WUKE NGU MANGA RASULI 7

Pidato ngi Stefanus

1Imam ko l᷊abo nukina si Stefanus, “Apa kaul᷊ie ko nihabari u tau e'e tingari?” 2#Kar. 12:1I Stefanus nusumimbahi, “Manga ana u simbau dang manga mawu! Kenangko pundaringihi si sia! Su horo i upung i kite i Abraham nangal᷊ing sarang Haran, su tempo ngi sie mborong natana su Mesopotamia, Mawu Ruata ko mawantughi nusumongo si sie 3dang nangul᷊i, ‘Tintangte wanua ngu dingang u manga ana u singkatau'u. Dakote tamai sarang wanua ko sarung Daku itibo si kau.’ 4#Kar. 11:31, 12:4Kuteu i Abraham nanintang u wanua Kasdim, bou e'e nangal᷊ing sarang Haran. Suapang i papa ngi Abraham nate, Mawu Ruata nupangal᷊ing i Abraham su wanua i'i ko su orasi i'i nikatanakeng u manga ana u simbau dang kaul᷊i u manga mawu. 5#Kar. 12:7, 13:15, 15:18, 17:8Su tempo e'e takoae sarang simpalang bou wanua i'i ko nionggo u Mawu Ruata si Abraham guna ngu makoa koa i Abraham; sarang kere manga pal᷊eri u l᷊aeri ta nionggo si sie. Kateho Mawu Ruata nudiandi uare I Sie sarung mangonggo e'e si Abraham guna ngu makoa koa i Abraham dingang u hintounge. Su tempo e'e i Abraham takoae anae. 6#Kar. 15:13-14Kateho i'i ko niul᷊i u Mawu Ruata si sie, ‘Hintou ngu sarung matana kere tau raghi su wanua ngu taumata ko wal᷊inge. Manga taumata ngu wanua e'e sarung matahul᷊ang i sire dang sarung mutingkai si sire su l᷊al᷊ung u pauhasu su taunge l᷊iwuenge. 7#Sasu. 3:12Kateho Ia sarung muhukung bangsa ko nutahul᷊ang i sire, dang i sire sarung sumuwang bou wanua e'e dang sarung manumba si Sia su tampa i'i.’ 8#Kar. 17:10-14, 21:2-4, 25:26, 29:31–35:18Bou nangul᷊i kere'e l᷊aiki diandi e'e nipakatoghasi Mawu Ruata dingang u hal᷊i sunati. Kuteu suapang i Ishak ana i Abraham nipahinding, i Abraham nanunati si sie su tempo umurie wal᷊u l᷊ou. Bou e'e i Ishak nanunati anae l᷊ai, i Yakub. Dang i Yakub l᷊ai nanunati manga anae i sire mapul᷊odua, ko nakoa manga iyamang i upung u tau Yahudi.

9 # Kar. 37:11, 28, 39:2, 21 Manga iyamang i upung i kite e'e naturu naung i sire si Yusuf, sarang i sire nuwal᷊u si sie nakoa l᷊ang su Mesir. Kateho Mawu Ruata nahundingang i sie, 10#Kar. 41:39-41dang nul᷊iu ngi sie bou kaul᷊i u susa. Mawu Ruata nangonggo si sie akal᷊i l᷊au kapapande su tempo i sie nutumatingo si Firaun ratu ngu Mesir, hakiu i Firaun nuhengke si sie nakoa Gubernur u Mesir dingang u mangangawasa ngu istana ngi Firaun. 11#Kar. 42:1-2Bou e'e nariadi tempo kal᷊ahutung ko l᷊abo su kaul᷊i u wanua ngu Mesir dang Kanaan hakiu taumata nasusa kahingang. I upung i kite ta nakarea kang. 12Kuteu su tempo ngi Yakub nakaringihi su Mesir pia gandung i sie nundoi manga anae, i upung i kite, natamai sarang pai e'e kahimotongange. 13#Kar. 45:1, 16Su tempo ngi sire natamai karuange, i Yusuf nuhabari su manga tuhange e'e i sie ko i Yusuf. Mbuhue su tempo e'e ratu ngu Mesir natitong u manga ghe i Yusuf. 14#Kar. 45:9-10,17-18, 46:27Bou e'e i Yusuf nundoho ngu habari sarang koa i papange, i Yakub, mundo tadeau i sie dingang u manga ghe'e pangal᷊ing sarang Mesir – kaul᷊ie pitumpul᷊ol᷊ima su kataunge. 15#Kar. 46:1-7, 49:33Kuteu i Yakub nangal᷊ing sarang Mesir dang su se'e i sie dingang i upung i kite napul᷊e asal᷊ie. 16#Kar. 23:3-16, 33:19, 50:7-13; Yos. 24:32Bou e'e mayati i sire sau niwawa sarang Sikhem dang nikubul᷊i su kubul᷊i ko seng nil᷊uangeng i Abraham bou tau Hemor su Sikhem.

17 # Sasu. 1:7-8 Suapang seng masandighi temponge Mawu Ruata nungganapi diandi-Nge si Abraham, bangsa ngi kite su Mesir seng kakaul᷊ie. 18Panginsuenge singkatau ratu ko wal᷊inge, ko wugha ngi Yusuf, namarenta su Mesir. 19#Sasu. 1:10-11, 22Ratu e'e nuputaghunang u bangsa ngi kite dang nutingkai si i upung i kite. I sie nanihasa si sire pundume manga ana i sire ko wuhu nipahinding tadeau pakiwala kapapatenge. 20#Sasu. 2:2Su tempo e'e i Musa nipahinding. I sie dario ko masidada kahingang. Tilu wul᷊ang l᷊iwuenge i sie nihiking su wal᷊e ngi papange, 21#Sasu. 2:3-10dang suapang i sie nirume, ahusi Firaun mahua nangal᷊a si sie, mbuhue nihikinge kere anae sisane. 22Kaul᷊i u titong u tau Mesir nitintiro si sie dang i sie nakoa taumata pia kawasange su didatoe dang su kakanoae.

23 # Sasu. 2:11-15 Su tempo ngu umuri Musa paupul᷊o su taunge, nutumimbul᷊i kao su l᷊al᷊ung u naunge mo matamai mutuhung kakakoa u bangsae tau Israel 24Bou e'e i sie nakawua pia singkatau bou tal᷊oara i sire nirarihang u tau Mesir; i sie nutumatawang su tau ko nirarihang e'e apiru namate tau Mesir e'e. 25Su naung i Musa bangsange sarung makahingang himoneu Mawu Ruata seng kapupake i sie guna ngu mul᷊iwiri sire. Kateho i sire mang ta nakahingang. 26Ndai mal᷊ou i sie sau nakawua pia i sire rua tau Israel kapukakokange. Bou e'e i sie nutul᷊ung nupurame ngi si sire rua. I sie nangul᷊i, ‘I kumu i'i ko singge. Hakiwe nukakoka ko?’ 27Kateho tau ko nangoka ringange e'e nanuhuri si Musa sarang wiwihi bou e'e nangul᷊i, ‘I sai nuhengke si kau nakoa pangaha l᷊au hakim i kami? 28Apa i kau mo mamate si sia l᷊ai musul᷊ung i kau namate tau Mesir e'e kahuwi?’ 29#Sasu. 18:3-4Suapang i Musa nakaringihi apa ko niul᷊i u tau e'e, i Musa nutumal᷊ang bou Mesir bou e'e natana su soa ngu Midian. Pai se'e i sie nakarea anae dua ngkatau.

30 # Sasu. 3:1-10 Paupul᷊o su taunge bou e'e pia singkatau malaikati nusumongo si Musa su tana ko l᷊inggi masandighi u wul᷊uri u Sinai. Malaikati e'e nusumongo su l᷊al᷊ung u putung su nggal᷊umue ko kahenange. 31I Musa naherang nakawua hal᷊i e'e, hakiu i sie natamai masandi-sandighi tadeau makatitong minsang ko apa e'e. Bou e'e i sie nakaringihi tingihi u Mawu nangul᷊i, 32‘Ia i'i Mawu Ruata ngi i upungu; Ia Mawu Ruata ngi Abraham, i Ishak, l᷊au i Yakub.’ I Musa kakendenge u katataku hakiu i sie seng ta wahani l᷊ai mutuhung sarang nggal᷊umue e'e. 33Bou e'e Mawu sau nangul᷊i, ‘L᷊uae sandaleng ko mal᷊al᷊oho su l᷊aeri u e'e, watu'u tana ko nirarisikangu e'e tana ko susi. 34Ia seng nakawua dang nakahingang kirapa buhae wawaneng u umati-Ku su Mesir. Ia seng nakaringihi kahioro i sire dang Ia nul᷊umintu guna ngu mul᷊iwiri sire. Su orasi i'i, maite! Ia mundoi si kau pusul᷊e sarang Mesir.’

35 # Sasu. 2:14 I Musa i'i i Musa ko ta niaku ngu bangsa ngu Israel dang ko nitolaki dingang u didato i'i, ‘I sai ko nuhengke si kau nakoa pangaha dang hakim i kami?’ Kateho ko seng i sie taumata ko niroi u Mawu Ruata guna ngu makoa pangaha dang panal᷊amati, dingang nisumbalang u malaikati ko nusumongo si sie su nggal᷊umue ko kahenange e'e. 36#Sasu. 7:3, 14:21; Rek. 14:33I Musa e'e ko nangaha bangsa ngu Israel nusumuwang bou Mesir dingang nukoa ko makal᷊aherang dang manga hal᷊i ko takoae sihinge su Mesir, su l᷊auri mahamu dang su tana ko l᷊inggi su l᷊al᷊ung u paupul᷊o su taunge l᷊iwuenge. 37#Sau. 18:15, 18I sie l᷊ai i Musa ko nangul᷊i su kawanua ngu Israel, ‘Mawu Ruata sarung mangonggo si kumu singkatau nabi ko nipile bou tal᷊oara i kumu, musul᷊ung I Sie namile si sia.’#7:37: musul᷊ung I Sie namile si sia: arako kere ia. 38#Sasu. 19:1–20:17; Sau. 5:1-33I Musa i'i su tal᷊oara u bangsa ngu Israel su tana ko l᷊inggi, nakoa mananal᷊oara guna ngu malaikati ko nudidato si sie su wul᷊uri u Sinai dingang i upung i kite. I sie nanarima bou Mawu Ruata habari ko wiahi guna ngu ihabari si kite.

39Maning kere'e i upung i kite mandi tumuhu si sie. I sire nanagakang si sie dang mo musul᷊e sarang Mesir. 40#Sasu. 32:1I sire nangul᷊i si Harun, ‘Pukoako manga dewa guna ngi kami, tadeau manga dewa e'e mangaha si kami. Watu'u i kami seng wugha apa ko nariadi dingang i Musa e'e ko numbawa si kami nusumuwang bou Mesir!’ 41#Sasu. 32:2-6Bou e'e su tempo e'e i sire nukoa patong ana u sapi simbau, bou e'e i sire nanumba ngu korbang su patong e'e dang nukoa sal᷊iwang guna ngu manumba barang ko nikoa i sire sisane. 42#Am. 5:25-27Kuteu Mawu Ruata nanintang i sire dang namala ngi sire panumba manga wituing su l᷊angi. E'e nuhino kere seng mawawohe su buki u manga nabi, kiri'i,

‘Ei manga tau Israel! Wal᷊ingewe guna ngu Ia

I kumu nuhata dang nanumba ngu binatang paupul᷊o su taunge l᷊iwuenge su tana ko l᷊inggi

43Kema ngu barhala Molokh e'e ko taghunang iwawa i kumu

singkahindo dingang u patong wituing barhala ngi kumu, ko i Refan;

e'e patong ko nikoa i kumu guna ngu isumba

watu'u e'e Ia sarung mundume i kumu pakarau sarang simbuka su soa ngu Babel.’

44 # Sasu. 25:9, 40 Kema tampa u Mawu Ruata sumongo su taumata pia si upung i kite su tana ko l᷊inggi. Kema e'e nikoa watu'u niparenta ngu Mawu Ruata si Musa dang nutumuhu tul᷊ara ko nitode u Mawu Ruata si Musa. 45#Yos. 3:14-17Mbuhue kema e'e niwawa i upung i kite su tempo ngi sire dingang i Yosua natamai namal᷊aho wanua ngi kite i'i bou kawasa ngu manga bangsa ko niuseri u Mawu Ruata su tingo ngi sire. Kema e'e ene su se'e sarang nurating u tempo ngi Daud. 46#2Sam. 7:1-16; 1Taw. 17:1-14I Daud nakal᷊uasi naung u Mawu Ruata dang nundo si Sie tadeau i sie ipakawala mupararisi wal᷊e ngu Mawu Ruata ko taghunang isumba ngi Yakub#7:46: Mawu Ruata ko taghunang isumba ngi Yakub: pira mbau wohe horo: bangsa ngu Israel. e'e. 47#1Mar. 6:1-38; 2Taw. 3:1-17Kateho hindo i Salomo nupararisi wal᷊e ngu Mawu Ruata.

48Maning kere'e Mawu Ruata Ko Karangetange ta natana su wal᷊e ko nikoa u taumata; watu'u su l᷊al᷊ung u buki u nabi kawawohe kiri'i,

49 # Yes. 66:1-2 ‘L᷊angi e'e kakangianeng-Ku,

dang dunia tatotokang u l᷊aeri-Ku.

Ko wal᷊e apa ikoateng i kumu guna ngu Ia?

Su apa tampa guna ngu Ia mangindul᷊e?

50Wal᷊ingewe Ia sisaneku ko nundiadi kaul᷊i u patiku?’

kere'e angkung u Mawu Ruata.

51 # Yes. 63:10 Wal᷊inge gampang kitihie timbo u manga ana u simbau dang kere'e kasusange tumuhu su Mawu Ruata! Tul᷊i ngi kumu ko wenggeli kahingang mundaringihi didato ngu Mawu Ruata! I kumu musul᷊ung i upung i kumu, sintinia mundoka Roh u Mawu Ruata! 52Apa pia nabi ko ta nitingkaitang i upung i kumu? I sire namate manga raroi u Mawu Ruata ko ndahuwite e'e seng nuhabari ko himoneu L᷊ang u Mawu Ruata ko tingari e'e sarung sumongo. Dang su orasi i'i i kumu seng nutingkai dang namate l᷊ang u Mawu Ruata e'e. 53Manga Malaikati seng nuhabari kaul᷊i u parenta ngu Mawu Ruata si kumu kateho i kumu ta nutumuhu!”

I Stefanus nipal᷊o u watu

54Kere'e manga tataho u manga Pangadilang u Agama e'e nakaringihi kaul᷊ie ko nihabari Stefanus, naturu naung i sire dang nuwawal᷊uang kahingang si sie. 55Kateho i Stefanus ko nikawasa ngu Roh u Mawu Ruata, nul᷊umal᷊ingara sarang l᷊angi. I sie nakawua kawawantughi u Mawu Ruata l᷊au I Yesus kararisi su tampa ko makawasa su simbuka kuaneng u Mawu Ruata. 56“Tuhungete,” angkung i Stefanus, “Ia nakawua sorga nawuka dang ana u taumata kararisi su simbuka kuaneng u Mawu Ruata!”

57Manga tataho u pangadilangu e'e nanaka tul᷊i ngi sire apiru nukumiha, bou e'e singkahindo nanumbou si Stefanus. 58I sire nuhiuri i sie sarang l᷊ikuri soa mbuhue nipal᷊o u watu. Manga taumata ko kaputuhunge hal᷊i ko nariadi e'e nakihinggo ngu pakeang i sire su singkatau makuda arenge i Saulus. 59Saritau i sire kapamal᷊oe si Stefanus, i Stefanus nukumiha, “Mawu Yesus, tarimako rohku!” 60Bou e'e i sie nusuba dang nukumiha, “Mawu, kumbahang dosa i'i makoa si sire!” Bou nuhabari kere'e i sie namal᷊usi sinangonge.

Currently Selected:

WUKE NGU MANGA RASULI 7: PLT

Highlight

Copy