ራእዩ ለዮሐንስ 21

ምዕራፍ 21

በእንተ ሰማይ ሐዲስ ወምድር ሐዳስ

1 # 20፥11፤ ኢሳ. 65፥17፤ 2ጴጥ. 3፥13። ወእምዝ ርኢኩ ሰማየ ሐዲሰ ወምድረ ሐዳሰ እስመ ሰሰለ ሰማይ ቀዳማዊ ወምድርኒ ቀዳሚት ወባሕርኒ ተስዕረት እንከ። 2#ዕብ. 11፥10-16፤ 12፥22፤ ገላ. 4፥26። ወለሀገርኒ ቅድስት ሐዳስ ኢየሩሳሌም ርኢክዋ ወረደት እምሰማይ እምኀበ እግዚአብሔር ወድሉት ይእቲ ከመ መርዓት ሥርጉት ለምታ። 3#ሕዝ. 37፥27፤ 7፥17፤ ዘሌ. 26፥11-12፤ ዮሐ. 1፥14። ወሰማዕኩ ቃለ ዐቢየ እምሰማይ ዘይብል ናሁ ቅድሳቱ ለእግዚአብሔር ምስለ ዕጓለ እመሕያው ኀደረት ምስሌሆሙ እሙንቱኒ ይከውንዎ ሕዝቦ ወውእቱኒ ይከውኖሙ አምላኮሙ ወይሄሉ እግዚአብሔር ምስሌሆሙ። 4#7፥17፤ ኢሳ. 25፥8፤ 35፥10። ወያሴስል አንብዐ እምአዕይንቲሆሙ ወአልቦ እንከ ሞት ወኢላሕ ወኢገዐር ወኢሕማም አልቦ እንከ እስመ ኀለፈ ዘቀዳሚ ሥርዐት ወናሁ ተሐደሰ ኵሉ። 5#2ቆሮ. 5፥17-21። ወይቤ ዘይነብር ዲበ መንበሩ ናሁ እገብር ኵሎ ሐዲሰ ወይቤለኒ ጸሐፍ እስመ ዝንቱ ቃል እሙን ዘበጽድቅ ይከውን። 6#1፥8። አነ ውእቱ አልፋ ወኦ ወአነ ቀዳማዊ ወአነ ደኃራዊ ወአንሰ ለዘጸምዐ እሁቦ ይስተይ እምነቅዐ ማየ ሕይወት በከንቱ። 7#20፥14፤ ዘካ. 8፥8። ወዘሰ ሞአ ይወርሶ ለዝንቱ ወእከውኖ ሎቱ አምላከ ወውእቱኒ ይከውነኒ ወልደ። 8#22፥15፤ ዕብ. 10፥38-39። ወእለሰ ይፈርህዎ እንዘ ኢየአምኑ ወያጌምኑ ሥጋሆሙ ወይቀትሉ ወይዜምዉ ወይገብሩ ሥራየ ወያመልኩ አማልክተ ወኵሎ ሐሰተ ይከውን ምንዳቤሆሙ ገሃነም ዘእሳት ወተይ ወዝንቱ ውእቱ ዳግም ሞት።

በእንተ ሐዳስ ሀገር

9 # 15፥1፤ 19፥7። ወመጽአ አሐዱ እምነ እልክቱ ሰብዐቱ መላእክት እለ ይጸውሩ ሰብዐተ ጽዋዓተ እለ ምሉኣን ሰብዐተ መቅሠፍታተ ደኃርያተ ወተናገረ ምስሌየ ወይቤለኒ ነዓ አርኢከሃ ለመርዓት ለብእሲተ በግዑ። 10#ሕዝ. 40፥20። ወወሰደኒ መንፈስ ውስተ ደብር ዐባይ ወነዋኅ ወአርአየኒሃ ለሀገር ቅድስት ኢየሩሳሌም እንተ ትወርድ እምሰማይ እምኀበ እግዚአብሔር። 11#ሕዝ. 48፥35። ወስብሐተ እግዚአብሔር ላዕሌሃ ወከዋክብቲሃኒ ይመስሉ ከመ ዕንቍ ክቡር ወጽዕዱት ይእቲ ከመ ባሕርይ። 12#ሕዝ. 48፥31-34። ወዐባይ አረፍታ ወነዋኅ ጥቅማ ወባቲ ዐሠርቱ ወክልኤቱ አናቅጽ ወውስተ አናቅጺሃ ዐሠርቱ ወክልኤቱ መላእክት ወጽሑፋን አስማት ዘዐሠርቱ ወክልኤቱ ሕዝበ እስራኤል። 13ወውስተ አናቅጽ ጽባሓውያን ሠለስቱ ወውስተ አናቅጽ ዐረባውያን ሠለስቱ ወውስተ አናቅጽ ሰሜናውያን ሠለስቱ ወውስተ አናቅጽ ደቡባውያን ሠለስቱ። 14#ኤፌ. 2፥20። ወዐሠርቱ ወክልኤቱ መሠረታቲሃ ለአረፍተ ሀገራ ወጽሑፍ ውስቴቶን አስማተ ዐሠርቱ ወክልኤቱ ሐዋርያተ በግዑ። 15#ሕዝ. 40፥3፤ 11፥1። ወዝክቱ ዘይትናገር ምስሌየ ይጸውር ኅለተ ወርቅ በዘቦቱ ይሜጥና ለይእቲ ሀገር ወለአናቅጺሃ ወለአረፋቲሃ። 16#ሕዝ. 48፥16-17። ወርብዕት ይእቲ ሀገር በአምጣነ ኑኃ ወግድማ ወመጠና ለይእቲ ሀገር በውእቱ ኅለት ወኮነ አምጣኒሃ ዐሠርተ ወክልኤተ ምእተ ኑኃ ወግድማ ወቆማኒ ዕሩይ። 17ወእምዝ መጠነ አረፋቲሃ ምእት ወአርብዓ ወአርባዕቱ በእመተ ሰብእ ዘውእቱ አሐዱ በእመተ መልአክ። 18ወውስተ ርእሰ አረፍታ ለይእቲ ሀገር በዕንቈ ኢያሰጲድ ወበያክንት ወበመረግድ ወትመስል ሀገራ ከመ ዘበወርቅ ንጹሕ ግብረታ። 19#ኢሳ. 54፥11-12። ወመሠረተ አረፍተ ሀገራ ከመ ማህው ጸዓዳ ሥርጉት በኵሉ ዕንቍ ክቡር ወቀዳሚት መሠረት በኢያሰጲድ ወካልእት በሰንፔር ወሣልስት በኬልቄዶን ወራብዕት በዘመረግድ። 20ወኃምስት በሰርዶንክስ ወሳድስት በሰርድዮን ወሳብዕት በክርስቲሎቤ ወሳምንት በቢረሌ ወታስዕት በወራውሬ ወዓሥርት በክርስጵራስስ ወእንተ ዐሥሩ ወአሐቲ በያክንት ወእንተ ዐሥሩ ወክልኤ በአሜቴስጢኖስ። 21#22፥2። ወዴዴያቲሃኒ ዐሥሩ ወክልኤ በዐሥሩ ወክልኤ ባሕርይ ወለለአሐቲ ዴዴ አሐቲ ባሕርይ ወጽጐ ሀገራ ከመ ወርቅ ንጹሕ ወያጸድል እንተ ውስጣ ከመ ማህው። 22#ዮሐ. 4፥21-33። ወኢርኢኩ ጽርሐ እንተ ከማሃ እስመ እግዚአብሔር ዘኵሎ ይመልክ ውእቱ ጽርሓ#ቦ ዘይቤ «ውስተ ጽርሐ መቅደሱ» ወበግዑ። 23#22፥5፤ ኢሳ. 24፥23፤ 8፥19-20። ወሀገራሰ ኢትፈቅድ ፀሓየ ወኢወርኀ ከመ ያብርሁ ላቲ እስመ ብርሃነ እግዚአብሔር ያበርህ ላቲ ወማኅቶታ ውእቱ በግዑ። 24#ኢሳ. 8፥3። ወየሐውሩ አሕዛብ በብርሃነ ዚኣሃ ወነገሥተ ምድርኒ ያመጽኡ ክብሮሙ ውስቴታ። 25#ኢሳ. 8፥11፤ 22፥5። ወኢይትዐጸዉ አናቅጺሃ መዐልተ ወሌሊተ እስመ አልባቲ ሌሊት። 26ወአሕዛብኒ ያመጽኡ ክብሮሙ ወስብሐቲሆሙ ውስቴታ። 27#ኢሳ. 52፥1፤ 21፥15፤ ፊልጵ. 4፥3። ወኢይበውእ ውስቴታ ኵሉ ዘርኩስ ወዘይገብር ግማኔ ወሐሰተ ወዘኢኮነ ጽሑፈ ውስተ መጽሐፈ ሕይወት ዘበግዑ።

Currently Selected:

ራእዩ ለዮሐንስ 21: ሐኪግ

Highlight

Copy