Lukaas 23

Wideer Ɛɛk Yeese Pirdiya Taamɛka Pilatoosuk

(Maa. 27:1-2,11-14; Mar. 15:1-5; Yow. 18:28-38)

1Joop sigɛɓa tolɗi saadik baŋɛ ŋaararɓa nɛ diiler Yeesee Pilatoosa. 2Tukerɓa a daariyɗiigeeɗ a tonur kɛ, "Iɗit sini laŋkiikɔ a ari joop gaŋk a babadarŋ. Ɓaariiɗ a katnɔ koyɛ gibiri Keesaara ɛ tonu kɛ, 'Eet ɔɗɔwa naaka Keresee, Tapaɗ.'

3Nɛɓa Pilatoos kɔɔniy kɛ, "Iin Tapaɗ Ayuuduk?"

Nɛɓa Yeese tongeeɗ kɛ, "Ii, oko sinɛ toniiɗink."

4Nɛɓa Pilatoos tonu ɔɗɔweera tapa ŋaadiyɛɛkoŋk a joopa sigaaga ɓɔɔkaak kɛ, "Kii kaa saak ete sineene laŋiiɗ tikiyɛ."

5Yakanaɓa sɛɛk tonur a ɓaŋkawuŋ kɛ, "Iɗit sini rɔririyiikan sinɔɔnɛ ɗoo Yuudaak baŋɛ, a tukiɗi Gɛlilaake nɔ mɛlɛɛɗa seena Yorsaleema, a boŋku joop ooyaana."

Wideer Ɛɛk Yeese Taamɛka Herodisik

6Saaɓa Pilatoos tiyɛɛɗ sinik, nɛɓa kɔɔniya kɛ, "Ege sini iɗit Gɛlilaak?" 7Saaɓa Pilatoos ɗegerɗi kɛ kuskɔ Yeese ɗook Herodisik, nɛɓa wosɛyɛ son lak sɛɛnik saaɓak arɓa sɛŋk Herodis Yorsaleeme.

8Dɛnɛɓa Herodis Yeesee nɛɓa yaageeɗiŋ jɛt, agut sinɔɓa tiitiyɗi ɔɔtɛ nɛɛk, nɛɓa lak ŋaadiyɛ sigɔ ɗɛyɛ a dɛnɛ saa ijaagiɗ sɔɔriyɛɛk. 9Kɔniniyɓa Herodis Yeesee a kɔɔniyɔɔnak ɓɔɔkaaŋ, yakanaɓa sɛŋk kɛɛ any sinɔ jumurgeeɗik. 10Ɔɗɔweer tapa ŋaadiyɛɛkoŋk a rɔɔriytaanak higi Muuseek ɛtɛtɛɗarɓa saadi nɛɓa daariyɗigeeɗ a ɓaŋkawuŋ. 11Herodis a amaasiniyɛ gɛɛŋk daraayɛrɓa ɛ nyɔɔnar. Nɛ gaɓɛrgeeɗ ɛɛka abii eemɛyɔɔnoŋk nɛ wosɛyɛr kɛkar son lak Pilatoosuk. 12Herodis a Pilatoos latuɓa jeemɛ ɗaakan kɔɔr, nɛɓa popori ɓeny sinaanɛŋ.

Pɛrɛdɛɛ Yeesee Rer

(Maa. 27:15-26; Mar. 15:6-15; Yow. 18:39-40; 19:1-16)

13Tolɛɓa Pilatoos ɔɗɔweer tapa ŋaadiyɛɛkoŋk a suumiyɛ a joop sigɛ ɓɔɔkaak, 14nɛ tonu sɛɛga kɛ, "Ɗɔkarkɔɔkɔ iɗit sini son lak eetik kɛ boŋkunɔ joop anta sinɔɔna ŋɛɛwɛnŋɔŋk. Nɛkɔ mermena iinakɛ taamɛkɛ, nɛ kɛɛ tikiyɛ sigɔ laŋkiɗaak. 15Maakɔ ɓɔrɛ Herodis kɛɛ any sinɔ laŋkiɗik nɛkɔ wosɛyki kɛkar son lak eteŋkik. Oko sini dɛnɛrɗɔɔk iɗit sini kɛɛ any sinɔkɔ ijaag a ɗegeera a rɛrgiɗɛɛŋɔŋk. 16Agut sini nɛkɔɔ goopa nɛ wooriraaŋ." 17[Nɔɓa toniiɗ sinik agut sinɔɓa Ba'aale nɛɛkɛ ɗɛyɛɛɗ a woorkɛ sɛɛga korkortan sinɔ omoŋɔŋk.]

18Nɛɓa joop baŋɛ ooyɛr agut omoŋ kɛ, "In ɓokotɛɛ iɗit sini, ma in tina woorkɛɛ Bɛrbaan." 19(Bɛrbaan iɗit sinɔɓa korkoɗɛɛ maɓa boboŋku ɗaakan katamɛɛ tak joopaak, ɛɓa ɓokokot joopuk.)

20Agut sinɔɓa Pilatoos ɗɛyɛɛɗ paariita Yeeseek nɛɓa tonu sɛɛga kɛkar. 21Yakanaɓa sɛɛk ooyɛr kɛ, "Laalawuk! Laalawuk!"

22Nɛɓa Pilatoos tonu sɛɛga jiiteen nɛɛkɛ kɛkar kɛ, "Jikon? Ijaagkɔ Iɗit sini tikiyɛ kɛ jikonak? Nɛ tonu sɛɛga kɛ 'Kiikiɗakɔ laŋiiɗ tikiyɛ sigɔ ɗegeera a rɛrgiɗɛɛŋɔŋk, Nɛkɔɔ goopa nɛ wooriraaŋ.' "

23Yakanaɓa sɛɛk kalɛyir a ɗooruŋ a ɓaŋkawuŋ kɛnɔ laalawɛɛ, ɓaŋkawuɓa ooyan nɛŋkiŋ. 24Agut sini ruumeɓa Pilatoos any sinɛɓa kalɛyirk kɛnɔ ijaagɛɛ. 25Woorkuɓa Bɛrbaan sinɛɓa korkoɗɛɛ maɓa boboŋku ɗaakan joopaak ɛɓa ɓokokot joopuk oko sinɛkan kɔɔniyarɗik, ma gaɓɛ sɛɛga Yeesee oko sinɛkan ɗɛyɛrɗik.

Laalawɛɛ Yeesee

(Maa. 27:32-44; Mar. 15:21-32; Yow. 19:17-27)

26Saaɓa diilerɗi Yeeseek, nɛɓa laŋirki, iɗit Kɛrenaak sinɔ riyɛ kɛ Simionuk, a kus kɛntɛɛ katamɛya nɛ remɛrgeeɗ laalawutan nɛɛk kɛnɔ ɓataki kɛnɔ nomɛ Yeesee. 27Nomɛrɗiɓa baŋi joop sigɔ ɓɔɔkaaŋɔŋk, a jartiyatɔk sigɔ kuɗer a paaŋir kokomeerik. 28Yakanaɓa Yeese kolɛɛnyɛ son lak sɛɛgik nɛ tonu sɛɛga kɛ, "Iinak jartiyatɔk Yorsaleemuk, kat kuɗɛɛ agut eet, ma in kuɗɛɛ agut ɛkan goŋk a tɔɔmɔk goŋk." 29Mɛlkikɔɔ ɔɔtɛ sinɔkɔɔ tonurɗɔ kɛ, 'Tersikaanak a amtun sigɔɓa kir ɓartɛɛtik, a apatiir sigɔɓa kɛ sɛɛg aapokɔɔnuk geetitaanak. 30Saakoyk tonurkoy joop kurkumɛɛka kɛ, 'In tina ɗirkɛɛ raŋana!' Tonurkoy jumkuka kɛ, 'In tin dugɛɛ!' 31Sisɔ ɔkɔn ijaagir keet sinɔɔnɛ dodooŋɔŋk oko sinikiŋ, nɛ sinaanɛ paalkik ijaagir jikon?"

32Diilerɓa joop ɔgɔ a pɛɛy sigɔɓa sɔɔkɛr ɓɛɛlɛtik kɛnɔ kɛɛɗɛɛ ɓokootɛɛ sɛɛg a sɛɛn agut omoŋ. 33Saaɓa mɛlɛrɗi soona riyɛ kɛ Kɛraniyook, nɛɓa laalawar Yeeseeŋ. Laalawarɓa ɓɔrɛ joop a pɛɛy sigɛɓa sɔɔkɛr ɓɛɛlɛtik, om ɗiɗikakɛ gɛɛnɛk, ma om kantunakɛ gɛɛnɛk. 34Nɛɓa Yeese tonu kɛ, "Iin Baabɛɛ, toŋoɗar sɛɛge, agut sinɔ kir ɗegerɔɔn any sinɛ ijaagirk." Nɛɓa sɛɛk kaakasar abii nɛɛk itake.

35Ɛtɛrɓa joop sigɛ ɓɔɔkaak nɛ mermenarŋ, daraayɛrɓa ɔɗɔwer gɛɛnɛ kɛ, "Ebɔdɛ joop ɔgɔ. Ɔkɔnɓɔ sɛɛn Keresee sinɛɓa daam Waakoyotuk, intɔ ebɔdɛ ɛɛk nɛɛk."

36Widerkiɓa ɛɛk amaasiniyɛɛk nɛ daraayɛrŋ. Gaɓɛrgeeɗɓa ogool wɛynik sigɔ kowɛrŋɔŋk. 37Nɛ tonurgeeɗ kɛ, "Ɔkɔn iin Tapaɗ Ayuuduk, ebɔdutɔ ɛɛk nook."

38Lakɛɓa aɗoy nɛɛkɛ rakaay taapiyɛ sigɔ tonur kɛ, "Ege sini Tapaɗ Ayuuduk."

Laalawɛɛ Joop A pɛɛy Sigɛɓa Sɔɔkɛr Ɓɛɛlɛtik

(Maa. 27:38-42; Mar. 15:27-32)

39Joop sigɛɓa sɔɔkɛr ɓɛɛlɛtik sigɛɓa laalawɛɛ sɛɛg a Yeesee agut omoŋɔŋk nyɔɔnɓa sɛɛn omaay kɛ, "Moko iin Keresee? Ebɔdutɔ ɛɛk nook a eteŋk."

40Nɛɓa iɗi sinɛɓa sɔɔkɛ ɓɛɛlɛtik omaay koykoyɛ sɛɛn kɛ, "A dɛnin a ɓɔrɛ arkin goopan retoŋk, nɛ aasi kin tuɓur Waakoyo? 41Goopɛɛ eteŋk agut tikiyɛ sigɔkan ijaagiiŋɔŋk. Ege goopan naŋk liki, ma iɗit sini kɛɛ any sinɔkan tikek."

42Tonuɓa Yeeseya kɛ, "Iin Yeesee, koɓaakoyreeta saakoy guugunyɗun burɛya Nookaakik."

43Nɛɓa Yeese tongeeɗ kɛ, "Eekeer tona naaŋ, iinkɔɔ ɓenyse a eet Gɛnɛte."

Rɛr Yeesee

(Maa. 27:45-56; Mar. 15:33-41; Yow. 19:28-30)

44Arɓa ɔɔtɛ nɛɛkɛ sayitiyɛɛkɛ sigɔɔgɛ tula omk, nɔ mɛlɛɛɗa sayitiyɛɛka sigɔɔga tula aŋank ɓɛɛlɛɛɓa ɗook raŋ baŋɛ a nyuugur. 45Miinyɗiiɓa pɛɗɛrka waawuyoŋkuŋ. Abii sinɛɓa biriitɛɛ Godeey sinaanɛ Geetitank pɔɔkiɗiɓa nɛ pakat ɛɛk a pɛɛy. 46Nɛɓa Yeese duriye a ɗooruŋ kɛ, "Iin Baabɛɛ! Gaɓana wɛɛŋa gaaŋk ariita!" tonuɓa oko sinɛk nɛ rɛrŋ.

47Ɔɗɔwen sinɛ amaasiniyɛɛkoŋk saaɓa dɛnɛɛɗ any sinik, nɛɓa pɔɔsɛ Waakoyo kɛ, "Iɗit sini mentankɔ taamɛkɛ Waakoyotoŋk eekeerɛ." 48Joop sigɛɓa tolɗiik nyonitaakɛ kɛnɔ dɛnɛr any sinik baŋɛ, saaɓa mermenarɗi any sinɛɓa ɓɛɛlɛkik, nɛɓa weeri a paaŋir kokomeer gɛŋk. 49Ma joop sigɛɓa ɗegerar Yeesee jɔkuk baŋɛ, a jartiyatɔk sigɛɓa nonomarɗi a tukiɗi Gɛlilaakeek, ɛtɛtɛɗarɓa a yowɛɛɗiŋ nɛ mermemenarki any sini.

Kɔɔwɛɛ Yeesee

(Maa. 27:57-61; Mar. 15:42-47; Yow. 19:38-42)

50Lakɛɓa iɗit om sinɔ riyɛ kɛ Yoosepuk. Sinɔɓa beeɗ Armaatiyaase katamɛɛ joop Ayuuduk. Sɛɛnɓa iɗit sinɔ mentanŋɔŋk ɛ mentan taamɛkɛ Waakoyotoŋkuk. Sɛɛnɓa ɓɔrɛ iɗit Ayuuduk sinɔ gaɓɛ woorank. 51Kiɓa sɛŋk kɔnyɗiit waasiyɛɛkɛ sigaagɛ toniiɗɛɛ Yeesee kɛnɔ ɓokotɛɛk. Sɛɛnɓa iɗit sinɔ kookor burɛ Waakoyotoŋk ŋaadiyɛɛkɛk. 52Iɗit sini wideerɓa ɛɛk son lak Pilatoosuk nɛ kalɛyiiɗ buusɛ Yeeseek kɛnɔ gageeɗ. 53Nɛɓa woorku buusɛ nɛɛk laalawutant nɛɛkɛ nɛ ɓuwu abiye sinɔɔnɛ kɛwukɛwuŋɔŋk. Nɛɓa riiɓe kaakaak nɛɛkɛk sinɔɔnɛ kɛɛ iɗit sinɔɓa riiɓeeɗɛkik sinɔɔnɛɓa ragadɛɛ aɓa kɔɔwɛɛ talaaɗɛk. 54Egeɓa ɓɛɛnyɔ nɛɛkɛ sinɔ ragadiiɗɛɛ ɛɛk waawuya Sambatɛyoŋk Ayuuduk.

55Jartiyatɔk sigɛɓa kurak a Yeesee agut omoŋ Gɛlilaakeek nomɛrkiɗɓa nɛ dɛnɛr pii nɛɛk, nɛɓa mermenar kɛ riiɓɛɛkɔ buusɛ nɛɛk ɛk. 56Nɛɓa weeri nɛ kaar ragadir reyaay a diikuy agut buusɛ nɛɛk. Nɛɓa imiinyer waawuy Sambatɛyoŋk Ayuuduk oko sinɛɓa sekɛɛɗɛɛ higii Muuseek.

Currently Selected:

Lukaas 23: KSTM

Highlight

Copy