ወንጌል ዘማርቆስ 4

ምዕራፍ 4

1 # ማቴ. 13፥1-23፤ ሉቃ. 8፥4-15። ወአኀዘ ካዕበ ይምሀሮሙ ለአሕዛብ እንተ መንገለ ባሕር ወተጋብኡ ኀቤሁ ብዙኃን ሰብእ እስከ ሶበ የዐርግ ውስተ ሐመር ወይነብር ውስተ ባሕር ወኵሉ ሰብእ ውስተ ምድር ይቀውሙ።

በእንተ ምሳሌ ዘርዕ

2ወመሀሮሙ ወመሰለ ሎሙ ብዙኀ ወይቤሎሙ እንዘ ይሜህሮሙ። 3ስምዑ ወፈረ ዘይዘርዕ ይዝራዕ። 4ወእንዘ ይዘርዕ ቦ ዘወድቀ ውስተ ፍኖት ወመጽኡ አዕዋፍ ወበልዕዎ። 5ወቦ ዘወድቀ ውስተ ኰኵሕ ኀበ አልቦ መሬት ብዙኅ ወፍጡነ በቈለ እስመ አልቦ ዕመቅ ለመሬቱ። 6ወሠሪቆ ፀሓይ አውዐዮ እስመ ኢኮነ ዕሙቀ መሬቱ ወአልቦ ሥርው ወየብሰ። 7ወቦ ዘወድቀ ውስተ ሦክ ወኀነቆ ሦክ ወኢፈረየ። 8ወቦ ዘወድቀ ውስተ ምድር ሠናይት ወበቈለ ወልህቀ ወፈረየ ወወሀበ ፍሬ ቦ ዘሠላሳ ወቦ ዘስሳ ወቦ ዘምእት። 9ወይቤ ዘቦ ዕዝን ሰሚዐ ለይስማዕ። 10ወሶበ ተባሕተወ ተስእልዎ እሊኣሁ ምስለ ዐሠርቱ ወክልኤቱ አርዳኢሁ ምሳሌሁ። 11ወይቤሎሙ ለክሙ ተውህበ ታእምሩ ምሥጢራ ለመንግሥተ እግዚአብሔር ወለእለሰ አፍኣ በምሳሌ ኵሉ ይከውኖሙ። 12#ኢሳ. 6፥9-10፤ ማቴ. 13፥14፤ ዮሐ. 12፥40፤ ግብረ ሐዋ. 28፥26። ከመ ርእየ ይርአዩ ወኢያእምሩ ወሰሚዐ ይስምዑ ወኢይለብዉ ከመ ኢይነስሑ ወኢይሣሀሎሙ ወኢይትኀደግ ሎሙ ኀጢአቶሙ። 13ወይቤሎሙ ኢተአምሩኑ ዛተ ምሳሌ እፎ እንከ ተአምሩ ኵሎ አምሳለ። 14ዘይዘርዕሰ ቃለ እግዚአብሔር ይዘርዕ። 15ወእሉ እሙንቱ እለ ውስተ ፍኖት ኀበ ተዘርዐ ቃል ወእምከመ ሰምዑ ቃለ ይመጽእ ሰይጣን ሶቤሃ ወይነሥእ እምልቦሙ ቃለ ዘተዘርዐ። 16ወእሉ ካዕበ እሙንቱ ዘውስተ ኰኵሕ ተዘርዑ እለ ይሰምዑ ቃለ ወይትዌከፍዎ ሶቤሃ በፍሥሓ። 17ወአልቦሙ ሥርው ለጊዜሃ ዳእሙ እሙንቱ ወእምከመሰ ኮነ ምንዳቤ ወስደት በእንተዝ ቃል የዐልዉ ሶቤሃ። 18ወእሉ እሙንቱ እለ ውስተ ሦክ ተዘርዑ እለ ይሰምዕዎ ለቃል። 19#10፥23፤ 1ጢሞ. 6፥17። ወኅሊና ዝንቱ ዓለም ወፍትወተ ብዕል ወባዕድኒ ኵሉ ፍትወት ይበውኡ ወየኀንቅዎ ለቃል ወኢይፈሪ። 20ወእሉ እሙንቱ እለ ውስተ ምድር ሠናይት ተዘርዑ እለ ይሰምዑ ቃለ ወይትዌከፍዎ ወይፈርዩ አሐዱ በሠላሳ ወአሐዱ በስሳ ወአሐዱ በምእት። 21#ማቴ. 5፥15፤ ሉቃ. 8፥16-18። ወይቤሎሙ ቦኑ ዘያኀትዉ ማኅቶተ ወያመጽእዋ ከመ ያንብርዋ ታሕተ ከፈር አው ታሕተ ዐራት አኮኑ ከመ ያንብርዋ ዲበ ተቅዋማ። 22#ማቴ. 10፥26፤ ሉቃ. 12፥2። ወአልቦ ኅቡእ ዘይትከበት ወአልቦ ክዱን ዘኢይትከሠት። 23ዘቦ ዕዝን ሰሚዐ ለይስማዕ። 24#ማቴ. 7፥2። ወይቤሎሙ ለብዉ ዘትሰምዑ በውእቱ መስፈርት ዘሰፈርክሙ ይሰፍሩ ለክሙ ወይዌስኩክሙ። 25#ማቴ. 13፥12፤ ሉቃ. 8፥18፤ 19፥26። እስመ ለዘቦ ይሁብዎ ወይዌስክዎ ወለዘሰ አልቦ እለሂ ቦ የሀይድዎ።

በእንተ ዘርዕ ወማእረር

26ወይቤሎሙ ከመዝ ይእቲ መንግሥተ ሰማያት ከመ ብእሲ ዘዘርዐ ሠናየ ዘርዐ ውስተ ገራህቱ። 27#ያዕ. 5፥7። ወነዊሞ ይትነሣእ መዓልተ ወሌሊተ ወይዋሕዮ ወዘርዑ ይፈሪ ወይልህቅ ወውእቱሰ የአምር። 28ወባሕቱ ትሁብ ምድር ፍሬሃ ቀዳማዌ ሣዕረ ወእምዝ ሰብለ ወእምሰብሉ ይመልእ ፍጹመ ሰዊተ። 29ወሶበ ፈጸመ ፈርዮተ ሶቤሃ ይፌኑ ማዕጸደ እስመ በጽሐ ማእረር።

በእንተ ኅጠተ ሰናፔ

30 # ማቴ. 13፥31-34፤ ሉቃ. 13፥18-19። ወይቤ በምንት አስተማስላ ለመንግሥተ እግዚአብሔር ወምንተ ትመስል። 31ከመ ኅጠተ ሰናፔ እንተ ተዘርዐት ውስተ ምድር ወትንእስ እምኵሉ አዝርዕት ዘውስተ ምድር። 32ወእምከመ ዘርዕዋ ትበቍል ወተዐቢ እምኵሎን አሕማላት ወትገብር አዕጹቀ ዐበይተ እስከ ይክሉ አዕዋፈ ሰማይ አጽልሎ ታሕተ አዕጹቂሃ። 33ወበዘ ከመዝ አምሳል ተናገሮሙ ቃሎ በአምጣነ ይክሉ ሰሚዐ። 34ወዘእንበለ ምሳሌሰ ኢተናገሮሙ ወበባሕቲቶሙ ይፌክር ለአርዳኢሁ ኵሎ። 35#ማቴ. 8፥18-23፤ ሉቃ. 8፥22-25። ወይእተ አሚረ መስዮ ይቤሎሙ ለአርዳኢሁ ንዕዱ ማዕዶተ። 36ወኀደጎሙ ለሕዝብ ወነሥእዎ በሐመር ወቦ ካልኣትኒ አሕማር ምስሌሆሙ። 37ወመጽአ ዐቢይ ነፋሰ ዐውሎ ወይሰወጥ ማይ እሞገድ ውስተ ሐመር እስከ መልአ ማይ ውስተ ሐመር። 38ወውእቱሰ መንገለ ከዋላ ሐመር ተተርኢሶ ኖመ ወአንቅህዎ ወይቤልዎ ሊቅ ኢያኀዝነከኑ እንዘ ንመውት።

ዘከመ ገሠጻ ለባሕር

39ወተንሥአ ወገሠጾሙ ለነፋሳት ወይቤላ ለባሕር ተፈፀሚ ወአርምሚ ወኀደገ ነፋስ ወኮነ ዛኅን ዐቢይ። 40ወይቤሎሙ ምንትኑ ያፈርሀክሙ ኦ ድኩማን ከመ ዝኑ አልብክሙ ሃይማኖት። 41ወፈርሁ ዐቢየ ፍርሀተ ወተባሀሉ በበይናቲሆሙ መኑ እንጋ ውእቱ ዝንቱ ዘይትኤዘዙ ሎቱ ባሕርኒ ወነፋሳትኒ።

Currently Selected:

ወንጌል ዘማርቆስ 4: ሐኪግ

Highlight

Copy