RASUL-RASUL EKUGWA WENE 12
12
Ar Petrus kede warek pigalogo wulka nen Yakobus wakwi ekugwa wene
1Eta paga ap Raja Herodes#12:1: Raja Herodes eti: Ap Herodes Agripa I, ir Yahudi mende werekma ye ai nde ai etoma obogar inewe welagage nen akuni jemaat etoma wigalkunem yiluk, mondok obatne paga inaru mbalkige. 2Etegerogo yega lagagarek, Yakobus Yohanes ogar enogo warurak yirigemo, tega paga wakuga. 3Ir akuni Yahudi mende nen, eta pano eken o yorugwama, Herodes nen eti ndak-ndak ar eka lagage. Ar Petrus kede warurak o, yiluk yirigemo, Petrus kede warogo malakugwa. O eta paga ir Yahudi mende Roti Ragi Bigikdek dago darurak korogar panggo yi wagage o. 4#Kel. 12:1-27Nen ar Petrus pakbiluk, nen ebe kede warek bartagama onggol dirugwa. Nen Ap tentara inebe empat paga dogalek nen, ar Petrus aruwam mondok welagugwa. Nen ambi dogalek mende, ap tentara inebe empat paga barugwa. Ma ar Herodes nen yega dogolir, ar ebe Paska ake dago nalok nen kalok, ar Petrus ebe akuni dogalekma telekma biluk, wene uwak doluok o yiluk yirugwa. 5Ar Petrus kede warek kigik, ir jemaat nen tamban mondok inur kunik, ar Petrus ake eku lagugwa.
Ar Petrus kede pigalogo wuldirugwa wene
6O kukbaga, ar Herodes nen Petrus auwan telekma bigikdek kigik, Petrus inggi kede besi mbere paga warek, ap tentara inebe mbere aruwam dagik nogo yega kigik, nen ir tentara amberak tukande abel tekman nggwe tuam welagugwa. 7Nen ir tuam akerak kigik, malaikat Tuhan etoma menari waga lagagerek, o penjara etoma akbinak ambik ndedalek wedalek ekige. Nen ar malaikat nen Petrus abidik abodok ekigemo ar iluk agage o. Tuguluk ar malaikat enogo nen ar Petrus yoga dogolir, “Wedak, ibar kiluk arin o!” Eta yoga kigik, mbuti kede warek mende yemenogo, aburak ar nggilurogon arar wurkige o. 8Eta etagagemo, malaikat nen, “Kiyom yitaga, sepatu yitaga erin o!” yiluk yorige. Ar Petrus iyom yitaga, nen sepatu yitaga ekigemo, ar malaikat nen, “Yogo kiyom dangguk mende ibar yitan, nen nimbirak wunduwok nen ibar eme o,” yiluk yorige. 9Yotuk ar Petrus malaikat enogo imbirak penjara dambe kalok wundi lagugwa. Ar Petrus nen, ya ebebar ernabi taga yiluk andagidek, ar nen ya nakbi ngganggo kertaga yiluk andarige o. 10Ir imbirak tuwam wakwi inalep mende balok nen tuam yabongga wakwi mende bar-bar, tukande besi paga larek ma arar wagu lagugwa, tukande enogo aburak ar kurtagagemo, imbirak lelok togon wundiluk, lambimo negen lagu dogolir, malaikat enogo ar Petrus dambe kalok, arar dek agage o.
11Eta eka kalok, ar Petrus nen, “Ae yogo, ar Herodes inggimo, nen ap Yahudi mende naru inakla andaga mende, Ar Tuhan nen malaikat ebebar an kede pigal nabuwak nen yiluk, lakbi wagama kigi o,” yiluk yirige.
12Eta ebeka lagagerek, ar Petrus kwe Maria elege Yohanes nen endaga ambi yogu dogolir Markus eti, aguya uma lagage. Lagage mende, ir akuni ambigar dogolir, tamban erugu nanggugwa inoba lagage. 13Petrus nen tu wundi tagama mbu karigemo, kodak ambi endaga Rode, eti nen tu kurik nen yiluk lagage. 14Lagage mende, Petrus ane yega aruk ndaguk togon kulka lagagerek, iliti adeknggen nen tu kurkalokdek, akuni ndak yoraga dogolir, ar Petrus wagarik tekman nggwe dogolir tu mbuk ketaga o, yiluk yorarige. 15Mende ir nen, “Kar kebe kiliti mbalken o!” yiluk yoruga. Mende ar Rode nen, eti Petrus ebebar o. Mende ir nen yogu dogolir, “Kalok eti ar mende malaikat!” yiluk yoruga.
16Yugu nggodek, ar Petrus nen tu mbuk kega mondok ar ekigemo, ir nen tu kurku lagugwa, ar Petrus arar inoba tobarogo unggirigemo, inane lambedagi waku dogolir, bi ambik warkugwa o. 17Tuguluk ar Petrus nen, kinane yugup o, yiluk yorage. Yabungga ar ekige mende, Tuhan nen kede pigalogo wolok wundi wagage mende, mbililogo yoralok, “Yogo wene yi ap Yakobus ogari inom yora lani o,” yoragage. Tuguluk ar Petrus o etoma dambe kalok, o wedekma nggwe arar lagage o.
18O keyalek, ar Petrus ya nenggertaga yiluk, iniliti dek agage. 19Ma ar Herodes nen, ir akuni ar Petrus ibar kwarni o yiluk, yoragage. Yirigemo kwakugwa mende, ar Petrus arar kimak lagagemo, inil kalokdek arar o. Herodes nen ap tentara tuwam welagugwa mende eti, inuwak dologo warinaburak yiluk, yirige.
Eta yiluk ap Herodes ernogo, o Yudea nen o Kaisarea etoma ari lagagerek welagage.
Herodes wartagage wene
20Herodes anini atuk akuni Tirus mende inom, Sidon mende inom, wenemuk yoralok inom agorek welagugwa. O ambi paga, ir obogar Herodes inom dambuluwok o yiluk, wagugwa. Ir nen ap Blastus Raja Herodes uma kepala oba unggurugwama, ar Blastus nen, kalok ndak o yiluk yirige. Yoragage mo, ir Herodes oba unggirugwa. Ir nen nir erom koba onggo mbali wagwima, ninom agorek dogorak dek o yiluk, yorugwa.
21O yi paga yiluk yirugwa paga arar agagemo, Herodes iyom endaga mbogor mende yitalok, nen ar wene yik nen yiluk kotari tagama o ndalek paga, lagagerek wene yoragage. 22Ar wene pano yega kalok, ir akuni nen yugu dogolir, “Yi akuni nen yega dek o, dewa#12:22: Dewa eti, ye mende nde mende paga, akuni kwak, sapi kwak, wam kwak, inakla wadok mutok erogo biluk, anggo warogo amudi kunggwi ninalok, nir wadok mende erogo binanigin yiluk ekwi. nen yitaga o,” yiluk yorugwa. 23Nen Ar Allah alon palkikdek yigi nanggige, Tuhan mende malaikat nen, aruganggo dambuk togo wakige. Wakigemo, ar ebe nggikbi nen elaburta aik kunogo watagage.
24Etanogo nen, Ar Allah Ane nggok wigalir wulka, nen obatne arir laga ekige o.
25Nen ir Barnabas o, Saulus o, yabu arar eku lagugwarik, ar Yohanes Markus eti inom o Yerusalem iniyok paga arar lagugwa.
Currently Selected:
RASUL-RASUL EKUGWA WENE 12: WLW
Highlight
Share
Copy
Want to have your highlights saved across all your devices? Sign up or sign in
