RASUL-RASUL EKUGWA WENE 15

Ap inane o Yerusalem nen dambul kugwa wene

1 # Im. 12:3 Ir ap amberak o Yudea nen, Antiokhia wagugwarik, ir akuni Musa wene yirige paga sunat erinakikdek kalok ndilinabigin dek o, yiluk yirugwa. 2Ar Paulus Barnabas imbirak nen wene eti mondok dambekaurak o, yiluk yoragugwa. Ar Paulus, Barnabas, ir ap amberak inom, o Yerusalem etoma, ap inewai inom, ir Rasul inom wene eti amburu mbalurak o, yiluk wolok lagugwa.

3Ir jemaat Antiokhia nen wogorek tuan paga lakba lagugwama, ir tuan Fenisia nen o Samaria podok togo lagugwa. Etoma dogolir, ir nen akuni tekman mende Allah ane yorarugwama, ir nen wene waganggugwa mende inabok yorarugwama, ir inaruk kuldiluk, Allah akburi iniliti adeknggen ambik agage. 4Ir o Yerusalem etoma arar ari lagugwama, ir rasul inom, inewai nggaindak inom, ir Allah akburi inom nen ir wogonakugwa. Ir nen ir yorar nugunem, Ar Allah nen eka lagage mende panorogo mbililogo yoragugwa. 5Ap Farisi mende Yesus ane waganggugwa mende ambi menatuk, “Yogo, ap tekman mende, Yesus ane wagangga mende eti, ir sunat erinakwi, nen Musa wene erir lagwi, eku dogorak o,” yiluk yirige.

6Nen, ir rasul inom, ap nggaindak inom, wonggalogo nen, wene eti amburu mbalkugwa. 7#Kis. 10:1-43Wene eti yugwi dagik, o il nggobok yirige. Yabungga, Petrus menatuk yoraga dogolir, “Nawor nakbur wae! O alep ar, Ar Allah nen, kar akuni Yahudi dek mende, wene Pano Wene yi inilu arurak paga yorar lano o yiluk lakbaninggige mo o. 8#Kis. 2:4, 10:44Ar Allah akuni iniliti ilu mende nen, ir arar wogonaki o yirige. Eta dik togo nilu agage eti, Ar agorengge nir ninoba wurabi wagage ndak-ndak, ir inoba etegerogo ar wurabi waga ninil karugu o. 9Ar Allah nen ir inom, nir inom, ninelokte yambenukdek o. Ar Allah nen ir ebebar andagama, inomaduk korogo mbo lakbege o. 10Yogo, wadigi ya, kar ta nen kwak Allah ane paga aik waritagan? Kir nen wene anggin ambik mende, akuni Allah ane wagangga mende inoba durogo buwok yiluk, nir ninumbui inom, nir inom, ar Musa awene nggakberogo ekwi dek o. Nen ir kwak mondok eruwak yiluk yogop a? 11Nir ebebar yiluk, Ar Yesus oba eberogo waganggoma, Tuhan Yesus ninakba andalok ninagap endake ndak-ndak, ir etegerogo ar inagap endake mo o,” yiluk yorarige.

12Akuni obogar inane dek agugwa. Yabungga ar Paulus, Barnabas imbirak nen yorau dogolir, ap tekman mende, akuni Yahudi dek mende werekma wene yorar lagunem, Allah nen erukbuk mende inom, elalin mende inom, eka karugwa mende yorarugwa. 13Ir arar yirugwama, ar Yakobus nen, “Yogo nawor nakbur wae! An wene yirtaga endi, kinaruk kolalino o! 14Ar Simon nen, ar Allah nen akuni Yahudi dek mende etoma iliti kunik nen, ir nakburi aruwak nen yiluk miginake mende yege o. 15Eti Allah nen Alkitab akla ir ap nabi nen yirugwa mende, yi ndak-ndak ar o.

16 # Am. 9:11-12 Ar Tuhan nen yega dogolir, ‘Dogoluk nen, an yabongga warigin o.’

‘An nen ar Daud ai miyalek kalok, pali warigin o.

Tagalek kalok menogo bi warigin o,

nen windik kalok, men dega eri warigin o.

17Ir akuni amberak ndidilik eta werek mende nen, Tuhan kwakwi dogowak yiluk,

ir akuni Yahudi dek mende inom, an nen wairamo, nakburi arugun o.’

Tuhan nen yirige. 18Wene eti o pagane nen ar yirigemo o.”

19“An nakla andagi mende eta,” ar Yakobus nen, “Nir nen akuni Yahudi dek mende, Allah ane waganogo apma wagiya mende, inoba anggin erogo bagun dek o. 20#Kel. 34:15-17; Im. 17:10-16, 18:6-23Nir nen kir erurak dek mende yi o, yiluk diru warogo inoba lakbuwok o. Ir inaruk waruwok o. Kir nen kuguwak ake bugwi mende nagup o, engganok nggumuk warek mende nagup o, amep inom nagup o, kwe nen ap nen ugunar kagar-kagar eru maga o. 21Musa wene kindirik mende, o pagane endaga tebelogo yoragwi, inaruk kolalkwi, tamban eritagwi hari Sabat paga inom, ap o kota dombok etoma obogar yoragwi eruwok o,” yiluk yoragage.

Ap inalebunu adik mende inake diru warek wene

22Ir rasul mende inom, ap nggaindak mende inom, jemaat obok dambulik nen, ap wene mbalek wolok o Antiokhia etoma, ar Barnabas o, Paulus o inom lakbau kwarinaku dogolir, ambi Silas, ambi Yudas, endaga ambi Barsabas inom, inebe eta deninakugwa. Ap eta Allah akburi, o Yerusalem eta obarne werekma inom laurak kwarinakugwa. 23Lakbagu dogolir wene inane paga dambulik mbalek mende diru mbalogo wolok lakbarugwa mende yi o,

“Kir akuni Yahudi dek mende, o Antiokhia, Siria, Kilikia, nir kinogari rasul inom, ap nggaindak inom, o Yerusalem mende nen keyagi wakinako o. 24Ap amberak yoma nen kinoba wagarik, ir inawene emerek paga yiluk kiniliti tagalkwi, nadok-kadok ekinakwi ninaruk kolalko o. Eta nir etegerogo eri lani o yiluk, ir lakba warukdek mende nen ekama o. 25Eta ninaruk kuliluk, ap enda kwagago Paulus, Barnabas inom lakba wago o. 26Ap inebe mbere ya, inebe obogar Tuhan Yesus Kristus ake birugwama o. 27Nir nen wadigi Yudas inewe Silas inom, kinoba lakba wago endi, ir imbirak inane paga nen inom, nen wene surat paga eko mende inom, wene yokeragun o. 28Wene kinake yogo mende, Roh Allah inom, nir nen inom pano ar yiluk obok dambulko o. Kir kinoba anggin durogo burak nina'ir nen, kir eku dogorak mende ya mbalogo bogo o: 29maduk ake bu mende nagup o. Amep nagup o. Engganok nggumuk warek mende nagup o. Kumi nen ap nen ugunar kagar-kagar eru maga o. Kir nen wene eta wogalugun kalok, mondok pano arar erugun o. Ma, nir wene yu mende, eta arar yokerago o, ninogari, Wanelak!”

30Nen ir keyagi war-war yugu lagugwarik, ir o Antiokhia lakbarugwa mende, arar lagugwa. Nen ir etoma lagugwarik, jemaat obogar inayonggo biluk, wene mbalek mende enogo ir inaruk paga, obogar yoragugwa. 31Diru mbalek enogo inuwagam endaga talkugama, ir jemaat obok nen wene yi nir ninake pano yegama o, yiluk iniliti adeknggen agage. 32Ir Silas o, nen Yudas o, ir imbirak ap nabi mende arma, ir nen jemaat inom dogolir inaruk wakwi, iniliti aik warinakwi ekugwa. 33Ar Yudas, Silas imbirak jemaat Antiokhia inom welagugwarik ar nen, iniyok paga o Yerusalem lakbagu dogolir, ap kir lakbinagi wagiya mende, nir nen keyagi warinako. Ma kir nen lalok yora lano o, yiluk yoragugwa. 34[Ogwe, ar Silas nen an o Antiokhia yoma ninom dogogun o, yiluk puk agage.]

35Ar Paulus Barnabas imbirak, ir o Antiokhia ambi inom welagugwa. Ir eta dogolir, akuni Tuhan Ane emeriragwi, eku lagugwa.

Paulus, Barnabas imbirak tuan inadik ndak waganggugwa wene

36O dogoluk dek ar, ar Paulus nen Barnabas yoga dogolir, “Yogo, nir yogondak ir ninakburi Yesus ane wagangga mende inuma dombok bikdar luwok o. Etoma lagu dogolir, Allah wene yoragagu mende nenggerogo agiyarik, yiluk ninil dombokdar luwok o,” yorige. 37Yirigemo ar Barnabas nen, kalok pano ar o, ma ar Yohanes Markus yi ninom ar luwok o, yiluk yirige. 38#Kis. 13:13Ogwe ar Paulus nen, ar Markus yi, nir o Pamfilia etoma yabu ninom eru dambek binaniluk, uma lagage enogo arar ma, ninamborna ninom laurak, an na'ir talek o, yiluk yirige. 39Yiginanggige, ar Barnabas nen, Paulus imbirak aredo ambik arar waku lagugwarik, inadik ndak agugwa. Nen ar Barnabas Markus ambudik kodalok, o Siprus etoma arar unda lagugwa. 40Nen ar Paulus Silas imbirak, ir jemaat Antiokhia nen ir inake Tuhan oba tamban erogo barugwama, arar lagugwa. 41Paulus, Silas imbirak ir jemaat o Siria inom, nen Kilikia inom etoma inaruk warir lagugwa.

Currently Selected:

RASUL-RASUL EKUGWA WENE 15: WLW

Highlight

Copy