MARKUS 14

L᷊aakal᷊i si Yesus

(Mat. 26:1-5; Luk. 22:1-2; Yoh. 11:45-53)

1 # Sasu. 12:1-27 Kate dua l᷊ou l᷊ai seng l᷊ou ngu Paska l᷊au Sal᷊iwang u Boroti Takoae Raginge. Manga tumbonang u imam l᷊au manga meteri agama mundea l᷊al᷊enge tadeau mangono maname si Yesus dang mamate si Sie. 2Angkung i sire, “Kateho kumbahang i kite mukoa hal᷊i e'e su l᷊ou ko mapia, watu'u tihang makoa gara.”

I Yesus nil᷊anisang

(Mat. 26:6-13; Yoh. 12:1-8)

3 # Luk. 7:37-38 Su tempo ngi Yesus ene su Betania, su wal᷊e ngi Simon ko l᷊inau pia sakie pisi ko makatataku, pia singkatau kowawine nusumongo sarang koa-E. I sie numbawa wotol᷊i pualam simbau tahoe l᷊anisi ko mal᷊ighari, nikoa bou hamu ko mawungi. Su tempo ngi Yesus kakangiang kakange, tau kowawine e'e nuhose wotol᷊i e'e dang naniwohi l᷊anisi e'e su timbo I Yesus. 4Taumata pirangkatau ko ene su se'e l᷊awo nuwawal᷊uang dang nangul᷊i i sire l᷊au i sire. “Apa gunange l᷊anisi e'e nigholo? 5L᷊anisi e'e botonge iwal᷊u su hariga lebe bou tiluhasu doi sal᷊aka,#14:5: doi sal᷊aka: Putuhung 6:37. dang doinge inggile su tau ko susa!” Kuteu i sire nuwawal᷊uang su kowawine e'e.

6Kateho I Yesus nangul᷊i, “Walate kere i sie! Nakurawe i kumu mupakasusa ngi sie? I sie nukoa simbau hal᷊i ko mapia l᷊au makadal᷊o si Sia. 7#Sau. 15:11Tau ko susa sintinia ene su tal᷊oara i kumu. Sintinia tempo boko i kumu mo, i kumu botonge mutul᷊ung i sire. Arawe Ia wal᷊ingewe sarang kal᷊iwuenge dingang i kumu. 8Tau kowawine i'i seng nukoa apang ko botonge ikakoae. Dingang u l᷊anisi e'e i sie seng nanadia si Sia guna ngu pul᷊al᷊uwing-Ku su horo u tempoe. 9Pangimangte! Su kaul᷊i u dunia suapang tampa Habari Mapia bou Mawu Ruata ipul᷊ahabari, kakanoa u tau kowawine i'i sarung iwuke l᷊ai makoa kere putatinaungang si sie.”

I Yudas nukumire musingking I Yesus

(Mat. 26:14-16; Luk. 22:3-6)

10Bou e'e i Yudas Iskariot, singkatau bo i sire mapul᷊odua tumatuhu I Yesus, natamai sarang manga tumbonang u imam dingang u pandung musingking I Yesus si sire. 11I sire mangkate kal᷊iaghi nakaringihi pandung e'e, dang nudiandi nunggile u doi si Yudas. Kuteu i Yudas nanita nundea tempo ko mapia tadeau musingking I Yesus.

I Yesus nukumang kang u Paska dingang u manga tumatuhu-E

(Mat. 26:17-25; Luk. 22:7-14,21-23; Yoh. 13:21-30)

12Su l᷊ou ko kahimotongange su l᷊al᷊ung u sal᷊iwang u boroti ko takoae raginge – su tempo ngu taumata namoto domba ngu Paska – manga tumatuhu I Yesus nukina si Sie, “Su apa kao i Tuang i kami manadia kang u Paska guna ngi Tuang?”

13Kuteu I Yesus nundoi dua ngkatau bou tal᷊oara i sire. “Dakoe tamai sarang soa, pai se'e pia singkatau ko ese kapumbawae bunsari taho u ake, sarung ipusombang i kumu. Tuhukete i sie 14sarang wal᷊e ko itamainge dang ul᷊iko su tataghuang u wal᷊e e'e, i Tuang Guru mukina, su apa tampa I Sie l᷊au manga tumatuhu-E kumang kang u Paska. 15Taumata e'e sarung manibo si kumu tampa simbau mal᷊oahi su wawoe. Tampa e'e seng mbuae niatori mapia, dingang u tatahoe. Sadiaite kaul᷊ie pai se'e guna ngi kite.”

16Bou e'e tumatuhu I Yesus darua e'e natamai sarang soa, Su se'e i sire rua nakahombang kaul᷊ie kere ko niul᷊i I Yesus. Bou e'e i sire nanadia kang u Paska.

17Su huwinge I Yesus nusumongo dingang i sire tumatuhu-E mapul᷊odua. 18#Mzm. 41:10Dang su tempo ngi sire kakangiang kakange I Yesus nangul᷊i, “Raringihi: singkatau bou tal᷊oara i kumu, su orasi i'i kakange dingang-Ku sarung musingking u Ia.”

19Nakaringihi e'e, manga tumatuhu I Yesus nasusa naung i sire. Bou e'e i sire l᷊au i sire nanita nukina si Yesus. “Tantu wal᷊inge ia ko niol᷊ang I Tuang?”

20I Yesus nusumimbahi, “I sie ko singkatau bou tal᷊oara i kumu mapul᷊odua ko kumang su l᷊ama simbau dingang-Ku i'i. 21Tingari bou Ahusi Taumata mang sarung mate kere mawawohe su l᷊al᷊ung u Buki Susi. Kateho wal᷊inge gampang silakae su taumata ko musingking Ahusi Taumata e'e! Mapiang taumata e'e seng ta nipahinding!”

Parjamuang u Mawu

(Mat. 26:26-30; Luk. 22:14-20; 1Kor. 11:23-25)

22Su tempo ngi sire kakange, I Yesus nangal᷊a boroti l᷊au nutarimakase su Mawu Ruata. Bou e'e I Sie nangangompeng boroti e'e dingang u l᷊ima-Nge, wuhue ninggile su manga tumatuhu-E dingang nangul᷊i “Al᷊ae dang kangte, i'i ko badang-Ku.”

23Bou e'e I Sie nangal᷊a cawang u anggori. I Sie nukal᷊iomaneng nutarimakase su Mawu Ruata, bou e'e nangonggo u cawang e'e su manga tumatuhu-E. Bou e'e i sire kaul᷊ie nanginung anggori e'e. 24#Sasu. 24:8; Yer. 31:31-34Bou e'e I Yesus nangul᷊i, “Ko i'i daha-Ku ko nakakoa pudadiandi ngu Mawu Ruata natatapi, daha ko niwoso guna ngu taumata maul᷊i. 25Pangimangte: Ia sarung ta sau manginung anggori i'i l᷊ai sarang murating tempo ngu manginung anggori ko wuhu dingang i kumu su Dunia ngi Yamang-Ku ko Wuhu.”

26Bou e'e i sire nusamperi u samperi dadalo simbau. Nasue e'e i sire natarai sarang Wukiri u Zaitung.

Nubueti Petrus sarung musunial᷊i I Yesus

(Mat. 26:31-35; Luk. 22:31-34; Yoh. 13:36-38)

27 # Za. 13:7 Bou e'e I Yesus nangul᷊i si sire, “I kumu kaul᷊ie sarung tumal᷊ang manintang u Ia. Watu'u su l᷊al᷊ung u Buki Susi seng mawawohe, ‘Mawu Ruata sarung mamate gembalae, dang ghapang u dombae sarung mukaesi.’ 28#Mat. 28:16Kateho samuri ngu Ia sau ipuwangung. Ia sarung muhoro si kumu makoa sarang Galilea.”

29I Petrus nusumimbahi, “Ta, maneng i sire manintang I Tuang, ia sisaneku ta.”

30“Tinaunge,” angkung I Yesus, “su huwi i'i l᷊ai, su horo u manu mukumuku pakarua, i kau seng pakatilu nusunial᷊i u Ia.”

31I Petrus nusumimbahi kahingang, “Maneng ia mate dingang I Tuang, ia sarung ta mangul᷊i ko ia wugha ngi Tuang!”

Dang manga tumatuhu ko wal᷊inge kaul᷊ie l᷊ai nangul᷊i kere'e.

I Yesus nukal᷊iomaneng su Getsemani

(Mat. 26:36-46; Luk. 22:39-46)

32I sire nurating u tampa simbau ko arenge Getsemani dang I Yesus nangul᷊i su manga tumatuhu-E, “Kangiangte su si'i i kumu tintal᷊a Ia tamai mukal᷊iomaneng.”

33Bou e'e I Yesus namaringang i Petrus, i Yakobus l᷊au i Yohanes natamai dingang-E. I Sie seng manita pia pundange masusa l᷊au balisa. 34I Yesus nangul᷊i si sire, “Naung-Ku tumaniu masusa, pundangeng musul᷊ung ko mate. Katanae su si'i dang pundiagae!”

35I Yesus nutingkarau singkodo bou e'e nusuba dang nukal᷊iomaneng. Su l᷊al᷊ung u kakal᷊iomaneng-E I Sie nundo kere wotonge I Sie ta wahal᷊uasu makapundang tempo ngu singsara e'e. 36I Sie nangul᷊i, “I Yamang, o I Yamang, takoae sarang simbau hal᷊i ko ta mariadi si Yamang, hengke ko singsara i'i bou Ia. Kitang ariwe mariadi tumuhu kao-Ku, kateho mang su kao I Yamang.”

37Bou e'e I Yesus sau nusul᷊e dang nakahombang si sire tumatuhu-E kapahuntikie. I Sie nangul᷊i si Petrus, “Simon, katikie i kau? Kitang l᷊ai singkaorasi i kau seng ta makatahang mundiaga?” 38Bou e'e I Yesus nangul᷊i si sire. “Pudadiagako, l᷊au pukal᷊iomanengko tadeau i kumu ta kahombangeng u sasal᷊uka. Tingari roh u mo mukoa apang ko mutatahino, kateho i kumu ta makakoa ual᷊ingu tabieti taumata e'e ko l᷊ome.”

39Nusau paghisa I Yesus natamai nukal᷊iomaneng dingang u didato ko musul᷊ung. 40Bou e'e I Sie sau nusul᷊e sarang tumatuhu-E, dang nakahombang si sire mang mborong katikie, ual᷊ing i sire seng ta makakuhirang u tiki. Kuteu i sire seng wugha minsang apa ko mambeng ipudidato ngi sire si Yesus.

41Suapang I Yesus nusul᷊e sarang koa i sire su katilunge, I Sie sau nangul᷊i, “Kate i kumu mang mborong katikie l᷊au mborong kapangindul᷊enge? Botongete. Seng nurating temponge Ahusi Taumata isarakang su l᷊ima ngu manga taumata bardosa. 42Wangungte maite i kite tamai. Tuhungete! Taumata ko musingking u Ia seng nasongo!”

I Yesus nisame

(Mat. 26:47-56; Luk. 22:47-53; Yoh. 18:3-12)

43Tintal᷊a I Yesus mborong kapudidatonge, i Yudas singkatau bou tal᷊oara i sire tumatuhu-E mapul᷊odua nusumongo. Nasongo l᷊ai dingang i Yudas ghapang u taumata maul᷊i nahia u pera l᷊au manga papukul᷊i. I sire niparentang u manga tumbonang u imam, manga meteri agama l᷊au manga pangaha u tau Yahudi. 44Taumata ko nusingking I Yesus seng mbuae nangatori simbau akal᷊i ko hinonge makoa tatia si sire. I sie nangul᷊i si sire, “Taumata ko daku imbung I Sie seng taumatange. Same'e dang wawae I Sie su l᷊al᷊ung u pudadiaga ko matoghasi.”

45Su tempo ngi Yudas nasongo, i sie turusi natamai sarang koa I Yesus dang nangul᷊i, “Tuang Guru!” bou e'e I Sie nangimbu si Yesus. 46Bou e'e manga taumata ko nusumongo singkahindo dingang i Yudas e'e naname si Yesus l᷊au nuhapusi si Sie. 47Kateho pia tau singkatau ko ene su se'e nanawu perange dang namili l᷊ang u imam ko mawantughi hakiu tul᷊inge nasahing. 48Bou e'e I Yesus nangul᷊i si sire, “Apa su naung i kumu Ia i'i ko singkatau taumata ko dal᷊ai, hakiu i kumu nusumongo nahia u pera l᷊au papukul᷊i tadeau maname si Sia? 49#Luk. 19:47, 21:37Sintinia l᷊ou Ia kapanintironge su tingo ngi kumu su Wal᷊e ngu Mawu, dang i kumu mang ta naname si Sia. Kateho mang seng mambeng kere'e, tadeau mariadi apa ko seng mawawohe su l᷊al᷊ung u Buki Susi.”

50Kaul᷊i u manga tumatuhu-E nutumal᷊ang nanintang I Yesus.

51Singkatau ko makuda ko kitang nupake u heka singgehe pamikung badange, nutumuhu si Yesus. Manga taumata mo maname si sie, 52kateho i sie namilo u heka e'e, bou e'e nutumal᷊ang tintal᷊ang.

I Yesus su tingo ngu Pangadilang u Agama

(Mat. 26:57-68; Luk. 22:54-55,63-71; Yoh. 18:13-14,19-24)

53I Yesus niwawa sarang wal᷊e ngu imam ko mawantughi. Pai se'e kaul᷊i u manga tumbonang u imam, manga pangaha u tau Yahudi, l᷊au manga meteri agama nukomol᷊i. 54I Petrus katuhue si Yesus bou raunge sarang I Sie nasu su lilahi u wal᷊e ngu imam ko mawantughi. Pai se'e I Sie kakangiang kapundarange su sindihang u putung dingang i sire mundadiaga. 55Manga tumbonang u imam l᷊au kaul᷊i u Pangadilang u Agama mutawakal᷊i mundea manga tatia ko mupunsal᷊a ngi Yesus tadeau mupakanawo u hukumang papate si Sie. Kateho i sire mang ta nakahombang tatiange sarang simbau. 56Maul᷊i saksi nikuing tadeau pangonggo u kasaksiang l᷊eo su hal᷊i I Yesus, kateho kasaksiang i sire simbau-simbau kaul᷊ie mutatintang.

57Bou e'e saksi pirangkatau nurumarisi dang nangonggo u wuke l᷊eo i'i bou hal᷊i I Yesus, 58#Yoh. 2:19“I kami nakaringihi taumata i'i nangul᷊i, Ia sarung mupakaopehi Wal᷊e ngu Mawu Ruata ko nikoa u taumata i'i, dang su katilu l᷊ounge, Ia sarung sau mupararisi ko wal᷊inge ko nikoa u taumata.” 59Kateho wuke ngu manga taumata e'e mang l᷊ai kaul᷊ie mutatintang.

60Kuteu imam ko mawantughi nurumarisi su tingo ngi sire kaul᷊ie dang nukina si Yesus. “Apa I Kau ta sumimbahi suapang l᷊aantang i sire si Kau?”

61Kateho I Yesus mangkate marumasi. I Sie ta nusumimbahi sarang singkodo. Bou e'e imam ko mawantughi e'e sau nukina paghisa si Sie, “Apa I Kau Ratu Mananal᷊amati, Ahusi u Mawu Ruata Ko Kasusinge?”

62 # Dan. 7:13 I Yesus nusumimbahi, “Seng Ia I Sie, dang i kumu sarung makawua Ahusi Taumata kakangiang su kuaneng u#14:62: kakangiang su kuaneng u: Putuhung 12:36 Mawu Ruata Ko Makawasa dang sumongo su l᷊al᷊ung u winawa bou l᷊angi!”

63Kuteu imam ko mawantughi e'e munggehe-gehe pakeange#14:63: Munggehe-gehe pakeange: Kakakoa u tau Yahudi muwawal᷊uang. dang nangul᷊i, “Seng ta wahal᷊uasu l᷊ai pia saksi! 64#Im. 24:16I kumu sisane seng nakaringihi apang didato-Nge ko nuhinakang Mawu Ruata. Su orasi i'i apa putusang i kumu?”

I sire kaul᷊ie namutusi I Yesus nunsal᷊a, dang seng hinonge ihukung pakapate.

65Bou e'e taumata pirangkatau nanita nanguru si Yesus, dang i sire nanaka mata-Nge l᷊au namukul᷊i si Sie, bou e'e nangul᷊i, “Kenang tika, minsang i sai namukul᷊i si Kau?” Taumata mundadiaga nutumuhu l᷊ai namal᷊eri si Yesus.

I Petrus nusunial᷊i Yesus

(Mat. 26:69-75; Luk. 22:56-62; Yoh. 18:15-18,25-27)

66Tintal᷊a i Petrus mborong su lilahi, pia singkatau kowawine l᷊ang u imam ko l᷊abo nusumongo sarang pai e'e. 67Suapang nakawua si Petrus kapundarange su sindihang u putung, i sie nutuhung pahesi Petrus pakapia pia dingang nangul᷊i, “Wal᷊ingewe i kau l᷊ai dingang I Yesus tau Nazaret e'e?”

68Kateho i Petrus nusunial᷊i. I sie nangul᷊i su l᷊ang e'e “Ia wugha dang ta nakahingang kaou.” Bou e'e i Petrus natamai sarang tukari sasukang sarang wal᷊e ngi imam ko mawantughi e'e. (Su orasi e'e, manu nukumuku).

69L᷊ang kowawine e'e sau nakawua si Petrus, dang nangul᷊i l᷊ai su manga taumata su se'e, “Tingari ko i sie simbau dingang i sire!” 70Kateho i Petrus sau nusunial᷊i, Ta nal᷊iwue bou e'e, manga taumata su se'e sau nangul᷊i si Petrus, “Seng ta ikapusunial᷊i l᷊ai i kau ko mang tingari singkatau bou i sire, watu'u i kau bou Galilea!”

71Bou e'e i Petrus nanita nutewa dang nangul᷊i, “Ia wugha ngu taumata ko nihabari kumu e'e!”

72Su orasi e'e l᷊ai manu nukumuku karuange. Dang i Petrus nakatinaung ko I Yesus seng mbuae nangul᷊i si sie. “Suhoro u manu mukumuku karuange, i kau seng pakatilu nusunial᷊i u Ia.” Inau i Petrus nusumangi marehe.

Currently Selected:

MARKUS 14: PLT

Highlight

Copy