RASUL-RASUL EKUGWA WENE 17
17
O Tesalonika nen ekugwa wene
1Ar Paulus Silas imbirak tuan o Amfipolis nen Apolonia nggwe o Tesalonika unggwi lagugwa. Etoma ir ap Yahudi mende tamban erir tagama ka lagugwa. 2Ar Paulus ir Yahudi tamban erir tagama etoma lagage. Ar nen, ir Yahudi mende tamban erir tagama, wene lakbigik wakbigik Alkitab wene mbalek mutok mbalitagwi ndak-ndak mbalu yiluk kwakige. Kwak biluk, o hari Sabat paga inggi mbere ambi paga etegerogo eka lagage. 3Ayat Alkitab mbalek nen yirige paga yega dogolir, Allah nen ninewe endaga mbogor ndilninakwa warigin yirige eti, watuk nen anggin-panggin erogo warogo bumo, watatuk lektagama nen iluk arigin o. “Nen Ar Yesus an yokera taga yi, ar ebe endaga mbogor ndil ninakwa mende yi arar o,” yiluk Paulus nen yoragage. 4Akuni ar ebebar yege kwa yiluk andarugwa mende Paulus, Silas inom mugurek lagugwa. Ir akuni Yunani Allah oba um palek mende ambigar inom, kumi inendaga werek mende inom, nen wene yi ebebar o yiluk inakla eberogo waganggugwa.
5Ir Eti paga, ir ap Yahudi mende inanini ambik karugwa. Etiar ma, ir nen akuni o piyalkwa ugunar erir nugwi mende inom nggeralku lagugwarik, o kota etoma kuwak ekdiluk wene werek erogo birugwa. Nen ir akuni Yesus ane waganggugwa mende, ap ambi endaga Yason, uma Paulus Silas imbirak kwaginabir onda mbalinakugwa. Ir nen Paulus Silas imbirak akuni dogalekma inande bagaluwok nen yiluk ekugwa. 6Ogwe, ar Paulus Silas imbirak, inebe dek agugwama, ir akuni Yesus ane waganggugwa mende, ap ambi endaga Yason eti, ogari amberak inom, pagago wogorek lagu dogolir, inane naik agan lagugwa. Lagugwama, “Ap yi o ya-nda mondok maduk eritagwi mende inebe yi o! Yogondak o yoma maduk erninabuwak nen yiluk wagiya o yirugwa. 7Nen, ir inebe ar Yason yi nen ar uma wogorek unggi waga o. Ir nen kaisar Roma mende endaga tebelogo biluk, ap endaga mbogor ambi werek yitagwi o, ar ebe endaga Yesus yega o.” 8Inane etegerogo yugu nanggugwa, akuni o etoma welagugwa mende inom, inarige werek mende inom, obok inabodok luk lak yirugwa. 9Nen ir Yason inom, akuni Yesus ane waganggugwa mende amberak inom, ir inarige werek nen, uang onggo bini o yiluk yoralok inebe wuldarugwa.
O Berea nen ekugwa wene
10O kukbaga eta paga, ar Paulus Silas imbirak akuni ar Yesus ane waganggugwa mende nen, o Berea lani o, yiluk lakbarugwa. Etoma lagugwarik Paulus Silas imbirak, ir akuni Yahudi tamban erir tagama inil kalok unggwi lagugwa. 11Ir akuni o Berea mende iniliti pano, nen ir akuni Tesalonika mende iniliti maduk. Ir nen o kuben keyam Paulus wene yitaga yi, ebebar o yiluk Alkitab wene paga kwakwi, etegerogo eku lagugwa. 12Ir ap Yahudi mende amberak Yesus ebebar o, yiluk ane waganggwi, nen ap Yunani mende inendaga werek mende ambigar inom, nen kumi ap ambigar Yesus ane inom waganggugwa. 13Ap Yahudi Tesalonika mende, ar Paulus o Berea lagarik, Allah wene ir akuni Berea mende emerirage o, yiluk inaruk kolalkugwa. Koldiluk ir o berea etoma wagugwarik akuni iniliti dibi erogo barugwa. 14Nen ar Paulus ogari akuni o Berea mende nen ibar-ibar wolok lait aik paga bilagugwa. Ogwe, ir Silas Timotius eti inom uma kota etoma welagugwa. 15Ir Paulus kimagago wolok o Atena arar bi lagugwarik, ir iniyok paga o Berea etoma ar Paulus nen ir Silas Timotius imbirak ibar noba lakba warno o, yiluk yirige mende wene wolok arar wagugwa.
O Atena nen ekugwa mende wene
16Ar Paulus nen ir Silas Timotius wagwi inaruwam dogolir, o Atena etoma amudi kunir tagwi mende agabak kigirik il kega lagagerek, ar Paulus iliti watega lagage. 17Etegerogo il daga lagagerek, Ar Paulus ir akuni Yahudi mende inom nen akuni amberak Ar Allah ebebar yirugwa mende amberak inom, tamban erir tagama lalok, wene lakbigik wakbigik inom yugu lagugwa. Nen etegerogon ar, ir akuni pasar nggwe etoma welagwi mende inom, wene lakbigik wakbigik yugu lagugwa. 18Ir ap guru-guru Epikuros mende inom, Stoa mende inom, ar Paulus inom wene aredo waku dogolir, ir amberak nen, “Ar Paulus, wene edo obok onggokdek mende kigik, nena wene yigiluk yitaga?” yiluk yorugwa. Nen ir amberak nen, “ir akuni nin inumbui ekugwa wene yitaga o,” yiluk yorugwa. Nenaluk ar Paulus nen, Yesus wene kanggigerek iluk agage wene yoragage paga arar o. 19Ir inom wene onggo yugu lagugwarik wene uwak dolitagama, kur Areopagus ampa etoma nen yega kuwok nen yiluk wolok lagugwa. Wolok lagugwarik, ir nen ar Paulus yogu dogolir, “Nir yogondak kar wene ngger wolok wagan eti yoneran o, yiluk yoruga. 20Kar kane yeganem etoma, adik negen yega keyago o. Eti paga ma, wene enggen mende arar yangguk togon yoneran!” (21Nenaluk, ir akuni o Atena inai werek inom, kuro mende inom, inobabur wene ngger mende negen yugwi kalok, inaruk kulu wadok mondok welagugwa.)
22Paulus o Areopagus etoma akuni ambik kuwak ekugwa inakla menatuk, wene yoraga dogolir, “Akuni o Atena mende yi! Kir nen agama wene mondok kiniliti kunik erir tagama kigi o. 23An nen kir kinuma tuan paga yoma laga waga dogolir, kir nen kurban erir tagama nggwe etoma diru mbalek ambi, ‘Ar Allah Ebe Ninonggokdek Mende Oba,’ yiluk diru mbalek kigi o. Etama, Ar Allah ebe kinonggokdek kigik ar, kir nen wogokdugwi mende eti abok ar, an nen yokera taga o. 24#1Raj. 8:27; Yes. 42:5; Kis. 7:48Ar Allah eti, agar yi inom, agar paga werek mende yoma inom, agabak kigikige werek, nen Ar ebe eti mbogor inom agar inom onde werek ebe Ar arar o. Ar nen ir akuni nen odewa ai palogo bageteka ma etoma dogi tagodek o. 25Ar ir akuni nen yonggwa kau ndak dek. Ar nen akuni iniluk dogu mende inom, tar wakwi mende inom, Ar nen wogora taga o. 26Ar akuni ambiar ebe paga nen, ye akuni nde akuni ir ndi pilogo wigalagugwa o. Ar nen o pagane kwak etoma ar, ir inake o dogowam inom, o telek menda dogogun mende inom, kudi warogo baga, ekige o. 27Eta ir nen Allah ebe inilu atuk kwarir luwak nen yiluk ekige o. Ir nen Ar kwarir nugunem, inakbarek inom abuk aruwak o. Nen Ar Allah ebe nir ninom nen ar ebe maduk agorik dek o 28Ebe akuni nen yirugwa yi ndak-ndak o, nir nen niniluk pano welagwi, ye ekik nde ekik ekwi yoma ar adik obarne paga mban ekwi o. Eti ndak-ndak ar ir ap ndai wakwa mende yirugwa eti,
‘Nir yoma Ar adik aburi mban werek o.’ 29Yogo, nir Ar Allah akburi kalok, nir nen allah Emas mende, perak mende, yigom mende akuni ininggi paga agabak kigirik mende eti wogokburak mondok dek arar o. 30Nir ninonggokdek bulatuk welagagumo, Ar Allah nen lemelogo lakalok, yogondak maduk mbo biluk kiniliti kwaktani yitaga o. 31O irep paga, akuni yoma werek mende obogar ndak-ndak inuwak doligin o. Yabu eti eru mende, eti Ar Allah nen obok pulogo birige mo werek o. Allah nen wene yi eru mende akuni ebe Ar Allah nen pulogo birigemo werek o. Nen ir akuni Ar Allah ebebar ekige o yiluk inilu aruwak nen yiluk, Ar Allah nen akuni kambiluk lektagama nen ilugur birige o.”
32Wene kambiluk iniluk arurak wene yiginanggige, ir amberak nen agarndok kanggwi, “Amberak nen wene eti yabongga ambi inom yinok nen o,” yogwi ekugwa. 33Nen, ir eta wonggalek dogik, ar Paulus nen dambek dalok lagage mende, 34Ap Dionisius anggota majelis ar Areopagus mende inom Paulus wene yirige wokbiluk Yesus oba iliti panggol kugwa.
Currently Selected:
RASUL-RASUL EKUGWA WENE 17: WLW
Highlight
Share
Copy
Want to have your highlights saved across all your devices? Sign up or sign in
