Yoël 2

L᷊aingati hal᷊i L᷊ou ngu Mawu ko sarung musumongo

1Paniuko tarompeti, pul᷊untingihiko tatia ngu silaka

su bongkong u Sion ko susi, katanakeng u Mawu Ruata.

Pahungkendeko, ei taumata ngu Yehuda!

Watu'u L᷊ou ngu Mawu seng masandighi dang seng maehong musumongo.

2L᷊ou e'e marundung l᷊au masul᷊ako,

napene u hiwu ko masunaughi.

Sordado ngu kumbati nahunsongo

kere winawa ko nawila su wawo u manga wul᷊uri.

Hombang ko kere'e mborong tangkeng nariadi,

dang sarung ta musau sarang kal᷊iwuenge.

3Kere putung ko manutung dang makatutung

i sire mundusa apang sasuang.

Su horo u e'e, wanua e'e kere Eden, taman u Mawu,

suapang bou e'e, musul᷊ung u tana l᷊inggi ko mahusu.

Takoae sarang simbau ko mal᷊umbei,

takoae ko mal᷊iwiri bou pangangalo ngi sire.

4 # Kl᷊h. 9:7-9 Ghahi i sire musul᷊ung u kawal᷊o;

tatal᷊ang i sire musul᷊ung u kawal᷊o su l᷊al᷊ung u parang.

5I sire l᷊ul᷊inso su pusu u manga wul᷊uri,

tingihi sire kere tatarangkal᷊i u kereta ngu parang

dang kere tingihi u putung ko nanutung rahami.

I sire mubarisi kere pasukang ko wahani,

ko seng sadia mangansing sarang tampa u parang.

6Su tempo ngi sire mangalo, kaul᷊i u taumata nataku,

kaul᷊i u pahesi nawilosi dang nal᷊ung.

7Kere ko wawahani, i sire mangalo,

dang musumaka meseli kere ko matatoghasi

I sire mubarisi matul᷊iri sarang tingo,

ta mamal᷊engko arako mamal᷊u mona.

8I sire ta musasise,

su bahageang u simbau-simbau i sire mul᷊umal᷊eng.

Singkahindo i sire mundusa apang tatinda,

ta ikaro barisang i sire.

9I sire mangalo sarang l᷊al᷊ung u soa,

dang mutumal᷊ang su wawo u meseli.

I sire sumengkang sarang l᷊al᷊ung u manga wal᷊e;

kere mananako, i sire musumu bou janela.

10 # Kl᷊h. 8:12 Tintal᷊a i sire kal᷊al᷊enge, dunia mukumanoa,

dang l᷊angi l᷊ai mukumende.

Bou e'e matangutiti l᷊au wul᷊ang marundung,

dang sinang u manga wituing mailang.

11 # Kl᷊h. 6:17 Tingihi Mawu mul᷊ul᷊u, nangonggo u parenta,

su pasukang u parange.

Wal᷊inge gampang kaul᷊ie sordadonge!

Wal᷊inge gampang katoghasi sordado ko mupal᷊al᷊eng parenta-E!

Mang tingari matoghasi l᷊au ko hebati kahingang L᷊ou ngu Mawu!

Takoae sarang singkatau ko botonge makatahang.

Kakui pamal᷊u puwawiahi

12 Mawu nuhengetang, “Kateho orasi i'i,

pusul᷊eko sarang koa-Ku dingang kal᷊abo u naung,

apiru pupuasa, pukahuang l᷊au pumpal᷊ehe.

13Gheheko naungu, wal᷊ingewe pakeangu.”

Puwihuko sarang koa u Mawu Ruata ngu.

I Sie manandu pusasabari dang makindaghi

mal᷊ondo l᷊au napene u kakindaghi.

Mal᷊uasi mangonggo u ampung dang mandi

mupal᷊al᷊eng u hukumang.

14Pari Mawu Ruata ngu nuwawal᷊u naung,

dang nangal᷊amati si kumu napene-pene.

Hakiu i kumu botonge manumba ngu

korbang anggori l᷊au gandung su Mawu Ruata ngi kumu.

15Paniuko tarompeti su Sion, wul᷊uri u Mawu Ruata,

pamohangko l᷊ou ngu puasa,

pukoako komol᷊ang ko l᷊abo.

16Komol᷊iko kaul᷊i u ana u kawanua,

hawukeko komol᷊ang u umati.

Roiko pasongo apang taumata ko maghaghurang,

manga ana l᷊au manga rario ko dadio l᷊ai.

Sarang boroiti mambeng pasongo l᷊ai.

Roiko i sire panintang u kamari.

17Roiko manga imam ko mutatangkiang Mawu,

pasangi su tal᷊oara u mesba l᷊au su poresi su tingo,

apiru pangul᷊i, “Kindaghiteko umati-U, o Mawu;

kumbahang mamala ngu umati-U makoa l᷊aheghesang,”

hakiu manga bangsa ko wal᷊inge manindiri dang mangul᷊i,

“Ko su apa Mawu Ruata ngi sire?”

Mawu Ruata sau nupakatawa ngu tana

18Bou e'e Mawu nutuhung tana-E, dang nukumindaghi umati-E.

19I Sie nusumimbahi si sire kiri'i,

“Orasi i'i i kumu kaul᷊ie Daku onggol᷊ang u:

gandung, anggori l᷊au l᷊ana zaitung guna ngu kang,

tadeau i kumu kaul᷊ie ipakal᷊aeri.

Ia sarung ta mupakawala ngi kumu ihinakaneng

arako il᷊igheing u manga bangsa.

20Pasukang u kumbati bou sawunahi sarung Daku lumbaheng,

singga Daku iaha sarang tana l᷊inggi.

Sarang L᷊auri ko Nate Daku isuhuri barisang su tingonge,

sarang L᷊auri su Tal᷊oarae Daku isuhuri barisang ko su l᷊ikuri.

Manga bangkenge sarung mundaruru.

I sire Daku nipakawinasa watu'u seng nukabasara si kumu.

21Kumbahang mataku, ei anseri, pakal᷊uasi naungu;

putinaung hal᷊i ko l᷊abo ko sarung ihal᷊ikang u Mawu si kumu!

22Ei manga binatang kumbahang ghumagha.

Manga nguda u rindulu orasi i'i seng nurapaghi.

Manga kau nuwua matubung,

wua ngu anggori l᷊au ara napene-pene.

23Ei ana u kawanua ngu Sion, pahul᷊uasi!

Pahul᷊uasite l᷊au pahul᷊iaghite!

Ual᷊ingu apang kapapia ngu Mawu Ruata ngi kumu.

Su tempo ngu mundondosi nionggo-E tahiti su kitae si kumu. #2:23: Su tempo … si kumu arako: Nionggoe si kumu tahiti su tempo ngu kararondosi watu'u I Sie ko maadili.

Su tempo ngu matinoung tahiti nipangundu-E,

kere'e l᷊ai su tempo ngu katuwonge kere horo.

24Kuteu gandung sau makoa tataho u tampa pamupakeng,

anggori l᷊au l᷊ana zaitung sarung mawungke bou tampa u pamamuhukang.

25Ia sarung nungganti apang ko naghahing

su manga taung su tempo ngu kumbati nanahangesi wua ngu sasuangu.

Watu'u ko Ia nundoi ngu ghapang u kumbati e'e sarang koa i kumu.

26I kumu sarung makahombang kang su kitae dang makapundang mal᷊aeri.

Mawu Ruata ngi kumu sarung iwantughang i kumu,

watu'u guna ngi kumu seng nikoa-E maul᷊i ko makal᷊aherang.

Umati-Ku sarung ta makoa l᷊aheghesang!

27Kuteu katitongko i kumu, Israel, himoneu Ia ene su tal᷊oara i kumu,

dang himoneu Ia, Mawu, ko Mawu Ruata ngi kumu.

Takoae Mawu Ruata ko wal᷊inge, su l᷊ikuri Ia sisane.

Umati-Ku sarung ta sau ipakamea!”

L᷊ou ngu Mawu

28 # Wuk. 2:17-21 “Bou e'e kaul᷊i u taumata sarung Daku peneng dingang u roh-Ku.

Kuteu manga ana u kowawine l᷊au kol᷊aese sarung muhabari manga tatanata-Ku;

manga maghaghurang su tal᷊oara i kumu sarung makarea ipi

kawawua sarung ionggo su manga ana ko ese l᷊au kowawine ko makakuda.

29Su tempo e'e roh-Ku sarung Daku ionggo l᷊ai

su manga mutatangkiang kol᷊aese l᷊au kowawine.”

30Su l᷊angi l᷊au su dunia sarung Daku koateng maul᷊i ko makal᷊aherang. Sarung pia daha musoang, hena ngu putung l᷊au owol᷊i u tipu. 31#Mat. 24:29; Mrk. 13:24-25; Luk. 21:25; Kl᷊h. 6:12-13 Matangutiti sarung makoa ko marundung dang wul᷊ang makoa ko mahamu kere daha. Kaul᷊i u e'e sarung mariadi su horo u L᷊ou ngu Mawu ruminta, l᷊ou ko l᷊abo dang makatataku! 32#Rm. 10:13 Kateho i sai-sai ko mukahioro tul᷊umang u Mawu, sarung ipakasal᷊amati. Mawu nuhengetang, “Su Yerusalem manga taumata ko Daku ipile sarung masal᷊amati.”

Currently Selected:

Yoël 2: PLT

Highlight

Copy