah Roma mende nen Paulus, Silas imbirak kede pigalogo wuldano, yiluk ir polisi lakbarugwa.

36Nen ar ap kepala penjara nen, ir Paulus Silas imbirak yoraga dogolir, “Ir pemerintah nen yegerogon yega o, kir kimbirak kede pigalogo wuldano, yiluk yega ma o. Ma kir kinuma arar lani o, aenelak wa!” yiluk yorarige o.

37Ogwe, ar Paulus nen ap wagugwa enogo yoraga dogolir, “Nir ninebe akuni Roma mende o. Nir ninawene dirogo mbalukdek, ndugi ninakwi, kede warogo malninakwi ekarikma, yogondak nir kimak-kimak wuldinanuwok yiluk yega a? Nir wundiluk lugun dek o! Ir ap pemerintah eti watuk nen wulninabi waruwak o!” yiluk yirige.

38Etegerogo yirigemo, ir Polisi nen wene eti wolok, ir ap Pemerintah Roma mende arar yora lagugwa. Nen ir ap pemerintah Roma mende eti, ir Paulus Silas imbirak nen, nir ap o Roma mende o, yiluk yugu nanggugwa, ir inobade ambik agugwa. 39Nen Ir Paulus Silas inoba lagugwarik, nir maduk erkinako o, ma maga binanino o, yiluk kede warek baktagama lagugwarik yoralok, nen inebe kede warek baktagama etoma nen wogorek wulkugwarik, kir o kota yi dambe kalok lani o yiluk nggino yorarugwa. 40Yorarugwama, ir Paulus Silas imbirak penjara nen, kwe Lidia uma lagugwa. Arar lagugwarik, ir akuni ebebar andarugwa mende inom dambul diluk, inaruk warogo balok, Paulus Silas imbirak arar lagugwa.

Currently Selected:

RASUL-RASUL EKUGWA WENE 16: WLW

Highlight

Copy