ወንጌል ዘማርቆስ 5

ምዕራፍ 5

በእንተ ሌጌዎን

1 # ማቴ. 8፥28-34፤ ሉቃ. 8፥26-40። ወበጺሖሙ ማዕዶተ ባሕር ኀበ ብሔረ ጌርጌሴኖን። 2ወወሪዶ እምሐመር ተቀበሎ ሶቤሃ ብእሲ ዘእኩይ ጋኔን ላዕሌሁ ወፂኦ እመቃብር። 3ወይነብር ውስተ መቃብር ወስእንዎ አጽንዖቶ በመዋቅሕትኒ። 4ወእንዘ ዘልፈ ይሞቅሕዎ አልቦ ዘይክል አድክሞቶ እስመ መዋቅሕተኒ ይሰብር ወሰናስለኒ ይቀጠቅጥ ወየዐቅብዎ ደቅ።#ቦ ዘኢይጽሕፍ «ወየዐቅብዎ ደቅ» 5ወዘልፈ የዐወዩ መዓልተ ወሌሊተ በውስተ መቃብር ወበውስተ አድባር ወይጌምድ ሥጋሁ በእብን። 6ወሶበ ርእዮ ለእግዚእ ኢየሱስ እምርኁቅ ሮጸ ወሰገደ ሎቱ። 7#3፥11፤ ማቴ. 8፥29። ወጸርሐ በዐቢይ ቃል ወይቤ ምንት ብየ ምስሌከ ኢየሱስ ወልደ እግዚአብሔር ልዑል አምሕለከ በእግዚአብሔር ከመ ኢትሣቅየኒ። 8እስመ ይቤሎ ለውእቱ ጋኔን እኩይ ፃእ እምላዕሌሁ። 9ወተስእሎ እግዚእ ኢየሱስ ወይቤሎ መኑ ስምከ ወይቤሎ ውእቱ ጋኔን ሌጌዎን ስምየ እስመ ብዙኃን ንሕነ። 10ወአስተብቍዖ ብዙኀ ከመ ኢይስድዶ አፍኣ እምብሔር። 11ወቦ ህየ መራዕየ አሕርው ብዙኅ ይትረዐይ መንገለ ደብር። 12ወአስተብቍዕዎ እሉ አጋንንት ብዙኀ ወይቤልዎ ፈንወነ ውስተ አሕርው ከመ ንባእ ላዕሌሆሙ። 13ወአብሖሙ እግዚእ ኢየሱስ ወወፂኦሙ እሙንቱ አጋንንት ቦኡ ላዕለ አሕርው ወአብዱ እሙንቱ መራዕይ ወጸድፉ ውስተ ባሕር ወኮኑ መጠነ ዕሥራ ምእት ወሞቱ በውስተ ባሕር። 14ወጐዩ ኖሎት ወዜነዉ ለአህጉር ወለአዕጻዳት ወወፅኡ ይርአዩ ዘኮነ። 15ወመጽኡ ኀበ እግዚእ ኢየሱስ ወረከብዎ ለዘጋኔን አኀዞ እንዘ ይነብር ዳኅነ ወልቡሂ ገብኦ ወልቡሰ ልብሶ ዝኩ ዘአኀዞ ሌጌዎን ወፈርሁ። 16ወዜነውዎሙ እለ ርእዩ ዘከመ ኮነ ዘጋኔን ወዘበእንተ አሕርው። 17ወአኀዙ ያስተብቍዕዎ ከመ ይፃእ እምደወሎሙ። 18ወዐሪጎ ሐመረ አስተብቍዖ ውእቱ ዘጋኔን ይሑር ምስሌሁ። 19ወከልኦ እግዚእ ኢየሱስ ወይቤሎ ሑር ቤተከ ኀበ እሊኣከ ወንግር ኵሎ ዘገብረ ለከ እግዚአብሔር ወዘከመ ተሣሀለከ። 20ወሖረ ወአኀዘ ይስብክ በዐሥሩ አህጉር ኵሎ ዘገብረ ሎቱ እግዚእ ኢየሱስ ወአንከሩ ኵሎሙ። 21ወካዕበ ዐደወ እግዚእ ኢየሱስ በሐመር ማዕዶተ ወተጋብኡ ብዙኅ ሰብእ ኀቤሁ በኀበ ሐይቀ ባሕር።

በእንተ ወለተ መጋቤ ምኵራብ

22 # ማቴ. 9፥18-26፤ ሉቃ. 8፥41-56። ወመጽአ ኀቤሁ አሐዱ ብእሲ መጋቤ ምኵራብ ዘስሙ ኢያኢሮስ ወርእዮ ሰገደ ሎቱ ታሕተ እገሪሁ። 23#7፥32። ወብዙኀ አስተብቍዖ ወይቤ ወለትየ አልጸቀት ትሙት ወባሕቱ ነዓ ደይ እዴከ ላዕሌሃ ወተሐዩ። 24ወሖረ ምስሌሁ ወተለውዎ ብዙኃን ሰብእ ወተጋፍዕዎ።

በእንተ እንተ ይውኅዛ ደም

25ወመጽአት ብእሲት እንተ ደም ይውኅዛ እምዐሠርቱ ወክልኤቱ ክረምት። 26ወብዙኀ አሕመምዋ ብዙኃን ዐቀብተ ሥራይ ወአስተዋፅአት ኵሎ ንዋያ ወአኅለቅት ወአልቦ ዘበቍዓ ዘእንበለ ዳእሙ ዘአልሐማ ፈድፋደ። 27ወሰሚዓ በእንተ እግዚእ ኢየሱስ መጽአት ወቦአት ማእከለ ሰብእ ወገሠሠት ጽንፈ ልብሱ በድኅሬሁ። 28#ሉቃ. 6፥19። እንዘ ትብል እምከመ ገሠሥኩ ጽንፈ ልብሱ አሐዩ። 29ወሶቤሃ ነጽፈ ነቅዐ ደማ ወአንከረት#ቦ ዘይቤ «ወአእመረት» ርእሳ ከመ ሐይወት እምደዌሃ። 30#ሉቃ. 8፥45። ወአእመረ እግዚእ ኢየሱስ ሶቤሃ ከመ ወፅአ ኀይል እምኔሁ ወተመዪጦ ኀበ ሰብእ ይቤሎሙ መኑ ገሠሠኒ ጽንፈ ልብስየ። 31ወይቤልዎ አርዳኢሁ ትሬኢ ሰብእ እንዘ ይትጋፍዐከ ወትብል መኑ ገሠሠኒ። 32ወተመይጠ ከመ ይርአይ ዘገብረ ዘንተ። 33ወፈርሀት ይእቲ ብእሲት ወርዕደት ጥቀ እስመ አእመረት ዘኮነ ላዕሌሃ ወመጽአት ኀበ እግዚእ ኢየሱስ ወሰገደት ሎቱ ወነገረቶ ኵሎ ጽድቀ። 34ወይቤላ ወለትየ ሃይማኖትኪ አሕየወተኪ እትዊ በሰላም ወሕየዊ እምደዌኪ። 35ወእንዘ ይትናገር ምስሌሃ መጽኡ ሰብእ ኀበ መጋቤ ምኵራብ ወይቤልዎ ወለትከሰ ሞተት ወኢታጻምዎ እንከ ለሊቅ። 36ወሰሚዖ እግዚእ ኢየሱስ እንዘ ይትናገርዎ ይቤሎ ለመጋቤ ምኵራብ ኢትፍራህ ተአመን ዳእሙ። 37ወከልአ ከመ አልቦ ዘይተልዎ ዘእንበለ ጴጥሮስ ወያዕቆብ ወዮሐንስ እኍሁ ለያዕቆብ። 38ወቦአ ቤቶ ለመጋቤ ምኵራብ ወረከቦሙ እንዘ ይትሀወኩ ወይበክዩ ወየዐወይዉ ብዙኀ። 39#ዮሐ. 11፥11። ወቦአ ወይቤሎሙ ለምንት ትትሀወኩ ወትበክዩ ሕፃንሰ ኢሞተት አላ ትነውም። 40ወሰሐቅዎ ወእምዝ ሰደደ ኵሎ ወነሥኦሙ ለአቡሃ ወለእማ ለሕፃን ወእለ ምስሌሆሙ ወቦአ ኀበ ሀለወት ሕፃን። 41#ሉቃ. 7፥14። ወአኀዛ እዴሃ ለሕፃን ወይቤላ ጣቢታ ቁሚ ተንሥኢ ወለትየ ብሂል በትርጓሜሁ። 42ወተንሥአት ሶቤሃ ይእቲ ወለት ወአንሶሰወት ወዐሠርቱ ወክልኤቱ ክረምታ ወደንገፁ ሶቤሃ ዐቢየ ድንጋፄ። 43ወገሠጾሙ ለአቡሃ ወለእማ ብዙኀ ከመ አልቦ ዘየአምር ዘንተ ወአዘዘ የሀብዋ ዘትበልዕ።

Currently Selected:

ወንጌል ዘማርቆስ 5: ሐኪግ

Highlight

Copy