ሉቃስት ወንጌል 9
9
ፈወነ 9
እየሱስ ፅጭ ሊጘ ኻወርየታንድ እፃቐጘ
(ማቲ. 10፡5-15፤ ማር. 6፡7-13)
1እየሱስም ፅጭ ሊጘ ኻወርየታንድ ሊንስ ጝጐ ጭጝ ጋኒናንድቅ ፊስጥጘ ማጥን፣ ፅውዝጅንጥድቅም ጝታፅውዘይስ ቓዝጥጘ ማጥን ኻይልዝመ ስልጣንዝ ይዉ። 2ቈሽም እደረት ምጝግስትት ሲቭክጥጘ ማጥን፣ ፅውዝጅንጥድም ቓዝጥጘ ማጥን እፃቑ። 3እንት የውም ድቁ፦ «ግብም፣ ኸረጢትም፣ ሊቈውም፣ ቍርሻንም፣ ቂይረነው ኣልቨም፣ ክታጕደነይዝ ውረውረቅ ፃይትርነ። 4ጥውርነይ ኻትመየት ሊቅርን ፍትርኒስቅ ኣፍለ ጥውርነው ጝኒል ጐይጥን። 5ጚ ኻትመየት እቅድ ክታት ለምጠቅ ይጝሽ ግን ጛጭስ ሚዝር ኣጠ ማጥን ክታልኲይዙ ኣወረድ ኣርግፍርን ጚ ኻትመየት ሊቅርን ፊጥን» ዩ።#ሉቃ. 10፡4-11፤ ኻወ. 13፡51። 6ኻወርየታንድም ጝጊስ ፍጝ ወንጌልድ ሲቭክጛ ፅውዝጅንጥድቅም ቓዝጛ ኪቋኒልቅ ጅልው።
7ገሊለት ቅማ ዊነው ኺረውድስ ግን እን ኣቐው ዊገድቅ ወሻንድ ጨጝቅሹ፤ ምላሰንድ ላው ላው እቅ፦ «ጣምቀተ ይዃንስ ክርጘይስ ጕኩ» ይጛ ጂጝዝጛ ዊን። 8ላጥድ ቈሽ፦ «ነቭይ ይልያስ ዋጥር ተርኩ» ይጛንድ፣ ግቨርድ ቈሽ፦ «ኽፅምትቍ ነቭያታኒስ ላውድ ክርጘይስ ጕኩ» ይጛ ዊን።#ማቲ. 16፡14፤ ማር. 8፡28፤ ሉቃ. 9፡19። 9ኺረውድስም፦ «ይዃንስትስ ያን ይቕም ጝቕልመድ ቀቭ ቁ ዊኑን፤ እደስለ እንቝጠ ጂጘ ጂጝዝጘው እን እጅርድ ኣው የጝ» ዩ፤ ጝትም ጝእልጣኒዝ ቓልጠ በና ዊኑ።#ማቲ. 14፡1-2፤ ማር. 6፡14-15፤ ሉቃ. 9፡7-8።
እየሱስ ኣኰ ሽኽ እቅ ታምርዝ ሚግቨጘ
(ማቲ. 14፡13-21፤ ማር. 6፡30-44፤ ይዃ. 6፡1-14)
10ኻወርየታንድም እፃሽጘዊስ ዋጥርጝ ተርጝ ጛይ ፃቭጘውድቅ እየሱስስ ድቍ፤ ጘጝም በተሰይደ ኻትመይዝ ጋቢዙ በራኸይል ጝታለ ፃይ ፊሩ። 11ኽዝቭድም እየሱስ ፊረው ስፍረድ ኣርቓንስቅ ቲክን ፊሩ፤ ጘጝም ለምር እደረት ምጝግስትት ማጥን ድቋ ዊኑ፤ ፅዊተቍድዛትቅም ጝታፅውዘይስ ቓዙ።
12ግርየድ ኵንጠ ጓንድም ፅጭ ሊጘ ኻወርየታንድዛይ ጝጐ ኣልትጝ፦ «ይን ፅብነው ስፍረድ በራኸ የጝ፤ ኽዝቭድ ጅልወይል ፅበቍ ኻትምጢልም ኣነ ገጠሪልቅ ፊር ጝዀነውዝመ ጨነው ኽርተዝ ደምዝጠ ማጥን ሲነቭሽ» ይ። 13እየሱስ ግን፦ «ክትን ጝታዀነው ይውጥን» ዩ፤ ጛይም፦ «ይናናኒል ፅበቍድ ኣኰ ምጭዝመ ሊጘ ኻዝዝ ጭቝ ጛይ፤ ፊርን ጅቪነውዝየ እንቝጠ ኽዝቪዝቅ ኣቓቍም» ይ።
14ኽዝቭድም ኣኰ ሽኽ ኣጠ ዊኑ፤ እየሱስም ጝክንደጢዝ፦ «ኣኵርጝን ኣኵርጝንድ ሚድቭርና ጐይስጥን» ዩ። 15ጛይም ኣዚትጘጘ ፃቭጝ ኽዝቭድ ጐይስ። 16እየሱስም ኣኰ ሚጪዝመ ሊጘ ኻዚዝ ፃይ ንየ ጭቅ የው ሲመይ ሲመይ ቓላ እደረት ሚዝየንዙ፤ ኪልም ኽዝቪዝ ኣድልጥጘ ማጥን ጝክንደጢዝ ይዉ። 17ኽዝቭድም እጝቅቅ ዅ እቭቱ፤ ኻወርየታንድም ኽዝቭድ ዅ ቲርፍዘውድየንት ፅጭ ሊጘ ሚስቫን እቻዝጝ ጕይ።
ቢጥሮስት እምንቲዝመ ሚዝርነይዝ
(ማቲ. 16፡13-19፤ ማር. 8፡27-29)
18ላው ግርየ እየሱስ ጝለ ፃልያ ዊኑ፤ ጝክንደጥድም ጝጋቢል ዊንጛንስቅ፦ «እቅ ይት ኣው ይጘኵ» የው ዋቕሩ። 19ጛይም፦ «ግቨርድ ጣምቀተ ይዃንስ፣ ግቨርድ ይልያስ፣ ግቨርድ ቈሽ ኽፅምትቍ ነቭያታኒስ ላውድ ክርጘይስ ጕኩ ይጘኳ» ይጝ ዊስ።#ማቲ. 14፡1-2፤ ማር. 6፡14-15፤ ሉቃ. 9፡7-8። 20ጘጝም፦ «ክትንሰ ይት ኣው ይርና» ዩ፤ ቢጥሮስም፦ «ክት እደረቲስ እፃሽረር ክርስቶስ የጝ» የው ዊሱ።#ይዃ. 6፡68-69። 21እየሱስም፦ «እን ዊገድ ኣውማውስቅ ድቍርነቅ» የው ጣጝቅቅሱ።
22ቈሽም፦ «እጅር ዅር ኽየው ሚከረ ለምርጠ ጥውሸኵ፤ ሽመቅሊዝመ ካኽነጣነ ኻልቅጢዝ፣ ወሪትት ኽግ ክንሰጢዝም ነቅሽትጡ፣ ጝዝ ግረም ቍዉሽትጡ፣ ኣነጚ ሸወትረ ግርየይዝ ክርጘይስ ጕጡ» ዩ።
23እንዝ ግረም እጝቅዝቅ እንት ዩ፦ «ይእግርገይል ቲክንጠ በነው እጅር ፅብሽ ጝቕምት ኻዲነ! ግሪ ጨቨቅም ጝሚስቅልድ መውር ይት ቲክነ!#ማቲ. 10፡38፤ ሉቃ. 14፡27። 24ጝኒቭስሸንት ቓዝጠ በነውድቅ ድስጡ፤ ይማጥን ጝኒቭስየንት ድሰውድ ግን ቓዝጡ።#ማቲ. 10፡39፤ ሉቃ. 17፡33፤ ይዃ. 12፡25። 25እጅር ኣልሚዙ ኻፍትድቅ ችጛን ጝኒቭስየንት ድሰውዝየ ዊንም ጒድልዘውዝየ ውር ጣቅምሽጡ? 26ኣውማው እጅር ይቍዝመ ይቃሊዝ ኣይቭትሽ እጅር ዅር ቈሽ ጝክቭሪዝ፣ ጚርት ክቭሪዝመ ጝቅዱሳን መላእክታኒዙ ክቭሪዝ ተራንድ ጝቍዝ ኣይቭትጡ። 27እማንዝ የኵን፤ ነን እንል ችብረቊስ እደረት ምጝግስትየን ተትራንድ ቓሊጝቀ ክራቍ ላው ላው እቅ እኵ።»
እየሱስት ሚልክድ ላውጥሸጘ
(ማቲ. 17፡1-8፤ ማር. 9፡2-8)
28እየሱስ እንየት ዊግተት ሰውጠ ግርቅ ኣጛንድ ቢጥሮስት፣ ይዃንስት፣ ያይቈቭት፣ ቲክንዝ ፃልይጠ ላው ኣበል ፉ። 29ፃልያ ሲጝቀም ጝጋፂዙ ሚልክድ ላውጥሹ፤ ጝኣልቨድም ፃር ብርቕርቕ የው ኣቑ። 30ድጝግትም ሊጘ እቅ ተርጝ ጝጅቅ ዊግትጛ ዊን፤ እን እቅድም ሙሴስመ ይልያስስ ጛይ። 31ጛይም ኽየው ክቭርዝ እትልጝ እየሱስ እየሩሳልየምስ ለምረው ጝሚከረይዝመ ጝክርጘይዝቍዝ ዊግትጛ ዊን። 32ኣይንድም ቢጥሮስመ ጝጅቅ ዊነቊዝ ዝመውዝ ፅጐውሽጝ ዊን፤ ጝታዝመዊስ ነቃጛንድ ግን እየሱስት ክቭሪዝመ ጝጅቅ ዊነቍ ሊጘ እቂዝ ቓል። 33እዛይ ሊጘ እቅድም እየሱስቲስ ቲትጝ ፊርጥጘ ጕጛንድ ቢጥሮስ እየሱስት፦ «ኣደረወ! ይን እንል ጐይናን ይናጭስ ቀሰው የጝ፤ ኣቓንስቅም እንል ሻቘ ደፅ ተስነ፤ ላውድ ክጭስ፣ ላውድ ሙሴስ፣ ላውድ ቈሽ ይልያስስ ኣጥቍ» ዩ፤ ዊግተው ዊገድየንትም ኣርቓውም ዊኑ።
34ቢጥሮስም እኒንት ዊግታ ሲጝቀ ድምነ ተር ጛት ገርዱ፤ ድምነይዝ ኣቒል ጥውጛንድም ጐውት። 35ድምነይስም፦ «ያን ማርፀው ይዅርድ እኒን ይጝ፤ ጝት ወጭጥን» የው ድመ ተሩ።#እሳ. 42፡1፤ ማቲ. 3፡17፤ 12፡18፤ ማር. 1፡11፤ ሉቃ. 3፡22። 36ድመድ ወሽተት ግረ እየሱስ ጝለ ኣቕ ችጝሹ፤ ጝክንደጥድም እን ዊገድ ኣይንት ኰሪዝ ላውዝቅ ድቍጝቀ ጝታእዘኒዝ ፃይጝ ዝም ይ።
እየሱስ እርኵስ መንፈስ ጨው እፈረድየንት ቓዘጘ
(ማቲ. 17፡14-18፤ ማር. 9፡14-27)
37ጝኣምርሲዝም እየሱስስመ ሻቘ ክንደጢዝ ኣበይስ ጊምጛንድ፣ ንቕፀው ኽዝቭ ተር ዲምቅሹ። 38ኽዝቪዝ ማኽሊስም ላው እጅር ጝድመድ ኣጕስ ሸው እንት ዩ፦ «ክንሰተወ! ይፃቀው ይዅርድ ላው ጘጝ ጭቝ የጝ፤ ኣለቀይ ቓዝተ ማጥን ጨወኵን። 39ጝት ጋኒን ፃይ ጕቝሰኵ፤ ዝቨይልም ማል ገፍረድ ገፍርዛ ፍርግሰኵ፤ ጝሰውነትድቅ ልኻንዘት ግረ ዋቐ ሚከረዝ ሊቅ ፊረኵ። 40ክክንደጥድዛትም፦ ‹ኣለቀይጥን ፊስጥን› የር ጨው ዊኑን፤ ጛይ ግን ቸለነ ብ» ዩ።
41እየሱስም፦ «እፈ እምንት እጅርነቅ ጠማማን ዅል ክታትርነ! ኣውን ኣሽ ክታጅቅ ፅብጭር? ኣውን ኣሽስ ክታት ቸልጭር? እስቲ ክዅርት እንጐ ነሽ» ዩ። 42እፈረድም እየሱስትጐ ኣልታንድ ጋኒንድየን ዝቨይል ማል ፍርግሱ፤ እየሱስ ግን እርኵስ መንፈስድየንት ጋስፁ፤ እፈረድየንትም ቓዝ ጚርስ ይዉ። 43ኽዝቭድቅም እደረት ኻይሊዙ ኽይትድ ቓል ጊርምሹ።
እጝቅቅም እየሱስ ሰራሸው ሰቪዝቍዝ ጊርምሽጛ ሲጝቀ እየሱስ ጝክንደጢዝ፦ 44«እኒን ነን ያን ድቈው ዊገድ ወሽርን ክታእዘኒዝ ፃይጥን፤ እጅር ዅር እቀ ናንል ዲቍሽት ይውሽትጡ» ዩ። 45ጛይ ግን እን ዊገድ ኣስክሲየቍም፤ ኣስክሳይጘጘ ጝታእዘኒስ ሲውርሽ ዊኑ፤ ዋቕራይጘጘ ቈሽ ጐውት።
እጝቂስቅ ንየቱ ኣቐው እጅርድ
(ማቲ. 18፡1-5፤ ማር. 9፡33-37)
46እንዝ ግረ ጝክንደጥድ ጛስ ጛይ፦ «ይናማኽሊስ ኣው የጝ ንየቱ ኣቐውድ» የነው ክርክር ጕይጝ ዊን።#ሉቃ. 22፡24። 47እየሱስ ግን ጝታእዘኒዙ ኻሰቭድ ኣርቓንስቅ ላው ኽፃን ጝጐ ነስ ጝጋቢል ችብስ እንት ዩ፦ 48«እኒን ኽፃንድየንት ይሽዝ ለምረው ኣውማው እጅር ፅብሽ ይት ለምሩ የነት የጝ፤ ይት ለምረውድ ቈሽ ይት እፃቐውድየንት ለምሩ የነት የጝ፤ ክታማኽሊስ ክታእጝቂስቅ እጥን ኣቐውድ ክታእጝቂስቅ ኽየው ኣጡ» ዩ።#ማቲ. 10፡40፤ ሉቃ. 10፡16፤ ይዃ. 13፡20።
49ይዃንስም፦ «ኣደረወ! ላው እጅር ክሽዝ ጋኒናን ፊሳንድ ቓልኑን፤ ዊገድ ግን ጘጝ እጅርድ ይናጅቅ ቲክናው ኣቓንስቅ ኪልክልኑን» ዩ። 50እየሱስም፦ «ክታት ተቃውምሻውድቅ ክታጅቅ የጝ፤ ኪልክልትርነ» ዩ።
ሰማርየት እቅድ እየሱስት ተቃውምሽጘጘ
51እየሱስም ጝሲመይ ፈነው ግርየድ ችጝጠ ጓንድ እየሩሳልየም ፍጠ ቋርጥ ጉ። 52በውግስም ጝበዊል ፊረቍ እቅ እፃቑ፤ ጛይም እጝቅትቅ ኣስልጝ ዊንጥጘ ሰማርየት ኻግሪዝወ ላይ ኪውትል ጥው። 53ጚ ኪውሸንትቍ እቅድ ግን ጝታግዝ ፃቭ እየሩሳልየም ፊርጠ በነጘ ኣርቕጛንስቅ ለምሪየቍም። 54ጝክንደጥ ያይቈቭስመ ይዃንስም እኒንት ቓልጛንድ፦ «ክንሰተወ! ይልያስ ፃቨጘ ሲመይስ ልየ ሊቭ እን እቅድ ኣብዝጠ ማጥን ኣዝነ ፊቅድትርመ?» ይ።#2ነገ. 1፡9-16። 55እየሱስ ግን ጝታጐ ብሩ የው፦ «ክትን ኣወየው መንፈሲስ ኣቕርነጘ ኣርቓይርነቅም፤ እጅር ዅር ተረውድ እቀ ርዅየ ቓዝጠጚ ድስጠም ኣየው» የው ጋስፁ። 56ጝጊስም ጕጝ ላየ ኪውል ፊር።
እየሱስት ቲክነናንድ ተረው ፊተነድ
(ማቲ. 8፡19-22)
57ጒደነይዝም ፃጛ ሲጝቀ ላው እጅር ተር፦ «ኣደረወ! ክት ፊትረዊልቅ ቲክንጨ በነኵን» ዩ። 58እየሱስም፦ «ቘፅልድ ጝታቢ ፃየቍ ጛይ፤ ዚልቅድም ጝታጕጂ ፃየቍ ጛይ፤ እጅር ዅር ግን ጝቕልመድ ድወነ እኳ እጀውም» ዩ።
59ላየ እጅርድየንት ግን፦ «ለው ቲክን» ዩ፤ ጘጝ ግን፦ «ኣደረወ! ኣለቀይ በዊል ፊጥ ይርት ዲቭ ተጨር ፊቅጅ» ዩ። 60እየሱስም፦ «ጝታክረቍድ ዲቭጥጘ ማጥን ክረቍድዛት በጭ፤ ክት ግን እደረት ምጝግስትት ማጥን ሲቭክ» ዩ።
61ላው ላየ እጅር ቈሽ፦ «ኣደረወ! ያን ክት ቲክንጨ በነኵን፤ ዊገድ ግን በዊል ፊጥ ይበተሰቭድ ሲነቭጭ ተጨር ፊቅጅ» ዩ። 62እየሱስ ግን፦ «እርቭነድ ጝናኒዝ ጫብጥ እግርገ እግርገ ቓለው እጅር እደረት ምጝግስትስ ጥውሻውም» ዩ።
Currently Selected:
ሉቃስት ወንጌል 9: ኽምጣኣኪ
Highlight
Share
Copy
Want to have your highlights saved across all your devices? Sign up or sign in
