AMOS 6

Israel naghoghahi

1Kasasilaka si kumu ko kapuwiahi matemang su Sion, dang i kumu ko nakapundang mapia su Samaria – i kumu ei manga tumbonang u ana u kawanua ngu bangsa Israel ko kapiange e'e, i kumu ko narange isongong u ana u kawanua guna ngu ipundokang u tul᷊umang! 2Tamaite putuhung su Kalne, bou e'e l᷊al᷊engte turusi sarang soa ngu Hamat ko l᷊abo e'e, mbuhue sarang soa ngu Gad su Filistin. Su naung i kumu manga soa e'e lebe mapia bou kararatuang u Yehuda l᷊au Israel? Apa tampa i sire lebe l᷊abo bou tampa i kumu? 3I kumu mundendehi himoneu l᷊ou kasasilaka e'e mborong marau, kateho manga kakanoa i kumu kitang mupakasahawu sasongo ngu l᷊ou katatingkai e'e.

4Kasasilaka si kumu ko kal᷊al᷊oka su l᷊al᷊okang ko mal᷊al᷊ighari l᷊au ko kapusal᷊iwange dingang u ghisi ngu sapi l᷊au domba ko makuda! 5I kumu mal᷊uasi mangarang samperi kere ko nikoa i Daud dang i kumu nunang u kecapi dingang u manga samperi e'e. 6I kumu nanginung anggori su galasi ko napene tahoe, dang i kumu nupake u l᷊anisi ko kapiange, kateho i kumu ta nasusa naung i kumu su kaghaghoghahi u Israel. 7Ual᷊ingu e'e seng i kumu ko kahorokange itaweng sarang pundandumekang. Manga sal᷊iwang i kumu sarung mangiro.

8Dingang mal᷊ahe Mawu Ko Makawasa l᷊au Ko Karangetange seng nangonggo u ingati i'i, “Ia mabunsing u kal᷊aoboti umati Israel; Ia ta masanang dingang u manga wal᷊e ngu ratu ngi sire ko masasidada. Pusati u soa ngi sire singkahindo dingang u kaul᷊i u ko ene su l᷊al᷊unge sarung Daku isarakang su roka.”

9Boko mborong pia mapul᷊o su kataunge nukumbuni su l᷊al᷊ung u wal᷊e simbau, i sire sarung mate l᷊ai. 10Singkatau tataho u walagheng ko pia hal᷊ie mangurusi pul᷊al᷊uwingang i sire, sarung musumongo dang mumbawa sarang l᷊ikuri badang u ghe'e ko seng nate e'e. I sie sarung mukui su taumata ko ene su l᷊ikuru wal᷊e e'e, “Apa pia ko wal᷊inge mborong wiahi?”

Kuteu sarung ikaringihi sasimbahie, “Takoae!”

Tataho u walagheng ko pia hal᷊ie mul᷊uwing badang ko seng nate e'e sarung mangul᷊i, “Kumbahang sau mudidato! I kite kumbahang musigho areng u Mawu.”

11Boko Mawu mangonggo parenta, manga wal᷊e ko l᷊abo ko dio sarung ighoghahi. 12Apa botonge kawal᷊o mutumal᷊ang su bongkong u watu? Apa mbuae taumata namongkari sasi dingang u sapi? Kateho i kumu seng nangal᷊imputari kal᷊aadili nakoa ilu ko makapate, dang ko nuhino nakoa ko nunsal᷊a.

13I kumu nangarang uare i kumu seng nakawata Lodebar.#6:13: Lodebar: Tingihie kere didato ngu Ibrani ko mangal᷊enge “takoae manga apa”. I kumu l᷊ai nangul᷊i, “I kami mborong matoghasi guna ngu mangaho Karnaim.”#6:13: Karnaim: Areng u soa ko dio i'i mangal᷊enge “sasunge”, simbau tatia ngu katatoghasi.

14 Mawu Ko Karangetange l᷊au Ko Makawasa nuhengetang, “Umati Israel, Ia sarung mundoho ngu sordado bou bangsa raghi simbau tadeau pangalo wanua ngi kumu. I sire sarung manira si kumu bou l᷊al᷊eng sarang Hamat su simbuka ngu sawunahi murating sarang Wal᷊ang u Araba su simbuka ngu timuhi.”

Currently Selected:

AMOS 6: PLT

Highlight

Copy