MIKHA 2

Sisipi manga taumata ko manira taumata ko susa

1Silaka su manga taumata ko mukirou ko dal᷊ai tintal᷊a kal᷊al᷊oka su l᷊al᷊okang su tempo ngu huwi, bou e'e mupal᷊al᷊eng u e'e su tempo ngu mal᷊ukari ual᷊ing i sire pia katatoghasi guna ngu mukoa e'e. 2Boko i sire mo anseri simbau, pal᷊ahong i sire. Boko i sire mo wal᷊e simbau, ahong i sire. Rarotong arako l᷊ai wal᷊agheng takoae ko matatapi.

3Ual᷊ingu e'e Mawu nuhengetang, “Ia mukirou ngu silaka si kumu, hakiu i kumu ta makal᷊iwiri. Su tempo ko soe e'e i kumu ta makal᷊al᷊eng l᷊ai dingang oboti. 4Sisipiu sarung ipake u taumata kere l᷊aheghesang, dang i sire sarung mukoa samperi pul᷊al᷊utu i'i,

‘Mawu seng nuhampasi wanua ngi kami i'i

dang nionggo su ko nanaweng si kami.

I kami seng naghaghoro kahingang.’”

5Ual᷊ingu e'e, boko murating temponge wanua e'e isul᷊e su umati Mawu, takoae sarang singkatau bo i kumu ko sarung makatarima bahageange.

6Manga taumata munasi si sia, “Kumbahang munasi si kami. Kumbahang munasi u kaul᷊i u e'e. I kami sarung ta mamea. 7Kumbahang mangiral᷊ing umati Israel seng nikutoki Mawu! Mawu sarung ta mukoa manga hal᷊i ko kere'e. I sie ta sarang paghisa kailangeng u pusasabari. Wal᷊ingewe I Sie mudidato dingang mahimumu su manga taumata ko mukoa ko nuhino?”

8 Mawu nusumimbahi, “Ko i kumu seng nangalo umati-Ku kere roka. Taumata musul᷊e bou nuparang dingang u pul᷊aharapi sarung makapundang matatapi su wal᷊enge, sumbal᷊i pai se'e i kumu seng kapangampal᷊i guna ngu muhampasi wal᷊enge. 9Manga kowawine su tal᷊oara u umati-Ku nitokol᷊i kumu bou wal᷊e ko ikukindaghi i sire, dang nihampasi kumu sarang kal᷊iwuenge al᷊amati ko Daku nionggo su manga ana i sire. 10Puwangungko dang tamaite; su si'i seng ta l᷊ai matatapi. Manga dosa ngi kumu seng nupasongo ngu silaka ko makal᷊ahiasi su tampa i'i.

11I kumu mo u nabi ko mul᷊eo l᷊au mangakal᷊i dang mamatehi himoneu i kumu sarung managhuang anggori l᷊au inung ko makabukang mapene-pene.”

Diandi ngu kasasal᷊amati

12 mawu sau nuhengetang, “Ei umati Israel ko mborong nal᷊umbei! I kumu nal᷊ahe sarung Daku ikomol᷊i dang Daku ipakasimbau kere domba ko nusul᷊e sarang kuhunge. Kere nguda u rindulu ko napene u domba, kere'e l᷊ai wanua ngu sarung mapene l᷊ai dingang u taumata maul᷊i.

13Ia sarung mamuka l᷊al᷊eng dang mumbawa si kumu musumuwang bou pundandumekang. I kumu sarung manuhuri manga tukari u soa dang matamai dingang takoae ko makasahaghe. Ia Mawu sisane, ko Ratu ngi kumu, dang Ia sarung mangaha si kumu musumuwang.”

Currently Selected:

MIKHA 2: PLT

Highlight

Copy