ወንጌል ዘማርቆስ 6

ምዕራፍ 6

ዘከመ ሰበከ እግዚእ ኢየሱስ በናዝሬት

1 # ማቴ. 13፥53-58፤ ሉቃ. 4፥15-30። ወወፂኦ እምህየ ቦአ ሀገሮ ወተለውዎ አርዳኢሁ። 2#ማቴ. 7፥28፤ ዮሐ. 7፥15። ወበሰንበት መሀሮሙ በምኵራብ ወብዙኃን ያጸምዕዎ ወያነክሩ እንዘ ይብሉ እምአይቴ ሎቱ ዝንቱ ኵሉ ወምንትኑ ዛቲ ጥበብ እንተ ተውህበት ሎቱ ወዝኒ ኀይል ዘይትገበር በእደዊሁ። 3አኮኑ ዝንቱ ውእቱ ወልዱ ለጸራቢ#ቦ ዘይቤ «አኮኑ ውእቱ ዝንቱ ጸራቢ» ወልደ ማርያም ወአኀዊሁኒ ያዕቆብ ወዮሳ ወይሁዳ ወስምዖን ወአኮኑ አኃቲሁኒ ሀለዋ ዝየ ኀቤነ ወተዐቅፉ በእንቲኣሁ። 4ወይቤሎሙ እግዚእ ኢየሱስ ኢኮነ ምኑነ ነቢይ ዘእንበለ በሀገሩ ወበቤቱ ወበኀበ አዝማዲሁ። 5ወኢገብረ ኀይለ#ቦ ዘይቤ «ወኢተክህሎ ገቢረ ኀይል ...» በህየ ዘእንበለ ኅዳጣን ድዉያን እለ አንበረ እዴሁ ዲቤሆሙ ወአሕየዎሙ። 6ወአንከረ ኢአሚኖቶሙ ወአንሶሰወ ውስተ አህጉረ አድያም እንዘ ይሜህር።

ዘከመ ፈነዎሙ ለሐዋርያት ይስብኩ

7 # ማቴ. 10፥1-9፤ ሉቃ. 9፥1-7። ወጸውዖሙ ለዐሠርቱ ወክልኤቱ ሐዋርያት ወፈነዎሙ በበ ክልኤቱ ወአብሖሙ ላዕለ አጋንንት እኩያን። 8ወአዘዞሙ ከመ አልቦ ዘይሰንቁ ለፍኖት ወኢይንሥኡ ዘእንበለ በትር ባሕቲታ ወኢኅብስተ ወኢጽፍነተ ወኢጸሪቀ ውስተ ቅናቶሙ 9ዘእንበለ አሣእን ዘውስተ እገሪሆሙ ወኢይልበሱ ክልኤ ክዳናተ። 10ወይቤሎሙ ቤተ ኀበ ቦእክሙ ህየ ንበሩ እስከ አመ ትወፅኡ እምህየ። 11#ማቴ. 10፥14-15። ወብሔረ ኀበ ኢተወክፉክሙ ወኢሰምዑክሙ ወፂአክሙ እምህየ ንግፉ ጸበለ እገሪክሙ ከመ ይኩን ስምዐ ላዕሌሆሙ አማን እብለክሙ ከመ ይረክባ ሣኅተ ሰዶም ወገሞራ አመ ዕለተ ደይን ፈድፋደ እምይእቲ ሀገር። 12ወወፂኦሙ ሰበኩ ከመ ኵሉ ይነስሑ። 13#ያዕ. 5፥14። ወብዙኃነ አጋንንተ ያወፅኡ ወይቀብዕዎሙ ቅብዐ ለብዙኃን ድዉያን ወየሐይዉ።

በእንተ ዮሐንስ መጥምቅ ወሄሮድስ

14 # ማቴ. 14፥1-12። ወሰምዐ ሄሮድስ ንጉሥ እስመ ክሡተ ኮነ ስሙ ወይቤ ዮሐንስ መጥምቅ ተንሥአ እምዉታን ወበእንተዝ ይረድኦ ኀይል። 15#ሉቃ. 9፥7-9። ወቦ እለ ይቤሉ ኤልያስ ውእቱ ወቦ እለ ይቤሉ ነቢይ ውእቱ ወቦ እለ ይቤሉ ከመ አሐዱ እምነቢያት። 16ወሰሚዖ ሄሮድስ ይቤ ዮሐንስ ውእቱ ዘአነ መተርኩ ርእሶ ውእቱ ተንሥአ እምዉታን። 17እስመ ውእቱ ሄሮድስ ፈነወ አግብርቲሁ ወአኀዞ ለዮሐንስ ወሞቅሖ በእንተ ሄሮድያዳ ብእሲተ ፊልጶስ እኁሁ እስመ ኪያሃ አውሰበ። 18#ዘሌ. 18፥16፤ 20፥21። እስመ ይቤሎ ዮሐንስ ለሄሮድስ ኢይከውነከ ታውስብ ብእሲተ እኁከ። 19ወተቀየመቶ ሄሮድያዳ ወፈቀደት ታቅትሎ ወስእነት። 20ወኮነ ይፈርሆ ሄሮድስ ለዮሐንስ እስመ የአምር ከመ ብእሲ ጻድቅ ወቅዱስ ውእቱ ወይትዐቀቦ ወብዙኀ ይሰምዕ በኀቤሁ#ቦ ዘይዌስክ «ወይፈቅድ ይርአይ ተአምረ ዘይገብር» ወያስተሐውዝ ወይፈቅድ ይስምዖ። 21ወኮነት ዕለት አመ ይገብር ሄሮድስ በዓለ ዘዕለተ ተወልደ ወአምስሐ መኳንንቲሁ ወመላእክቲሁ ወመሳፍንቲሁ ወመገብቶ ወዐበይተ ሀገረ ገሊላ። 22ወቦአት ወለተ ሄሮድያዳ ወዘፈነት ሎቱ ወአሥመረቶ ለሄሮድስ ወለእለ ይረፍቁ ምስሌሁ ወይቤላ ንጉሥ ለይእቲ ወለት ሰአልኒ ዘትፈቅዲ ወእሁበኪ። 23#አስ. 5፥3-8። ወመሐለ ላቲ ከመ የሀባ ዘሰአለቶ እስከ መንፈቀ መንግሥቱ። 24ወወፅአት ወትቤላ ለእማ ምንተ እስአሎ ወትቤላ ርእሶ ለዮሐንስ መጥምቅ። 25ወቦአት ሶቤሃ ኀበ ንጉሥ እንዘ ትጔጕእ ወሰአለቶ ወትቤሎ እፈቅድ ይእዜ ተሀበኒ ርእሶ ለዮሐንስ መጥምቅ በጻሕል። 26ወተከዘ ንጉሥ በእንተ መሐላሁ ወበእንተሂ እለ ይረፍቁ ምስሌሁ ወኢፈቀደ ይእበያ። 27ወፈነወ ንጉሥ ሶቤሃ መስተራትዓተ ሐራ ወአዘዘ ያምጽኡ ርእሶ። 28ወሖሩ ወመተሩ ርእሶ ለዮሐንስ በቤተ ሞቅሕ ወአምጽኡ ርእሶ በጻሕል ወወሀብዋ ለይእቲ ወለት ወይእቲኒ ወለት ወሀበት ለእማ። 29ወሰሚዖሙ አርዳኢሁ ሖሩ ወነሥኡ በድኖ ለዮሐንስ ወቀበርዎ።

ዘከመ ተመይጡ ሐዋርያት ኀበ እግዚእ ኢየሱስ

30 # ሉቃ. 9፥10። ወተጋብኡ ሐዋርያት ኀበ እግዚእ ኢየሱስ ወነገርዎ ኵሎ ዘገብሩ ወዘከመ መሀሩ። 31ወይቤሎሙ ንዑ ንፃእ ገዳመ ባሕቲተነ ወታዕርፉ ሕቀ እስመ ብዙኃን እለ የሐውሩ ወይመጽኡ ወኢያበውሕዎሙ ይብልዑ እክለ እስመ ኢያስተርከቡ። 32#ሉቃ. 10፥17-20። ወሖሩ ሐቅለ በሐመር ባሕቲቶሙ። 33ወርእይዎሙ እንዘ የሐውሩ ወአእመርዎሙ ብዙኃን ወሖሩ እንተ እግር ኀቤሁ እምኵሉ አህጉር ወተቃደምዎሙ ወመጽኡ ኀቤሁ።

በእንተ ኀምስ ኅብስት ወክልኤቲ ዓሣት

34 # ማቴ. 9፥36። ወወፂኦ እግዚእ ኢየሱስ ርእየ ብዙኃነ ሰብአ ወምሕሮሙ እስመ ከመ አባግዕ ዘአልቦ ኖላዊ እሙንቱ ወአኀዘ ይምሀሮሙ ብዙኀ። 35#8፥1-10። ወእምድኅረ ብዙኅ ሰዓት መጽኡ አርዳኢሁ ወይቤልዎ ሐቅል ውእቱ ዝ ብሔር ወሰዓቱኒ ወድአ መስየ። 36#ማቴ. 14፥13-22፤ ሉቃ. 9፥11-17፤ ዮሐ. 6፥1-15። ሰዐር ሰብአ ይሑሩ ውስተ አህጉር ወአዕጻዳት ወይሣየጡ ሎሙ ሲሳየ እስመ አልቦሙ ዘይበልዑ። 37ወአውሥአ ወይቤሎሙ ሀብዎሙ አንትሙ ዘይበልዑ ወይቤልዎ ንሑርኑ ንሣየጥ በክልኤ ምእት ዲናር ኅብስተ ወነሀቦሙ ይብልዑ። 38ወይቤሎሙ ሑሩ ርእዩ ሚመጠን ኅብስት ብክሙ ወርእዮሙ ይቤልዎ ኀምስ ኅብስት ወክልኤቲ ዓሣት። 39ወአዘዞሙ ለኵሎሙ ይርፍቁ በበ ምርፋቃቲሆሙ ዲበ ሐመልማለ ሣዕር። 40ወረፈቁ በበ ምርፋቃቲሆሙ በበ ምእት ወበበ ኀምሳ። 41#7፥34። ወነሥኦን ለኀምስ ኅብስት ወለክልኤቲ ዓሣት ወነጸረ ሰማየ ወባረከ ወፈተተ ኅብስተ ወወሀቦሙ ለአርዳኢሁ ያቅርቡ ሎሙ ወከፈሎሙ ለኵሎሙ እምክልኤቲ ዓሣትኒ። 42ወበልዑ ኵሎሙ ወጸግቡ። 43ወዘአግኀሡ ዘተርፈ ፍተታት መልአ ዐሠርተ ወክልኤተ መሣይምተ ወእምዓሣሁኒ። 44ወእለሰ በልዕዎ ለውእቱ ኅብስት ዕደው ኀምሳ ምእት። 45#ማቴ. 14፥22-36፤ ዮሐ. 6፥15-21። ወአገበሮሙ ሶቤሃ ለአርዳኢሁ ወአዘዞሙ ይዕርጉ ሐመረ ወይቅድምዎ ማዕዶተ ቤተ ሳይዳ እስከ ሶበ ይስዕሮሙ ለሕዝብ። 46ወፈነዎሙ ወኀለፈ እምህየ ወዐርገ ደብረ ከመ ይጸሊ።

ዘከመ ሖረ እግዚእ ኢየሱስ ዲበ ባሕር

47ወመስዮ ብሔር ሀለወት ሐመር ማእከለ ባሕር ወውእቱሰ ባሕቲቱ ሀሎ ዲበ ምድር። 48ወርእዮሙ እንዘ የሐውሩ ወጥቀ ይትመነደቡ ወያሐምሞሙ ነፋስ እስመ እመንገለ ገጾሙ ውእቱ ወበራብዕት ሰዓተ ሌሊት መጽአ እግዚእ ኢየሱስ ኀቤሆሙ እንዘ የሐውር ዲበ ባሕር ወፈቀደ ይትዐደዎሙ። 49ወሶበ ርእይዎ እንዘ የሐውር ዲበ ባሕር መሰሎሙ ጋኔነ። 50ወኵሎሙ ርእይዎ ወደንገፁ ወዐውየዉ ወነበቦሙ ሶቤሃ ወይቤሎሙ ተአመኑ ከመ አነ ውእቱ ወኢትፍርሁ። 51#4፥39። ወዐርገ ኀቤሆሙ ውስተ ሐመር ወኀደገ ነፋስ ወፈድፋደ ተደሙ ወአንከርዎ። 52ወአመሂ ኅብስት ኢለበውዎ እስመ ጽሉል ልቦሙ። 53ወዐደዉ ወበጽሑ ምድረ ጌንሴሬጥ ወአርሰዩ ህየ ሐመሮሙ። 54ወወፂኦሙ እምሐመር አእመርዎ ሶቤሃ ሰብአ ይእቲ ሀገር። 55ወሮጹ ውስተ ኵሉ በሓውርት ወአምጽኡ ድዉያነ በዐራታት ወይወስዱ ኀበ ሰምዑ ከመ ሀሎ ውእቱ ህየ። 56#5፥27-28። ወውስተ አህጉር ወአዕጻዳት ወውስተ ምሥያጣት ኀበ ቦአ ያነብርዎሙ ለድዉያን ወያስተበቍዕዎ ከመ ይግሥሡ ጽንፈ ልብሱ ወኵሎሙ እለ ገሠሥዎ የሐይዉ።

Currently Selected:

ወንጌል ዘማርቆስ 6: ሐኪግ

Highlight

Copy