WUKE NGU MANGA RASULI 2

Sasongo ngu Roh u Mawu Ruata

1 # Im. 23:15-21; Sau. 16:9-11 Suapang seng nurating l᷊ou ngu Pentakosta, kaul᷊i u taumata ko mangimang nukomol᷊i su tampa simbau. 2Singkahuwi pia tingihi nikaringihi bou l᷊angi kere tatiu u anging ko mauha. Wal᷊e tampa pukakomol᷊ang i sire napene u tingihi e'e. 3Bou e'e i sire nakawua manga lila musul᷊ung u hena ngu putung nurumaki sarang manga tampa dang nurumoro si sire singkatau-singkatau. 4I sire kaul᷊ie nikawasa ngu Roh u Mawu Ruata, dang nanita nudidato dingang haghi ngu wahasa ko wal᷊inge. I sire nudidato tumuhu manga ko nionggo u Roh e'e si sire pakiul᷊i.

5Su tempo e'e napene tau Yahudi, bou manga tampa su kaul᷊i u dunia natana su Yerusalem. I sire e'e ko manga taumata mararingihi su Mawu Ruata. 6Su tempo nikaringihi tingihi e'e maul᷊i kahingang taumata nusumongo nuhumbung. I sire kaul᷊ie nahuwi nakaringihi manga taumata mangimang e'e kapudidatonge su l᷊al᷊ung u wisara ngi sire singkatau-singkatau. 7Dingang naherang i sire nangul᷊i, “Manga taumata ko kapudidatonge i'i kaul᷊ie ko tau Galilea, aru? 8Kirapa hal᷊i i'i nariadi sarang i kite nakaringihi si sire kapudidatonge su wisara ngi kite singkatau-singkatau? 9I kite manga taumata bou Partia, Media, Elam; bou Mesopotamia, Yudea dang Kapadokia; bou Pontus dang Asia, 10bou Frigia dang Pamfilia, bou Mesir dang bou manga tampa bageang u Libia ko masandighi u Kirene; pia bou tal᷊oara i kite ko nasongo bou Roma, 11pia manga tau Yahudi dang pia l᷊ai manga taumata bou bangsa ko wal᷊inge ko seng nasu agama Yahudi; pia l᷊ai ko nusumongo bou Kreta l᷊au bou Arab. I kite kaul᷊ie nakaringihi i sire kapudidatonge su l᷊al᷊ung u wisara ngi kite singkatau-singkatau bou kaul᷊i u hal᷊i ko makal᷊aherang ko nikoa u Mawu Ruata!” 12Dingang naherang i sire kaul᷊ie mangkate kapukakinae simbau dingang ko wal᷊inge, “Ko apa mangal᷊enge i'i?”

13Kateho pia l᷊ai manga taumata ko kapuhinakange. I sire nangul᷊i, “Ah, manga taumata e'e ko kitang nabukang!”

Nasi i Petrus

14Bou e'e i Petrus nurumarisi dingang i sire mapul᷊onsau rasuli ko wal᷊inge, dang nudidato su taumata maul᷊i e'e. Dingang u tingihi ko mauha i sie nangul᷊i, “Manga ana u simbau, manga tau Yahudi dang kaul᷊ie ko natana su Yerusalem! Daringihe ko pakapia-pia, watu'u hal᷊i i'i hinonge daku ipakal᷊ahe si kumu. 15Manga taumata i'i wal᷊ingewe ko bukang, kere ko nitika i kumu; watu'u i'i mbuhue pukul᷊i sio mal᷊ukari. 16Arawe hal᷊i i'i ko seng mbuae nihabariu u Mawu Ruata bo i Nabi Yoël:

17 # Yl. 2:28-32 Mawu Ruata nangul᷊i, su tempo panginsuenge

Ia sarung mangonggo Roh-Ku su kaul᷊i u taumata.

Manga ana i kumu kol᷊aese l᷊au manga ana i kumu kowawine sarung muhabari si kumu kaul᷊i u hal᷊i ko Daku ihabari si sire.

Manga taumata ngu ko makakuda sarung makawua kaul᷊i u hal᷊i ko Daku iandaghi si sire.

Manga taumata ngu ko maghaghurang sarung maipi hal᷊i u ipi ko Daku ionggo si sire.

18Su manga l᷊ang-Ku l᷊ai – mbaeng ko ese arako kowawine –,

sarung Daku onggol᷊ang u Roh-Ku su l᷊ou-l᷊ou e'e.

I sire sarung muhabari kaul᷊i u hal᷊i ko Daku ihabari si sire.

19Ia sarung mukoa manga ko makal᷊aherang su l᷊angi,

dang manga hal᷊i ko makal᷊al᷊ingu su dunia;

sarung pia daha dang putung, hiwu dang tipu.

20Matangutiti sarung makoa ko marundung,

Wul᷊ang makoa ko mahamu kere daha

Su horo L᷊ou ngu Mawu, l᷊ou ko l᷊abo dang mawantughi e'e sumongo.

21Su tempo e'e, taumata ko mukui Mawu

sarung ipakasal᷊amati.

22Manga ana u simbau tau Israel! Raringihite manga ko Daku iul᷊i i'i: I Yesus tau Nazaret e'e seng ninggilenang u Mawu Ruata hal᷊i guna ngi kumu. E'e mal᷊ahe kahingang su manga ko makal᷊aherang l᷊au manga hal᷊i ko makal᷊al᷊ingu ko nikoa u Mawu Ruata su tal᷊oara i kumu bou pul᷊ahal᷊i I Yesus e'e. Ana u simbau sisane seng matitong kaul᷊ie e'e. 23#Mat. 27:35; Mrk. 15:24; Luk. 23:33; Yoh. 19:18Mutuhu kirou-E sisane, Mawu Ruata namutusi tadeau manarakang I Yesus si kumu. Dang saritau I Sie nisarakang, i kumu namate si Sie dang namala ngu manga taumata ko dal᷊ai nunggantong si Sie. 24#Mat. 28:5-6; Mrk. 16:6; Luk. 24:5Kateho Mawu Ruata sau nupuwiahi Sie bou tal᷊oara u manga taumata ko nate. I Sie nil᷊u u papate, kateho Mawu Ruata namilo I Sie, watu'u tawe mariadi boko papate turusi mangawasa si Sie. 25#Mzm. 16:8-11I Daud seng mbuae nangul᷊i hal᷊i I Yesus i'i,

‘Ia nakawua Mawu sintinia su saruangku;

I Sie mahundingang u ia, tadeau ia ta maghio u manga apa.

26E'e sabapie naungku mal᷊ua-l᷊uasi,

mohongku mul᷊uhabari u dadalo

dang badangku i'i sarung mangampal᷊i

dingang matatapi su l᷊al᷊ung u kubul᷊i

27Watu'u I Kau ta mupakawala ngu jiwaku matintang su l᷊al᷊ung u dunia ngu taumata ko nate.

I Kau ta mupakawala l᷊ang-U ko masatia e'e mahene l᷊au masue.

28I Kau seng nanibo si sia l᷊al᷊eng sarang puwawiahi ko kahingang.

Kal᷊uasiku ta ikahabari watu'u I Kau ene mahundingang u ia.’

29Manga ana u simbau, pakawalako ia mudidato pakal᷊ahe-l᷊ahe hal᷊i i Daud, i upung i kite e'e. I sie seng nate dang seng nikubul᷊i l᷊ai; kubul᷊i mborong ene su tal᷊oara i kite sarang orasi i'i. 30#Mzm. 132:11; 2Sam. 7:12-13Mawu Ruata seng nudiandi si Daud, dingang u tewa, himoneu singkatau bou hintounge sarung ihengke u Mawu Ruata makoa Ratu. Ual᷊ing i Daud matitong diandi e'e dang ual᷊ing i sie l᷊ai ko singkatau nabi, 31i sie l᷊ai matitong manga ko sarung i koa u Mawu Ruata. Inau i sie seng nunubueti himoneu Ratu mananal᷊amati ko nidiandi ngu Mawu Ruata, sarung sau muwiahi bou papate. I Daud nangul᷊i,

‘I Sie ta ipakawala matintang su l᷊al᷊ung u dunia ngu manga taumata ko nate;

badang-E sarung ta mahene dang ta masue.’

32I Yesus i'i ko sau nipuwiahi u Mawu Ruata bou papate. I kami kaul᷊ie seng nakawua sisane hal᷊i e'e. 33I Sie nihengke su kakangianeng ko marange dang ninggilenang u Mawu Ruata kawasa, mbuhue nanarima Roh u Mawu Ruata ko seng nidiandi ngi Yamang. Dang ko nikaringihi l᷊au nikawua ngi kumu su orasi i'i ko Roh e'e nionggo-E si kami. 34#Mzm. 110:1I Daud sisane ta napua sarang sorga, arawe i Daud nangul᷊i,

‘Mawu nangul᷊i su Mawuku:

35Kangiangte su kuaneng-Ku,#2:35: Kangiangte … kuaneng-Ku: Tumuhu adati tau Yahudi, ko nionggol᷊ang adati dang kawasa mukumangiang su simbuka kuaneng.

sarang manga roka-U Daku ipakawata si Kau!’

36E'e sabapie kaul᷊i u tau Israel mambeng matitong kahingang himoneu I Yesus ko nighantong i kumu e'e, I Yesus e'e l᷊ai ko seng nikoa u Mawu Ruata nakoa Mawu dang Ratu Mananal᷊amati!”

37Suapang manga taumata e'e nakaringihi hal᷊i e'e, naung i sire maghawang kahingang. Bou e'e i sire nakina si Petrus l᷊au su manga rasuli ko wal᷊inge, “Manga ana u simbau, apa mambeng koateng i kami?”

38I Petrus nusumimbahi, “Putobati bou manga dosa ngi kumu. Dang i kumu pu singkatau-singkatau pakisahani su areng I Yesus Kristus, tadeau kaul᷊i u dosa ngi kumu iampungang. Manga ana u simbau sarung manarima l᷊aonggo Roh Mawu Ruata bou Mawu Ruata. 39Watu'u ko nidiandi ngu Mawu Ruata e'e ko guna ngi kumu dang manga hintou ngi kumu l᷊au manga taumata ko su manga tampa marau – manga taumata ko nikuing u Mawu Ruata Mawu ngi kite guna ngu pasongo si Sie.”

40Kere'e i Petrus nupakal᷊ahe si sire. Dang dingang u didato maul᷊i ko wal᷊inge i sie l᷊ai nundo si sire tadeau i sire mul᷊iwiri badang i sire bou umati ko dal᷊ai i'i ko sarung ihukung u Mawu Ruata. 41Maul᷊i taumata nangimang manga ko niul᷊i i Petrus, bou e'e i sire nisahani. Inau kaul᷊i u taumata ko nangimang su l᷊ou e'e sau natamba tiluhiwu su kataunge. 42Dingang mangaking i sire turusi nangundung bou manga rasuli dang hanesi mukomol᷊i singkahindo. I sire mukumang singkahindo dang mukal᷊iomaneng singkahindo.

Puwawiahiu manga taumata ko mangimang

43Maul᷊i kahingang ko makal᷊aherang nikoa u manga rasuli e'e hakiu kaul᷊i u taumata naherang dang nataku. 44#Wuk. 4:32-35Manga taumata ko mangimang e'e kaul᷊ie turusi nasimbau dang manga ko koa i sire, ipake i sire singkahindo. 45I sire nuwal᷊u manga sal᷊iumpuhi l᷊au rarotong i sire, bou e'e doinge nipahia i sire kaul᷊ie tumuhu manga ko ipake u singkatau-singkatau. 46L᷊ou-l᷊ou i sire turusi mukomol᷊i su Wal᷊e ngu Mawu; kumang singkahindo, dingang u kal᷊al᷊uasi dang kasasana u naung su wal᷊e ngi sire. 47I sire turusi mundalo Mawu Ruata dang ikao u manga taumata. L᷊ou-l᷊ou rekenang i sire mang katatambange watu'u Mawu nunggile si sire manga taumata ko ipakasal᷊amati.

Currently Selected:

WUKE NGU MANGA RASULI 2: PLT

Highlight

Copy