RASUL-RASUL EKUGWA WENE 13

Ar Barnabas o nen Saulus o imbirak, ir inalubak tebelogo lakbarugwa wene

1Ir jemaat Antiokhia paga etoma ap Allah wene pago nabi-nabi inom, guru-guru inom, welagugwa. Inebe Barnabas, Simeon mudi mende yugwi enogo inom, Lukius Kirene mende inom, Menahem ar Raja Herodes#13:1: Raja Herodes eti: Herodes Antipas o Galilea paga pago welagage mende ernogo. (lih. Luk. 3:1). imbirak ndak-ndak nggulik mende inom, Saulus inom welagugwa. 2Ir Allah inom kunik dogolir tamban ekunem, Roh Allah nen yoraga dogolir, “Yogondak Barnabas o, nen Saulus o, ir imbirak An nake inalubak tebelogo bani o. Nen an ir ineyabu bigi mende wogorak nen o,” yiluk yoragage. 3Ir etegero kuwak ekbiluk tamban eku lagugwarik, Barnabas, Saulus inalubak tebelogo balok, Allah wene wolok lani o, yiluk lakbarugwa.

O Siprus nen ekugwa wene

4Ar Barnabas, Saulus imbirak, Roh Allah nen lakbarigemo, o Seleudikia unggi lagugwa. Eta nen to paga o Siprus unda lagugwa. 5Ir o Salamis unggi lagugwarik, ir akuni Yahudi tamban erir tagama nggwe etoma, Allah wene yorar lagugwa. Nen ar Yohanes Markus nen tuan paga etoma lagunem, yamakdar lagage.

6Nen ir o pulau eti paga lagwi ar dagik, o Pafos kudi arar ari lagugwa. Ari lagugwarik mo, o etoma ar ap Yahudi mende ambi endaga Bar Yesus eti inom abuk agugwa. Nen ar ebe yimagare mende ogwe, ar nen yega dogolir, an eti ap nabi mende arar o, yiluk yega lagage. 7Nen ar Sergius Paulus Gubernur pulau etila mende eti, ar Barnabas eti imbirak pano korok ar welagage. Ap Gubernur iliti werek nen, wene pano mende mban ekama, Barnabas Saulus imbirak, Allah wene yorniri waruwak o, yiluk inayonggo birige. 8Ar Barnabas Saulus imbirak, ap Elimas ebe yimagare mende ma (Yunani wene paga etegerogo yogu lagugwa) ar nen inaru mbalkige mende, ar gubernur Yesus wene wagangganem yiluk akla nggagalkige. 9Ar Saulus, endaga ambi yoruwok nen yiluk eti Paulus ma, nen ar Roh Allah imbirak werekma, ap obagari enogo il birogo dogolir men yorige, 10“Wedak wene enggal nggirik, elege pudulik mende kar arar o! Kar eti wene pano mende kimbirak wim kebe kar yi arar o. Kar Allah nen akuni yoma, ndilinabuwam nggodo mbalinaka damber kigik de nenaluk? 11Yogondak kil kanda, Ar Tuhan nen hukuman koba wurabi taga yi arar o! Kar kil mbuk arigin o. Kar o ya paga, o yoma mo akbinak bega kil kigikdek dogogin o.” Eta yoga kigik, Elimas ilmo tokde mudi arar tebeli wagage o.

Ar il mbuk atuk, inggi ya nduk nda nduk, akuni ar inggi pagago wolok lowak nen yiluk kwaginabir ekige o. 12Ar Gubernur enogo, wene eta etaga il kega lagagerek, Ar Yesus ebebar andarige o. Nenaluk wene Tuhan awene mende eti ar akla ndonggo yirige paga arar o.

Antiokhia Pisidia, Allah wene yoragugwa wene

13Ar Paulus ogari inom, o Pafos nen Perga unda lagugwa, nen ar Yohanes Markus enogo, o etala nen ir dambe dalok, ar uma Yerusalem paga arar lagage o. 14O Perga nen, o Antiokhia, Pisidia lagugwa. Etoma lagugwarik nen, akuni Yahudi mende tamban erir tagama hari Sabat paga, unggiluk korek welagugwa. 15Tamban eku dogolir, Buku Musa wene inom, nabi-nabi wene inom arar endaga taldiluk, ir ap o tamban erir tagama onde nen “Paulus ogari inom eti, wene ambi inaruk warurak werek kalok, akuni yoma inaruk ambi warurak o,” yiluk yoragugwa. 16O telek erogo barugwama, ar Paulus arar menaga lagagerek, inggi paga yenggak kowak nen yiluk eka lagagerek, men yirige,

“Wanelak, nawor nakbur kir Israel mende inom, kir ap wedek mende amberak inom, kir yoma Allah wene pano mutok lagwi agokip o! Ma, an wene ambi yitaga endi, kinaruk dirogon kolalini o. 17#Kel. 1:7, 12:51Ar Allah ap Israel mende inumbui mirinaka lagagerek, ap yi akuni inuma o Mesir etoma dogolir, ir akuni nggok mondok mende arar wigalagugwa. Tuguluk, Ar Allah obarne paga, ir o Mesir nen wogorek wundi wagage o. 18#Bil. 14:34; Ul. 1:31Ir empat puluh tahun paga, o ye dekma nde dekma telekma etoma maduk ekwi dagik, Allah nen yanggorogo togonarek welagage. 19#Ul. 7:1; Yos. 14:1Ap inalebunu tujuh paga, o Kanaan etoma welagugwa mende deger dalok, agar etoma obogar nir ninumbui wogoragagemo, onde agugwa. 20#Hak. 2:16; 1Sam. 3:20Eta erir wagwi dagik, empat ratus lima puluh tahun ekugwama o. Agar Kanaan eta arar wogoralok, Ar Allah nen ap hakim-hakim inapma dogowak nen yiluk barige. Nen ap Hakim o irep paga mondok menagage eti Nabi Samuel arar o. 21#1Sam. 8:5, 10:21 Tuguluk ir nen, ap raja wadok yirugama, Ar Allah nen ap endaga Kish eti akbur endaga Saul suku Benyamin paga wigalek mende, ar eti arar wogoragage o. Ma ar Saul raja werek kigik, empat puluh tahun ekugwa o. 22#1Sam. 13:14, 16:12; Mzm. 89:21 Tuguluk Ar Allah nen ar Saul korekbiluk, ar Daudraja dogon o yiluk, akdipmo menogo birige. Nen yi Ar Allah nen Daud ake yegerogon yirige o, An yogondak ar ap Isai akbur endaga Daud eti obok kwaktagi o, Ar paga An niliti adeknggen aga o. Ar nen an niliti mirik mende erir laga dogogin o. 23Ar Daud umbuwi wigalek paga nen, Ar Allah akuni yoma ndilinabuak nen yiluk, Raja Ndilinakwa ambi lakbi warigin o, yiluk wene warogo birige o. Nen, eti ebe Ar Yesus Raja Ndilinakwa mende yi arar o. 24#Mrk. 1:4; Luk. 3:3Ar Yesus yabu awan ekikdek kigik, Yohanes wagagerek, Israel mende kinomaduk mbo biluk, kiliti kwaktani o, nen kiniliti kwaktagwi kalok, kir ima wukdinagagin o, yiluk yoraga lagage o. 25#Mat. 3:11; Mrk. 1:7; Luk. 3:16; Yoh. 1:20,27Yabu arar eka lagagerek, Yohanes nen, ir akuni yoraga dogolir, ‘Kir nen an yi ta neyartagwi o? An yi ap kir aruwam wakwi enogo dek o. Kinilu dogono, ap eti ebe yabongga warigin o, nen Ar mende sepatu eti, an nen nggolalurak noba ndak dek o,’ yiluk yirige.

26Nawor nakbur, kir ap Abraham umbui mende inom, nawor nakbur kir akuni wedek mende inom, Ar Allah apma tebe yiluk agortip mende obogar, ae wa. Ar Allah nen, wene nir ndil ninaburak wene, arar ninoba lakbi wagage yi arar o. 27Nenaluk ir Akuni Yerusalem werek mende inom, ir inewai inom, ap nir ndil ninaburak mende ebe yi arar o. Ir nen hari Sabat paga, o ninggi nanggi ap nabi-nabi nen yirugwa wene diru mbalek eti endaga talkwi ar ogwe, wene ebe enggen mende inakla ebekikdek ma, Ar Yesus ebe hukuman oba birugwa o. Eta mende, ir nen etegerogo ekugwa paga, ir ap nabi-nabi wene yirugwa mende etoma arar apma dik yirige o. 28#Mat. 27:22-23; Mrk. 15:13-14; Luk. 23:21-23; Yoh. 19:15Ir nen Yesus waruwok nen yiluk, maduk ekige ambi inil kalok dek ar mende, ir Pilatus nggino yogu dogolir, Ar mondok warurak ar o yiluk yirugwa. 29#Mat. 27:57-61; Mrk. 15:42-47; Luk. 23:50-56; Yoh. 19:38-42Ap nabi nen yirugwa mende, Alkitab pada diru mbalek ndak-ndak arar eku lagugwarik, Ar ebe o kari-karo paga nen, nggorogo wukdi watuk, kwiyonla bi lagugwa o. 30Ar Ebe warek mende, Ar Allah nen iluk erogo mendirige o. 31#Kis. 1:3Ar Iluk atuk dogolir, kuben keyam, akuni ar oba wagugwa mende inom o Galilea nen Yerusalem wagugwa. Ir inebe inil karugwa werek eti nen ar, yogondak Ar Ebe iluk agage ninil karugu o yiluk abok bagalogo yonerar tagwi o. 32Etiar ma, wene Pano Wene eti ar, yogondak kir yokerar tagwi o. Wene eti, Ar Allah nen nir ninumbui Ane amburu yorarige mende arar o. 33#Mzm. 2:7Wene ebe eti arar erogo binanengga dogolir, Ar Yesus ebe warekma nen, Ar nen iluk ekdirige o. Nenaluk wene buku Mazmur dua kwak paga diru mbalek yegerogo yirige o;

‘Kar an nakbur arar o.

O yogondak yi paga, an Kombae arar etagi o.’

34 # Yes. 55:3 Ar ebe warek werekma, Ar Allah nen arar iluk ekdirige. Yogondak ar ambi inom warekma etoma watari unggigin dek o. Eti ake, Ar Allah nen wene yegerogo yirige o,

‘An nane amburu oba maduk labek dek mende eti Kar arar erogo bagagin.

Wene nane amburu ebe ar Daud arar yorigimo o.’

35 # Mzm. 16:10 Eta ndak-ndak ayat amberak paga ya yirige ar o,

‘Kar nen kayedoman kane kolek mende eti, Ebe warek pidi aruwak nen yiluk damber kigin dek o.’

36Eta paga ma, ar Daud ebe arar kanggigemo, umbui inuwak paga inom arar kubur erogo birugwa o. Ar Allah nen yabu wogorige mende eti, arar ekige, nen ar Daud ebe warek enogo arar pidi agagemo o. 37Ar Allah warekma nen ilugu dirige mende yi, Ar Yesus ebe mondok pidi arukdek arar o. 38Etama, nawor nakbur wene yi kinilu arni o, Ar Yesus paga nen, wene kinomaduk dek erogo burak mende wene, yokerar tagwi o. 39Etiar ma, kir kinilu erogo o, ir akuni Ar oba iniliti ebebar andagun mende eti, inomaduk ar Musa Allah nen wene yoga kigik diru mbalka dogolir, inomaduk dek erogo bagin dek yirige mende eti kigik ar, inomaduk erek eti dek erogo bagin o. 40Wene ap nabi-nabi yirugwa yi ambi kir kinoba wukanem, kir nen pik pak dikbiluk ekwi dogorak mende yio,

41 # Hab. 1:5 ‘Kir akuni miyuk meyak erogo tebelinakwa yi, pik pak dikbini o!

Kir nen wi'au yiluk nen, kinebe kambugun o!

Yogondak o ya paga, An nen yi ekik-ndi ekik eka nagik,

nen ir akuni nen pik pak mbililogo yokeragun ar ogwe,

kir nen waganugun dek ar o.’ ”

42Wene obogar yoralok, Ar Paulus Barnabas imbirak uma tamban erir tagama nen wundi lagu nanggugwa, ir akuni etoma Allah wene inaruk kulkugwa mende nen, tamban yabongga paga, wene eti ambi inom ar yornerabagik nen, ninoba warno yiluk, inayonggo birugwa. 43Tamban erir tagama nen wundi lagugwarik, lagu dogolir, Paulus Barnabas akuni Yahudi mende inom, akuni nin ap mende inom, ambigar inom mugurek lagugwa. Ma ir rasul-rasul enogo nen, kir Allah obabur pano eti paga, oba kiniliti panggok diluk dogono o, yiluk inaruk wakugwa.

44O hari Sabat paga, akuni o unggul etila mende obogar Allah wene inaruk kuli wagugwa. 45Ir akuni pakalogar wagugwama, ap Yahudi mende nen, ir inair ambik darugwa. Ir nen Paulus miyuk-meyak erogo bugwi, ane yega tebelogo bugwi ekugwa. 46Ekugwa mende, Paulus Barnabas imbirak inakla dakor dogolir, Allah wene telekma yangguk togon ar yoragugwa, “Allah wene yi, kir ndak yokerau paga arar o. Kir wene ebe waganu kina'ir paga nen, kir nen ar nir wene pano mende, Nabedal-kabedal wene eti nina'ir yitagwi o. Yogondak kir dambek binagaluk, akuni nin mende yorar lano o. 47#Yes. 42:6, 49:6Wene Ar Tuhan nen yonerage mende ebe yi o,

‘An nen akuni wedek mende amberak inake paga, kir Yahudi mende eti kinebe akbinak mende etaruak nen yiluk erogo binagarigimo o.

Eti paga nen, ye akuni nde akuni o agar paga yoma, ndilkodaurak mende eti, kir paga nen arar ndilkodagun o.’ ”

48Ir akuni Yahudi mende dek ogwe, ir akuni ninggalok mende nen, Ar Allah wene owadok nen, endai warugun o. Nen ir akuni Ar Allah nen iniluk nabedal kabedal eru ake paga, pulogo bagin mende ernogo, ir nen ebebar o, yiluk andagun o.

49Ar Tuhan ane, o eta obogar wiga lagage o. 50Ogwe, ap o etoma inendaga mbogor mende inom, kumi ap nggok ndak Allah oba um palek inakburi inom, ir ap Yahudi mende nen inakla nomalir lagugwa. Ma ir nen Paulus Barnabas imbirak enogo, tamban erir tagama nen mugogo wul darugwa. 51#Mat. 10:14; Mrk. 6:11; Luk. 9:5, 10:11Ir Rasul imbirak nen, akuni obogar inuwagam, iniluk dogowak nen yiluk, ir iniyok kola, korogo inoba biluk, o Ikonium unggwi lagugwa. 52Ir akuni o Antiokhia etoma, wene waganggugwa mende, Roh Allah inoba labi wura waga, nen ir inakla adeknggen mondok arar etagugwa.

Currently Selected:

RASUL-RASUL EKUGWA WENE 13: WLW

Highlight

Copy