MARKUS 12

Papinintu pul᷊ahal᷊i awuhi anggori

(Mat. 21:33-46; Luk. 20:9-19)

1 # Yes. 5:1-2 Bou e'e I Yesus nanita nangul᷊i dingang u papinintu su manga tumbonang u imam, manga meteri agama l᷊au manga pangaha u tau Yahudi e'e. I Yesus nangul᷊i, “Pia singkatau ko nusuang u anggori su awuhi simpalang, bou e'e nipagarenge nal᷊iku. Bou e'e i sie nukal᷊i l᷊ohange guna ngu pamuhukang wua ngu anggori, bou e'e i sie nukoa wal᷊e dadiaga. Nasue e'e awuhi e'e nipakisewae su mul᷊ahal᷊i pirangkatau, wuhue i sie nuwua sarang soa ko wal᷊inge. 2Suapang seng temponge manipo wua ngu anggori e'e, taumata e'e nundoi u paparentange singkatau sarang koa i sire mul᷊ahal᷊i awuhi e'e, tadeau manarima bahageange. 3Kateho manga mul᷊ahal᷊i e'e naname paparentang e'e. Wuhue nipukul᷊i sire, bou e'e niroi pakapul᷊e dingang u l᷊ima mapul᷊o. 4Sau bou e'e tataghuang u awuhi e'e nundoi u singkatau paparentange ko wal᷊inge. Kateho paparentang e'e nipukul᷊i u manga mul᷊ahal᷊i e'e su timboe, wuhue nitokol᷊i apiru nirohangeng. 5Tataghuang u awuhi e'e nusau nundoi u paparentang ko wal᷊inge. Kateho paparentang e'e nipate ngi sire. Dang maul᷊i l᷊ai paparentang ko wal᷊inge ko koateng i sire turusi kere'e, pia ko nidudu dang pia l᷊ai ko nipate. 6I sai l᷊ai su orasi i'i ko botonge ikaroi tataghuang u awuhi e'e? Seng kate singkatau, e'e ko anae sisane ko ikukindaghie. Panginsuenge i sie mang nundoi anae sarang koa i sire mul᷊ahal᷊i e'e. Su sipirange, “Tantu anaku e'e mang adateng i sire.” 7Kateho manga mul᷊ahal᷊i e'e kapudidatonge i sire l᷊au i sire, ‘Ko seng i sie i'i tataghuang u pusaka e'e. Maite i sie pateng i kite, tadeau pusakae al᷊akeng i kite!’ 8Inau anae nisame i sire, mbuhue nipate. Bangkenge nirume i sire sarang l᷊ikuru awuhi e'e.”

9Mbuhue I Yesus nukina, “Apa sarung koateng u tataghuang u awuhi e'e? Nal᷊ahe i sie sarung sumongo dang mamate apang mul᷊ahal᷊i e'e, mbuhue manarakang u awuhi e'e su mul᷊ahal᷊i ko wal᷊inge. 10#Mzm. 118:22-23I kumu tantu seng mbuae nubasa ayeti i'i su l᷊al᷊ung u Buki Susi,

‘Watu ko ta napake su manga base u wal᷊e

seng nakoa watu panitakenge.

11Ko i'i nikoa u Mawu,

wal᷊inge gampang sidadae!’ ”

12Inau manga pangaha u taumata ngu Yahudi ko nakaringihi papinintu e'e, mundea l᷊al᷊enge maname si Yesus, watu'u i sire matitong papinintu e'e nitarang I Yesus si sire. Kateho i sire mataku taumata maul᷊i. Inau i sire nul᷊umal᷊eng nanintang I Yesus.

Hal᷊i u pamamaehi balasteng

(Mat. 22:15-22; Luk. 20:20-26)

13Taumata ngu Farisi pirangkatau l᷊au sire taumata ngi Herodes niparentang pangakal᷊i si Yesus dingang u mul᷊al᷊ahaghi kakina. 14I sire nusumongo sarang koa I Yesus dang nangul᷊i, “Tuang Guru, i kami matitong I Tuang matul᷊iri dang ta mundia ngu tingihi sai-sai. I Tuang manintiro mal᷊ahe hal᷊i u kao u Mawu Ruata guna ngu taumata, watu'u I Tuang ta mutuhung pahesi. Ho, kenangko i Tuang puhabari si kami, ‘Tumuhu atorang u agama ngi kite, botonge mamaehi balasteng si Kaisari arako ta? Apa i kite mambeng pamaehi balasteng arako ta?’ ”

15I Yesus seng matitong l᷊eo i sire, I Sie nusumimbahi, “Hakiwe i kumu mangakal᷊i si Sia? Kenang andaghi si Sia doi sal᷊aka simbau.”

16Kuteu i sire nangonggo doi sal᷊aka simbau si Sie. Bou e'e I Yesus nukina si sire, “I'i gambari l᷊au areng i sai?”

“I Kaisari,” sasimbahi i sire.

17“Ho, boko kere'e,” angkung I Yesus, “Onggoe si Kaisari apa ko koa i Kaisari, dang su Mawu Ruata apa ko koa u Mawu Ruata.”

I sire naherang nakaringihi si Sie.

Hal᷊i u puwawangung bou papate

(Mat. 22:23-33; Luk. 20:27-40)

18 # Wuk. 23:8 Pira ngkatau bou komol᷊ang u tau Saduki nusumongo sarang koa I Yesus. (I sire e'e manga taumata ko pia titonge uare taumata ko nate seng ta sarung muwangung.) 19#Sau. 25:5I sire nangul᷊i si Yesus, “Tuang Guru, I Musa namohe u atorang i'i guna ngi kite: ‘Boko singkatau ko ese mate dang takoae anae, kuteu tuaringe mambeng mukawing u wal᷊unge e'e tadeau makaonggo u hintou su tau ko nate e'e.’ 20Pia i sire pitu tamahuari. Ko iyakang nukawing, bou e'e nate takoae anae. 21Bou e'e ko karuange nukawing dingang u wal᷊unge, kateho i sie nate l᷊ai takoae ana. Hal᷊i ko musul᷊ung nariadi l᷊ai su tuaringe katilunge, 22dang turusi kere'e sarang nurating u kapitunge. Panginsuenge tau kowawine e'e nate l᷊ai. 23Su tempo ngu taumata nate sau ipuwangung, makoa kawing i sai tau kowawine e'e? Watu'u i sie seng mbuae nipukawingang i sire pitu kaul᷊ie!”

24I Yesus nusimimbahi, “I kumu seng ta nakahino. Ual᷊ing i kumu ta nakahingang didato ngu Buki Susi l᷊au kawasa ngu Mawu Ruata. 25Boko taumata mate ko sau muwangung, i sire seng ta mukawing, kateho i sire sarung muwiahi kere malaikati su sorga. 26#Sasu. 3:6Dang hal᷊i u taumata nate sau ipuwangung, i kumu mang mborong ta nakabasa su Buki i Musa hal᷊i u ghal᷊umue ko kahenange? Su l᷊al᷊ung u manga ayeti e'e kawawohe, ‘Mawu Ruata nangul᷊i si Musa, ko Ia Mawu Ruata ngi Abraham, Mawu Ruata ngi Ishak, l᷊au Mawu Ruata ngi Yakub.’ 27Mawu Ruata e'e wal᷊inge Mawu Ruata ngu tau ko nate. I Sie Mawu Ruata ngu tau ko wiahi. I kumu seng nunsal᷊a kahingang!”

Parenta ko kahimotongange

(Mat. 22:34-40; Luk. 10:25-28)

28 # Luk. 10:25-28 Bou e'e nasongo singkatau meteri agama mundaringihi didato ngi Yesus dingang u manga taumata bou komol᷊ang u Saduki e'e. Meteri u agama e'e nakawua si Yesus kere'e kapiange nusumimbahi su manga taumata e'e. Kuteu i sire nukina si Yesus. “Parenta sude'e ko kal᷊abokange bou kaul᷊i u parenta?”

29 # Sau. 6:4-5 I Yesus nusumimbahi, “Parenta kahimotongange ko i'i: ‘Raringihi ko, ei i kumu tau Israel! Mawu Ruata ngi kite, Mawu e'e mang simbau.#12:29: Mawu Ruata ngi kite, Mawu e'e mang simbau: arako Mawu e'e ko Mawu Ruata ngi kite, kitang e'e Mawu. 30Kindaghiteko Mawu Ruata ngi kumu dingang kal᷊abo u naung ngi kumu, dingang u kaul᷊i u jiwa ngi kumu dang kaul᷊i u sipirang i kumu dang dingang u katatoghasi kumu.’ 31#Im. 19:18Parenta karuange ko i'i: ‘Kindaghiteko sinsul᷊ungu, musul᷊ung i kau kumindaghi u watangengu sisane.’ Seng takoae l᷊ai parenta ko wal᷊inge ko lebe l᷊abo bou parenta darua i'i.”

32 # Sau. 4:35 Bou e'e meteri agama e'e nangul᷊i si Yesus, “Nuhino kahingang, Tuang Guru! Mang tingari apa ko nididato ngi Tuang: Mawu Ruata e'e ko Mawu Ruata mang simbau, dang takoae l᷊ai Mawu Ruata ko wal᷊inge. 33#Hos. 6:6Dang taumata mambeng kumindaghi u Mawu Ruata dingang u kaul᷊i u naunge dang dingang u kaul᷊i u sipirange dang dingang u kaul᷊i u katatoghasie. Dang l᷊ai i sire mambeng kumindaghi u sinsul᷊unge kere watangenge sisane. E'e lebe kapiange sul᷊ung u manumba sasumba ko itutung dang manga sasumba ko wal᷊inge su Mawu Ruata.”

34I Yesus nakawua meteri agama e'e seng kere'e kapiange nusumimbahi. I Yesus nangul᷊i si sie, “I kau seng masandighi makoa tataho u umati Mawu Ruata.”

Bou e'e seng takoae sarang manga singkatau l᷊ai ko wahani makina si Yesus.

Hal᷊i u Ratu mananal᷊amati

(Mat. 22:41-46; Luk. 20:41-44)

35Su tempo ngu kapanintironge su l᷊al᷊ung u Wal᷊e ngu Mawu, I Yesus nukina, “Kirapawe manga meteri agama e'e botonge makapudidato himoneu Ratu manal᷊amati e'e ko hintou ngi Daud? 36#Mzm. 110:1Sumbal᷊i i Daud sisane – ual᷊ingu nipakasua ngu Roh u Mawu Ruata – nangul᷊i,

‘Mawu nangul᷊i su Mawuku:

Kangiangte su kuaneng-Ku#12:36: Kangiangte … kuaneng-Ku: Tumuhu adati tau Yahudi, ko nionggol᷊ang adati dang kawasa kumangiang su simbuka kuaneng.

sarang ia mukoa apang roka-U sumulung si Kau.’

37Inau boko i Daud musigho ngu Ratu mananal᷊amati e'e Mawu, mariadiwe kirapa I Sie hintou ngi Daud?”

L᷊aingati tadeau pakatatiho su manga meteri agama

(Mat. 23:1-36; Luk. 20:45-47)

Taumata maul᷊i ko ene su Wal᷊e ngu Mawu e'e mal᷊uasi nakaringihi si Yesus nanintiro. 38I Sie nudidato si sire, “Pakatiho su manga meteri agama, Kao i sire l᷊umal᷊eng dingang u juba mananandu dang makihaghi adateng su manga pasari. 39I sire mo su manga tampa mawantughi su l᷊al᷊ung u wal᷊e pukal᷊iomanengang dang su manga sal᷊iwang. 40I sire nangakal᷊i manga kowawine ko wal᷊u dang mamal᷊aho wal᷊enge. Dang tadeau manaka kakanoa i sire ko dal᷊ai e'e, i sire mukal᷊iomaneng manandu-nandu. Hukumang i sire sarung mabuha!”

Sasumba ngu tau kowawine ko wal᷊u

(Luk. 21:1-4)

41Su tempo ngu kakangiang mutatingo ngu kasi u sasumba su l᷊al᷊ung u Wal᷊e ngu Mawu, I Yesus kaputuhunge manga taumata ko mutaho u doi ngi sire su l᷊al᷊ung u kasi e'e. Maul᷊i taumata kala mutaho doi ngi sire mal᷊aul᷊i; 42Bou e'e pia singkatau kowawine ko wal᷊u ko susa nusumongo l᷊ai. I sie nutaho u doi nge witu ko kaesi darua ko harigange kakadiokange. 43Kuteu I Yesus nukui tumatuhu-E bou e'e nangul᷊i si sire, “Tuhungeko pakapia i'i: Tau kowawine ko wal᷊u ko susa e'e seng nutaho lebe maul᷊i su kasi bou kaul᷊ie ko nitaho u manga taumata ko wal᷊inge. 44Watu'u i sire kaul᷊ie nangonggo bou lebenge kakala ngi sire. Arawe tau kowawine ko wal᷊u e'e maneng kere'e kasusange nangonggo u apang patiku kaul᷊ie ko ene si sie – ko hino ngu ipake guna ngu ipuwiahi.”

Currently Selected:

MARKUS 12: PLT

Highlight

Copy