ራእዩ ለዮሐንስ 22

ምዕራፍ 22

በእንተ ፈለገ ሕይወት ወዕፀ ሕይወት

1 # ዘካ. 14፥8፤ ሕዝ. 47፥1። ወአርአየኒ ፈለገ ዘማየ ሕይወት ጸዐዳ ከመ በረድ ወይወፅእ እምነ መንበሩ ለእግዚአብሔር ወሥልጣነ በግዑ። 2#21፥21፤ ዘፍ. 2፥9፤ ሕዝ. 47፥12። ወይውኅዝ ውስተ ማእከለ መርሕባ ወእምለፌኒ ውእቱ ፈለግ ወእምከሓሁኒ ዕፀ ሕይወት ወይገብር ፍሬ ዐሠርተ ወክልኤተ ለለአሐዱ ወርኅ ወቈጽለ ዕፁኒ ፈውስ ለሕይወተ አሕዛብ። 3#ዘካ. 14፥11። ወአልቦ እንከ ርኩስ ወኢምንትኒ ወሀለወ ውስቴታ መንበረ እግዚአብሔር ወበግዑ ወኢይከውን መዓት ላዕለ አግብርቲሁ ለእግዚአብሔር እለ ያመልክዎ። 4#3፥12፤ 14፥1፤ ማቴ. 5፥8፤ 1ዮሐ. 3፥2። ወይሬእዩ ገጾ ወስሙ ውስተ ፍጽሞሙ። 5#ዳን. 7፥18-27። ወአልቦ እንከ ሌሊት ወኢይፈቅዱ ብርሃነ ማኅቶት ወኢብርሃነ ፀሓይ እስመ እግዚአብሔር ያበርህ ላዕሌሆሙ ወይነግሡ ለዓለመ ዓለም። 6#1፥1። ወይቤለኒ ዝክቱ ቃለ ጽድቅ ወመሃይምን እግዚእነ ወእግዚአብሔር አምላክነ ወመንፈሰ ነቢያት ዘፈነወ መልአኮ ከመ ያርእዮሙ ለአግብርቲሁ ዘሀለወ ይኩን ፍጡነ። 7#1፥3፤ 3፥11። ወናሁ እመጽእ ፍጡነ ወብፁዕ ዘየዐቅብ ቃለ ተነብዮቱ ለዝንቱ መጽሐፍ። 8#19፥10። ወአነ ዮሐንስ ዘርኢኩ ወዘሰማዕኩ ዘንተ ሰገድኩ ቅድመ እገሪሁ ለውእቱ መልአክ ዘአርአየንዮ ለዝንቱ። 9#ዳን. 12፥10። ወይቤለኒ ኢትስግድ ሊተ ዑቅ ዮጊ ገብረ አጋዕዝቲከ አነ ወዘአኀዊከ ነቢያት ወዘእለ የዐቅቡ ቃለ ዝንቱ መጽሐፍ። 10ወአንተሰ ለእግዚአብሔር ስግድ ወኢትኅትም ቃለ ተነብዮቱ ለዝንቱ መጽሐፍ እስመ በጽሐ ዘመኑ። 11ወለዘገፍዐኒ ይገፍዕዎ እንከ ወለዘረስሐኒ ያረስሕዎ እንከ ወጻድቅ ለይጽደቅ ወንጹሕኒ ለይንጻሕ። 12#3፥11፤ ኢሳ. 40፥10፤ ሮሜ 2፥6-12። ወናሁ እመጽእ ፍጡነ ወዕሴትየኒ ምስሌየ ውእቱ ከመ እፍድዮ ለለ አሐዱ ወእኰንኖ በከመ ምግባሩ። 13#1፥4-8፤17። አነ ውእቱ አልፋ ወኦ አነ ቀዳማዊ ወአነ ደኃራዊ ርእስ ወማኅለቅት። 14#3፥4፤ 7፥14፤ መዝ. 117፥20። ብፁዓን እለ አንጽሑ አልባሲሆሙ ከመ ይኩን ሥልጣኖሙ ላዕለ ዕፀ ሕይወት ወይበውእዋ እንተ አናቅጺሃ ለዛ ሀገር። 15#21፥8-27፤ 1ቆሮ. 6፥9-10። ወይወፅኡ አፍኣ ኀምስቱ አክላብ እለ ሥራይ ወዘማውያን ወቀታልያን ወእለ ያመልኩ ጣዖተ ወኵሎሙ እለ ያፈቅሩ ግብረ ሐሰት። 16#5፥5፤ 20፥1፤ ኢሳ. 11፥10፤ ማቴ. 1፥1፤ ሉቃ. 1፥78። አነ ኢየሱስ ፈነውኩ መልአክየ ያስምዕ ለክሙ ዘንተ ለአብያተ ክርስቲያናት አነ ውእቱ ሥርው ዘእምዘመደ ዳዊት ኮከበ ብርሃን ጽባሓዊ። 17#21፥6፤ ኢሳ. 55፤ ዮሐ. 7፥37፤ መዝ. 35፥8-9። ወመንፈስ ቅዱስ ዘመርዔት ይቤሉ ለይምጻእ ወዘጸምዐኒ ለይምጻእ ወዘይፈቅድ ለይንሣእ ማየ ሕይወት በከንቱ። 18#15፥6-8፤ ዘዳ. 4፥2። ወአነ ስምዑ ለኵሉ ዘይሰምዕ ቃለ ዝንቱ መጽሐፍ እመ ወሰከ ዲቤሁ ይዌስክ እግዚአብሔር ላዕሌሁ መቅሠፍተ ዘጽሑፍ ውስተ ዝንቱ መጽሐፍ። 19ወእመኒ አሰሰለ እምውስተ ቃለ ዝንቱ መጽሐፍ ያሴስል እግዚአብሔር ክፍሎ እምዕፀ ሕይወት ወእምነ ሀገር ቅድስት ዘጽሑፍ ውስተ ዝንቱ መጽሐፍ። 20ወይበል ዘሰምዐ ዘንተ እወ እመጽእ ፍጡነ አሜን ነዓ እግዚእየ ኢየሱስ። 21ጸጋሁ ለእግዚእነ ኢየሱስ ክርስቶስ ምስለ ኵልክሙ አሜን።

በዝየ ተፈጸመ ራእየ ዮሐንስ አቡቀለምሲስ ዘውእቱ ብሂል ዘርእየ በሕይወቱ ራእየ።

ወስብሐት ለእግዚአብሔር አሜን።

Currently Selected:

ራእዩ ለዮሐንስ 22: ሐኪግ

Highlight

Copy