Lukaas 24

Ŋaarki Yeese Ret Walasa

(Maa. 28:1-10; Mar. 16:1-8; Yow. 20:1-10)

1Boŋurɓa jartiyatɔ sigɛɓak reyaay sinɛɓa ragadirk, nɛ kaar romiɗ kuleet waawuy Sambatɛyoŋk saana lak pii nɛɛkik. 2Nɛɓa kaar laŋirki giɗee nɛɛk a kɔ girgiɗiik pii nɛɛkɛ adiŋ. 3Saaɓa guugunytarkiɗ takanak, nɛɓa kir laŋiiɗ buusɛ Suumi Yeeseek. 4Saaɓa sɛɛga kiiɗ mɛlɛ ɔɔtɛ nɛɛkɛkik, nɛɓa a gorgorŋ ɛtɛr sɛɛge jɔk joop a pɛɛy sigɔ latu abiyak sigɔ nyaalɛr jɛtik. 5Nɛɓa jartiyatɔk sigɛ ɓuri nɛ dakɛɛtar ɗooka. Nɛ joop sigɛ tonur sɛɛga kɛ, "Warɛɛr Yeesee sinɔ bɔdtank joope sigɔɔgɛkan rɛrarŋɔŋk kɔɔr agut jikon? 6Kɛɛ ara seedi! Ŋaarkikɔŋ! In koɓukɛɛ any sinɛkan kɔna tonu saakan arkiɗ Gɛlilaakeek, 7tonukan kɛ, 'Ɗɛyɛ Tɔɔna Etoŋk a kɔɔ gaɓɛɛ ariita tikitaanakoŋk, a kɔɔ laalawɛɛ, nɛkɔɔ ŋaarki ɗoŋikɛ sigɔɔgɛ jiitik ret walasa.' " 8Nɛɓa jartiyatɔ sigɛ sisa koɓurku pɛɛni sinɛ.

9Weeriikɓa jartiyatɔ sigɛ saadi lak pii nɛɛkik nɛ kurak tonur any sini baŋɛ nomtaanaka sigaaga aarin a omoŋɔŋk a joopa ɔgɔɔka baŋɛ. 10Joop sigɛɓa tonur any sini nomtaanakaak Maariyam Mɛgdooluk, a Yohaana, a Maariyam, ɛmɛs Yaykooba, lakɛɓa ɓɔrɛ jartiyatɔk sigɔɓa sɛɛg a sɛɛg agut omoŋɔŋk. 11Yakanaɓa sɛɛg any sinɛ sɛɛga tonur jartiyatɔ sigɛk koɓur kɛ nyon, nɛ kir ŋaadiit. 12Yakanaɓa Petros ŋaar nɛ reeri saana lak pii nɛɛkik. Nɛɓa mɛlɛ nɛ ruuɗe ɛɛk nɛ guugunyur utula nɛɛka nɛ dɛnɛɛr abii sinɛ kɛwukɛwuŋɔŋk sinɛɓa ɓuwuɗɛɛ buusɛ nɛɛkik dakɛɗa. Nɛɓa weeri nyaka nɛɛka a reemɗi ɓayɛ nɛɛkɛ agut any sinɛ ɓɛɛlɛk.

Yaaŋɛ Ɛɛk Yeese Nomtaanaka Sigɔɔga Pɛɛyk

(Mar. 16:12-13)

13Ɓeny sinaanɛɓak nomtaanakɛ Yeeseek a pɛɛy kaarɓa Eemawusa. Eemawus mɛndɛr sinɔ ar soodi yowɛrka nɛɛkɛ Yorsaleeme kiilo meetera aarin a omoŋɔŋk. 14Waasiɗiiɓa sɛɛk ɛkanɛɛkɛ gɛŋk agut any sinɛkan ɓɛɛlɛ baŋɛk. 15Saaɓa tonɗiiɗik ɛ mermenarɗik, nɛɓa Yeese wideer ɛɛk nɛ ŋawiiter a sɛɛg agut omoŋ. 16Yakanaɓa sɛɛk dɛnɛr nɛ kir ɗegerɔɔn kɛ wooɗ, agut sinɔɓa miinyɗiiɗ taamɛ gɛŋkik.

17Nɛɓa sɛŋk tonu sɛɛga kɛ, "Jikon sinɛ waawasari ɛkanɛɛkɛ goŋk oko sinik ma atukari ŋawit gopan takank?"

Nɛɓa sɛɛk sanɗi nɛ ɛtɛr kɛ many. 18Sɛɛge om iɗit sinɔɓa riyɛ kɛ Kɛlɛyoopaak, tongeeɗɓa kɛ, "Ɗoŋikɛ sigeege any sinɛkɔ ɓɛɛlɛ seedi Yorsaleemek kin ɗegeeraat iin dakɛɗa?"

19Nɛɓa sɛŋk tonu sɛɛga kɛ, "Jikon any sinɛkɔ ɓɛɛlɛk?"

Nɛɓa sɛɛk jumurargeeɗ kɛ, "Any sinɛkɔ ijaagɛɛ Yeesee Naajreetik raŋk. Sɛɛnkan sɛŋk iɗit pɛrkaakoŋk sinɔkan ɓaŋkaawur pɛɛnii a ijaag Waakoyote a joope baŋɛ taamɛkɛk. 20Yakana ɔɗɔweer tapa ŋaadiyɛɛkoŋk a suumiyɛ gaŋk gaɓɛrkan pirdiya retoŋk, nɛ laalawarŋ. 21Ma seek eteŋk joop Israeelik ŋaadiikan kɛ ebɔdɛkoy tin sɛɛn. Yakana sinɛkɔ ijaagiiɗɛɛ any sinik ege ɓenyse ɗoŋ jiit. 22Maɓɔrɛ reemɗi tin ɓayɛtun agut jartiyatɔk a omoŋ omoŋ sigɔ atu eteŋkɛ kɔɔruk, kaarkɔ kuleet saana lak pii nɛɛkik, 23yakanakɔ kir laŋiiɗ buusɛ nɛɛk weerikikɔ nɛ tonur kɛ, "Dɛniikɔ wosɛytaanak Waakoyotoŋk sigɔ tonur kɛ ɓɛɛlɛ wɛɛŋakɛɛk." 24Eteŋkɛ joop a omoŋ omoŋ kaarkɔ saana lak pii nɛɛkik, nɛ kaar laŋirki a ɓɛɛlɛ oko sinɛkɔ tonurɗu jartiyatɔ sigɛk. Yakanakɔ kir taanta Yeesee."

25Nɛɓa Yeese tonu sɛɛga kɛ, "Iinak sigi kiir koɓiitik a sigi gaalaakari ant sinaanɛɓa tonur joop pɛrkaakoŋkuk! 26Ki ɗɛyɛɛ Kereseya a laŋk rakatɛ sini a guugunyɔn eemɛyɔɔna nɛɛkaakik?" 27Kɔnyɛɗɓa sɛɛg any sinɛɓa taapɛɛ Wargatɛɛ Waakoyotoŋk baŋɛ agut sɛɛn a tukiɗi Muusee a joope pɛrkaakoŋk baŋɛk.

28Saaɓa woontukuɗ mɛndɛra sinaanaɓa kaargeeɗik, nɛɓa koɓɛɛ kɛ ɗoyukɔɔ Yeese a gopan, 29yakanaɓa sɛɛk kaaɓur a ɓaŋkawuŋ kɛ, "Kɔjururuŋ ɗiirirkɔ waawuy nɛɛkɛkiŋ, koy ɗeegarii a eteŋk." Nɛɓa guuguny godeya kɛnɔ ɗeegarar a sɛɛg.

30Saaɓa beeɗirɗi a sɛɛg agut omoŋ nyon ɗamatoŋkuk, nɛɓa ɓɔŋgɔɔrɛ kiiwu nɛɛk, nɛ geetiŋ nɛ ŋapati nɛ gaɓɛ sɛɛgaŋ. 31Nɛɓa sisa ɓuukiɗi taamɛ gɛɛŋk, nɛ ɗegerar kɛ sɛɛn Yeesee. Nɛɓa sɛŋk dugiɗi sɛɛgeŋ. 32Nɛɓa sɛɛk tonur ɛkanɛɛkɛ gɛŋk kɛ, "Mokoto arkii gopɛ tak nɛkɔ tina waawasi nɛ wooru Wargatɛ Waakoyotoŋk nɛ tin kɔnyɛɛɗ nɛ tin moɗi ɓayɛtun a ito maɗ?"

33Ŋaararɓa sayitii sinaanɛ nɛ weeri Yorsaleema. Nomtaanak gɛɛŋk sigɛ aarin a omoŋɔŋk a joop sigɛɓa sɛɛg a sɛɛn agut omoŋɔŋk. Laŋirkiɓa sɛɛg saadi a kɔ tolɗi agut omoŋ. 34Tonurɓa sɛɛk nomtaanak sigɛ aarin a omoŋɔŋk kɛ, "Ŋaarkikɔ Suumii eekeerɛ! Yaaŋɛkɔ ɛɛk Simionaaŋ." 35Nomtaanak sigɔ pɛɛyk waasɛrɓa sɛɛga any sinɛkan ɓɛɛlɛ gopɛk a sinɛɓa ɗegerarɗi Yeesee saakan ŋapatiiɗ kiiwu nɛɛkik.

Yaaŋɛ Yeese Ɛɛk Nomtaanaka Gɛɛnaak

(Maa. 28:16-20; Mar. 16:14-18; Yow. 20:19-23; Ija. 1:6-8)

36Saaɓa atukuɗ waasiyɛɛkɛ any sinik, nɛɓa Yeese ɔɗɔwa nɛɛka sisa ɛtɛ sɛɛge kɔɔr nɛ tonu sɛɛga kɛ, "Digoy kɔna!"

37Yakanaɓa sɛɛk koɓurkɛ dɛnɛr wɛɛŋa, nɛ ɓuriiŋ jɛt. 38Nɛɓa sɛŋk tonu sɛɛga kɛ, "Ɓuriikari agut jikon? Latukari ɓayɛtun nɛɛkɛ goŋk koɓiɗak a pɛɛy agut jikon? 39In dɛnɛɛ arin gaaŋk, a derak gaaŋk nɔ ɗegerɛɛ kɛ eet. Inti kumɛɛ nɔtu dɛnɛɛ oko sini dɛnɛrɗɔ eeteek, kɛɛ wɛɛŋakɛ buusɛ a ɛmɛɛk."

40Tonu oko sinɛk nɛ yaaŋɛ sɛɛga arin gɛɛŋk a derak gɛɛŋk. 41Agut sinɔɓa sɛɛga yaakiɗ, ɛ ŋaatirɗiŋɔŋk, nɛɓa tɛɛnan kir ŋaadiit. Nɛɓa Yeese kɔɔniy sɛɛg kɛ, "Latukari any sinɔ ɗamɛŋɔŋk sinɔ balaaŋɔŋkuŋ seediiŋ?" 42Nɛɓa sɛɛk gaɓɛrgeeɗ olt sinɔ tɛmŋɔŋk sinɔkan tuujɛɛŋɔŋk. 43Nɛɓa sɛŋk boŋu nɛ ɗam sɛɛge taamɛkɛ.

44Nɛɓa sɛŋk tonu sɛɛga kɛ, "Saakan eet a iinakik pɛɛni naak sinɛkan kɔna tona kɛ any sinɛɓa taapɛɛ Higii Muuseek, a Pɛrkaakɛɛk, a Iiliyakɛɛk ɗɛyɛ a dusanɛɛŋɔŋk. Sɛɛn sini."

45Saadi baŋiya ɓuukeɓa kalbiyɛ gɛŋk kɛnɔ oolɛr gaamit Wargatɛ Waakoyotoŋkuk. 46Tonuɓa sɛɛga kɛ, "Taapɛɛɓa Wargatɛɛ Waakoyotoŋk kɛ, 'Laŋkikoy Kerese rakatɛ, ŋaarkikoy ret walasa ɗoŋikɛ jiiteene nɛɛkɛk. 47A tukiɗi Yorsaleeme waasɛɛkoy weerɛɛt tikiyɛɛkɛ Waakoyotak a ranyjɛɛt tikiyɛɛkoŋk joopa baŋɛ tiriyaakɛ gɛɛnɛk.' 48Ɗegerari any sini baŋɛ sɔɔk.

49Sisɔ wosɛykaakɔɔ kɔna any sinɛɓa kuumɗigeeɗ Baabɛɛkiŋ. In beeɗikuunɛɛ katamɛɛ Yorsaleemuk, mɛlɛɛɗa nɔkɔɔ kɔna gakiɗɛ ɓaŋkawuka darikk."

Ŋaar Yeese Dariya

(Mar. 16:19-20; Ija. 1:9-11)

50Saadi baŋiya diileɓa sɛɛg mɛlɛɛɗa Bitaniyaaka, ɓɔŋgɔɔrɛɓa arin gɛɛŋk, nɛ geeti sɛɛgiŋ. 51Aɓa geeget sɛɛgiŋ, nɛɓa pakat sɛɛge ɛɛk nɛ ŋaar dariya. 52Nɛɓa sɛɛk ugumergeeɗiŋ, nɛ weeri Yorsaleema yaakaat sinɔɔnɛ obiiŋɔŋk. 53Atuɓa Godeey sinaanɛ Geetitank ɓɛɛnyɔwɛ gɛɛŋk baŋɛ a pɔɔpɔsar Waakoyo.

Currently Selected:

Lukaas 24: KSTM

Highlight

Copy