MARKUS 13

I Yesus muhabari hal᷊i u kaghaghoghahi u Wal᷊e ngu Mawu

(Mat. 24:1-2; Luk. 21:5-6)

1Su tempo I Yesus nanintang u Wal᷊e ngu Mawu, singkatau bou manga tumatuhu-E nangul᷊i, “Tuang Guru, kenang putuhung kakakoa u Wal᷊e ngu Mawu e'e. Tuhungete manga watunge. Wal᷊inge gampang kasidadae!”

2I Yesus nusumimbahi, “I kau seng nakawua kirapa aru kakakoa u Wal᷊e ngu Mawu ko l᷊abo e'e? Takoae sarang simbau bou watu ngu wal᷊e e'e ko matatana mal᷊ahunsuri su tampae. Kaul᷊ie sarung iopehi.”

Kasasusa l᷊au papahang

(Mat. 24:3-14; Luk. 21:7-19)

3Bou e'e I Yesus nakoa sarang Wukiri u Zaitung, dang nukumangiang#13:3: dang nukumangiang: su tempo e'e tau Yahudi mukumangiang boko manintiro. su tampa mutatingo Wal᷊e ngu Mawu. Bou e'e i Petrus, i Yakobus, i Yohanes l᷊au i Andreas nusumongo sarang koa-E guna ngu mudidato dingang-E sisane. 4I sire nangul᷊i si Sie, “Kenang I Tuang pangul᷊i si kami, kangereng temponge e'e sarung mariadi? L᷊au manga tatia apa ko manul᷊ara himoneu seng temponge?”

5“Pakaingati,” angkung I Yesus, “Kumbahang i kumu sarang kaakal᷊eng. 6Sarung maul᷊i taumata sumongo mupake u areng-Ku dang mangul᷊i seng Ia I Sie! bou e'e mangakal᷊i taumata maul᷊i. 7Boko i kumu makaringihi tingihi u l᷊utang l᷊au manga habari u parang, kumbahang mataku. Manga hal᷊i e'e mang mambeng mariadi, kateho e'e wal᷊ingewe seng temponge mukiamati. 8Bangsa simbau sarung rumarisi mundoka bangsa ko wal᷊inge. Negara simbau sarung mangalo mundoka negara ko wal᷊inge. Suapang tampa sarung pia rinuhi l᷊au kal᷊ahutung. Kaul᷊ie e'e wuhue panitakenge, musul᷊ung u pundang u kal᷊iki su singkatau kowawine su tempo ngu mahinding.

9 # Mat. 10:17-20; Luk. 12:11-12 I kumu mambeng pakatatiho, watu'u i kumu sarung samekang dang wawaneng su pangadilang. I kumu sarung rarihang su manga wal᷊e pukakal᷊iomanengang. I kumu sarung wawaneng pupasaruang su manga tumbonang l᷊au manga ratu ual᷊ing i kumu ko tumuhu si Sia. Dang e'e tempo ngi kumu tadeau pangonggo u wuke hal᷊i u Ia si sire. 10Habari Mapia bou Mawu Ruata e'e mambeng ipul᷊ahabari horo su kaul᷊i u bangsa. 11Dang boko i kumu samekang l᷊au wawaneng sarang pangadilang, kumbahang ghumagha apa hinonge ipudidato ngi kumu. Boko seng su temponge mudidato, pudidatote apa ko nipakatitong si kumu su temponge. Watu'u kaul᷊i u manga didato ko ipudidato ngu e'e wal᷊ingewe didatongu sisane, kateho ko nusumongo bou Roh u Mawu Ruata. 12Taumata sarung musingking u ana simbaue tadeau pakipate. E'e l᷊ai sarung mariadi su tal᷊oara iyamang dingang anae. Manga ana sarung mundoka si mama-papange l᷊au manarakang i sire tadeau pakipate. 13#Mat. 10:22I kumu sarung ipubunsi u kaul᷊i u taumata ual᷊ing i kumu tumatuhu-Ku. Arawe taumata ko mutatahang sarang panginsuenge, sarung ipakasal᷊amati.”

Kal᷊al᷊ai ko makawinasa

(Mat. 24:15-28; Luk. 21:20-24)

14 # Dan. 9:27, 11:31, 12:11 I kumu sarung makawua kal᷊al᷊ai ko makawinasa, kararisi su tampa ko ilarang si sie. (Nota su ko mubasa: Putuhung ko apa mangal᷊enge!) Su tempo e'e taumata ko ene su Yudea mambeng tal᷊ang sarang manga wul᷊uri. 15#Luk. 17:31Taumata ko su wawo atu u wal᷊e kumbahang l᷊umintu l᷊au sumu su l᷊al᷊ung u wal᷊e, guna ngu mangal᷊a manga apa. 16Taumata ko su anseri kumbahang musul᷊e mangal᷊a jubange. 17Wal᷊inge gampang katital᷊ie l᷊ou-l᷊ou e'e su manga kowawine ko pia kal᷊uwaenge dang i ma ko mborong kapupasusu ngu ana! 18Pukal᷊iomaneng ko tadeau manga hal᷊i e'e kumbahang mariadi su tempo ngu tahiti. 19#Dan. 12:1; Kl᷊h. 7:14Su l᷊ou-l᷊ou ko matital᷊i e'e sarung pia kasasusa ko mborong tangkeng nariadi, mangki bou titae Mawu Ruata nukoa dunia sarang l᷊ou i'i, dang sarung ta mariadi l᷊ai. 20Kere botonge Mawu Ruata ta mupakapol᷊o ngu tempo e'e kuteu takoae sarang singkatau masal᷊amati. Kateho ual᷊ingu umati-E, Mawu Ruata nupakapol᷊o ngu tempo e'e.

21Su tempo e'e boko singkatau mangul᷊i si kumu, ‘Tuhungete Ratu Manal᷊amati e'e ene su si'i arako tuhunge I Sie ene su se'e!’ – Kumbahang mangimang su taumata e'e. 22Watu'u manga sihing u mananal᷊amati l᷊au manga mahang nabi sarung sumongo. I sire sarung mukoa manga hal᷊i ko takoae sul᷊unge dang kaul᷊i u ko makal᷊aherang tadeau mangakal᷊i kiko botonge sarang umati u Mawu Ruata l᷊ai. 23Inau, pakal᷊aingati! Kaul᷊ie seng bou Daku nipakatitong si kumu suhoro u hal᷊i e'e mariadi.”

Sasongo ngu Ahusi Taumata

(Mat. 24:29-31; Luk. 21:25-28)

24 # Yes. 13:10; Yeh. 32:7; Yl. 2:10,31, 3:15; Kl᷊h. 6:12 “Mal᷊iu tempo kasasusa e'e, matangutiti sarung mutingkarundung, l᷊au wul᷊ang seng l᷊ai ta suminang. 25#Yes. 34:4; Yl. 2:10; Kl᷊h. 6:13Manga wituing sarung manawo bou l᷊angi, l᷊au apang mangangawasa ngu kinoang sarung mukakal᷊imbuhung. 26#Dan. 7:13; Kl᷊h. 1:7Su tempo e'e ana u taumata sarung ikawua sumongo su l᷊al᷊ung u winawa dingang u kawasa ko l᷊abo l᷊au kawawantughi. 27I Sie sarung mundoi u manga malaikati pangomol᷊i umati ko nipile-E bou pa u wuku ngu dunia, bou pondol᷊i u dunia sarang pondol᷊i l᷊angi.”

Tintiro bou kau ara

(Mat. 24:32-35; Luk. 21:29-33)

28“Pangal᷊ako tintiro bou kau ara. Boko manga lelange ko dadio ko ijo l᷊au ko mal᷊owo, dang manita mutuwo, i kumu matitong himoneu tempo ngu titi seng masandighi. 29Kere'e l᷊ai boko i kumu makawua kaul᷊ie e'e mariadi, i kumu matitong temponge seng masandighi kahingang.#13:29: temponge seng masandighi kahingang: arako I Sie seng masandighi, seng masandighi ruminta. 30Katitongte! kaul᷊i u hal᷊i i'i sarung mariadi su horo u manga taumata ko wiahi orasi i'i masue mate. 31L᷊angi l᷊au dunia sarung mailang, arawe didato-Ku tatapi sarang kal᷊iwuenge.”

Takoae sarang singkatau matitong l᷊ou l᷊au orasi

(Mat. 24:36-44)

32 # Mat. 24:36 “Manengwe kere'e, takoae sarang singkatau ko matitong kangereng l᷊ounge arako kangereng orasi. Manga malaikati su sorga wugha dang Ahus-E mang l᷊ai wugha, kitang I Yamang sisane matitong. 33Inau i kumu mambeng pundiaga dang pakal᷊aingati, watu'u i kumu wugha ngu kangereng temponge. 34#Luk. 12:36-38Kakakoae musul᷊ung u singkatau ko nanintang u wal᷊enge bou e'e nul᷊umal᷊eng nakoa sarang tampa marau. I sie nuparenta su manga paparentange pangurusi wal᷊enge, l᷊au nangonggo u hal᷊i si sire singkatau-singkatau. Su mundadiaga tukari nitanatange tadeau pundiaga tukari pakapia-pia. 35Watu'u e'e i kumu mambeng pakadadiaga, watu'u i kumu wugha kangereng tataghuang u wal᷊e e'e sarung musul᷊e – pari wawul᷊aeng, pari kal᷊oarange, pari kalonge, arako pari su tempo ngu matangutiti maburesi. 36Boko i sie singkahuwiu nusumongo, kumbahang sarang i sie makahombang si kumu mborong katikie. 37Apang ko Daku ihabari si kumu i'i, Daku ihabari l᷊ai su manga taumata: pakadadiagate!”

Currently Selected:

MARKUS 13: PLT

Highlight

Copy