WUKE NGU MANGA RASULI 5

I Ananias l᷊au i Safira

1Kateho pia singkatau ko ese arenge i Ananias. I sie dingang kawinge arenge i Safira, nuwal᷊u l᷊ai tana ngi sire rua singkamonang. 2Doi l᷊ua ngu tana e'e singga nipaerange guna ngu badange dang l᷊umbeinge nisarakang su manga rasuli. E'e nikoae su titong u kawinge. 3I Petrus nangul᷊i si sie, “Ananias, nakurawe i kau nupakawala ngu setang nangawasa naungu, hakiu i kau nutul᷊ong su Roh u Mawu Ruata, dang maruma-rumasi namaeri doi ngu tana e'e singga guna ngu badangu sisane? 4Tana e'e ko koa u suhoro niwal᷊u u. Dang suapang tana e'e niwal᷊u u, doinge mang mborong koa u l᷊ai. Inau nakurawe pia pandung su l᷊al᷊ung naungu mukoa kere'e? I kau wal᷊inge nutul᷊ong su taumata kateho su Mawu Ruata!” 5Kere'e Ananias nakaringihi didato e'e, i sie nabanting turusi nate. Manga taumata ko nakaringihi hal᷊i e'e kaul᷊ie nataku. 6Kuteu manga rario ko makakuda nusumongo namikung badang i Ananias, bou e'e niwawa sarang l᷊ikuri tadeau il᷊uwing.

7Patehang manga tilu ngkaorasi bou e'e, kawinge nusumu. I sie wugha apa ko wuhu nariadi. 8I Petrus nangul᷊i si sie, “Kenangko habari si sia: Apa hariga ngu tana ko niwal᷊u i rua singkawingang e'e, mang seng e'e kaul᷊ie?” “Tingari, kere'e harigange,” nisimbahi u kawing i Ananias.

9Bou e'e i Petrus nangul᷊i si sie, “Nakurawe i rua singkawingang nukakire manal᷊uka Roh u Mawu? Daringiheko! Manga taumata ko bou nul᷊uwing kawingu seng nusul᷊e. I sire l᷊ai sarung muhengke si kau sarang l᷊ikuri.” 10Su tempo e'e l᷊ai kawing i Ananias e'e nawanting dang nate su tingo ngi Petrus. Dang su tempo ngu manga rario makakuda e'e nasu, i sire nakasuma si sie seng nate. Bou e'e i sire numbawa badange sarang l᷊ikuri dang nil᷊uwing su sindihang u kawinge. 11Kuteu kaul᷊i u manga taumata ko mangimang e'e dingang u manga taumata ko wal᷊inge, ko nakaringihi hal᷊i e'e nasue nataku.

Manga ko makal᷊aherang l᷊au manga hal᷊i ko takoae sihinge

12Ual᷊ingu pul᷊ahal᷊i u manga rasuli maul᷊i ko makal᷊aherang dingang u manga hal᷊i ko takoae sihinge nariadi su tal᷊oara u manga ana u kawanua. Dingang u singkanaung manga taumata ko mangimang nukomol᷊i su Poresi Salomo su Wal᷊e ngu Mawu. 13Dang taumata ngu l᷊ikuri takoae ko wahani musumongo mukomol᷊i dingang u manga taumata ko mangimang e'e. Arawe manga taumata ko mangimang e'e mangkate niadateng u manga ana u kawanua. 14Dang kal᷊al᷊iwuenge katatambange ul᷊i u manga taumata ko mangimang su Mawu – mbaeng ko ese kere'e l᷊ai kowawine. 15Katewe bou e'e kakakoae seng nakoa kere'e ghahie, hakiu sarang taumata masasaki ipilo i sire su l᷊al᷊okang arako su tupihi, bou e'e nihengke sarang l᷊al᷊eng, tadeau i sire mutingkadio kahinong u tintaung i Petrus, boko i Petrus sumahe se'e. 16Mangkate napene manga taumata nusumongo bou manga soa ko masandighi u Yerusalem. I sire numbawa manga taumata ko masasaki l᷊au ko nikasukang u manga roh ko dal᷊ai. Dang i sire e'e kaul᷊ie nipakaul᷊e.

Manga Rasuli nipahangeng

17Panginsuenge imam ko l᷊abo dang kaul᷊ie tumatuhue, ko bou golongang u Saduki, nanita nukumanoa, watu'u saki u naung i sire. 18Manga rasuli e'e nisame, bou e'e nipasu su l᷊al᷊ung u tutupang ngu hape. 19Kateho huwinge, pia singkatau malaikati u Mawu namuka manga tukari u tutupang, bou e'e numbawa manga rasuli e'e sarang l᷊ikuri. Malaikati e'e nangul᷊i su manga rasuli e'e, 20“Dakoe tamai rarisi su Wal᷊e ngu Mawu dang habari su manga taumata hal᷊i u puwawiahi ko wuhu i'i.” 21Kuteu manga rasuli e'e nutumuhu tatanata ngu malaikati e'e. Mborong mal᷊uka-l᷊ukari i sire natamai sarang wal᷊e ngu Mawu dang nanita nanintiro su se'e.

Saritau e'e imam ko l᷊abo dingang u manga tumatuhue nusumongo, bou e'e nukomol᷊i mahkamah l᷊au manga pangaha u tau Yahudi. Mbuhue i sire nangoro taumata patamai pangal᷊a manga rasuli e'e bou tutupang pakiwawa pupatingo si sire. 22Kateho su tempo ngu manga taumata ko niparentang e'e nasongo su tutupang, i sire ta nakahombang manga rasuli e'e pai se'e. Inau i sire nusul᷊e, bou e'e nangalaki hal᷊i e'e su mahkamah. 23“Su tempo i kami nurating u tutupang,” niul᷊i i sire su mahkamah, “i kami nakahombang tukari u tutupang e'e makakunsi mapia-pia, dang manga mundadiagae mborong kapundiagae su tukari. Kateho su tempo i kami namuka tukari e'e, i kami ta nakarea taumata maneng singkatau su l᷊al᷊unge.” 24Suapang komandang u mundadiaga Wal᷊e ngu Mawu dang tumbonang u manga imam nakaringihi kakalaki e'e, i sire nubingo hal᷊i u manga rasuli e'e dang nataku apa sarung mariadi. 25Bou e'e nusumongo singkatau ko ese numbawa habari i'i, “Raringihiko! Manga taumata ko nitahang u manga Tuang su l᷊al᷊ung u tutupang e'e orasi i'i seng kapanintironge taumata maul᷊i su Wal᷊e ngu Mawu!” 26Kuteu komandang u mundadiaga Wal᷊e ngu Mawu e'e dingang u manga mundadiaga sau natamai nangal᷊a manga rasuli e'e. Kateho i sire seng nal᷊ompeng, watu'u i sire mataku su taumata maul᷊i; kumbahang sarang taumata maul᷊i e'e manguntung u watu si sire.

27Manga rasuli e'e niwawa pasu pupatingo mahkamah. Bou e'e imam ko l᷊abo namariksa si sire. 28#Mat. 27:25I sire nangul᷊i, “I kami seng nuhabari si kumu kumbahang-bahang manintiro hal᷊i u Taumata e'e. Kateho i'i tuhungete apa ko nikoa i kumu! I kumu nangeke ngu tintiro ngi kumu e'e su kaul᷊i u Yerusalem, dang i kumu mborong nangantang uare i kami nakapate Tau e'e.”

29I Petrus l᷊au manga rasuli ko wal᷊inge nusumimbahi, “I kami mambeng mutumuhu Mawu Ruata dang wal᷊ingewe mutumuhu taumata. 30I Yesus, ko nighantong i kumu, seng sau nipuwiahi bou papate watu'u Mawu Ruata i upung i kite. 31Dang Mawu Ruata seng nunggile si Sie kakaianeng l᷊au kawasa ko marange kere Pangaha l᷊au Mananal᷊amati; tadeau umati u Israel nggilenang u tempo putobati bou manga dosa ngi sire dang makahombang kal᷊aampung. 32I kami i'i saksi ngu kaul᷊i u hal᷊i e'e – i kami dang l᷊ai Roh u Mawu Ruata ko nionggo u Mawu Ruata su manga taumata ko tutuhu parenta-E.”

33Suapang manga tataho u Pangadilang u Agama e'e, nakaringihi e'e i sire nuwawal᷊uang kahingang, dang i sire nughaghighili tadeau mamate manga rasuli e'e. 34Kateho su tal᷊oara u manga tataho u mahkamah e'e pia singkatau Farisi arenge i Gamaliel. I sie meteri agama ko ikahungge u manga taumata. I sie nurumarisi bou e'e nangoro taumata pumbawa manga rasuli e'e pasuwang maehong sarang l᷊ikuri. 35Bou e'e i sie nangul᷊i su Pangadilang u Agama e'e, “Manga ana u simbau manga taumata ngu Israel! Kenangko sipiri pakapia-pia apa ko sarung koateng u manga ana u simbau su manga taumata i'i. 36Watu'u ndahuwite pia nul᷊umitou i Teudas, ko nupundang u badange kere singkatau taumata ko l᷊abo, hakiu patehang pia pauhasu su kataunge taumata nutumuhu si sie. Kateho i sie nipate dang manga tumatuhue e'e nusal᷊iawuhi, dang kakakoa u komol᷊ang i sire e'e naghoghahi. 37Bou e'e su tempo ngu pia rekenang, nul᷊umitou l᷊ai i Yudas, tau bou Galilea. Ual᷊ingu ikahungge, maul᷊i l᷊ai taumata nutumuhu si sie. Kateho i sie l᷊ai mang nikapate, dang manga tumatuhue nusal᷊iawuhi 38Inau su orasi i'i su hal᷊i ko seng nariadi i'i, sasasaku kitang i'i: kumbahang mukoa manga apa su manga taumata i'i, mangkate wala kere'e i sire. Watu'u boko tintiro dang kakanoa i sire i'i asal᷊ie bou taumata, kuteu tintiro dang kakanoa e'e sarung mailang. 39Arawe boko e'e asal᷊ie bou Mawu Ruata, kuteu manga ana u simbau sarung ta makawata si sire. Katewe pari sarung mal᷊ahe himoneu manga ana u simbau mundoka Mawu Ruata.”

Sasasa i Gamaliel e'e nitarima u mahkamah. 40Kuteu manga rasuli e'e nikuing, mbuhue nil᷊uwaghi, bou e'e kumbahang musau manintiro ngu hal᷊i I Yesus. Bou e'e, mbuhue i sire nipilo. 41Manga rasuli e'e nanintang u Pangadilang u Agama e'e dingang u naung mal᷊uasi watu'u Mawu Ruata seng nundekeng si sire botonge manarima l᷊ahinakang ual᷊ing I Yesus. 42Dang l᷊ou-l᷊ou su wal᷊e ngu Mawu dang suapang wal᷊e ngu taumata, i sire turusi nanintiro dang nuhabari Habari Mapia hal᷊i I Yesus himoneu seng I Sie e'e Ratu Mananal᷊amati ko seng nipudiandi e'e.

Currently Selected:

WUKE NGU MANGA RASULI 5: PLT

Highlight

Copy