ሉቃስት ወንጌል 11

ፈወነ 11

ኣደረ ክንሰው ፀለውትድ

(ማቲ. 6፡9-13፤ 7፡7-11)

1ላው ግርየ እየሱስ ላው ስፍረል ኣቕ ፃልያ ዊኑ፤ ጝፀለውትድ ኻተጘም ጝክንደጢስ ላውድ፦ «ኣደረወ ይዃንስ ጝክንደጢዝ ፀለውት ክንሰጘ ክትም ፃልይነ ማጥን ክንሽ» ዩ። 2ጘጝም እንት ዩ፦ «ፃልይርናንድ እንት ይጥን፦

‹ሲመይ ፅብረር ይናኣይርወ!

ክሽድ ኪብርነ፤

ክምጝግስትየን ተትርነ፤

ክፈቃድሸን ሲመይስ ኣረጘ፣

እኒዝጘም ዝቨትል ኣርነ።

3እልቱ ይናሚድ ግሪ ጨቨቅ ነቅ።

4ይን ይናት ቢድለቍድዛት ይቅር ይናንትጘ፣

ክትም ይን ቢድልነውድየንት ይቅር ይ፤

ፊተነልም ድውተ፤ ይናት ጭቓይስቅ ቓዝጚ።›»

5ቈሽም እንት ዩ፦ «ክታጊስ ወደጅ ፃየው እጅር ዊናን ጘጝ እጅርድ ኻረ ግቨሪዝ ፊር፦ ‹ይወደጅወ! ኣለቀይ ሻቘ ምጭ ኣዲሽ። 6ላው ይፃምረ ጒደነ ዊን ይጐ ተራን ኣልሰነው ሚ ቡን› ያኒ፣ 7እድ ጝወደጅድ ኣቒል ኣቕ፦ ‹እፈ ላኽ ሽተ፤ ቢለድ ቘልፍሽኩ፤ ይቝርም ይጅቅ ኣረቲል ኽርይጝኵ፤ ኣቓንስቅም ጕን ነየነው ቸለቅም› ይጡመ? 8እማንዝ የኵን፤ ጝወደጅነይዝቍዝ ጕ ይውጠ በኒዪሽ እኳ ጝት ኒዝንዛንስቅ ጕ ጘጝ በነውድቅ ይወኵ።

9«ያንም የኵን፤ ጨውጥን፤ ካታጭስም ነይሽትጡ፤ ደምዝጥን፤ ችጝትርንቅ፤ ቢለድም ኰኳዝጥን፤ ክታጭስም ቢትጡ። 10ጨወውድቅ ለምርጡ፤ ደምዘውም ችጝጡ፤ ቢለ ኰኳዘውዝም ቢትጡ። 11ክታማኽሊስ ኣይር ኣቕ ጝዅርድ ኻበሸ ጨዋን ቕርጘ ይወው እኩመ? ኻዘ ጨዋንስ ሲቭረ ይወውድ ኣው የጝ? 12ዊንስ ቕሉነ ጨዋን እጭወ ክርክርጣነው ይውጡመ? 13እደስለ ክትን ጭቕ ኣቕርን ፅብርና ክታቝሪዝ ቀሰው ይወነው ኣርቕርነውዝየ ሲመይቱ ክታይርድ ጝት ጨወቊዝ መንፈስ ቅዱስት ኣወሽ ኒቒስ ይዋው?»

እየሱስ ብየልዘቩልዝ ጋኒን ፊሰኵ ይሽተጘ

(ማቲ. 12፡22-30፤ ማር. 3፡20-27)

14እየሱስም ላው ግርየ ላው ድደ እጅሪስ ዊግሳው ጋኒን ፊሳ ዊኑ፤ ጋኒንድ ፈት ግረም እድየን ድደ እጅርድ ዊግተነው ኪርሙ፤ ኽዝቭድም ጭቕጘ ጊርምሹ። 15ላው ላውድ ግን፦ «ጋኒናንድ ፊሰውድ ብየልዘቩል የነው ጋኒናነ ኻልቀይዝ የጝ» ይ።#ማቲ. 9፡34፤ 10፡25። 16ላጥ ቈሽ ፊትንጥጘ በንጝ ሲመይስ ላው ምልክት ቓሊስጠ ማጥን ጝት ዋቕር።#ማቲ. 12፡38፤ 16፡1፤ ማር. 8፡11።

17ጘጝ ግን ጝታኻሰቭድ ኣርቕ እንት ዩ፦ «ላው ምጝግስት ጝስመ ጝስ ቲተቲተው ኣቐውዝየ ድዘው የጝ፤ እኒዝጘም ላው በተሰቭ ጝስመ ጝስ ቲተቲተውዝየ ሊቨው የጝ። 18ጋኒናን ጛስመ ጛስ ቲተቲትጘውዝየ ሲጣኒዝ ምጝግስትየን ኣወይር ፀናቲ? እኒንት የውድም ክትን ይት ብየልዘቩልዝ ጋኒናንድ ፊሰኵ ይርኑዝ የጝ። 19ቈሽስ ያን ጋኒናንድዛት ፊሰውድ ብየልዘቩልዝ ኣቐውዝየ ክታቝርድ ኣውትዝ የጝ ፊስጘውድ? ነስየ በገዘ ክታቝርድ ክታት ፊርድጥቍ። 20ያን ጋኒናን ፊሰውድ እደረት ኻይልዝ ኣቐውዝየ ግን እደረት ምጝግስትየን ክታግል ኣልትረጘ ኣርቕጥን።

21«ላው ኻይሉ እጅር መሰሪ ከምር ጝጝንድ ሊሚደውዝየ ጝኻፍትድ ዚርፍሻውም። 22ጝጊስ ዲቈው ኻይሉ እጅር ተር ጝት ኻቕሽ ግን ተማምንሽ ዊነው ጝመሰሪድየንት እክስ ፊሰኵ፤ ጝኻፍትድም መራቕ ላጥዝ ኣድልድለኵ። 23ይጅቅ ኣቓውድቅ ይት ተቃውምሸኵ፤ ይጅቅ ኣኽቫውድም ቢትነኵ።»#ማር. 9፡40።

እርኵስ መንፈስ እጅርል ዋጥርን ጥወነውድ

(ማቲ. 12፡43-45)

24«እርኵስ መንፈስ እጅሪስ ፋንድ ፈወነ ስፍረ ደምዝጠ ኣቝ እጀው በራኸዝ በራኸ ጅልወኵ፤ ደምዝ ደምዝ ባንድ ግን፦ ‹እንዝ ሚቅ ዊነው ይጝኒል ፊጨጚ› የኵ። 25ዋጥር ተራንድም እድ ጝንድ ዊር የው ኣስልሽ ችጘኵ። 26እንዝ ግረ ፊር ጝቐምቲስ ወሰቍ ላጝጠ ጭቕ ጋኒናን ፃይ ተረኵ፤ እድ ጝኒልም ጥውጝ ጐይጥቍ፤ እንዝ ግረ እድ እጅሪዙ ፅብጘድ በውገትዊስ እግርገትውድ ወሰው ኣቐኵ።»

27እየሱስ እኒንት ዊግታ ሲጝቀ ኽዝቪዝ ማኽሊስ ላይ እውነ ጝርቃልድ ኣጕስ ሽር፦ «ክት መውትረይ ማፅንትሸንስመ ክት ኒቭረቍ እቍጣኒዝ ቀቫሸቍ ጛይ» ይች። 28ጘጝ ግን፦ «ቀቫሸቍስ እደረት ቃልድ ወሽጝ ኣዚተቍድ ጛይ» ዩ።

የውናስት ምልክትነይድ

(ማቲ. 12፡38-42)

29ንቕፀው ኽዝቭም ጝጐ ኣኽቭሻንድ እየሱስ እንት ዩ፦ «እን ዅለድ ጭቓ የጝ፤ ምልክት ቓልጠ በነኵ፤ ዊገድ ግን ነቭይ የውናስት ምልክትድ ኣሽጚ ላየ ምልክት ይውሽታውም። 30የውናስ ነነውየት ኽዝቪዝ ምልክት ኣቐጘ እጅር ዅርም እን ዅለይዝ ምልክት ኣጡ።#የው. 3፡4። 31ደቩቭት ንግስትየን ፍርድ ግርየዝ ኰር እን ዅለይጅቅ ጕር ጘጝ ዅለድ ፊርድቲ፤ ምላሰንድም ጚ ሰለሙንት ጥቨቭድ ወሽተ ዝቨዝ ደርቸይስ ጕር ተትርኵች፤ ዊገድ ግን እንወ! ሰለሙንቲስ ዲቈው እንል እኩ። 32ነነውየት እቅድ ፍርድ ግርየዝ ኰር እን ዅለይጅቅ ጕጝ ጘጝ ዅለይል ፊርድጥቍ፤ ምላሰንድም ነነውየት እቅድ የውናስት ስቭክትድ ወሽጝ ንስኻ ጥውጝኵ፤ ዊገድ ግን እንወ! የውናስቲስ ዲቈው እንል እኩ።

ሰውነትዙ መቭራትነይድ

(ማቲ. 5፡15፤ 6፡22-23)

33«መቭራት ኣቭርኽዝ ስውር ስፍረል ዊንም ክቪ ኣቒል እቝረው እጅርም እጀው፤ ኣቒ ጥወቍ እቂዝቅ እትልጠ ማጥን ንየስ ሸው መቅረዚል እቝረኵ። 34ክሰውነቲዝ መቭራትሸን ክእልሸን ጚ፤ ነስየ ክእልሸን ትኽኒ ኣርሽ ክሰውነትድቅ ብሩኽ ኣቐኵ፤ ክእልሸን ፅውዝጅነ ኣርሽ ግን ክሰውነትድቅ ጥምተው የጝ ኣቐውድ። 35ኣቓንስቅም ክቕምትል ፅበው ብርኻንድ ጥምታየጘ ጣጝቅቅጭ። 36ነስየ ክሰውነትድ ውርቅ ጥመ እጀው ብሩኽ ኣቐውዝየ ክዅለመነድቅ ድምቐው መቭራትድ ኣቭርቅርቃንትጘ ብሩኽ ኣጡ።»

እየሱስ ፈሪሳኒዝመ ወሪትት ኽግ ክንሰጢዝ ዊቅሰጘ

(ማቲ. 23፡1-36፤ ማር. 12፡38-40)

37እየሱስም እኒንት ዊግት ኻተጘ ላው ፈሪሳነው እጅር እየሱስት ምዘት ዀስጠ ጝጝኒል ኣቭንወ ጭጙ፤ ጘጝም ፊር ጝጅቅ መዲል ጐዩ። 38ፈሪሳነውድም እየሱስ ምዘት ዀነዊዝ በውገ ጝናንጣንድ ቓሪየው ኣቓንስቅ ጊርምሹ። 39ኣደረም እንት ዩ፦ «እፈ ፈሪሳን ክታትርነ! ወኝጨይዝመ ድስቲዝዙ ዲግድ ዊር ሽርን ቓስርነኵ፤ ክታጊዝውድ ግን ጭቕትዝመ ቀመነውዝ እቻቕኩ። 40እፈ ኻጘፃን ክታትርነ! እደረ ዲግድ ፋጥረጘ ኣቒድስ ፋጥሪየውመ? 41ዊገድ ግን ኣቒል ፅበውድ ምፅዋት ፃቭርን ይውጥን፤ እንዝ ግረ ክታጭስ እጝቅቅ ንፅዅ ኣጡ።

42«እፈ ፈሪሳን ክታትርነ ወየው! ኣዝሙዲስ፣ ጨናዳሚስመ ላጥ ቅመማኒስቅ ኣስራት ፊስርን ይውርነኵ፤ ኣነጚ እማን ፊርደነውዝመ እደረት ቀነነውዝ በትርንኵርኑ፤ እንዛት በሪጝቀ ዊኑ እዛት ፃቨነውድ።#ዘሊ. 27፡30። 43እፈ ፈሪሳን ክታትርነ ወየው! ምኵራቪስ ኪብረው ጐይተል ጐየነው፣ ኣርየ ማኽሊስም እጅርቅ ክታት ሲለም ይጠ በንርነኵ። 44እቅ ኣርቒጝቀ ጝዲጊል ፃጝጘው ምልክት እጀው መቃቭርድ ተክርነቅ ክታትርነ ወየው።»

45ወሪትት ኽግ ክንሰጢስም ላውድ፦ «ክንሰተወ! እንት ይር ዊግርትራንድ ቃል ይናት ዛሸነት የጝ» ዩ። 46እየሱስም እንት ዩ፦ «ወሪትት ኽግ ክንሰጥ ክታትርነ ክታግልም ወየውተ ተርጡ፤ ምላሰንድም እቅዝ መውርሻው ፅጐወው መውር መውስርነኵ፤ ክታቕም ግን ክታላይ ኽጨውለየስ እኳ ዳቓይርነቅም። 47ክታኣቅልድ ቍውጘቍ ነቭያታኒዝ መቃቭርድ ተስርነቅ ክታግስ ወየው። 48ነስየ ክትን ክታኣቅልድ ሰራሽጘው ሰቪዝ ቲስመምርነቅ ሚዝረጫን የጝ፤ ጛይ ነቭያታንድዛት ቍዉⶖ፤ ክትን ቈሽ ጝታመቃቭራንድ ተስርነኵ። 49እንዝ ማጥን እደረት ጥቨቭሸን እንት የች፤ ‹ነቭያታንዝመ ኻወርየታንዝ ጝታጐ በርስጭር፤ ጛጊስም ላው ላውድ ቍውጥቍ፤ እዳቐቍድዛት ቈሽ ሲድስጥቍ።› 50ኣቓንስቅም ንጭት ዅለድ ኣልም ፋጥርሸት ኪርም ቅብረው ነቭያታኒዙ ብሪዝቍዝቅ ዋቕርሸው የጝ። 51ኣቭየልት ብሪስ ኪርም መሰዊየይዝመ መቅደሲዝ ማኽሊል ቍውሽተው ዘካርያስትል ኣሽ ቅብረው ብረድቅ እን ዅለይስ ደምዝሽትጡ፤ የይ! እን ዅለድ እንዝቅ ዋቕርሸው የጝ። 52ክትን ወሪትት ኽግ ክንሰጥ ክታትርነ ወየው! ኣርቕትዙ ቝልፍድ ፃይርንኵርኑ፤ ዊገድ ግን ክታቕምም ጥዋይርነቅም፤ ጡጥጘ በነቍድም ጊግቭርነኵ።»

53እየሱስም ጝጊስ ፋንድ ፈሪሳኒዝመ ወሪትት ኽግ ክንሰጢዝ ጭቕጘ ተቃውምሽጛ ንቕፀቍ ዊቅም ዋቕርጛ ኣዋክቭጥጘ ኪርም። 54እንት ሽጘውድም ጝምቸይስ ፈው ቃሊዝ ፃውርጥጘ በንጝ የጝ።

Currently Selected:

ሉቃስት ወንጌል 11: ኽምጣኣኪ

Highlight

Copy