AMOS 2

Moab

1 # Yes. 15:1–16:14, 25:10-12; Yer. 48:1-47; Yeh. 25:8-11; Zef. 2:8-11 Mawu nuhengetang, “Taumata ngu Moab seng masau mukoa dosa, ual᷊ingu e'e Ia nal᷊ahe sarung muhukung si sire. I sire nuhinakang Ratu ngu Edom ko seng nate e'e, dingang nukal᷊i kubul᷊ie l᷊au nangal᷊a manga duhinge dang nitutung nakoa awu. 2Watu'u e'e Ia sarung mundoho ngu putung sarang wanua ngu Moab, dang manutung pakasue manga tatinda u Keriot. Taumata ngu Moab sarung mate su tal᷊oara u gara u parang, tintal᷊a tarompeti nipul᷊untingihi, l᷊au komando ngu parang nikiha. 3Manga mangangawasa ngu Moab l᷊au kaul᷊i u tumbonang u pamarentahange sarung Daku ipate.”

Yehuda

4 Mawu nuhengetang, “Taumata ngu Yehuda seng masau mukoa dosa, ual᷊ingu e'e Ia nal᷊ahe sarung muhukung si sire. I sire nul᷊umawang manga parenta-Ku dang ta nupandung manga tatintiro-Ku. I sire nipakapal᷊iri u manga ilah ko nisumba ngu manga i upung i sire. 5Watu'u e'e, Ia sarung mundoho ngu putung sarang Yehuda dang manutung pakasue manga tatinda u Yerusalem.”

Hukumang u Mawu Ruata su Israel

6 Mawu nuhengetang, “Taumata ngu Israel seng masau mukoa dosa, ual᷊ingu e'e Ia nal᷊ahe sarung muhukung si sire. Taumata ko matul᷊iri ko ta nakasul᷊e range, seng niwal᷊u i sire nakoa l᷊ang. Kere'e l᷊ai kakanoa i sire su taumata ko susa ko ta nakawaehi utange, manengwe utang e'e kitang musul᷊ung hariga ngu sapatu simpari. 7I sire manira taumata ko l᷊ome ko ta makakoa manga apa, dang mupakaghea ngu taumata ko susa. I yamang l᷊au ana mul᷊al᷊ol᷊osi nutatamba u badang dingang u l᷊ang kowawine simbau, hakiu nakal᷊amuhu areng-Ku ko susi. 8Su apang tampa u pukakal᷊iomanengang, manga taumata matiki dingang u l᷊aku ko nial᷊a i sire kere paiki u utang bou taumata ko susa. Su Wal᷊e ngu Mawu Ruata, i sire manginung anggori ko nial᷊a i sire bou taumata ko pia utange si sire.

9 # Sau. 3:8-11 Manengwe kere'e, ei umati-Ku, ko guna ngi kumu Ia nupakawinasa ngu tau Amori ko mararange kere kau cemara dang matatoghasi kere kau terpentin. 10I kumu seng Daku niwawa pasuwang bou Mesir, dang Daku niaha bou tana l᷊inggi paupul᷊o taung l᷊iwuenge. Tana ngu tau Amori seng Daku nionggo si kumu makoa wanua ngi kumu ha. 11#Rek. 6:1-8 Ia seng namile pirangkatau bou manga ana i kumu guna ngu makoa nabi, dang pirangkatau bou manga ana ko makakuda i kumu makoa taumata ngu Nasiri.#2:11: Nasiri: Tau Israel ko mutahamawu su Mawu Ruata dang nudiandi ta manginung anggori, arako inung ko makabukang, ta mamoto utae dang ta manuhung bangke (Rek. 6:1-8). Wal᷊ingewe e'e nuhino, ei tau Israel? Ia, Mawu seng nuhengetang.

12Kateho i kumu nupanginung su tau Nasiri anggori, hakiu nakakoa si sire nul᷊umawang diandi. Dang i kumu nularang manga nabi muhabari tatanata-Ku. 13Orasi i'i i kumu sarung Daku isira murating u tana, hakiu i kumu muhumeo kere kereta ko napene u l᷊urange gandung. 14Tumatal᷊ang ko masasahawu sarung ta makal᷊iso; taumata ko matoghasi sarung kailangeng u uhae, dang taumata ko wahani sarung ta makasal᷊amati watangenge sisane. 15Mamamiti sarung ta makatahang, tumatal᷊ang ko masahawu sarung ta makatal᷊ang u watangenge, dang sumasake kawal᷊o sarung ta mal᷊iwiri. 16Su l᷊ou e'e parajuriti ko kawahaninge l᷊ai sarung manintang u aghiri, bou e'e mutumal᷊ang. Ia Mawu seng nuhengetang.”

Currently Selected:

AMOS 2: PLT

Highlight

Copy