ራእዩ ለዮሐንስ 20

ምዕራፍ 20

ዘከመ ተሞቅሐ ሰይጣን

1 # 12፥9፤ ይሁዳ 6። ወእምዝ ወረደ ካልእ መልአክ እምሰማይ ወይጸውር መራኁተ ፀሓይ ወዐበይት መዋቅሕት ውስተ እዴሁ። 2ወአኀዞ ለዝክቱ አርዌ ዘውእቱ ቀዳማዊ ወውእቱ ጋኔን ሰይጣን ወአሰሮ ዐሠርተ ምእተ ዓመተ። 3#2ተሰ. 2፥9-10። ወአውደቆ ውስተ ማዕምቅ ወዐጸወ ላዕሌሁ በማኅተም ከመ ኢያስሕት አሕዛበ እስከ አመ ይትፌጸም ዝንቱ ዐሠርቱ ምእት ዓመት ወእምድኅረ ዝንቱ ሀለዎ ይትፈታሕ ኅዳጠ መዋዕለ። 4#ዳን. 7፥9-13። ወእምዝ ርኢኩ መናብርተ ወነበረ ላዕሌሆሙ ወልደ ዕጓለ እመሕያው ወአግብአ ሎሙ ፍትሐ በእንተ ነፍሶሙ ለእለ ተቀትሉ በእንተ ስሙ ለኢየሱስ ወበእንተ ቃለ እግዚአብሔር ወእለሰ ኢሰገዱ ለዝክቱ አርዌ ወኢለምስሉ ወኢጸሐፉ ትእምርቶ ውስተ ፍጽሞሙ ወኢውስተ እደዊሆሙ እሙንቱ የሐይዉ ወይነግሡ ምስለ ክርስቶስ ዐሠርተ ምእተ ዓመተ። 5#ዮሐ. 5፥25-27፤ 17፥3፤ 5፥10። ወባዕዳንሰ ምዉታን ኢይትነሥኡ እስከ አመ ይትፌጸም ዝንቱ ዐሠርቱ ምእት ዓመት። 6#21፥8፤ ኢሳ. 61፥6። ወዛቲ ይእቲ ቀዳሚት ሕይወት ብፁዕ ወቅዱስ ውእቱ ዘረከበ ክፍለ በትንሣኤ እንተ ትቀድም መጺአ እስመ አልቦ እንከ ዳግመ ሥልጣነ ሞት ላዕለ እሉ እስመ ይከውኑ ካህናቲሁ ለእግዚአብሔር ወለክርስቶስ ወይነግሡ ምስሌሁ ዐሠርተ ምእተ ዓመተ። 7ወሶበ ኀልቀ ዐሠርቱ ምእት ዓመት ይትፈታሕ ሰይጣን እምነ ሞቅሑ። 8#ሕዝ. 38፥1-22። ወይወፅእ ያስሕቶሙ ለአሕዛብ እለ ውስተ አርባዕቱ መኣዝኒሃ ለምድር ወያስተጋብኦሙ ለጎግ ወለማጎግ ከመ ያስተቃትሎሙ ወኍልቆሙሰ ከመ ኆፃ ባሕር። 9#ሕዝ. 38፥9፤ 39፥6፤ 1ነገ. 18፥38። ወዐርጉ ውስተ ስፍሓ ለምድር ወዐገትዋ ለትዕይንቶሙ ለቅዱሳን ወለሀገር ቅድስት ወእምዝ ወረደት እሳት እምሰማይ እምኀበ እግዚአብሔር ወበልዐቶሙ። 10ወለዝክቱኒ ሰይጣን ዘያስሕቶሙ ወደይዎ ውስተ ዐዘቅተ እሳት ወተይ ኀበ ሀሎ ዝክቱ አርዌ ወሐሳዌ ነቢይ ከመ ይደየኑ መዐልተ ወሌሊተ እስከ ለዓለመ ዓለም።

በእንተ ፍጻሜ ፍትሕ

11 # መዝ. 101፥26፤ ማቴ. 25፥31-40፤ 2ጴጥ. 3፥7-12። ወእምዝ ርኢኩ መንበረ ዐቢየ ወጸዓዳ ወእምዘ ይነብር ዲቤሁ ጐዩ እምቅድመ ገጹ ሰማይ ወምድር ወኀጥኡ መካነ። 12#3፥5፤ ዳን. 7፥10-22፤ ፊልጵ. 4፥3፤ ማቴ. 16፥27። ወእምዝ መጽኡ ኵሎሙ ምዉታን ዐቢያን ወንኡሳን ወቆሙ ቅድመ መንበሩ ወከሠቱ ኵሎ መጻሕፍተ ወለመጽሐፈ ሕይወትሰ እንተ ባሕቲታ ከሠትዋ ወተኰነኑ እልክቱ ምዉታን በከመ ጽሑፍ ውስተ ዝንቱ መጽሐፍ በከመ ገብሩ። 13#ዮሐ. 5፥28-29። ወአግብአት ባሕርኒ ኵሎ ምዉታነ እለ ውስቴታ ወአግብኡ ሲኦል ወሞት ዘኀቤሆሙ ምዉታነ ወአግብአት ምድርኒ እለ ሀለዉ ውስቴታ ምዉታነ ወተኰነኑ ኵሎሙ በከመ ምግባሮሙ። 14#1ቆሮ. 15፥26። ወወደይዎሙ ለሲኦል ወለሞት ውስተ ዐዘቅተ እሳት ዘምልእት ተየ ወሞትሰ ዳግም ገሃነም ዘእሳት ውእቱ። 15#19፥20፤ ማቴ. 25፥41። ወለኵሉ ዘኢይትረከብ ጽሑፈ ውስተ መጽሐፈ ሕይወት ይወድይዎ ውስተ ገሃነም ዘእሳት።

Currently Selected:

ራእዩ ለዮሐንስ 20: ሐኪግ

Highlight

Copy