YUNUS 4
4
Wawal᷊uang i Yunus l᷊au pangangampung u Mawu Ruata
1I Yunus tinga-tingari ta masanang dingang u hal᷊i e'e; i sie katewe nuwawal᷊uang. 2#Sasu. 34:6Bou e'e i sie nukal᷊iomaneng, “O Mawu, wal᷊ingewe seng daku nihabari suhoro u ia nuwua bou wal᷊eku horo, himoneu I Kau nal᷊ahe sarung mukoa kiri'i? E'e sabapie ia turusi nutumal᷊ang sarang Spanyol! Ia matitong I Kau Mawu ko mal᷊ondo l᷊au makindaghi, manandu pusasabari, masikome dang sintinia sadia mamal᷊u karaki pul᷊ahukung. 3#1Mar. 19:4 Orasi i'i, o Mawu, walate kere'e ia kapapatenge, watu'u mapiang ia mate sul᷊ung u muwiahi.”
4Sasimbahi Mawu, “I kau takoae alasange muwawal᷊uang kere'e.”
5Mbuhue i Yunus natamai sarang simbuka ngu raki u soa e'e, bou e'e nukumangiang su se'e. I sie nukoa raseng simbau dang nuraseng su l᷊al᷊unge, apiru kapangampal᷊i apang ko sarung mariadi su soa ngu Niniwe. 6Kuteu Mawu Ruata nupatuwo ngu sasuang simbau ko mul᷊ul᷊awe ko mangonggo u naue si Yunus, hakiu i sie mal᷊uasi. Tingari, i Yunus mal᷊uasi kahingang dingang u sasuang e'e. 7Kateho ndai mal᷊ou su tempo ngu kalonge, Mawu Ruata nukoa l᷊al᷊oati simbua pul᷊ohang hamu u sasuang e'e, hakiu nal᷊obe. 8Suapang matangutiti nusumuwang, Mawu Ruata nupasongo ngu anging ko matiti ko nutumiu bou raki. I Yunus masandighi mapinsang ual᷊ingu nikahinong u sinang u matangutiti kere ko manutung timboe. I sie nikasueng pul᷊aharapi dang mo mate. Angkunge, “Mapiangwe ia mate sul᷊ung u muwiahi!”
9Kateho Mawu Ruata nuhengetang si sie, “I kau ta hinonge tumaniu masusa kere'e naungu ual᷊ingu sasuang e'e!”
Nisimbahi Yunus, “Nakurawe? Seng hinonge ia muwawal᷊uang kahingang sarang mate.”
10Bou e'e hengetang u Mawu si sie, “Sasuang i'i nutumuwo kitang sihuwi, dang i sie nal᷊obe su l᷊ou tuhue; i kau ta nupatuwo dang nupal᷊ihara si sie. Kateho i kau nasusa watu'u i sie nal᷊obe. 11Tumaniuwe Ia sarung ta masusa musipiri u Niniwe, soa ko l᷊abo e'e. Watu'u su l᷊ikuru manga binatange ko ta ikarekeng e'e, su se'e pia l᷊ai lebe bou mahasuduampul᷊o su hiwunge su kataunge manga ana ko mborong wugha mupuhae ngu apang ko mapia l᷊au apang ko dal᷊ai.”
Currently Selected:
YUNUS 4: PLT
Highlight
Share
Copy
Want to have your highlights saved across all your devices? Sign up or sign in
