AMOS 3
3
1Raringihiko tatanata ngu Mawu i'i, ei bangsa Israel ko seng niwawa u Mawu pasuwang bou Mesir! Mawu nuhengetang, 2“Bou kaul᷊i u bangsa su dunia, seng kitang i kumu bangsa ko Daku nikakil᷊al᷊a dang ko Daku nipandungang. E'e sabapie dosa ngu seng maul᷊i, dang Ia nal᷊ahe muhukung si kumu.”
Hal᷊i u nabi
3Apa botonge dua ngkatau l᷊umal᷊eng singkahindo ta mukakire horo?
4Apa singa su ngudae munggahari, boko i sie mborong tangkeng nakahombang kinae?
Apa ana u singa munggahari su l᷊al᷊ung u l᷊iange boko i sie mborong tangkeng nakasame manga apa?
5Apa burung masaung su l᷊al᷊ung u seri, boko sasaung e'e mborong tangkeng nitaing?
Apa seri maintili boko takoae ko ikasaung?
6Apa taumata su soa ta mukumende boko makaringihi tingihi u tarompeti tatia ngu parang?
Apa botonge soa simbau ikahino ngu silaka, boko ta niroho ngu Mawu?
7 Mawu Ko Karangetange ta sarang paghisa mukoa manga apa ta muhabari horo kirou-E su manga nabi, manga l᷊ang-E.
8Boko singa munggahari, i sai ko ta mataku?
Boko Mawu Ko Karangetange muhengetang, i sai botonge marumasi dang ta muhabari tatanata-E?
Kananawo u Samaria
9Wohangko i'i su manga taumata ko natana su wal᷊e ngu ratu ngu Mesir l᷊au Asdod, “Pukomol᷊i su manga wul᷊uri su sindihang u Samaria, dang tuhungeko pugagara ko l᷊abo dingang u kabasara ko nikoa pai se'e.”
10 Mawu nuhengetang, “Manga taumata e'e nutaho manga wal᷊e ngu ratu istana ngi sire dingang u manga rarotong ko nikarea bou kabasara l᷊au putatingkai. Sarang singkodo-kodo i sire wugha mukoa ko matul᷊iri. 11Ual᷊ingu e'e wanua ngi sire sarung il᷊iwungang u roka, tatinda i sire ighoghahi, l᷊au manga istana ngi sire ihampasi.
12Kere singkatau mul᷊al᷊ukari kitang sau nakahombang l᷊aeri u domba dua mbuka arako tul᷊inge simpoto ko seng nitumbou ngu singa, kere'e l᷊ai kitang singkodo ko sarung mal᷊umbei bou taumata ngu Samaria ko orasi i'i kal᷊al᷊oka matemang-temang su l᷊al᷊okang ko masikome.”
13 Mawu Ko Makawasa l᷊au Ko Karangetange nuhengetang, “Putuhungko orasi i'i, dang onggol᷊e ko ingati hintou ngi Yakub. 14#2Mar. 23:15 Su l᷊ou Ia muhukung tau Israel ual᷊ingu dosa ngi sire, Ia sarung munggoghahi manga mesba su Betel. Apang mesba sarung ibare manga pondol᷊ie hakiu manawo sarang tana. 15Manga wal᷊e guna ngu tempo ngu matinoung l᷊au manga wal᷊e pangindul᷊eng su tempo ngu titi sarung Daku ighoghahi. Manga wal᷊e ko nil᷊ighahi dingang u gading sarung maopehi; kaul᷊i u wal᷊e ko l᷊al᷊abo sarung maghoghahi.
Currently Selected:
AMOS 3: PLT
Highlight
Share
Copy
Want to have your highlights saved across all your devices? Sign up or sign in
