MIKHA 3

I Mikha mundoka manga pangaha u Israel

1Pundaringihiko, ei i kumu mangangawasa Israel! Tuhu hinonge i kumu matitong apang ko maadili, 2kateho i kumu katewe mubinsi u ko mapia, dang mal᷊uasi dingang u apang ko dal᷊ai. Bangsaku borong wiahi seng niwuni i kumu, dang i kumu nunggaghehe ghisinge bou manga duhinge. 3I kumu nukumang bangsaku. Pisinge nighaghehe i kumu dang manga duhinge nighaghoro ngi kumu. I kumu nangangohe si sire kere nangohe daging guna ngu itaho su l᷊al᷊ung u kuring. 4Sarung murating temponge i kumu mukumiha mundo tul᷊ung su Mawu, kateho I Sie mandi musumimbahi. I Sie sarung ta mundaringihi manga kakal᷊iomaneng i kumu, ual᷊ing i kumu seng nukoa ko dal᷊ai.

5Bangsaku niakal᷊eng u manga nabi ko mamatehi ko mapia su taumata ko mangonggo doi, kateho mundoka dang mupakasana u taumata ko ta mangonggo. Su manga nabi ko kere'e, Mawu nuhengetang, 6“Ei nabi, tempo ngu seng masandighi masue; matangutitiu seng kasasirae. I kumu sarung ta l᷊ai makarea kawawua ko mul᷊ahe u manga kirou-Ku. I kumu sarung ta l᷊ai makapamatehi manga apa.” 7Manga taumata ko mamatehi l᷊ou su tingo sarung mamea ual᷊ingu papatehie ta nariadi. I sire kaul᷊ie namea ual᷊ingu Mawu Ruata ta nusumimbahi si sire.

8Kateho hal᷊i u watangengku i'i, Mawu seng nutaho si sia dingang u roh-E l᷊au kawasang-E. Ia nionggol᷊ang-E pangangina hal᷊i u kal᷊aadili, dang l᷊ai kawawahani guna ngu mul᷊ahe su tau Israel manga dosa ko seng nikoa i sire. 9Pundaringihiko manga didatoku i'i, ei i kumu mangangawasa ngu Israel ko mubinsi u kal᷊aadili dang mangal᷊intuing kal᷊ahino. 10I kumu mamangung Yerusalem, soa ngu Mawu Ruata, nialasi su pamamate l᷊au su hal᷊i ko takoae kal᷊aadili. 11Manga mangangawasa ngu soa mamarenta tadeau makarea doi ngu soroki, manga imam manintiro tita ngu Mawu tadeau makarea wawaehi, dang manga nabi mundo tatul᷊ara bou Mawu Ruata tadeau makarea doi – bou e'e i sire kaul᷊ie mangina Mawu ene su simbuka ngi sire. I sire mangul᷊i, “Mawu ene su tal᷊oara i kite; i kite sarung ta ikahino ngu silaka.”

12 # Yer. 26:18 Ual᷊ingu kal᷊al᷊ai i kumu e'e, Sion sarung ipacoli kere anseri, Yerusalem sarung makoa ambung u tuiri, dang bongkong u Wal᷊e ngu Mawu sarung makoa ngudae.

Currently Selected:

MIKHA 3: PLT

Highlight

Copy