AMOS 8
8
Kawawua hal᷊i u wawebekang u manga wua
1Ia nakahombang simbau kawawua l᷊ai bou Mawu Ko Karangetange. Ia nakawua wawewekang simbau ko pia tahoe manga wua ko masasasa. 2Mawu nakina, “I kau nakawua apa, Amos?”
Ia nusumimbahi, “Simbau wawewekang ko pia tahoe manga wua ko masasasa.”
Mawu nuhengetang, “Temponge seng nurating su umati-Ku Israel. Ia sarung ta mamal᷊u l᷊ai kirou-Ku dang nal᷊ahe sarung muhukung si sire. 3Su l᷊ou e'e manga samperi su istana sarung makoa sangi. Su apang tampa mangkate maul᷊i manga badang u taumata ko nate ko seng nirume dingang maruma-rumasi.”
Israel nihukung
4Pundaringihiko, ei i kumu ko nanira taumata ko susa su wanua i'i hakiu i sire nawinasa! 5I kumu nangul᷊i su watangeng i kumu sisane, “Wal᷊inge gampang kal᷊iwuenge manga l᷊ou putatinaungang. I kite mo maehong sau muwal᷊u gandung i kite, kateho sal᷊iwang e'e mang ta masue-sue. Kangereng l᷊ou ngu Sabati e'e mal᷊iu, tadeau i kite botonge sau manita mudagang? I kite mo kahingang mangakal᷊i, mul᷊inga dingang u cupa dang mul᷊eo dingang u kilo. 6Gandung ko seng narusa botonge iwal᷊u i kite dingang u hariga ko mal᷊ighari. I kite mundea taumata ko susa ko ta makaupili mamaehi utange, manengwe utang e'e kitang musul᷊ung hariga ngu sapatu simpari, dang i kite mul᷊uang si sie makoa l᷊ang i kite.”
7 Mawu Ruata ngu bangsa Israel, seng nutewa, “Ia tinga-tingari sarung ta mal᷊iwuhi u kakanoa i sire ko dal᷊ai. 8Dunia sarung kumende, dang kaul᷊i u taumata masusa naung. Kaul᷊i u wanua sarung ghumio dang ipunang kere Sal᷊uhi Nil. 9Sarung murating temponge Ia mukoa matangutiti musumira kal᷊ihae dang dunia marundung su tempo ngu l᷊ou. Ia Mawu Ko Karangetange, seng nuhengetang. 10Manga putatinaungang i kumu sarung Daku iwal᷊u makoa komol᷊ang u susa, dang manga samperi kumu makoa sangi. Ia sarung mukoa si kumu mangol᷊o uta i kumu dang mupake u wal᷊i karong tatia ngu kasasusa. I kumu sarung makoa kere iyamang i ma ko musumangi u papate ngu ana sisanenge. L᷊ou e'e sarung masue dingang u naung ko masusa kahingang.”
11 Mawu Ko Karangetange nuhengetang, “Sarung murating temponge Ia mupasongo ngu hombang kal᷊ahutung su wanua i'i. Taumata sarung mahutung, kateho wal᷊inge mahutung u kang. Taumata sarung marou, kateho wal᷊inge marou ngu ake. I sire sarung mahutung l᷊au marou ngu tatanata-Ku. 12Taumata sarung mul᷊iku bou sawunahi sarang timuhi dang bou raki sarang wahe guna ngu mundea tatanata-Ku, kateho i sire sarung ta makahombang. 13Su l᷊ou e'e sarang manga taumata ko makakuda ko matatoghasi l᷊ai mapinsang ual᷊ingu kararou. 14Manga taumata ko mutewa su areng u manga barhala ngu Samaria dingang mangul᷊i, ‘Su areng u dewa ngu bangsa Dan’, arako ‘Su areng u Dewa Bersyeba’ – sarung manawo dang ta sau makararisi.”
Currently Selected:
AMOS 8: PLT
Highlight
Share
Copy
Want to have your highlights saved across all your devices? Sign up or sign in
