RASUL-RASUL EKUGWA WENE 14

Ikonium dogolir eku lagugwa wene

1Ar Paulus Barnabas imbirak o Ikonium etoma, etegerogon ar erinakugwa o. Ma ir Yahudi mende tamban erir tagama unggi lagugwarik, wene mondok pano arar yoragugwama, ir Yahudi mende inom, nin ir akuni wedek mende inom, wene yi ebebar o yiluk waganggugwa mendeo. 2Ogwe, ir ap Yahudi mende Ar Yesus ebebar andau nina'ir yirugwa mende nen, akuni Yahudi dek mende amberak inilitimo nomalogo barugwama, ir nen ir akuni Yesus ebebar andarugwa mende ina'ir kuninakugwa. 3Paulus, Barnabas imbirak o etomala paga Allah wene yoragu lagugwa. Tuhan nen ir wene yoragugwa mende. Allah nen inakba karige wene eti ebebar yiluk, obarne wogoragage. Obarne paga Elalin erukbuk mende eku lagugwa. 4Ir akuni inai werek etoma inake mbere agortagugwa, amberak Yahudi inom agwi, amberak Paulus Barnabas inom agwi etagugwa.

5Ir ap Yahudi mende inom, ir ap nin mende inom, ir inewai inane kolek mende inom, nen ir rasul eti inaruwok yiluk inobok mbalkugwa. 6Mende ir rasul-rasul imbirak, o etaga obabur inil yenggak karugwa. Inil kalok nen, inebe ndorogo o Listra, Derbe etoma arar lagugwa. Eta o kota-kota Liakaonia nen pago dogi tagama, nen o amberak inom ar. 7Nen o etoma lagugwarik, wene Pano Wene enogo yoragugwa ar o.

O Listra Derbe nen ekugwa wene

8O Listra etoma ap ambi endaktaga dogolir, endop kunik endago mende welagage. Iyok menarurak obarne mondok dekma tuwan lagikdek ar welagage o. 9Ap eti korek dogolir, Paulus wene yega kalok, we waga ngga lagage. Paulus nen ap eti ebebar andaga il kega lagagerek, 10Paulus ane nggok ar yoga dogolir, “Walak! Kebe ibar menarin!” yiluk yorigemo, ap enogo mendok togo menatuk lagage. 11Akuni nen Paulus eka inil kugu lagugwarik, ir akuni Likaonia inane paga, “Yogo, ir dewa mende akuni inagakdo talek ertatuk agar taga arar wura wagama o,” yiluk naik yirugwa. 12Ir nen Barnabas eti Deus yorugwa nen Paulus eti Hermes yorugwa, ar nen ane yirigemo o, yirugwa. 13Ar imamdewa Zeus eti, ai o kota etila bakma nggwe werekma, ar nen anggumi lembu inom, nen ongga erogi bunga mbalek inom, ir akuni pakalok nen rasul-rasul enogo inake persembahan wogorawok nen yiluk ekunem, ar inom arar wagage o.

14Ir Barnabas Saulus nen, ir akuni wene eti eruwok nen yiluk ekwi inil dagu lagugwarik, imbirak iniyom ndedalogo lakbiluk, inane nggok ar yoragu dogolir, 15#Kel. 20:11; Mzm. 146:6“Wadigi ya, kir nenaganen yegerogo eritagwi o? Nir yi akuni kir ndak-ndak arar o? Nir ya dogolir, wene Pano Wene yokera wago o. Kir nen ye ekwi nde ekwi ebe dek mende eritagwi yoma dambe kalok, Ar Allah iluk mende, waltenak, mbogor agar inom, i laut inom, ye nde agar taga agarik yoma obogar kenamer birige werek, Ar adigar oba warubagik nen yiluk, wene yokera wago o. 16O pagane etoma, ye akuni nde akuni, ir inadik iniliti andalok ekwi dagik, Ar Allah nen dambe dalok welagage o. 17Ogwe, Ar nen ir An yenggak neyagun a yiluk, ye nde eru oba mi atukdek ar o. Eti ebe nena eru, pano ekinabitaga eti arar o. Ma mbogor taga nen miyo wokeraga, eti paga ye mende nde mende enggen pano yirka, tuguluk Ar nen nonggwa mende wokeraga kalok, kiniliti adeknggen agortip o.” 18Eta yoragugwa mende, mondok ndakbuk ar agage o. Ir akuni nen nir kinake bugun ar o yiluk, yugwi ar lagugwa.

19Eta ekunem, ir ap Yahudi mende o Antiokhia, Pisidia, Ikonium nen Listra mende wagugwarik, ir akuni obogar inakla nggagalkugwama, ir akuni obok ir Yahudi inane mban kolalkugwa. Ar Paulus yugun paga mburarir warogo, ebe lir kalok wolok, bakma abel tekman etoma, ar ebe arar wartaga o yiluk. yamburogo wuldi lagugwa. 20Ir Yesus ane waganggugwa mende yi kur erek werekma, ar Paulus iluk atuk, uma unggirugwa. Kubenengge, ar Barnabas imbirak o Derbe nggwe arar lagugwa o.

Ar Paulus Barnabas imbirak o Antiokhia lagugwa wene

21O Derbe lagugwarik, ar Paulus Barnabas imbirak, wene Pano Wene ir akuni yorarugama, akuni ambigar Yesus ebebar o yiluk Ane waganggugwa o. Eta nen ir o Listra lagugwarik nen tuguluk o Ikonium nggwe lagugwa. Nen etoma nen mbiyoktek, o Antiokhia, o Pisidia paga etoma arar unggwi lagugwa o. 22O kota etoma nggwe lagu lagugwarik, ir akuni Ar Yesus Ane wokbiluk mutok lagwi mende, wene iniliti aik wakbarugwa. “Nir nen ninoba anggin panggin kalok nen, yabungga nir Allah werekma Mbogor Agar Ngger erogo bigin mo etoma, ninadeknggen ka lagup mende o,” yiluk yorarugwa. Mar ir rasul-rasul enogo nen, akuni Ar Yesus mutok lagwi mende yemenogo, o kota-kota etomala wene etegerogon arar yoragu lagugwa o. 23Nen o kota dombok etoma, ar Paulus Barnabas imbirak nen tamban ekwi, puasa ekwi, nen ir jemaat-jemaat etoma inake paga, ap inewai jemaat paga dogu menogo bar bagwi, erir lagugwa. Ir nen Allah kinom yabu erugun o yiluk, inake tamban erogo bar lagugwa.

24Eta eku lagugwarik, Paulus Barnabas imbirak tuan o Pisidia nggwe o Pamfilia etoma arar lagugwa. 25Tuguluk Allah ane o Perga etoma yoragu lagugwarik, ir o Atalia etoma arar lagugwa. 26Atalia nen imanggwe to paga, o Antiokhia unggwi lagugwa. Antiokhia etoma nen, kir kimbirak Allah wene wolok lani o, yiluk lakbarugwama, yabu arar ekdiluk inoba wagugwa.

27Ir Allah aburi o Antiokhia mende obogar kuwak ekdalok, ir akugwa mende, Ar Allah nen ir erir lagunem ekige wene, obogar yoragugwa. Ambi Allah nen ir akuni Israel dek tekmana mende, Yesus ane waganuwak nen yiluk, tu kurogo birige karugwa mende inom yoragugwa. 28O Antiokhia etomala, ar Paulus Barnabas imbirak, Allah aburi inom mondok welagugwa.

Currently Selected:

RASUL-RASUL EKUGWA WENE 14: WLW

Highlight

Copy