መልእክተ ጴጥሮስ 2 2

ምዕራፍ 2

በእንተ ሐሳውያነ ነቢያት

1 # ማቴ. 24፥11፤ 1ጢሞ. 4፥1። ወቦ ባሕቱ ሐሳውያነ ነቢያት ማእከለ ሕዝብ ከመ እለ ሀለዉ ማእከሌክሙ ወውስቴትክሙ እለ ሐሰተ ይሜህሩ ወእለ ካሕደ ያበውኡ ለሕርትምና ወይክሕድዎ ለእግዚኦሙ ዘተሣየጦሙ በደሙ ወያመጽእዎ ላዕሌሆሙ ፍጡነ ለሙስና ወለተሠርዎ። 2#2ጢሞ. 4፥3-4። ወብዙኃን ሰብእ ይተልውዎሙ ለእሉ በእንተ ፍትወተ ዝሙቶሙ ወይፀርፉ ላዕለ ፍኖተ ጽድቅ። 3#ማቴ. 10፥32-33፤ 25፥46፤ ማር. 9፥44-49። ወይትካሐዱ በቃል ዘለሊሆሙ ፈጠሩ ወቦቱ የሐውሩ ወደይኖሙሰ እምፍጥረተ ዓለም ዘኢተዐርፍ ወሕርምትናሆሙ እንተ ኢትዴቅስ። 4#ይሁዳ 6። ወእግዚአብሔርሰ ለመላእክቲሁ ጥቀ አቢሶሙ ኢመሐኮሙ አላ ወደዮሙ ውስተ ጻዕረ ደይን ዘርሱን ወመጠዎሙ ይትኰነኑ ወይንበሩ ውስተ ጻዕረ ደይን። 5#3፥6፤ ዘፍ. 6፥17-22፤ 8፥18፤ ዕብ. 11፥7፤ ዘፍ. 19፥24። ወለዓለምሰ ቀደምት ኢመሐኮሙ አላ አትረፈ ሰማኒተ ነፍሰ ምስለ ኖኅ ዘዐቀባ ለጽድቅ ከመ ይኩን ዜናዌ በጽድቅ ወለባዕዳንሰ ሰብእ ረሲዓን ፈነወ አይኀ ላዕሌሆሙ። 6ወለአህጉረ ሰዶምኒ ወገሞራ አውዐዮን ወገፍትዖን ወከመዝ ኰነኖሙ ወአርኣያ ረሰዮሙ ለእለ በደኃሪ መዋዕል ለኃጥኣን። 7ወለጻድቅሰ ሎጥ ዘይትገፋዕ እምእለ ይኤብሱ በምግባረ ዝሙቶሙ አድኀኖ። 8#መዝ. 118፥158። ወእንዘ ይሬኢ ወይሰምዕ ጻድቅ ወኅዱር ምስሌሆሙ ወዕለተ እምዕለት ያጼዕርዋ ለነፍሱ ጻድቅት በእከየ ምግባሮሙ። 9#1ቆሮ. 10፥14፤ ራእ. 3፥10፤ ዘፍ. 19፥1-16። ናሁኬ አእመርነ ከመ እግዚአብሔር ይክል አድኅኖቶሙ እምነ መንሱት ለጻድቃን ወለኃጥኣንሰ ዕለተ ደይን ትጸንሖሙ ለተጽዕሮ። 10ወፈድፋደሰ ለእለ ይተልውዋ ድኅሬሃ ለፍትወቶሙ ወያጌምንዎ ለሥጋሆሙ ወያስተሐቅርዎ ለፈጣሪሆሙ ኅቡላን ወዝሉፋን እለ ኢይደነግፁ ከመ ይፅርፉ ላዕለ ስብሐቲሁ። 11ዘውእቱ ኀበ መላእክት እለ ልዑላን እሙንቱ እምኔሆሙ በኀይል ወበጽንዕ ወኢይክሉ ተዐግሦ ከመ ያብጽሑ ላዕሌሆሙ ደይነ ፅርፈቶሙ። 12#ኤር. 12፥3፤ ይሁዳ 10። ውእቶሙኬ ከመ እንስሳ ዘአልቦ ቃል ዘይትወለድ ለሙስና ወለተሠርዎ እስመ ይፀርፉ ላዕለ ዘኢየአምሩ ለሕርትምናሆሙ ወሎሙ በሙስናሆሙ ዐስበ ዐመፃ። 13ወአስተሐወዝዋ ለተደልዎ ስታየ ዕለቶሙ ወይበልዑ እንዘ ሕብቁቃን ወርኩሳን እለ ኢይጸግቡ ወይትጓሐለዉ በፍቅሮሙ ወይትሜክሑ ለቢጾሙ ከመ ዘሠናይ ምግባሮሙ። 14ወምሉእ ውስተ አዕይንቲሆሙ ዝሙት ወኀጢአት እንተ አልባቲ ዘይገሀግሃ ወያደነግፁ ነፍሰ ሰብእ እለ ስጡሕ ልቦሙ ወትዕግልት ምግባሮሙ ወየኀድጉ መርገመ ለውሉዶሙ። 15#ዘኍ. 12፥7፤ ራእ. 2፥14። ወስሕትዋ ለፍኖተ ጽድቅ ወተለውዋ ለፍኖተ በለዓም ወልደ ባሶር ዘአፍቀራ ለዐስበ ዐመፃ። 16#ዘኍ. 22፥28። ወተዛለፎ ለበለዓም በኀጢአቱ ዘኢይነብብ አድግ በቃለ ዕጓለ እመሕያው ተናገረ ወከልኦ ለነቢይ እበዲሁ። 17እሉ እሙንቱ ዐዘቅት ንጽፍት ወጊሜ ዘነፋስ ይዘርዎ እለ ለደይነ ጽልመት ዘለዓለም የዐቅብዎሙ። 18እስመ ዐበይተ ጌጋይ ነበቡ ወያደነግፁ ነፍሰ ሰብእ በእንተ ፍትወተ ዝሙቶሙ ዘሥጋሆሙ ሰብእ እለ ኅዳጠ አምሰጡ ወገብኡ ውስተ ጌጋይ። 19#ዮሐ. 8፥34። እለ ሕገ ግዕዛን ተምህሩ ወለሊሆሙኒ ቅኑያን ለሕርትምና እስመ ኵሉ ለዘተአዘዘ ውእቱ ይትቀነይ። 20#ማቴ. 12፥34። እስመ ጐዩ እምኀጢአቱ ለዝንቱ ዓለም በአእምሮቱ ለእግዚእነ ወመድኀኒነ ኢየሱስ ክርስቶስ ወገብኡ ዳግመ ወተፀፍሩ ወተቀንዩ ሎቱ ወይከውኖሙ ደኃሪ ጌጋዮሙ እምነ ቀዲሙ ዘየአክዮሙ። 21#ሉቃ. 12፥47-48። እምኀየሶሙ ሶበ ኢያእመርዋ ለፍኖተ ጽድቅ እምያእምርዋ ወይግብኡ ድኅሬሆሙ እምእንተ ተውህበት ሎሙ ትእዛዝ ቅድስት። 22ወበጽሐቶሙ አምሳል እንተ መሰሉ በጽድቅ እንተ ይቤ ከልብ ገብአ ዲበ ቅያኡ ወሐራውያኒ ተኀፂባ ገብአት ዲበ ጸብር።

Currently Selected:

መልእክተ ጴጥሮስ 2 2: ሐኪግ

Highlight

Copy