AMOS 5

Kakui tadeau mutobati

1Pundaringihiko ei umati Israel! Ia sarung musamperi guna ngi kumu simbau samperi u susa:

2Seng nanawo Israel ko mborong l᷊uhisi,

i sie seng sarung ta muwangung l᷊ai!

Su wawo u tanange sisane i sie niwala,

takoae ko mutul᷊ung mupararisi si sie.

3 Mawu Ko Karangetange nuhengetang, “Soa simbau su Israel nupasuwang u sihiwu su kataunge parajuriti, kateho ko nasul᷊e kate mahasu; soa ko wal᷊inge nupasuwang mahasu su kataunge, kateho nasul᷊e kate mapul᷊o.”

4 Mawu nuhengetang su umati Israel, “Pusul᷊ete sarang koa-Ku, kuteu i kumu sarung muwiahi. 5Kumbahang matamai sarang Bersyeba guna ngu munggaweti. Kumbahang mundea si Sia su Betel, watu'u Betel sarung mailang. Kumbahang l᷊ai matamai sarang Gilgal, watu'u taumata ngu soa e'e sarung iwawa sarang pundandumekang.”

6Pusul᷊ete sarang koa u Mawu, kuteu i kumu sarung muwiahi. Boko i kumu ta musul᷊e sarang koa-E, I Sie sarung musumongo kere putung ko l᷊umewa dang manutung pakasue tau Israel. Su Betel takoae sarang singkatau ko botonge makapate putung e'e. 7Silaka si kumu, i kumu ko mangal᷊imputari kal᷊aadili dang mangawasa haki u taumata!

8 # Ayb. 9:9, 38:31 Ko Mawu nundiadi manga wituing su l᷊angi –

wituing Belantik l᷊au wituing Kartika.

I Sie mamal᷊u ko marundung makoa ko masua dang l᷊ou makoa huwi;

sasi niwoso-E su l᷊ul᷊unge.

Ko nukoa kaul᷊ie e'e areng-E ko Mawu.

9I Sie nupakawinasa ngu taumata ko pia kawasange singkahindo u tatinda i sire.

10I kumu mubinsi u taumata ko mundoka hal᷊i ko takoae kal᷊aadili l᷊au ko mudidato ko nuhino su l᷊al᷊ung u pangadilang. 11I kumu manira taumata ko susa dang muhampasi gandung i sire. Ual᷊ingu e'e i kumu sarung ta matana su l᷊al᷊ung u manga wal᷊e ngi kumu ko masasidada, ko seng niwangung i kumu e'e. I kumu sarung ta manginung anggori bou manga awuhi ko nisuang i kumu. 12Ia matitong kirapa kal᷊aboe kal᷊al᷊ai i kumu dang kirapa kaul᷊ie dosa ngi kumu. I kumu manira taumata ko mapia; i kumu manarima sasoroki dang mamala taumata ko susa koateng takoae adili su pangadilang. 13Ual᷊ingu kakanoa i kumu e'e, kuteu manga taumata ko mapilesa mupundang mapiang marumasi su tempo ko dal᷊ai kere'e.

14Putawakal᷊iko pukoa ko mapia, dang kumbahang mukoa ko dal᷊ai, tadeau i kumu muwiahi. Kuteu Mawu Ko Makawasa sarung tinga-tingari matana su tal᷊oara i kumu kere ko niul᷊i i kumu. 15Pubunsie ko dal᷊ai, kaoko ko mapia, dang pararisiko kal᷊aadili. Pari Mawu mukumindaghi u manga taumata ko nal᷊umbei bou bangsa Israel.

16 Mawu Ko Makawasa nuhengetang, “Su manga l᷊al᷊eng u soa, taumata sarung mumpal᷊ehe dingang l᷊ul᷊ungkang u susa naung. Sarang manga musasuang kuiang tadeau pasangi singkahindo dingang u manga taumata ko niwaehang pasangi u taumata ko nate. 17Su kaul᷊i u awuhi anggori, taumata sarung mumpal᷊ehe ual᷊ingu Ia musumongo dang muhukung si kumu. Ia, Mawu, seng nuhengetang.”

18Tingari silaka si kumu ko mukati ngu l᷊ou ngu Mawu! Apa gunange l᷊ou e'e si kumu? L᷊ou e'e kitang kere l᷊ou ko marundung, wal᷊inge l᷊ou ko masua si kumu. 19Kakakoae kere taumata ko nutumal᷊ang u watangenge bou singa, kateho nusuma u beruang. Arako kere taumata ko napul᷊e sarang wal᷊e dang nutiking u l᷊imange su rarinding, bou e'e nitimbo u katoang! 20L᷊ou ngu Mawu tingari mupasongo ngu kararundung, wal᷊inge kasasua l᷊ou mal᷊ung ko masunaughi.

21 # Yes. 1:11-14 Mawu nuhengetang, “Ia mabunsing dang nasahe makawua manga tundu ngu agama ngi kumu! 22Boko i kumu mumbawa korbang tongkateng l᷊au korbang gandung, Ia sarung ta manarima e'e. Ia mandi manarima manga binatang i kumu ko matatawa e'e ko nisumba ngi kumu si Sia kere korbang purarame. 23Pangiroko manga samperi kumu ko makawengeli e'e, Ia mandi mundaringihi nang kecapi ngi kumu. 24Mapiang, putawakal᷊iko tadeau kal᷊aadili maansehi kere ake, l᷊au katatul᷊iri kere sal᷊uhi ko ta mamamara.

25 # Wuk. 7:42-43 Ei umati Israel, su tempo ngu Ia nangaha si kumu nul᷊umiu tana l᷊inggi paupul᷊o su taunge l᷊iwuenge, Ia ta nanuntu sasumba l᷊au korbang bo i kumu. 26Kateho orasi i'i i kumu nanumba Sakut ko nirekeng i kumu ratu ngi kumu e'e, l᷊au Kewan, wituing ko nisumba ngi kumu e'e. Ual᷊ingu e'e manga patong ko seng nikoa i kumu e'e mambeng wawa i kumu sisane, 27su tempo ngu Ia mundume si kumu sarang wanua simbau ko lebe marau bou Damsyik. Ia Mawu ko areng-E Mawu Ruata Ko Makawasa seng nuhengetang.”

Currently Selected:

AMOS 5: PLT

Highlight

Copy