RASUL-RASUL EKUGWA WENE 11

Wene ir ekugwa enogo, Ar Petrus nen ir jemaat Yerusalem paga yora lagage wene

1Ir rasul-rasul inom, akuni Yesus awene waganggugwa mende inom, o Yudea werek mende obogar inaruk kulku dogolir, ir akuni agama Yahudi dek mende ogwe, ir Allah wene arar wagangga o, yiluk inaruk kulkugwa o. 2Ma ar Petrus o Yerusalem arar wagagerek ma, ir akuni Yahudi mende, Ar Yesus Ane waganggugwa mende nen, ar Petrus abok mbalkugwa o. 3Ir nen yugu dogolir, “Ar Petrus yi, nenaluk ir akuni sunat erekdek mende inuma unggir lagan? Nen kinom inarom ninggik ar eken!” 4Yugu nanggugwa, ar Petrus nen, wene edoma nen pik pak mbililogo yoraga dogolir,

5“An o Yope etoma dogolir, tamban ekanem, nakbi ngganggo ambi yegerogon kigi o. An nil puk werekma, nggidimoge yago nggok yoma mbogor taga nen noba wukdi waga kigi o. Nen ugumo penok-penok agade kunikmo, an welaga nem nuwagam arar puk ari waga karigi. 6An nil kwak nggidimoge akla yemenogo birkega lagagi, wee, ye wado nde wado iyok werek mende inom, mbololo agan lektaga mende inom, wado onggama mende inom, tewe onggama mende inom, yagadek etoma darigi o. 7Nil mbenak inakanem, ar ane ambi yonega dogolir, ‘Petrus wae! Ibar kiluk arin o! Endoma obogar, kar nen warogo dago nau ndak o!’ 8Ogwe, an nen onggo yoga dogolir, ‘Ai Tuhan, yoma obogar nau maga yirigen mende o! Ma an nertagodek mende arar o,’ yiluk yorigi o. 9Nen, ae enogo ambi inom mbogor taga nen yonega dogolir, ‘Ye mende nde mende Allah nen tamolke mende, kar nen maga bugup o,’ yiluk yonirige o. 10Tuguluk nggidimoge akala yagadek eti, tir neyagik mban eka kigik, inggi kenagan paga eka lagagerek, obogar wolok mbogor taga dagaga kigi o. 11Eta karigi amor-amor arar, ap inebe kenagan, an kwak nabir o Kaisarea nen, uma an welaganem madi aila werek ma, da wura wagagi o. 12Nen Ar Roh Allah nen, kinom lano o yiluk yonirigemo, an niliti ugun ar ninom lagagi o. Ir ap inebe enam paga ya, ninom o Kaisarea etoma, ap Kornelius eti uma, nir obogar oba unggirugu o. 13Nen, ar ap Kornelius nen, ar malaikat nen oba uma wagagerek nen yorige mende mbilil neraga dogolir, ‘Kar nen akuni ambi o Yope etoma, ap ambi endaga Simon Petrus eti ayonggo lakban o, yiluk yorige o. 14Nen Ar watuk nen wene kar inom, kakburi inom, ndilkinaburak wene yokera warigin o.’ 15Nen an wene auwan etegerogo yeganem.” Ar Petrus nen wene ugu kambok togon, “Ar Roh Allah ir inoba kwi ndade erogo, nir o pagane ninoba wurabi wagage ndak-ndak ar eka karigi o. 16#Kis. 1:5Nen, an nen Tuhan alep yirige mende nakla ebetari wagage, ‘Yohanes nen i paga ima wukdaga mende, kir endoma Allah nen Ar agorengge paga ima wukinabigin yirige o.’ 17Eta ma, ir akuni agama Yahudi mende degar ogwe, Ar Allah nen nir Ar Yesus Kristus oba niniliti ebebar andagu nanggugu worneragage enogo, ir eti enogo ar wogorage o. Etama, an nen Ar Allah nggadi mbalu ndak dek o!”

18Etegerogo yoragagemo, ir nen wene onggo yu dek atuk, Ar Allah nen ekemo yiluk, Ar Allah arar wogok dirugwa o. Ma ir nen yugu dogolir, “Yogo wene etama, ir akuni Yahudi dek mende ogwe, Ar Allah nen ir inake o telek erogo bagerek ma, ir nen nabedal kabedal etau ake paga, ir iniliti kwakbatalok, inomaduk mbo bugwi eku dogorak o,” yiluk yirugwa.

Allah akburi o Antiokhia nen ekugwa wene

19 # Kis. 8:1-4 Ar Stefanus arar waku lagugwarik, Ar Yesus ane waganggugwa mende inaruwok nen yiluk, mugurek lagik erugu nanggugwa, tidik mbidik, o ya nda mbugulku dogolir, amberak o Fenisia lagwi, Siprus lagwi, Antiokhia lagwi, ekugwa o. Ir nen Allah ane akuni Yahudi mende mban yorar lagu lagugwa. 20Nen, ir akuni Yesus ane waganggugwa mende etoma amberak inao Siprus mende, Kirene mende, amberak Antiokhia mende lagu dogolir, wene Pano Wene Tuhan Yesus ekige mende, akuni agama Yahudi dek mende obogar yorar lagugwa. 21Tuhan obarne inom ma, akuni pakalogar Ar Yesus ane waganggwi, inebe Tuhan ake bugwi ekugwa.

22Wene yoma etagage mende, ir Allah aburi o Yerusalem werek mende inaruk kulkugwa. Ir jemaat Yerusalem nen, ar Barnabas o Antiokhia lakbiruga. 23Barnabas nen Allah ekige mende il kalok, iliti adeknggen ambik agage o. Mar ar nen yoraga dogolir, kir kiniliti paga, Ar Tuhan Ane eti dirogo arar mutok lagu dogoni o, yiluk yoragage. 24Barnabas eti iliti mondok pano, Roh Allah imbirak kunik, Tuhan oba mondok panggorogon welaga paga, akuni amberak ar paga Tuhan ane waganggwi eku lagugwa.

25Eta nen Barnabas o Tarsus Paulus kwarir lagage. 26Nen imbirak abuk atuk, Barnabas nen Saulus wolok o Antiokhia lagage. Satu tahun paga akuni wonggaldalok, wene emeriragwi, eku lagugwa. Antiokhia etoma nen, Ar Allah akburi inendaga Kristen mende eti ibibir arar kenam agage o.

27Eta paga, ap nabi inebe mbere kenagan, o Yerusalem nen Antiokhia wagugwa o. 28#Kis. 21:10Ir inogar ambi endaga Agabus, Roh Allah nen yorige paga, ar nen wene elalka dogolir, o ya nda yoma erom no mondok nggok wundigin o yiluk yorarige. (Nen wene eti, ap Kaisar Klaudius werek kigik arar kenam agage o). 29Ir Yesus ane waganggugwa mende, o Antiokhia mende nen dambulogo, Ar Allah akburi o Yudea nggwe werek mende etoma inake yamak dawok o, yiluk inake inamende wonggalkugwa. Ma ir nen inadik ndak dombok ininggimo werek ndak-ndak arar wogoragun o, yiluk yirugwa. 30Inane dambulkugwa mende enogo arar eku lagugwarik, ar Saulus o, nen Barnabas o, imbirak engga nandodek mende yemenogo wolok, Ar Allah akburi inewai inoba, o Yerusalem arar wolok lakbarugwa o.

Currently Selected:

RASUL-RASUL EKUGWA WENE 11: WLW

Highlight

Copy