WUKE NGU MANGA RASULI 8

1Dang i Saulus kal᷊iaghi l᷊ai su hal᷊i u pamamate e'e.

I Saulus nutingkai jamaati

Su l᷊ou e'e l᷊ai Jamaati su Yerusalem nanita niwawatukang, hakiu kaul᷊i u taumata ko mangimang, su l᷊ikuru manga rasuli, nusawuhi su kaul᷊i u tana ngu Yudea l᷊au Samaria. 2Manga taumata ko mataku u Mawu Ruata nangubul᷊i si Stefanus dang nusumangi ngi sie dingang susa ngu naung.

3 # Wuk. 22:4-5, 26:9-11 Arawe i Saulus ta mangiro mundea l᷊al᷊eng mupakaghoghahi jamaati. I sie natamai bou wal᷊e sarang wal᷊e dang nuhiuri sarang l᷊ikuri manga taumata ko mangimang, bou e'e nupasu i sire sarang l᷊al᷊ung u tutupang.

Habari Mapia bou Mawu Ruata nihabari su Samaria

4Manga taumata ko mangimang ko seng nusawuhi e'e nuhabari Habari Mapia bou Mawu Ruata e'e sarang manga tampa. 5I Filipus nakoa sarang soa#8:5: soa: pira mbau wohe horo: soa ko panganjuri su Samaria dang nuhabari suapang taumata su se'e hal᷊i u Ratu Mananal᷊amati ko nidiandi ngu Mawu Ruata. 6Suapang manga taumata nakaringihi si Filipus nudidato dang i sire nakawua ko makal᷊aherang ko nikoae, maul᷊i bo i sire nusumpi apang ko niul᷊i i Filipus. 7Watu'u manga roh ko dal᷊ai seng nusumuwang dingang mangkate kakinsal᷊e bou taumata maul᷊i ko nikasukang u setang. Manga taumata ko kesohi l᷊au ko peosi l᷊ai maul᷊i ko nipakaul᷊e. 8Kuteu manga taumata su soa ngu Samaria e'e mangkate kapuhul᷊iaghi.

9Su soa e'e pia singkatau ko ese arenge i Simon, seng dio mal᷊iwue nukoa manga tau Samaria naherang u kapapande ngu titonge. I sie nangul᷊i si sire uare i sie ko taumata ko takoae sihinge. 10Kaul᷊i u taumata su soa e'e bou patiku wuhi u kawanua nusumpi kahingang si sie. “Taumata i'i ko katatoghasi u Mawu Ruata ko timeleng musul᷊ung u ‘Katatoghasi ko L᷊abo’ e'e,” angkung i sire. 11Seng mal᷊iwue kahingang i sie makaherang manga taumata dingang katatoghasi u titonge, hakiu i sire mangkate kapusumpie si sie. 12Arawe i Filipus nuhabari si sire hal᷊i u Habari Mapia hal᷊i u kirapa Mawu Ruata sarung mamarenta musul᷊ung Ratu dang hal᷊i I Yesus Kristus, Ratu Mananal᷊amati e'e. Kuteu i sire nangimang u habari ko niwawa i Filipus, bou e'e i sire nisahani – ko ese dang l᷊ai kowawine. 13I Simon sisane l᷊ai nangimang. Suapang seng mbuae nisahani, i sie turusi nutumuhu si Filipus. Kaul᷊i u ko makal᷊aherang ko nariadi nakaherang si Simon.

14Manga Rasuli su Yerusalem nakaringihi uare manga tau Samaria seng nanarima didato ngu Mawu Ruata. Ual᷊ingu e'e i sire nundoi i Petrus l᷊au i Yohanes patamai sarang pai e'e. 15Suapang i Petrus l᷊au i Yohanes nurating, i sire nukal᷊iomaneng guna ngu manga tau Samaria e'e tadeau i sire makatarima Roh u Mawu Ruata, 16watu'u Roh u Mawu Ruata mborong tangkeng nangawasa maneng singkatau bo i sire; i sire kitang mbuhue nisahani su areng u Mawu Yesus. 17Bou e'e i Petrus l᷊au i Yohanes nanimbo l᷊ima ngi sire rua su kaul᷊i u tau Samaria e'e; kuteu i sire nakatarima Roh u Mawu Ruata.

18I Simon nakawua himoneu ual᷊ingu l᷊ima ngu manga rasuli nitimbo su manga taumata e'e, Roh u Mawu Ruata nionggo si sire. Watu'u e'e i Simon numbawa doi sarang koa i Petrus l᷊au i Yohanes, 19bou e'e nangul᷊i “Onggoko si sia kawasa e'e l᷊ai tadeau boko l᷊imaku itimbo si sai-sai, tau e'e sarung makatarima Roh u Mawu Ruata.”

20Arawe i Petrus nusumimbahi, “Kasasilaka si kau l᷊au doi ngu. Sinaungu l᷊aonggo u Mawu Ruata botonge kal᷊uangeng u doi? 21I kau takoae haki guna ngu mutumuhu su l᷊al᷊ung u hal᷊i i kami, watu'u naungu ta nutatahino su saruang u Mawu Ruata 22Watu'u e'e rumeko pandungu ko dal᷊ai e'e, dang pundoko su Mawu tadeau I Sie munggile u ampunge su sipirangu ko dal᷊ai e'e. 23Watu'u ia matitong i kau napene u pananoi dang nikawasang u ko dal᷊ai.”

24Bou e'e i Simon nangul᷊i si Petrus dang si Yohanes, “Tul᷊ungko pundo su Mawu tadeau takoae sarang simbau bou manga ko niul᷊i i rua e'e mariadi si sia.”

25Suapang i sire rua bou nusaksi dang nuhabari didato ngu Mawu, I Petrus l᷊au i Yohanes nusul᷊e sarang Yerusalem. Dang su l᷊al᷊eng i sire rua nuhabari Habari Mapia e'e su manga soa su Samaria.

I Filipus dingang singkatau ko pangkatie marange bou Etiopia

26Singkatau Malaikati u Mawu nangul᷊i si Filipus, “Ho puwuae! Tamaiko sarang simbuka ngu timuhi#8:26: simbuka ngu timuhi: arako kal᷊ihae. sarang l᷊al᷊eng ko manumpu Yerusalem dingang Gaza.” L᷊al᷊eng e'e ko marumasi.#8:26: L᷊al᷊eng e'e marumasi: arako l᷊al᷊eng e'e seng ta nipake orasi i'i. 27-28Kuteu i Filipus dingang nuwua. Su tempo e'e pia singkatau mul᷊ahal᷊i su Istana ngu Etiopia ko kal᷊al᷊enge mapul᷊e sarang wanuange. Tau e'e singkatau pangkatie marange ko hal᷊ie mutuhung kaul᷊i u kakakala i Kandake, boki ngu wanua Etiopia, Tau e'e seng mbuae bou Yerusalem guna ngu mukal᷊iomaneng su Mawu Ruata dang i'i i sie seng kakapul᷊e'e dingang u keretae. Saritau kakangiang su l᷊al᷊ung keretae e'e i sie kapubasange Buki i Nabi Yesaya. 29Roh u Mawu Ruata nangul᷊i si Filipus, “Tamaiko haunge kereta pai e'e.” 30Kuteu i Filipus tamai nuhumaung kereta e'e, bou e'e i sie nakaringihi tau e'e kapubasange Buki i Yesaya. I Filipus nakina si sie, “Apa i Tuang nakahingang apa ko kahibasa ngi Tuang e'e?”

31Tau e'e nusumimbahi, “Kirapawe ia makahingang boko takoae ko manul᷊ara si sia?” Bou e'e i sie nuhawu si Filipus paawi su kereta dang pakangiang singkakangiang dingange. 32#Yes. 53:7-8I'i ayeti ko nibasange e'e,

“I Sie musul᷊ung u domba ko kahiaha guna ngu hatang,

musul᷊ung u ana u domba ta mumbehe su tempo ngu rukue kahighunting,

kere'e I Sie ta mudidato maning kitang singkamohong.

33I Sie nihinakaneng dang niakal᷊eng.

Puwawiahi-E nipakailang bou wawo u dunia

hakiu takoae sarang singkatau makawuke ngu hintou-E.”

34Tau ko marange pangkatie bou Etiopia e'e nangul᷊i si Filipus, “Kenang ko habari si sia, i sai ko kahiul᷊i u nabi i'i? I sie sisane arako taumata ko wal᷊inge?” 35Kuteu i Filipus nanita nudidato; i sie nupake u manga ayeti e'e nikoae kere punguang u didatoe guna ngu muhabari Habari Mapia hal᷊i I Yesus su tau ko marange pangkati e'e. 36Su l᷊al᷊al᷊engang, i sire rua nurating u tampa ko pia ake'e. Tau e'e nangul᷊i, “Tuhungete pai, pia ake! Apa l᷊ai kurange guna ngu manahani si sia?”

37[I Filipus nangul᷊i, “Boko i Tuang mangimang dingang kal᷊abo u naung, i Tuang botonge isahani.”

“Ia mangimang I Yesus Kristus ko Ahusi u Mawu Ruata,” angkung tau ko marange pangkati bou Etiopia e'e.]

38Bou e'e i sie nangoro keretae pangiro; i sire rua, i Filipus l᷊au tau e'e, tuhue nul᷊umintu su l᷊al᷊ung u ake, dang i Filipus nanahani si sie. 39Su tempo i sire rua nusumuwang bou ake, Roh u Mawu Ruata nangal᷊a si Filipus bou e'e. Tau ko marange pangkati bou Etiopia e'e seng ta nakawua l᷊ai si sie. Dingang u naung mal᷊uasi tau ko marange pangkati e'e nanurusi l᷊al᷊al᷊engange. 40Wugha ngu i Filipus nae ko seng su Asdod. Dang suapang i sie nanurusi l᷊al᷊al᷊engange, i sie nuhabari Habari Mapia hal᷊i I Yesus su kaul᷊i u soa sarang i sie nurating su Kaisarea.

Currently Selected:

WUKE NGU MANGA RASULI 8: PLT

Highlight

Copy