ሉቃስት ወንጌል 10

ፈወነ 10

እየሱስ ላጝጥርጝን ሊጘ ክንደጥ እፃቐጘ

1እንዝ ግረ እየሱስ ላጥ ላጝጥርጝን ሊጘ እቅ ማርፅ ይሙ፤ ጘጝ ፊረው ብጣይዝጐቅ ቀድምጝ ፊርጥጘ ማጥን ሊጘ ሊጘ ፃቭ እፃቑ። 2እንት የውም ዊግቱ፦ «ማፅወድ ኽየው የጝ፤ ሰራሸጥድ ግን ዊትቍ ጛይ፤ እንዝ ማጥን ማፅወይዝ ወነድ ጝማፅወይል ሰራሸጥ እፃጠ ማጥን ጨውጥን። 3ነስየ ፊጥን፤ ቢቂዝጘ ተኵልጢዝ ማኽሊል ክታት እፃጭር። 4ቡርሰም ኸረጢትም ፃብጣንም ፃይትርነ፤ ጒደነይስም ችጝርነው እጅሪዝቅ ዲግተ ይውትርነ።#ማቲ. 10፡7-14፤ ማር. 6፡8-11፤ ሉቃ. 9፡3-5። 5ላው ጝንል ጥውትርነ በንርናንድ በውግስርን፦ ‹ዲግተ እን ጝኒል ኣነ› ይጥን። 6ጘጝ ጝኒል ዲግተ ቀነው እጅር ፅብሽ ክታዲግተድ ጝጅቅ ኣጡ፤ ኣለዝየ ግን ክታዲግተድ ክታቕምትል ዋጥርጡ። 7ጛይ ኣልስጘውድቅ ዅርና ዝይርና ጘጝ ጝኒል ጐይጥን፤ ሰራሸው እጅርዝ ምኻየ ጥውሸው የጝ፤ ላው ጝኒስ ፍርን ላየ ጝንዝጐ ጅልውትርነ።#1ቈረ. 9፡14፤ 1ጢመ. 5፡18። 8ኣውማው ኻትመይልቅ ጥውርናንድ ክታት ለምርጝሽ ጛይ ኣልስጘውድቅ ዅጥን። 9ጚ ኻትመየንትቍ ፅውዝጅንጥድ ቓዝርና፦ ‹እደረት ምጝግስትየን ክታጐ ኣልትርኩች› ይጥን።

10«ዊገድ ግን ላይ ኻትመትል ጥውርናንድ ጛይ ክታት ለምሪጝሽ ኻትመየት ኣርወይል ፍርን እንት ይጥን፦ 11‹ይናልኲል ጣብቅሸው ክታኻትመይዙ ኣወረድ እኳ ኣርግፍንቅ፤ ዊገድ ግን ክትን ኣርቒርነቅምጚ እደረት ምጝግስትየን ክታጐ ኣልትር ዊንች› ይጥን።#ኻወ. 13፡51። 12ፍርድ ግርየዝ ኰር ጚ ኻትመየንቲስ ሽ ሰደውምስ ቀልጡ የኵን።#ዘፍ. 19፡24-28፤ ማቲ. 11፡24፤ 10፡15።

13«ኰራዚንስ ወየው! በተሰይደስ ወየው! ክታግል ፃቭሸተቍ ታምራንድ ጢረውስስመ ሲዱነስታግል ፃቭሽት ዊናን፣ ገነ በውግ ጝግል ዊነቍ እቅድ ግምር ሲርጝ ፃብረልም ጐይጝ ንስኻ ጥውጥጘ ዊን።#እሳ. 23፡1-8፤ ኽዝ. 26፡1—28፡26፤ እዩ. 3፡4-8፤ ኣመፅ. 1፡9-10፤ ዘካ. 9፡2-4። 14ዊገድ ግን ፍርድ ግርየዝ ኰር ክታጊስ ሽ ጢረውስስመ ሲዱነስ ቀልጡ። 15እፈ ቅፍርናዀም! ሲመይ ኣሽመ ንየስ ንየስ ይሩ? ቀሰው! ሲወል ኣሽ ጊምትር።»#እሳ. 14፡13-15።

16ቈሽም ጝክንደጢዝ፦ «ክታት ወሸውድ ይት ወሸኵ፤ ክታት ለምራውድ ግን ይት ለምራውም፤ ይት ለምራውድ ቈሽ ይት እፃቐውድየንት ለምራውም»#ማቲ. 10፡40፤ ማር. 9፡37፤ ሉቃ. 9፡48፤ ይዃ. 13፡20።ዩ።

17ላጝጥርጝን ሊጘድም እፃሽጝ ፊርጘዊስ ዲስተዝ ዋጥርጝ፦ «ኣደረወ ጋኒናን እኳ ክሽዝ ይናጭስ ኣዚት» ይ። 18ጘጝም እንት ዩ፦ «ሲጣንድ መቭረቂዝጘ ሲመይስ ሊቫንድ ቓሉን። 19ነስየ ሲቭረዝመ እጭወ ክርክጣነውዝድቅ ደድትርነ ማጥን፣ ፃለትዝ ኻይልድቅም ኻትርነ ማጥን ክታጭስ ስልጣን ነቅኩን፤ ክታት ቘይዘው ሚንትርነም እጀው።#መዝ. 91፡13። 20ኣነጚ ክታሽድ ሲመይት መዝገቭዝ ፃፍሻንስቅ እንዝ ዲስ ይጥንጚ መንፈሳን ክታጭስ ኣዚትጙዝ ዲስ ይትርነ» ዩ።

21ኣይንድ እየሱስ መንፈስ ቅዱስዝ ጭቕጘ ዲስ የው እንት ዩ፦ «ሲመይስመ ዝቨስት ኣደረ ኣረር ኣየወ! እኒንት ጥቨቭኝጢስመ ኣርቐቍስ ሲውርድር ኽፃናታንዝ ጋልፅራንስቅ ሚዝየንዘኵን፤ የይ ኣየወ! እኒንት ፃቭተ ክፈቃድ ኣቕኩ። 22ይር እጝትቅ ይጭስ ነይኩ፤ ቈሽም ዅርት ኣው ኣቐጘ ኣይርትለ ኣውማውቅ ኣርቓውም፤ ኣይርትም ኣው ኣቐጘ ዅርትለ ዅርም ጝጭስ ጋልፅጠ በነዊዝለ ኣውማውቅ ኣርቓውም።»#ይዃ. 3፡35፤ 10፡15።

23ጝክንደጢዝጐም ዋጥር ጝታለስ፦ «ክትን ቓልድርነውድየንት ቓለቍ እልጣን ቀቫሽቍ ጛይ። 24እማንዝ የኵን፤ ንቕፀቍ ነቭያታንዝመ ንጕሳንዝ ክትን ቓልድርነውድየንት ቓልጥጘ በንጝ ዊን፤ ግን ቓሊየቍም፤ ክትን ወሽርነውድየንትም ወሽጥጘ በንጝ ዊን፤ ግን ወሺየቍም።»

እርዅርዅ ሳምራነውት እጅሪዝ ተከድ

25ላው ግርየ ላው ወሪትት ኽግ ክንሰተ እጅር፣ እየሱስት ፊትንጠ በን ጕ ችብር፦ «ክንሰተወ! ዘላልምት ርዅየ ችጝጨ ማጥን ወረጘ የጝ ሰራጨ ጥውሸውድ?» ዩ።#ማቲ. 22፡35-40፤ ማር. 12፡28-34። 26እየሱስም፦ «ኽጊዝ ፃፍሸውድ ወረጘ የጝ? ኣወሽርስ ኣንቭቭረኵ?» ዩ። 27ጘጝም፦ «ወሪትት ኽግድሰ፦ ‹ክኣምልክ ኣደረት ክእዘኒዝ፣ ክኒቭሲዝ፣ ክኻይሊዝመ ክኻሰቪዝቅ ምሉ በምሉዝ ቀን፤ ክፃምረድም ክቕምንትጘ ቀን› የኳ» ዩ።#ዘሊ. 19፡18፤ ዘዳ. 6፡5። 28እየሱስም፦ «ቀሰው ፃቭር የጝ ዊስረውድ! ክትም እንት ሽ፤ ዝላልምዙ ርዅየም ችጝትር» ዩ።#ዘሊ. 18፡5። 29ወሪትት ኽግ ክንሰተድ ግን ጝቕምት ፃድቅ ፃቭጠ በን፦ «ኣው የጝ ይፃምረድ?» ዩ።

30እየሱስም እንት የው ዊሱ፦ «ላው እጅር እየሩሳልየምስ ጕ እያሪኰ ትጐ ጊማንድ ሽፍጥ ችጝጝ ጝኣልቨድ ጊፍ፤ ቈሽም ድድብጝ ድድብጝ ክርጠ ጓንድ ማልጝ ፊር። 31ኣጋሊዝጘ ላው ካኽን ጘጝ ጒደነይዝ ጊማ ዊኑ፤ ጘጝም እድ ጣይተው እጅርድየት ቓል ሸው በር ውርቅ ፃቪጝቀ ዲቍ ፊሩ። 32እኒዝጘም ላው ለዋዊ እጅር ተር ጘጝ ብጣይል ችጙ፤ ጘጝም ቓል በር እዲዝጘ ዲቍ ፊሩ። 33ላው ሳምራነው እጅር ግን ጝዝ ዲቋንድ እድ ጣይተው እጅርድ ሊቨው ስፍረይል ችጙ፤ ጝት ቓላንድም ኻዝኑ። 34ጝጐም ኣልት ዘይትዝመ ወይንዙ ሚዝዝ ጝልኻኒል ቅብስ በር ፃርቀዝ ጣጥም እፅቁ፤ ጝድዃረይልም ድቃስ ላው ኣብን ፈወነ ጝንል ፊስ ጝግል ፃቭ ኣሙዙ።#2ዚመ. 28፡15። 35ጝኣምርሲዝም ሊጘ ዲናራን#10፡35 ዲናር፦ ላው ዲናር ላው ሰራሸተ እጅርዝ ላው ግርየዙ ምኻየ ዊኑ። ፊስ ጝኒዝ ወነይዝ ይው በር፦ ‹እን እጅርድየት ክኻደረ ዳኸነ ፃቭር ኣሙዝ፤ ላየ ቈሽር ኪፍልደው ጊንዝቭ ፅብሽም ዋጥራንድ ይቕም ኪፍልጭር› ዩ።

36«ነስየ እንዛይ ሻቘ እቂስ እድ ጣይተው እጅሪዝ ፃምረ ኣቐውድ ኣውየን የጝ ተከኵ?» ዩ። 37ወሪትት ኽግ ክንሰተድም፦ «እድየን ጝጭስ ኣርኽርኸው እጅርዳ» ዩ፤ እየሱስም፦ «ፈር ክትም ፊትር ጝጘ ፃቭ» ዩ።

እየሱስ ማርተስመ ማርያምስታጝኒል ጥወጘ

38እየሱስም ጝክንደጢጅቅ ኣቕ ፃጛ ላይ ኪውትል ጥዉ፤ ጝጊስም ማርተ የነይ ላይ እውነ ጝርጝኒል ለምርች። 39ጝርስም ማርያም ይሽትረይ ጝርስን ዊንች፤ ማርያምም ኣደረት ልኲዝ ሳይል ጐይር ጝቃልድ ወሽራ ዊንች።#ይዃ. 11፡1። 40ማርተ ግን ጛጭስ ዀነው ኣስልዳጐስ ሰቭ ኒቒስራንስቅ ቢክንዳ ዊንች፤ ኣቓንስቅም እየሱስ ትጐ ተትር፦ «ኣደረወ ይስን ሰቭድቅ ይጭስ ይለ በትር ጐይራንድመ ዝም ይራ? ይት ከቭስተ ማጥንቀ ድቋር!» ይች። 41ኣደረ ግን፦ «ማርተ! ማርተ! ክት ንቕፀው ሰቭዝቍዝ ጨጝቅሽራ ቢክንደኵ። 42ኣነጚ በንዘውድ ላው ጭቝ የጝ፤ ማርያምስ ዲቈው እድልድ ማርፅርኩች፤ እኒንት ጝርጊስ ቀም ፊሰውም እጀው» ዩ።

Currently Selected:

ሉቃስት ወንጌል 10: ኽምጣኣኪ

Highlight

Copy