AMOS 7
7
KAWAWUA HAL᷊I U HUKUMANG BOU MAWU
Kumbati
1Ia nakahombang simbau kawawua bou Mawu Ko Karangetange. Ia nakawua I Sie nundiadi singgapang ko l᷊abo kumbati su tempo ngu taumata mbuhue nasue bou namoto rindulu guna ngu ratu, dang rindulu mbuhue nanita sau katuwonge. 2Manga kumbati e'e nukumang masandighi masue kaul᷊i u sasuang su tana. Bou e'e ia nangul᷊i, “Mawu Ko Karangetange, ampungeko umati-U! I sire tumaniu ko dio l᷊au ko l᷊ome, kirapawe i sire makatahang?”
3 Mawu namal᷊u kirou-E dang nuhengetang, “Ko nikawuau e'e sarung ta mariadi.”
Putung
4Ia sau nakawua kawawua bou Mawu Ko Karangetange. Ia nakawua I Sie kapusasadiange guna ngu muhukung umati-E dingang u putung. Putung e'e nul᷊umewa nasue taghal᷊oang su wal᷊ang u dunia#7:4: taghal᷊oang su wal᷊ang u dunia: Manga taumata horo su Timur Tengah nusipiri himoneu su wal᷊ang u dunia pia taghal᷊oang ko makoa pung u apang sal᷊uhi l᷊au mata ngu ake. dang nanita nanutung anseri. 5Ia nangul᷊i, “O Mawu Ko Karangetange, tul᷊ung pangiriko putung e'e! Umati-U kere'e kadioe l᷊au ko l᷊ome, kirapawe i sire botonge makatahang?”
6 Mawu sau namal᷊u kirou-E dang nuhengetang, “I'i l᷊ai sarung ta mariadi.”
Tal᷊i l᷊aukuri matei
7Ia nakahombang simbau kawawua ko wal᷊inge bou Mawu. Daku nikawua I Sie kararisi su sindihang u meseli simbau ko niwangung dingang nupake tal᷊i l᷊aukuri matei. Su l᷊ima-Nge I Sie kapuhinggonge tal᷊i l᷊aukuri e'e guna ngu mutuhung minsang apa meseli e'e matei arako ta. 8I Sie nakina si sia, “I kau nakawua apa, Amos?”
Ia nusumimbahi, “Tal᷊i l᷊aukuri matei, Mawu.”
Bou e'e Mawu nuhengetang, “Ia mupake u tal᷊i l᷊aukuri i'i guna ngu manode himoneu umati-Ku musul᷊ung kere meseli ko soha. Ia sarung ta mamal᷊u kirou-Ku l᷊ai, Ia nal᷊ahe sarung muhukung si sire. 9Manga tampa ko nipake u hintou ngi Ishak guna ngu pukal᷊iomanengang sarung ighoghahi. Manga tampa ko susi ngu tau Israel sarung iopehi. Ia sarung mupakawinasa hintou ngu Ratu Yerobeam.”
I Amos l᷊au i Amazia
10I Amazia, imam su Betel, nundoho ngu habari i'i si Yerobeam, ratu ngu Israel, “I Amos seng nusingkongkoli dingang ana u kawanua mundoka si ko Il᷊uadateng. Manga didatonge ko maniti ana u kawanua sarung makakoa wanua i'i maghoghahi. 11I sie nangul᷊i himoneu ko Il᷊uadateng sarung mate su l᷊al᷊ung u parang, dang tau Israel nal᷊ahe itaweng sarang pundandumekang, marau bou wanuange sisane.”
12Bou e'e i Amazia nangul᷊i si Amos, “Ei nabi, kapul᷊e'e sarang Yehuda! Punasie pai se'e. Walate i sire pangonggo u wiahi si kau! 13Kumbahang sau munasi su Betel. Soa i'i nihae guna ngu ratu, dang makoa tampa u pukakal᷊iomanengang u bangsa.”
14I Amos nusumimbahi, “Ia wal᷊inge nabi ual᷊ingu pangkati. Tuhu hinonge ia i'i ko mamal᷊ihara binatang l᷊au mananipo wua ngu ara. 15Kateho Mawu nangal᷊a si sia bou pul᷊ahal᷊iku, dang nangoro si sia puhabari tatanata-E su tau Israel. 16Kuteu pundaringihiko apa ko nipuhengetang u Mawu si kau. Ual᷊ing i kau nanagakang si sia munasi mundoka bangsa Israel. 17Mawu nuhengetang himoneu kawingu sarung makoa kowawine ko dal᷊ai su manga l᷊al᷊eng u soa, dang manga ana u ipate su l᷊al᷊ung u parang. Tanau sarung ipupapahia su taumata ko wal᷊inge, dang i kau sisane sarung mate su wanua ngu taumata ko wugha ngu Mawu. Taumata ngu Israel nal᷊ahe sarung itaweng sarang pundandumekang, marau bou wanuange sisane.”
Currently Selected:
AMOS 7: PLT
Highlight
Share
Copy
Want to have your highlights saved across all your devices? Sign up or sign in
