WUKE NGU MANGA RASULI 4

I Petrus l᷊au i Yohanes su tingo ngu Pangadilang u Agama

1Tintal᷊a i Petrus l᷊au i Yohanes mborong kapudidatonge dingang u manga taumata e'e, manga tumbonang u imam#4:1: manga tumbonang u imam: pira mbau wohe horo: manga imam. dang komandang u mudadiaga Wal᷊e ngu Mawu dingang u manga tau Saduki nusumongo sarang koa i Petrus l᷊au i Yohanes. 2I sire nuwawal᷊uang watu'u i Petrus sire rua ngi Yohanes nangul᷊i su manga taumata himoneu I Yesus seng sau nuwiahi bou papate. Dang e'e mul᷊ahe himoneu taumata ko nate sarung sau muwiahi. 3Kuteu i sire naname si sire rua rasuli e'e, bou e'e nipasu su l᷊al᷊ung u tutupang. Dang ual᷊ingu seng huwi, i Petrus sire rua ngi Yohanes nitahang su se'e sarang ndai mal᷊ou. 4Kateho manga taumata ko seng nakaringihi tintiro ngu manga rasuli e'e, maul᷊i ko nangimang. Rekenang i sire taumata mangimang nikatambangeng pari nakoa sarang l᷊imahiwu su kataunge kaul᷊ie.

5Ndai mal᷊ou manga pangaha Pangadilang u Agama, manga pangaha u tau Yahudi l᷊au manga meteri agama nukomol᷊i su Yerusalem. 6I sire nusombang i Imam ko l᷊abo Hanas, i Kayafas, i Yohanes, i Aleksander dang kaul᷊ie ko nasu ghe u imam ko l᷊abo e'e. 7I Petrus sire rua ngi Yohanes niwawa putumatingo si sire, bou e'e i sire nukina, “Kirapa kakakoae i kumu nupakaul᷊e ngu taumata ko kesohi e'e? Dingang u katatoghasi apa arako dingang u kawasa bo i sai i kumu nukoa hal᷊i e'e?”

8I Petrus ko nikawasa ngu Roh u Mawu Ruata, nusumimbahi, “Manga Tuang pangaha u bangsa l᷊au manga Tuang tataho u Pangadilang! 9I kami nipariksa sil᷊ou i'i ual᷊ingu nukoa ko mapia guna ngu mutul᷊ung singkatau ko kesohi, dang ual᷊ingu manga Tuang mo matitong kirapa tau e'e nipakaul᷊e. 10Ho, kaul᷊i u manga Tuang l᷊au kaul᷊i u tau Israel mambeng l᷊ai matitong himoneu tau i'i nakararisi su orasi i'i dingang u badang ko mapia su tingo ngu manga Tuang, ual᷊ingu katatoghasi l᷊au kawasa bo I Yesus Kristus tau Nazaret e'e. Manga Tuang seng nunggantong I Yesus e'e, kateho Mawu Ruata seng sau nupuwiahi Sie. 11#Mzm. 118:22I Yesus i'i ko nihabari u ayeti i'i su l᷊al᷊ung u Buki Susi,

‘Watu ko ta napake si kumu manga base u wal᷊e,

nal᷊ahe nakoa watu ko kahimotongange.’

12Kitang ual᷊ing I Yesus taumata ipakasal᷊amati. Watu'u su tal᷊oara taumata su kaul᷊i u dunia takoae singkatau ko wal᷊inge ko nakarea kawasa bou Mawu Ruata guna ngu mupakasal᷊amati kite.”

13Manga taumata ngu Sidang Pangadilang e'e naherang nakawua kawahani ngi Petrus l᷊au i Yohanes, nangilembo i sire nakatitong himoneu i sire rua e'e ko taumata biasa ko takoae sikol᷊a ngi sire. Bou e'e i sire nakatinaung himoneu i sire rua rasuli e'e ko taumata tutuhu si Yesus. 14Kateho i sire ta makapudidato apa-apa, watu'u taumata ko seng nipakaul᷊e e'e ene kararisi su se'e su tingo ngi sire dingang i Petrus l᷊au i Yohanes. 15Inau i sire nundoi si sire rua rasuli e'e pasuwang bou tampa u sidang, bou e'e i sire nughaghighili. 16I sire nangul᷊i, “I kite mambeng mukoa apa si sire rua i'i? Kaul᷊i u taumata ko natana su Yerusalem seng matitong himoneu ko makal᷊aherang ko takoae sul᷊unge i'i, nikoa i sire rua. I kite ta makapusunial᷊i u e'e. 17Kateho tadeau hal᷊i i'i ari tumaniu mawombeng su tal᷊oara u manga taumata, maite i kite mamataku si sire rua tadeau i sire rua seng tawe wotonge mudidato su taumata sarang singkatau dingang mupake areng I Yesus.”

18Kuteu i sire nukui si sire rua rasuli e'e sau pasu, dang nuhabari sire rua seng ta woto-wotonge sau musigho l᷊au manintiro dingang u areng I Yesus.

19Kateho i Petrus sire rua ngi Yohanes nusumimbahi, “I kumute pusipiri apa ko muhino su saruang Mawu Ruata: tumuhu parenta ngu manga Tuang arako tumuhu parenta ngu Mawu Ruata. 20Watu'u i kami seng ta mangiro mudidato hal᷊i u apa ko seng nikawua l᷊au apa ko seng nikaringihi kami.” 21Manga taumata ngu Sidang e'e ta makarea sarang simbau punguange guna ngu muhukung si Petrus sire rua ngi Yohanes. I sire namataku si sire rua rasuli e'e, bou e'e namilo si sire rua. Watu'u kaul᷊i u taumata kapundalonge Mawu Ruata ual᷊ingu hal᷊i ko seng nariadi e'e. 22Taumata ko naul᷊e dingang makal᷊aherang e'e umurie seng lebe bou paupul᷊o su taunge.

Manga taumata mangimang mundo kawawahani bou Mawu

23Suapang i Petrus sire rua ngi Yohanes nipilo, i sire nusul᷊e su manga ringang i sire dang nuwuke kaul᷊ie ko nihabari u manga tumbonang u imam dang manga pangaha u tau Yahudi e'e si sire. 24#Sasu. 20:11; Neh. 9:6; Mzm. 146:6Suapang manga ringang i sire rua nakaringihi e'e, i sire singkahindo nukal᷊iomaneng singkanaung su Mawu Ruata. I sire nangul᷊i, “Mawu, i Kau ko nundiadi l᷊angi l᷊au dunia dang l᷊auri dingang u kaul᷊i u tatahoe. 25#Mzm. 2:1-2Dingang u Roh-U I Kau mbuae nuhabari bo i upung i kami, i Daud, ko l᷊ang-U; I Kau nangul᷊i,

‘Nakurawe manga taumata, ko wugha ngu Mawu, nuwawal᷊uang;

Nakurawe manga bangsa nukoa karaki ko takoae mangal᷊enge?

26Manga ratu ngu dunia nusasadia guna ngu muparang,

dang manga pangaha nusingkanaung

mundoka Mawu dingang i Ratu Mananal᷊amati.’

27 # Mat. 27:1-2; Mrk. 15:1; Luk. 23:1,7-11; Yoh. 18:28-29 Watu'u i Herodes l᷊au i Pontius Pilatus seng nusasuma dingang u manga taumata ko wugha ngu Mawu dang dingang u manga tau Israel su soa i'i. I sire nusuma guna ngu mundoka si Yesus L᷊ang-U ko susi e'e, ko seng mbuae nihengke-U nakoa Ratu Mananal᷊amati. 28I sire nusingkanaung guna ngu mukoa manga hal᷊i, ko seng mbuae nitantu-U horo, ko e'e sarung mariadi. Dang I Kau nanantu e'e watu'u kawasa dingang u kao-U sisane. 29Su orasi i'i, Mawu, tuhungete kirapa i sire mamataku si kami. Dang pakawalako i kami, manga l᷊ang-U i'i, mamombeng habari-U dingang u kawawahani. 30Onggol᷊e ko tul᷊umang-U tadeau taumata ko masaki ipakaul᷊e dang ko makal᷊aherang dingang u manga hal᷊i ko l᷊al᷊abo mariadi bou kawasa l᷊au kakatoghasi bou areng I Yesus, L᷊ang-U ko susi e'e.”

31Suapang i sire nasue kal᷊iomanenge, tampa ko nipukomol᷊ang i sire e'e nughumio. I sire kaul᷊ie nikawasa ngu Roh u Mawu Ruata, dang nanita nudidato hal᷊i u habari bou Mawu Ruata dingang wahani kahingang.

Kaul᷊ie nusingkanaung

32 # Wuk. 2:44-45 Kaul᷊i u taumata ko mangimang e'e nuwiahi singkanaung l᷊au singgighili. Takoae sarang singkatau bo i sire ko mupundang himoneu manga ko koa i sire e'e ko rarotong i sire ha. Apang ko pia si sire, ipake i sire singkapake. 33Dingang u kawasa ko l᷊abo, manga rasuli e'e nunggile kasaksiang himoneu I Yesus seng sau nuwiahi. Inau Mawu Ruata mangkatewe nangal᷊amati si sire. 34Dang takoae sarang singkatau bo i sire ko nikasueng u manga apa. Watu'u i sire ko pia tanange arako wal᷊enge, nuwal᷊u tana arako wal᷊e ngi sire e'e; bou e'e doinge niwawa i sire 35dang nisarakang i sire su manga rasuli. Bou e'e doi e'e nipupapahia su manga taumata ko mupake.

36-37Kere'e l᷊ai dingang i Yusuf. I sie l᷊ai nuwal᷊u tanange, bou e'e doinge niwawae dang nisarakang su manga rasuli. I Yusuf i'i ko singkatau hintou ngi Lewi bou Siprus; manga rasuli musigho si sie l᷊ai i Barnabas (mangal᷊enge Tahahibori)

Currently Selected:

WUKE NGU MANGA RASULI 4: PLT

Highlight

Copy