WUKE NGU MANGA RASULI 9

Putatobati i Saulus

(Wuk. 22:6-16, 26:12-18)

1Tintal᷊a e'e i Saulus mangkate turusi kapangantighi mo mamate manga tumatuhu Mawu Yesus. I sie nakoa sarang koa u imam ko l᷊abo, 2dang nundo surati u kawasa guna ngu makoa sarang manga pangaha manga wal᷊e pukakal᷊iomanengang u tau Yahudi su Damsyik, tadeau boko i sie musombang manga tau ko mangimang si Yesus pai se'e, i sie botonge maname si sire dang mumbawa si sire sarang Yerusalem.

3Saritau kal᷊al᷊enge sarang Damsyik, suapang seng masandighi soa e'e, singkawua pia kasasua bou l᷊angi nusuminang nul᷊iku si Saulus. 4I sie nawanting su tana bou e'e nikaringihi pia tingihi nangul᷊i si sie, “Saulus, Saulus! Nakurawe i kau mutingkai si Sia?”

5“Ko i sai I Kau, Mawu?” nipakinateng i Saulus.

Tingihi e'e nusumimbahi, “Ia I Yesus, ko nitingkaitangu. 6Arawe su orasi i'i wangungte dang tamaite sarang soa. Pai se'e sarung ihabari si kau apa ko mambeng koateng u.”

7Manga taumata ko nutumuhu dingang i Saulus nahuwi hakiu ta nakapudidato; watu'u i sire nakaringihi tingihi e'e kateho ta nakawua taumata sarang singkatau. 8Bou e'e i Saulus nurumarisi dang namuka matange. Kateho matange seng ta makawua apa-apa. Inau i sire nuhinggo l᷊imange dang nanata si sie nusumu sarang Damsyik. 9Tilu l᷊ou l᷊iwuenge i sie ta nakawua dang su kal᷊iwuenge e'e i sie ta nukumang arako ta nanginung sarang singkodo.

10Su Damsyik pia singkatau tumatuhu Mawu Yesus arenge i Ananias su l᷊al᷊ung u simbau kawawua, Mawu nudidato si sie, Mawu nangul᷊i, “Ananias!”

I Ananias nusumimbahi, “Ia, Tuang.”

11Mawu nangul᷊i, “Dakoko tamai i'i. Tamaiko sarang wal᷊e ngi Yudas su L᷊al᷊eng Matul᷊iri. Pakina pai se'e pia singkatau arenge i Saulus bou soa ngu Tarsus. Tau e'e kapukal᷊iomanenge, 12dang su l᷊al᷊ung u simbau kawawua i sie nakawua singkatau ko ese, arenge i Ananias, nusumongo si sie dang namilo u l᷊imange si sie tadeau i sie botonge sau makawua.”

13I Ananias nusumimbahi, “Mawu, ia seng nakaringihi maul᷊i taumata nuhabari hal᷊i u tau i'i, nangilembo hal᷊i u manga tingkaie ko nikoae su manga umati-U su Yerusalem. 14Dang i'i i sie seng nusumongo sarang i'i nipakawala ngu manga tumbonang u imam guna ngu maname kaul᷊i u taumata ko mangimang si Kau.”

15Kateho Mawu nangul᷊i si Ananias, “Mangkate tamai! Watu'u Ia seng namile si sie guna ngu putangkiang si Sia, tadeau i sie puhabari hal᷊i u Ia su kaul᷊i u bangsa ko wal᷊inge ko ta nutumuhu agama ngu tau Yahudi dang su manga ratu dang l᷊ai su tau Israel. 16Dang Ia sisaneku sarung manibo si sie kaul᷊i u singsara ko sarung ikapundangenge ual᷊ingu Ia.”

17Kuteu I Ananias dingang natamai sarang wal᷊e e'e dang nanimbo l᷊imae si Saulus. “Saulus,” angkung i Ananias, “Mawu Yesus ko nikawua ngu su l᷊al᷊eng su tempo i kau namai, I Sie nundoi si sia pasongo tadeau i kau botonge sau makawua dang ikawasa ngu Roh u Mawu Ruata.” 18Sikatempo e'e l᷊ai pia barang ko musul᷊ung u ona u kina nanawo bou mata ngi Saulus dang i sie seng sau nakawua. I sie dingang nuwangung, bou e'e nisahani. 19Suapang bou nukumang, i sie dingang sau natoghasi.

I Saulus nanintiro su Damsyik

I Saulus natana su Damsyik dingang u manga tumatuhu I Yesus pira l᷊ou l᷊iwuenge. 20I sie turusi nakoa sarang manga wal᷊e pukakal᷊iomanengang dang nanita nuhabari himoneu I Yesus e'e ko Ahusi Mawu Ruata.

21Kaul᷊i u taumata naherang nakaringihi si Saulus. I sire nangul᷊i, “Wal᷊ingewe i sie i'i su Yerusalem seng namate manga taumata ko mangimang si Yesus? I sie nusumongo su si'i kitang guna ngu maname dang mumbawa si sire sarang tumbonang u manga imam!”

22Kateho i Saulus nanamba ikahungge. Manga kal᷊al᷊ahe ko itode'e su hal᷊i I Yesus kere'e makaaking himoneu seng I Yesus e'e Ratu Mananal᷊amati, hakiu manga tau Yahudi ko natana su Damsyik ta nakarendehi.

23 # 2Kor. 11:32-33 Suapang nal᷊iu pira l᷊ou bou e'e manga tau Yahudi nughaghighili guna ngu mamate si Saulus. 24Kateho kirou ngi sire e'e nikatitonange. L᷊ou huwi i sire mangampal᷊i su tukari u soa guna ngu mamate si sie. 25Katewe su sihuwi, manga tumatuhu i Saulus nangal᷊a si sie, bou e'e i sie niul᷊uhi su l᷊al᷊ung u wawewekang nipal᷊intu bou pagari u soa

I Saulus su Yerusalem

26I Saulus nakoa sarang Yerusalem, dang pai se'e i sie nutawakal᷊i nukomol᷊i dingang u tumatuhu I Yesus. Kateho i sire mataku si sie, watu'u i sire ta mangimang ko i sie tinga-tingari seng nakoa tumatuhu I Yesus. 27Bou e'e i Barnabas nakoa sarang koae, bou e'e numbawa si sie sarang tingo ngu manga rasuli. I Barnabas nuwuke si sire hal᷊i u kirapa i Saulus nakawua Mawu su l᷊al᷊eng dang kirapa Mawu nudidato si sie. I Barnabas nuhabari l᷊ai hal᷊i u kirapa kawahaninge i Saulus nanintiro su Damsyik dingang u areng I Yesus. 28Ual᷊ingu e'e i Saulus natana dingang i sire, dang nunasi dingang wahani su kaul᷊i u Yerusalem dingang u areng u Mawu. 29I sie nudidato dang nupapangal᷊a l᷊ai dingang u manga tau Yahudi ko muwisara ngu Yunani, kateho i sire mundea mamate si sie. 30Suapang manga taumata mangimang ko wal᷊inge natitong u hal᷊i e'e, i sire numbawa si Saulus sarang Kaisarea, mbuhue i sie niroho sarang Tarsus.

31Jamaati su kaul᷊i u Yudea, Galilea, l᷊au Samaria mbuhue narumasi. Ual᷊ingu tul᷊umang u Roh u Mawu Ruata, dingang u katataku su Mawu, manga jamaati e'e nanamba natoghasi dang nanamba naul᷊i.

I Petrus su Lida dang su Yope

32I Petrus nul᷊umal᷊eng su manga tampa nutiwo manga jamaati. Pia su silou i sie nutiwo umati Mawu ko natana su Lida. 33Pai se'e i sie nusombang u singkatau ko ese arenge i Eneas, ko kesohi dang seng ta makawangung bou l᷊al᷊okange wal᷊u taung l᷊iwuenge. 34I Petrus nangul᷊i si Eneas, “Eneas, I Yesus Kristus nupakaul᷊e ngi kau. Wangungte dang rumpighie l᷊al᷊okangu.” Singkatempo e'e l᷊ai i Eneas turusi nuwangung. 35Kaul᷊i u tau Lida l᷊au Saron nakawua si Eneas, bou e'e i sire kaul᷊ie nangimang su Mawu.

36Su Yope pia singkatau kowawine arenge i Tabita. I sie singkatau ko mangimang si Yesus. (Arenge su l᷊al᷊ung u wisara ngu Yunani i Dorkas, mangal᷊enge rusa.) I sie sintinia mukoa manga hal᷊i ko mapia dang mutul᷊ung manga tau ko susa. 37Su tempo e'e i sie nasaki bou e'e nate. Suapang badange mbuae nireno, i sie nipilo su kamari su wawoe. 38Yope e'e ta tumaniu marau bou Lida. Inau su tempo ngu manga tumatuhu I Yesus su Yope nakaringihi i Petrus ene su Lida, i sire nundoi dua ngkatau patamai sarang koa i Petrus dingang u tatanata i'i, “Pakaehongte mai.” 39I Petrus turusi nuwangung dang nutumuhu si sire. Singkasongoe pai se'e, i sie niwawa sarang kamari ko su wawoe. Kaul᷊i u kowawine wal᷊u su se'e nuhumbung si Petrus apiru kasangie dang nanibo si sie manga l᷊aku l᷊au juba ko nighepe i Dorkas guna ngi sire su tempo i sie mborong wiahi. 40I Petrus nundoi si sire kaul᷊ie pasuwang, bou e'e i sie nusuba dang nukal᷊iomaneng, Bou e'e i sie nutumatingo mayati Dorkas dang nangul᷊i, “Tabita, puwangungte!” I Dorkas namuka matange, dang su tempo ngu i sie nakawua si Petrus, i sie nukumangiang. 41Bou e'e i Petrus nuhinggo l᷊imange dang nutul᷊ung si sie nurumarisi. Mbuhue i Petrus nukumui manga taumata ko mangimang su se'e dingang u manga kowawine ko wal᷊u e'e, bou e'e nanarakang i Dorkas ko seng nuwiahi e'e si sire. 42Habari hal᷊i ko nariadi e'e nakeke su kaul᷊i u Yope, hakiu maul᷊i taumata ko nangimang si Yesus kere Ratu Mananal᷊amati sire. 43I Petrus natana su se'e pira l᷊ou l᷊ai su wal᷊e ngu singkatau ko mul᷊al᷊ekesi pisi ngu binatang arenge i Simon.

Currently Selected:

WUKE NGU MANGA RASULI 9: PLT

Highlight

Copy