WUKE NGU MANGA RASULI 3
3
Tau ko kesohi nipakaul᷊e
1Pia su silou su orasi mukal᷊iomaneng pukul᷊i tatilu wawul᷊aeng, i Petrus sire rua ngi Yohanes nakoa sarang wal᷊e ngu Mawu, e'e su tempo mukal᷊iomaneng. 2Pai se'e su tukari sasukang ko nisigho “Tukari Masidada”, pia singkatau ko ese ko kesohi mangki bou nipahinding. Sintinia l᷊ou tau e'e iwawa i sire sarang e'e guna ngu makikindaghi su manga taumata ko sumu su wal᷊e ngu Mawu. 3Su tempo ngu tau e'e nakawua si Petrus l᷊au i Yohanes kasue sarang wal᷊e ngu Mawu, i sie nundo makikindaghi u apa-apa bo i sire rua. 4I sire rua nutumaeri si sie, bou e'e i Petrus nangul᷊i, “Pumbawua si kami!” 5Bou e'e tau e'e nutumaeri si sire rua dang muharapi sarung makarea manga apa bo i sire rua. 6Kateho i Petrus nuhabari si sie, “Ia takoa-koae doi. Kateho apa ko pia si sia, e'e sarung daku ionggo si kau: Dingang u kawasa I Yesus Kristus tau Nazaret e'e, l᷊al᷊engte!” 7Bou e'e i Petrus nuhinggo l᷊ima kuaneng u tau ko kesohi e'e dang nutul᷊ung si sie pararisi. L᷊aeri tau e'e dingang u kal᷊entoe turusi natoghasi. 8Bou e'e i sie nul᷊uminso nurumarisi, dang nanita nul᷊umal᷊eng tarai namai. Bou e'e i sie nusumu su Wal᷊e ngu Mawu dingang i Petrus sire rua ngi Yohanes, mangkate kal᷊al᷊enge dang kal᷊insoe dang kapundalonge Mawu Ruata. 9Kaul᷊i u taumata katuhunge si sie kal᷊al᷊enge dang kapundalonge Mawu Ruata. 10Bou e'e i sire natitong himoneu i sie mundando ko narange kakangiang su “Tukari Masidada” su Wal᷊e ngu Mawu. I sire naherang kahingang nakawua manga ko nariadi si sie.
Nasi i Petrus su l᷊al᷊ung u Wal᷊e ngu Mawu
11Tau e'e mangkate katuhue si Petrus l᷊au i Yohanes. Dang su tempo ngi sire tilu nasongo su poresi ko nisigho “Poresi Salomo”, kaul᷊i u taumata nusumongo nahumbung si sire ual᷊ingu naherang. 12Su tempo ngi Petrus nakawua manga taumata e'e, i sie nangul᷊i si sire, “Ei i kumu manga tau Israel, nakura manga ana u simbau naherang u hal᷊i i'i? Nakurawe i kumu mangkate katuhunge si kami? Apa su naung i kumu tau i'i nakal᷊al᷊eng watu'u pia kawasa si kami, arako ual᷊ing i kami matuhu su Mawu Ruata? 13#Sasu. 3:15Mawu Ruata ko isumba ngi Abraham, i Ishak, i Yakub, Mawu Ruata ngi upung i kite, Mawu Ruata e'e seng nupakawantughi L᷊ang-E, I Yesus. I Yesus e'e ko nisarakang i kumu su mangangawasa, dang nirokateng i kumu su tingo ngi Pilatus, su tempo ngi Pilatus mo mamilo si sie. 14#Mat. 27:15-23; Mrk. 15:6-14; Luk. 23:13-23; Yoh. 19:12-15I sie ko susi dang mapia, kateho i kumu nundoka si Sie dang nundo tadeau i Pilatus mamilo singkatau ko tahapate guna ngi kumu. 15Manga ana u simbau seng namate si Sie, sumbal᷊i ko I Sie pung u putatumbiahi kaul᷊i taumata. Dang Mawu Ruata seng nupuwiahi Sie sau bou papate. I kami i'i nakawua mal᷊ahe hal᷊i e'e. 16Manga ana u simbau seng nakawua dang nakapusaksi ngu apa ko nariadi su tau ko kesohi i'i. I sie seng natoghasi dang naul᷊e ual᷊ing i sie mangimang si Yesus dingang u kawasang-E. Ual᷊ingu nangimang si Yesus hakiu tau i'i seng naul᷊e su tingo ngu manga ana u simbau.
17Manga ana u simbau! Orasi i'i ia matitong himoneu manga ko nikoa i kumu l᷊au manga pangaha i kumu si Yesus, e'e ko nikoa i kumu watu'u i kumu wugha manga ko kahikoa i kumu. 18Dang ual᷊ingu e'e naganapi l᷊ai manga ko seng nihabariu u Mawu Ruata ndahuwite bou manga nabi-E, himoneu Ratu Mananal᷊amati ko nidiandi e'e mambeng mutatahang u singsara. 19Watu'u e'e manga ana u simbau, putobati bou kaul᷊i u dosa ngi kumu dang pusul᷊ete su Mawu Ruata, tadeau I Sie mangumu manga dosa ngi kumu. 20Mawu sarung sumongo si kumu dang i kumu sarung makapundang kal᷊al᷊oahi su naung. Dang Mawu sarung mundoi I Yesus pasongo si kumu, watu'u I Sie seng nitantu u Mawu Ruata makoa Ratu Mananal᷊amati guna ngi kumu. 21I Sie mambeng matana su sorga sarang Mawu Ruata mukoa kaul᷊ie ko wuhu musul᷊ung ko nihabariu u Mawu Ruata bou manga nabi-E ndahuwite. 22#Sau. 18:15, 18I Musa mbuae nuhabari, ‘Mawu Ruata ngu sarung mundoi sarang koa i kumu singkatau nabi bou bangsa ngu sisane, musul᷊ung kere I Sie nundoi u ia.#3:22: musul᷊ung kere I Sie nundoi u ia: arako kere ia. I kumu mambeng pundaringihi kaul᷊i u ko nihabari u nabi e'e si kumu. 23#Sau. 18:19Taumata ko ta mangindakang manga ko nihabari u nabi e'e, tau e'e sarung ipakaghea bou umati Mawu Ruata dang ipakawinasa.’ 24Manga nabi ko mbuae nuhabari hengetang u Mawu Ruata, nanita bo i nabi Samuel l᷊au manga nabi ko wal᷊inge ko nasongo samuringe, kaul᷊ie nuhabari kakakoau orasi i'i. 25#Kar. 22:18Manga diandi ngu Mawu Ruata ko nihabari u manga nabi e'e kaul᷊ie mang guna ngi kumu manga ana u simbau. Su l᷊al᷊ung u diandi ko nikoa u Mawu Ruata dingang i upung i kumu, Mawu Ruata nangul᷊i si Abraham kiri'i, ‘Bou hintou ngu Ia sarung mangal᷊amati kaul᷊i u bangsa su dunia.’ Diandi e'e ko guna ngi kumu l᷊ai. 26E'e sabapie Mawu Ruata namile L᷊ang-E, bou e'e nangoro si Sie pasongo horo sarang koa i kumu, tadeau I Sie mangal᷊amati si kumu. I Sie mangal᷊amati e'e tadeau i kumu kaul᷊ie manga ana u simbau mutobati bou kakanoa puwawiahiu ko dal᷊ai.”
Currently Selected:
WUKE NGU MANGA RASULI 3: PLT
Highlight
Share
Copy
Want to have your highlights saved across all your devices? Sign up or sign in
