ወንጌል ዘማርቆስ 3

ምዕራፍ 3

ዘከመ ፈወሶ ለዘየብሰት እዴሁ

1 # ማቴ. 12፥9-16፤ ሉቃ. 6፥6-11። ወቦአ ካዕበ ምኵራበ በሰንበት ወሀሎ ህየ ብእሲ ዘየብሰት እዴሁ። 2ወይትዐቀብዎ ለእመ ይፌውሶ በሰንበት ከመ ያስተዋድይዎ። 3ወይቤሎ ለውእቱ ብእሲ ዘፅውስት እዴሁ ተንሥእ ወቁም ማእከለ። 4ወይቤሎሙ ይከውንኑ በሰንበት ገቢረ ሠናይ አው ገቢረ እኩይ አሕይዎ ነፍስኑ፥ ወሚመ ቀቲል ወአርመሙ። 5ወነጸሮሙ እግዚእ ኢየሱስ እንዘ ይትመዐዕ ወይቴክዝ በእንተ ዑረተ ልቦሙ ወይቤሎ ለውእቱ ብእሲ ስፋሕ እዴከ ወሰፍሐ እዴሁ ወሐይወት ወኮነት ከመ ካልእታ#ቦ ዘኢይጽሕፍ «ወኮነት ከመ ካልእታ» ። 6#ማቴ. 12፥14። ወወፂኦሙ ፈሪሳውያን ምስለ ሰብአ ሄሮድስ ተማከሩ ከመ ይቅትልዎ።

በእንተ ካልኣን ተአምራት

7 # ማቴ. 4፥25። ወተግኅሠ እግዚእ ኢየሱስ ምስለ አርዳኢሁ መንገለ ባሕር ወተለውዎ ብዙኃን ጥቀ እምገሊላ ወእምይሁዳ። 8ወእምኢየሩሳሌም ወእምኤዶምያስ ወእማዕዶተ ዮርዳኖስ ወእምጢሮስ ወእምሲዶና ወብዙኃን ጥቀ መጽኡ ኀቤሁ ሰሚዖሙ ኵሎ ዘገብረ። 9ወይቤሎሙ ለአርዳኢሁ ያጽንሑ ሎቱ ሐመረ ከመ ኢይትጋፍዕዎ ሰብእ። 10እስመ ለብዙኃን አሕየዎሙ ወኮኑ ይትጋፍዕዎ እስከ ይወድቁ ዲቤሁ ወያስተበቍዕዎ ከመ ይግሥሥዎ ኵሎሙ ሕሙማን። 11#ማቴ. 8፥29፤ ሉቃ. 4፥41። ወእለሂ እኁዛነ አጋንንት ርኩሳን እምከመ ርእይዎ ይሰግዱ ሎቱ ወይጸርሑ እንዘ ይብሉ አንተ ውእቱ ወልደ እግዚአብሔር ። 12#1፥34። ወብዙኀ ይጌሥጾሙ ከመ ገሃደ ኢይረስይዎ።

በእንተ ኅርየቶሙ ለሐዋርያት

13 # ማቴ. 10፥1-4፤ ሉቃ. 6፥13። ወዐርገ ደብረ ወጸውዐ እለ ፈቀደ ወሖሩ ኀቤሁ። 14ወኀረየ ዐሠርተ ወክልኤተ ወሰመዮሙ ሐዋርያተ ወረሰዮሙ ከመ የሀልዉ ምስሌሁ ወይፈንዎሙ ይስብኩ። 15ወአብሖሙ ያውፅኡ አጋንንተ ወይፈውሱ ድዉያነ። 16ወሰመዮሙ በበ አስማቲሆሙ ወሰመዮ ለስምዖን ጴጥሮስ። 17ወለያዕቆብ ወልደ ዘብዴዎስ ወለዮሐንስ እኍሁ ሰመዮሙ ቦአኔርጌስ ደቂቀ ነጐድጓድ ብሂል። 18ወእንድርያስ ወፊልጶስ ወበርተሎሜዎስ ወማቴዎስ ወቶማስ ወያዕቆብ ወልደ እልፍዮስ ወታዴዎስ ወስምዖን ቀነናዊ። 19ወይሁዳ አስቆሮታዊ ዘአግብኦ። 20ወበዊኦ ቤተ መጽኡ ካዕበ አሕዛብ ብዙኃን እስከ ኢያበውሕዎ ይብላዕ እክለ።

በእንተ ዘይቤልዎ በብዔል ዜቡል ያወፅእ አጋንንተ

21ወሰሚዖሙ አዝማዲሁ መጽኡ የአኀዝዎ እስመ ስሕወ ልቡ ይቤልዎሙ። 22#ኢሳ. 49፥24-25፤ ማቴ. 12፥24-32፤ ሉቃ. 11፥15-22። ወጸሐፍትኒ እለ ወረዱ እምኢየሩሳሌም ይቤሉ ብዔል ዜቡል አኀዞ ወበመልአኮሙ ለአጋንንት ያወፅኦሙ ለአጋንንት። 23ወጸውዖሙ እግዚእ ኢየሱስ ወመሰለ ሎሙ ወይቤሎሙ እፎ ይክል ሰይጣን ለሰይጣን አውፅኦቶ። 24ወመንግሥትኒ ዘበበይናቲሃ ትትናፈቅ ኢትቀውም ይእቲ መንግሥት። 25ወእመኒ ቤት ተናፈቀት በበይናቲሃ ኢትቀውም ይእቲ ቤት። 26ወሰይጣንሂ ለእመ ተንሥአ በበይናቲሁ ወተናፈቀ ኢይቀውም አላ ማኅለቅተ ይረክብ። 27ወአልቦ ዘይክል በዊአ ቤተ ኀያል ወበርብሮተ ንዋዩ ለእመ ኢቀደመ አሲሮቶ ለኀያል ወእምዝ ይበረብር ቤቶ። 28አማን እብለክሙ ኵሉ ኀጢአት ወፅርፈት ይትኀደግ ለዕጓለ እመሕያው። 29ወዘሰ ፀረፈ ዲበ መንፈስ ቅዱስ ኢይትኀደግ ሎቱ ለዓለም ወይትኴነን በደይን ለዝሉፉ። 30እስመ ይቤሉ ጋኔን ርኩስ አኀዞ። 31#ማቴ. 12፥46-50፤ ሉቃ. 8፥19-22። ወመጽኡ እሙ ወአኀዊሁ ወቆሙ አፍኣ ወለአኩ ኀቤሁ ይጸውዕዎ። 32ወይነብሩ ሰብእ ብዙኃን ምስሌሁ ወይቤልዎ ነዮሙ እምከኒ ወአኀዊከኒ አፍኣ ይቀውሙ ወየኀሥሡከ። 33ወአውሥአ ወይቤሎሙ መኑ ይእቲ እምየ ወእለ መኑ እሙንቱ አኀውየ። 34ወነጸሮሙ ለእለ ይነብሩ ዐውዶ ወይቤ ነዮሙ እምየኒ ወአኀውየኒ። 35እስመ ኵሉ ዘይገብር ፈቃዶ ለእግዚአብሔር ውእቱ እኍየኒ ወእኅትየኒ ወእምየኒ።

Currently Selected:

ወንጌል ዘማርቆስ 3: ሐኪግ

Highlight

Copy