MIKHA 1

1 # 2Mar. 15:32-38, 16:1-20, 18:1–20:21; 2Taw. 27:1-7, 28:1–32:33 I Mikha asal᷊ie bou soa ko dio simbau arenge Moresyet. Su tempo wanua ngu Yehuda niparenta ngu ratu mutatuhu i Yotam, i Ahas, l᷊au i Hizkia, i Mikha nanarima tatanata ngu Mawu hal᷊i u Samaria l᷊au Yerusalem.

Sasangi guna ngu Samaria l᷊au Yerusalem

2Pundaringihiko, ei manga bangsa!

Putuhungko pakapia, ei taumata ngu kaul᷊i u dunia!

Mawu Ko Karangetange musumongo

kere saksi mundoka si kumu kaul᷊ie!

Raringihiko I Sie muhengetang

bou wal᷊e-Nge ko susi su sorga.

3I Sie mul᷊umintu bou katanakeng-E ko susi

dang mul᷊umal᷊eng su wawo u manga pusu u wul᷊uri su dunia.

4Manga wul᷊uri natuno su al᷊ung pal᷊eri u l᷊aeri-E

kere liling su l᷊al᷊ung u putung ko kahenange;

tanange naondol᷊i nawunsal᷊i su manga wal᷊ange,

kere ake su wawo u bongkonge kaansehe sintanae.

5Kaul᷊i u e'e sarung mariadi ual᷊ingu tau Israel nubardosa dang nanukung su Mawu Ruata. I sai ko nakakoa Israel nubardosa? Wal᷊ingewe Samaria pusati u soae sisane? I sai ko nakakoa Yehuda nanumba barhala? Wal᷊ingewe Yerusalem sisane? 6E'e sabapie Mawu nuhengetang, “Ia sarung mukoa Samaria mariadi ndu u tuiri su tenenge, dang tampa u taumata musuang anggori. L᷊inau opehi u soa e'e sarung Daku irume su wal᷊ange, dang manga dasarie Daku iwawungkal᷊a. 7Manga patonge ko mal᷊al᷊ighari sarung ipakaghaghoro dang apang barang ko ionggo su manga kowawine ko kapuhal᷊ie su kuil sarung itutung, l᷊au manga barhalange ipakawinasa. Manga barang e'e ko suke ngu pananumba su dewa ko mangonggo u katatawa. Orasi i'i kaul᷊i u e'e sarung iwawa u manga rokae guna ngu sasumba tatarima kase su manga dewa ngi sire.”

8Ual᷊ingu e'e ia, i Mikha nasusa naung dang nukarubu. Ia sarung mul᷊umal᷊eng tintal᷊ang dang takoae l᷊aumpahi l᷊aeri tadeau manode kirapa kasusange naungku. Ia sarung muhumuwu kere kapuna l᷊ul᷊u dang munggal᷊o kere burung onta. 9Watu'u manga l᷊esi u Samaria seng ta maul᷊e, dang Yehuda sarung ikahinong u sisipi ko musul᷊ung. Silaka seng nurating u Yerusalem, tukari u soa ngu wanuaku.

Roka seng masandighi mahumpa su Yerusalem

10Kumbahang muhabari su manga roka i kite su Gat hal᷊i u hombang i kite; kumbahang mamala ngi sire makawua si kumu mumpal᷊ehe. Ei taumata ngu Bet-Le-Afra, #1:10: Bet-Le-Afra: Nabi Mikha nudidato hal᷊i u manga soa su sindihang u Yerusalem (ayeti 10-14) ko nal᷊ahe sarung ialong suhoro roka mangalo Yerusalem. l᷊al᷊okako su awu kere tatia ngu nikasueng uha! 11I kumu taumata ngu Safir, puwuae tintal᷊ang l᷊au pundang mamea sarang pundandumekang! Manga taumata ngu Zaanan ta wahani musumuwang bou soa ngi sire. Sasiking taumata ngu Bet-Haezel manode si kumu himoneu pai se'e seng takoae l᷊ai pusirungang. 12Hombang bou Mawu seng nurating tukari u soa ngu Yerusalem! Ual᷊ingu e'e, ta mataho su akal᷊i tau Marot muharapi u tul᷊umang. 13I kumu taumata ngu Lakhis, taingko kawal᷊o su kereta ngu parang! I kumu nanguntu manga dosa ko nikoa su Israel hakiu nakakoa Yerusalem l᷊ai nubardosa. 14Orasi i'i, ei tau Yehuda i kumu sarung kailangeng u soa Moresyet-Gat. Manga ratu ngu Israel sarung ta makarea bantuang l᷊ai bou soa ngu Akhzib.

15Ei tau Moresya, Mawu sarung manarakang i kumu su roka ko sarung mangawasa soa ngi kumu. Manga pangaha u Israel ko kapukawasange sarung mukumbuni su l᷊al᷊ung u manga l᷊iang su Adulam. 16Ei tau Yehuda, potoko uta i kumu kere tatia ngu mul᷊al᷊utu su manga ana i kumu ko ikukindaghi i kumu. Kol᷊oko timbou sarang pakal᷊inggi kere burung kukang bangke, watu'u manga ana u sarung itaweng sarang pundandumekang.

Currently Selected:

MIKHA 1: PLT

Highlight

Copy